En lot zour Saba, Zezi i vizit en sinagog, tre probab Galile. Laba i vwar en zonm ki son lanmen i paralize. (Lik 6:6) Bann profeser lalwa ek bann Farizyen pe vey Zezi byen. Akoz? Nou konpran zot vre lentansyon ler zot demann sa kestyon: “Eski i kont lalwa pour geri en dimoun zour Saba?”​—Matye 12:10.

Bann sef relizye Zwif i krwar ki en dimoun i kapab ganny geri zour Saba selman si son lavi i an danze. Par egzanp, dapre zot, i kont lalwa pour remet lezo en dimoun dan son plas oubyen met en bann lo lipye en dimoun ki’n foul son lipye zour Saba akoz sa bann keksoz pa pou touy sa dimoun. I kler alor ki bann profeser lalwa ek bann Farizyen pa pe kestyonn Zezi akoz zot vreman enterese avek byennet sa zonm, me zot pe sey rod en rezon pour kondann Zezi.

Par kont, Zezi i konn zot bann move rezonnman. I realize ki zot in adopte en pwennvi tro strik konsernan ki kalite aksyon ki kas lalwa Saba. (Egzod 20:8-10) Zot in kritik Zezi pour bann bon keksoz ki i’n fer zour Saba. Aprezan Zezi pe al montre zot ki zot rezonnman pa bon e ki i pa dapre Lekritir. I dir sa zonm ki son lanmen i paralize: “Leve e vin la dan milye.”​—Mark 3:3.

Apre Zezi i get bann profeser lalwa ek Farizyen e dir: “Si enn antre zot i annan zis en mouton e i tonm dan en trou zour Saba, pa zot ti pou tir li?” (Matye 12:11) En mouton i en bon pti sonm larzan, alor zot pa pou kit li dan en trou ziska lannmen akoz antretan i kapab mor e zot pou perdi larzan. An plis, Lekritir i dir ki en dimoun drwat i pran swen avek son zannimo.​—Proverb 12:10.

Zezi i fer en konparezon ki fer sans ler i dir: “Pa en zonm i annan bokou plis valer ki en mouton! Alor, i pa kont lalwa pour fer en bon keksoz zour Saba.” (Matye 12:12) Pour sa rezon, Zezi pa pe kas lalwa Saba si i geri sa zonm. Bann sef relizye pa kapab dir nanryen pour kontredir sa rezonnman ki sitan lozik e ki demontre konpasyon pour lezot. Alor zot zis reste trankil.

Zezi i get zot tou, byen mekontan e tris akoz zot move rezonnman. Apre i dir sa zonm: “Redi ou lanmen.” (Matye 12:13) Ler sa zonm i fer sa, son lanmen i revin byen. Sa zonm i vreman kontan, me ki mannyer bann ki ti pe sey met Zezi dan pyez i santi?

Olye kontan ki sa zonm in ganny geri, deswit bann Farizyen i ale e zwenn ansanm “avek bann siporter parti Erod pour fer konplo pour touy” Zezi. (Mark 3:6) Bann Sadiseen i en group relizye, me aparaman serten Sadiseen i dan sa parti politik. Normalman, bann Sadiseen ek bann Farizyen pa tro byen avek kanmarad me aprezan zot tonm dakor akoz zot tou zot lennmi Zezi.