Pa bokou letan apre ki Zezi in koz konsernan pardon kot lakour Simon sa Farizyen, i konmans son dezyenm kanpanny predikasyon Galile. Sa i dezyenm lannen dan son minister e i pa pe vwayaz li tousel. Sa 12 zapot i avek li ensi ki serten madanm ki Zezi ti’n “sas demon dan zot e geri zot maladi.” (Lik 8:2) Parmi zot i annan Mari Magdalenn, Sizann ek Zann, madanm en zofisye Lerwa Erod Antipas.

Anmezir ki plis dimoun i tann koz lo Zezi, i annan plis diskisyon ek largiman konsernan son bann aktivite. Sa i evidan ler Zezi i geri en zonm posede par demon ki osi aveg e kozpa. La aprezan, sa zonm i nepli anba kontrol demon e i kapab vwar e koze. Bann dimoun i enpresyonnen ler zot vwar sa e zot dir: “Sa, pa Garson David sa?”​—Matye 12:23.

Sa lafoul ki’n rasanble kot sa lakaz kot Zezi pe reste i sitan gran ki bann disip pa ni menm kapab pran en repa. Me pa tou dimoun ki krwar ki Zezi i “Garson David,” sa Mesi ki’n ganny promet. Serten profeser lalwa ek Farizyen in sorti Zerizalenm pour vin vwar li. Me zot pa’n vin pour aprann avek Zezi ouswa siport li. Zot pe dir bann dimoun: “I posede par Belzebib e se par pouvwar sef demon” ki i fer sa bann mirak. (Mark 3:22) Ler fanmir Zezi i tann konsernan tou sa ki pe pase, zot esey tyonbo li. Pour ki rezon?

Sa letan, bann frer Zezi pa krwar ki i Garson Bondye. (Zan 7:5) Sa Zezi ki tou dimoun pe koz lo la pa parey sa Zezi ki zot ti konnen ler zot ti pe grandi Nazaret. Alor zot mazinen ki i annan en problenm mantal. Zot dir: “I’n perdi latet.”​—Mark 3:21.

 Me eski sa i leka? Zezi fek geri en zonm ki ti annan demon e la aprezan i osi kapab vwar e koze. Personn pa kapab dir ki sa pa vre. Alor bann profeser lalwa ek bann Farizyen i fer en fo lakizasyon lo Zezi konmkwa i pe anbet dimoun. Zot dir: “Sa zonm i sas demon avek pouvwar Belzebib, sef demon.”​—Matye 12:24.

Zezi i konnen ki bann profeser lalwa ek bann Farizyen pe mazinen alor i fer resorti sa pwen: “Si i annan divizyon dan en rwayonm, i pou ganny detrir e si i annan divizyon dan en lavil oubyen lakour i pa pou reisi. Dan menm fason, si Satan i sas Satan, i annan divizyon dan li menm, alor ki mannyer son rwayonm pou kapab reisi?”​—Matye 12:25, 26.

Sa rezonnman i lozik, pa i vre? Bann Farizyen i konnen ki serten Zwif i sas bann demon. (Akt 19:13) Alor Zezi i demande: “De plis, si mwan mon sas demon par pouvwar Belzebib, par pouvwar lekel zot bann dimoun i sas demon?” Andotmo, sa lakizasyon kont Zezi i devret aplik pour zot osi. Apre, pour ed zot rezonnen, Zezi i dir: “Me si i par pouvwar Bondye ki mon sas demon, zot pa’n realize ki Rwayonm Bondye in arive.”​—Matye 12:27, 28.

Pour montre ki i annan pouvwar lo Satan akoz i sas demon, Zezi i donn en legzanp: “Ki mannyer en dimoun i kapab kas lakaz en zonm for e pran son bann keksoz? I pou bezwen anmar sa zonm for avan e apre ki i pou kapab vol tou keksoz dan son lakaz. Sa ki pa dan mon kote i kont mwan, sa ki pa ed mwan pour fer dimoun vin kot mwan i fer zot ale.” (Matye 12:29, 30) I kler ki bann profeser lalwa ek Farizyen i kont Zezi, alor zot montre ki zot pe travay pour Satan. Zezi i Garson Bondye ki pe fer lavolonte Zeova e zot zot pe anpes dimoun swiv li.

Zezi i averti sa bann opozan ki pe travay pour Satan: “Bann imen pou ganny pardonnen zot pese, nenport pese zot komet e nenport move parol ki zot dir. Me sa ki koz an mal kont lespri sen pa pou zanmen ganny pardonnen me i koupab pour en pese eternel.” (Mark 3:28, 29) Zis mazinen ki sa i vedir pour bann ki pe akiz Zezi pour fer sa bann mirak avek led Satan olye lespri sen!