Zezi i ankor Zerizalenm pour Lafet bann Latant (oubyen Payot) e i ansenny bann laverite enportan. Serten Zwif ki la pandan sa lafet ti’n fek dir li: “Nou bann desandans Abraam e zanmen nou’n lesklav personn.” Zezi i reponn: “Mon konnen zot desandans Abraam. Me zot pe rod touy mwan parski zot pa aksepte mon parol. Mon koz lo bann keksoz ki mon’n vwar ler mon ti avek mon Papa, me zot zot fer sa ki zot in tande avek zot papa.”​—Zan 8:33, 37, 38.

Sa ki Zezi i dir i senp: I napa menm Papa avek zot. Bann Zwif pa konpran sa ki Zezi pe dir alor zot repet menm zafer: “Abraam i nou papa.” (Zan 8:39; Izai 41:8) Zot desandans Abraam alor zot krwar ki zot annan menm lafwa avek Abraam, zanmi Bondye.

Par kont, larepons Zezi i sirprann zot. I dir: “Si zot ti zanfan Abraam, zot ti pou azir parey Abraam.” An realite, en garson i imit son papa. Zezi i osi dir: “Me la zot pe rod touy mwan akoz mon’n dir zot laverite ki mon’n aprann avek Bondye, Abraam pa ti fer sa li.” Apre Zezi i dir en parol ki paret drol: “Zot pe azir parey zot papa.”​—Zan 8:39-41.

Me kantmenm sa, bann Zwif pa konpran lo lekel Zezi pe koze. Zot dir: “Nou pa bann zanfan ilezitim, nou annan en sel Papa, Bondye.” Me eski Bondye i vreman zot Papa? Zezi i dir: “Si Bondye ti zot Papa, zot ti pou kontan mwan parski mon sorti kot Bondye e mon la. Mon pa’n vin lo mwan menm, me Bondye ki’n anvoy mwan.” Zezi i demann en kestyon e i reponn li menm: “Akoz zot pa konpran sa ki mon pe dir? Parski zot pa oule aksepte mon parol.”​—Zan 8:41-43.

Zezi in esey fer zot konpran sa ki pou arive si zot rezet li. Me la i dir zot fran: “Zot sorti kot zot papa Dyab e zot anvi fer lavolonte zot papa.” Ki mannyer zot papa i ete? Zezi i dir klerman: “I ti vin en mertriye ler i ti konmans koz manti. I ti kit laverite.” Zezi i osi dir: “Sa enn ki sorti kot Bondye i ekout parol Bondye. Sanmenm rezon zot pa ekoute, akoz zot pa sorti kot Bondye.”​—Zan 8:44, 47.

Bann Zwif i ankoler ki Zezi in kondann zot e zot reponn: “Eski pa nou annan rezon ler nou dir, ‘Ou en Samariten e ou posede par demon’?” Ler zot apel Zezi “en Samariten,” sa i montre ki zot mepriz li. Me Zezi i inyor zot lensilt e i dir: “Mon pa posede par demon, me mon onor mon Papa e zot zot dezonor mwan.” Nou vwar ki sa i en keksoz serye ler Zezi i fer sa promes: “Mon dir zot laverite, si en dimoun i obei mon parol, i pa pou zanmen mor.” I pa pe dir ki bann zapot ek lezot ki swiv li pa pou zanmen mor. Par kont, zot pa pou zanmen ganny “dezyenm lanmor,” setadir destriksyon eternel kot napa okenn lespwar pour ganny resisite.​—Zan 8:48-51; Revelasyon 21:8.

Bann Zwif pa pe konpran ki Zezi pe koz dan en fason senbolik, alor zot dir: “La nou asire ki ou posede par en demon. Abraam in mor, bann profet osi, me ou ou dir, ‘Si en dimoun i obei mon parol, i pa pou zanmen mor.’ Ou pa pli gran ki nou papa Abraam ki’n mor, non? . . . Ki ou krwar ou ete?”​—Zan 8:52, 53.

I evidan ki Zezi pe montre ki i Mesi. Me olye reponn zot kestyon konsernan son lidantite direkteman, i dir: “Si mon glorifye mon lekor, mon laglwar pa nanryen. Mon Papa ki glorifye mwan, sa enn ki zot dir i zot Bondye. Pourtan zot pa konn li, me mwan mon konn li. Si mon dir mon pa konn li, mon pou vin parey zot, mon pou en manter.”​—Zan 8:54, 55.

 Aprezan Zezi i koz lo legzanp zot zanset: “Zot papa Abraam ti telman anvi vwar sa letan kot mon ti pou vini e i ti rezoui ler i ti pe reflesir lo la.” Abraam ti krwar dan promes Bondye e i ti pe esper Mesi vini. Bann Zwif pa oule krwar li e zot dir: “Ou pa ni menm annan 50 an e ou pe dir ou’n vwar Abraam?” Zezi i reponn: “Vreman mon dir zot laverite, mon ti deza la avan Abraam ti vin an egzistans.” Zezi pe koz lo son lavi dan lesyel konman en lanz avan ki i ti vin lo later konman en imen.​—Zan 8:56-58.

Bann Zwif i ankoler ki Zezi in dir ki i ti viv avan Abraam e zot anmas ros pour saboul li. Me Zezi i kit sa landrwa san ganny okenn dimal.