Fason ki dimoun i azir anver sa ki Zezi i dir e fer i depan lo zot kondisyon leker. Nou vwar sa ler nou get sa ki arive dan en lakaz Galile. En Farizyen ki apel Simon i envit Zezi pour vin pran en repa kot li, petet pour li aprann en pti pe plis lo sa enn ki pe fer tou sa bann mirak. Kekfwa, Zezi i aksepte sa lenvitasyon parey i’n deza fer avek bann kolekter taks ek bann ki fer pese akoz sa i donn li en loportinite pour prese.

Par kont, Zezi pa ganny menm latansyon ki bann envite i normalman gannyen. Dan bann semen Palestin, i annan en ta lapousyer e bann dimoun i abitye met sandalet, alor zot lipye i so e sal. Sanmenm, zot abitye lav lipye en envite avek delo fre. Me zot pa fer sa pour Zezi. Zot pa ni anbras li ler i arive parey i labitid pour bann Zwif. En lot koutim ki zot annan se pour vid en pe delwil lo latet sa envite pour demontre labonte ek lospitalite. Sa osi zot pa fer avek Zezi. I evidan ki Zezi pa’n ganny byen akeyir!

Tou dimoun pe asiz atab e zot konmans manze. Anmezir ki zot manze en madanm ki pa’n ganny envite i antre trankilman. Sa madanm i “renonmen dan sa lavil pour son move lavi.” (Lik 7:37) I paret ki sa madanm pe viv en lavi imoral, petet konman en prostitye. I posib ki i’n tann bann lansennyman Zezi, enkli sa lenvitasyon: “Vin kot mwan, zot tou ki pe rente e fatige e mon pou redonn zot lafors.” (Matye 11:28, 29) I paret ki parol ek aksyon Zezi in tous li e la aprezan i pe rod li.

I vin par deryer Zezi kot latab e i azenou kot son lipye. Son larm i koul lo lipye Zezi e i eswiy li avek son seve. I anbras son lipye avek tandres e vid delwil parfimen ki i’n anmennen lo son lipye. Simon i gete ki pe arive e i pa dakor. I dir dan li menm: “Si sa zonm ti vreman en profet, i ti pou konnen lekel sa madanm ki pe tous li, ki kalite dimoun i ete e ki i annan en move lavi.”​—Lik 7:39.

Zezi i konnen ki Simon pe mazinen alor i dir li: “Simon, mon annan en keksoz pour dir ou.” Simon i reponn: “Ale, Ansenyan, dir mwan!” Zezi i dir: “De zonm ti demann pret larzan avek en serten dimoun, enn ti dwa li 500 denye e lot ti dwa li 50. Vi ki zot ti napa nanryen pour rann li, sa zonm ti pardonn zot tou le de avek tou son leker. Alor, lekel parmi sa de ki pou kontan li plis?” Petet Simon i reponn dan zar i pa tro enterese: “Mon krwar sa enn ki i’n pardonn plis.”​—Lik 7:40-43.

Zezi i dakor. Apre i get sa madanm e an menm tan koz avek Simon: “Eski ou vwar sa madanm? Mon’n antre dan ou lakaz, ou pa’n donn mwan delo pour lav mon lipye. Me sa madanm in lav mon lipye avek son larm e eswiy li avek son seve. Ou pa’n anbras mwan, me sa madanm, depi ki i’n antre i pa’n aret anbras mon lipye avek tandres. Ou pa’n vid delwil lo mon latet, me sa madanm in vid delwil parfimen lo mon lipye.” Zezi i remarke ki menm si sa madanm ti annan en move lavi in montre ki i’n vreman repantir. Alor i dir li: “Akoz sa, mon dir ou, menm si son pese i bokou, i’n ganny pardonnen parski i’n kontan bokou. Me sa enn ki’n ganny pardonnen en ptigin i kontan en ptigin.”​—Lik 7:44-47.

Zezi pa pe soutir imoralite. Me son konpasyon i pous li pour konpran bann dimoun ki’n fer bann pese grav me ki montre ki zot regrete sa ki zot in fer e vin kot Kris pour ganny soulaze. Zis mazin sa gran soulazman ki sa madanm in bezwen santi ler Zezi i dir li: “Ou pese in ganny pardonnen. . . . Ou lafwa in sov ou, al anpe.”​—Lik 7:48, 50.