Ler Zezi i tande ki bann Farizyen ek bann siporter parti Erod i anvi touy li, li ek son bann disip i kit sa landrwa e al ver Lanmer Galile. En kantite dimoun i vin kot li sorti partou kote. I annan ki sorti Galile, lavil Tir ek Sidon lo lakot, les Larivyer Zourden, Zerizalenm ek Idime dan sid. Zezi i geri en kantite dimoun. I telman annan en kantite dimoun ki bann malad i bezwen pouse pour ariv kot Zezi. Zot pa esper Zezi tous zot, me zot anvoy lanmen pour tous li zot menm.​—Mark 3:9, 10.

I telman annan en kantite dimoun ki Zezi i demann son bann disip pour met pare en kannot an ka lafoul i pous li e i bezwen dekile avek lans. Sa pou osi fer ki i kapab ansenny zot ler i dan kannot oubyen zot kapab al en lot bor lo lakot pour ed plis dimoun.

Matye, son disip i ekri ki bann aktivite Zezi i akonpli “sa ki ti’n ganny dir atraver profet Izai.” (Matye 12:17) Ki profesi Zezi pe akonpli?

“Gete! Mon serviter ki mon’n swazir, sa enn ki mon kontan e ki mon’n aprouve! Mon pou donn li mon lespri sen e i pou fer tou nasyon konnen kisisa vre lazistis. I pa pou dispit ni kriye e personn pa pou tann son lavwa dan gran semen. I pa pou kraz en zon ki’n kase e i pa pou tenny en lanmes ki pros pour tennyen ziska ki i fer lazistis ranport laviktwar. Vreman, bann nasyon pou met zot lespwar dan son non.”​—Matye 12:18-21; Izai 42:1-4.

Byensir, Zezi i sa serviter ki Bondye i kontan e aprouve. Zezi i montre klerman kisisa vre lazistis, en keksoz ki difisil pour dimoun konpran akoz bann fo tradisyon relizye. Lefet ki bann Farizyen i aplik Lalwa Bondye dan zot prop fason, zot pa pou ni menm ed en dimoun ki malad zour Saba! Pour montre kisisa lazistis Bondye e osi ki i’n ganny lespri sen, Zezi i ed bann dimoun rezet bann tradisyon enzis ki en fardo pour zot. I pour sa rezon ki bann sef relizye i oule touy li. Pa sa i terib!

Ki savedir “i pa pou dispit ni kriye e personn pa pou tann son lavwa dan gran semen”? Ler Zezi i geri bann dimoun, i pa permet zot oubyen bann demon pour “fer dimoun konnen lekel li.” (Mark 3:12) I pa anvi ki bann dimoun i aprann konn li atraver bann lanons ki ganny fer an piblik oubyen bann rimer ki dimoun i rakonte.

 Deplis, Zezi i anons sa mesaz rekonfortan avek bann ki parey en zon (sa i en plant) ki’n kase dan en sans senbolik. Zot parey en lanmes lalanp ki pros pour tennyen. Zezi pa kraz sa zon ki’n kase oubyen tenny sa lanmes lalanp ki ankor annan en pti lafimen. O kontrer, i tret bann ki annan limilite avek tandres ek lanmour pour ankouraz zot. Definitivman, Zezi i sa enn dan ki bann nasyon i kapab met zot lespwar!