Petet ou kontan ler ou tann en bon nouvel. Eski ou ti konnen ki Zeova, Kreater nou liniver i annan en bon nouvel pour ou ek bann dimoun ki ou kontan?

Sa bon nouvel i dan Labib, sa liv ki’n ganny ekrir plizyer lannen pase e enspire par Zeova. Dan sa liv, nou pou konsantre lo kat liv Labib ki annan en bon nouvel pour nou tou. Sa bann liv i port non bann dimoun ki Bondye ti servi pour ekri sa bann liv, Matye, Mark, Lik ek Zan.

En kantite dimoun i apel sa bann liv sa kat Levanzil. Tou le kat i rakont levanzil, ki vedir bon nouvel, lo Zezi. Sa bann liv i ed nou aprann ki Zezi i sa mwayen ki Bondye i servi pour sov limanite e ki konman Lerwa dan Rwayonm Bondye dan lesyel, Zezi pou beni tou bann ki demontre lafwa dan li. Sa bann benediksyon pou dire pour touzour.​—Mark 10:17, 30; 13:13.

Petet ou pe mazinen akoz Bondye ti enspir kat zonm pour ekri lo sa ki Zezi ti ansennyen e fer.

Dan sak sa bann resi, nou kapab aprann en kantite lo sa ki Zezi ti dir e fer. Pour ed nou konpran sa, imazin kat zonm pe debout o bor en ansenyan renonmen. Sa zonm ki pe debout devan sa ansenyan i en kolekter taks. Sa enn lo son kote drwat i en dokter. Sa enn ki pe ekout li lo son kote gos i en peser e i en bon zanmi sa ansenyan. Sa katriyenm dimoun ki par deryer pe gete ki pe pase, i pli zenn ki zot tou. Tou le kat zonm i onnet e sakenn i annan en keksoz ki enteres zot an partikilye. Si zot tou zot ekri lo sa ki sa ansenyan i dir e fer, i tre probab ki tou le kat resi pou annan bann diferan detay ek levennman. Ler nou pran tou le kat resi an konsiderasyon e rapel ki sakenn i annan son prop lentere, nou kapab pli byen konpran sa ki sa  ansenyan ti dir e fer. Sa legzanp i ed nou konpran fason ki nou kapab benefisye ler nou annan kat diferan resi ki koz lo lavi nou Gran Ansenyan Zezi.

Annou retourn lo sa menm legzanp. Sa kolekter taks i anvi atir latansyon bann Zwif, alor i aranz bann lansennyman ouswa levennman dan en fason ki fer li pli fasil pour zot konpran. Sa dokter li i met lanfaz lo gerizon bann dimoun malad oubyen ki annan dezabilite, alor i pa enkli serten keksoz ki sa premye zonm in ekri oubyen i pa rakont sa bann levennman dan menm lord ki sa kolekter taks. Sa bon zanmi i konsantre lo santiman ek kalite sa ansenyan. Resi sa zonm pli zenn i pli kourt me pli presi. Be kantmenm sa, resi sak zonm i egzakt. Sa legzanp i montre ki sa kat resi lo lavi Zezi i ed nou pli byen konpran bann aktivite, lansennyman ek personnalite Zezi.

Ou kapab tann dimoun koz lo ‘Levanzil Matye’ oubyen ‘Levanzil Zan.’ Sa pa mal, parski sak levanzil i en “bon nouvel konsernan Zezi Kri.” (Mark 1:1) Par kont, an zeneral i annan zis en levanzil setadir en bon nouvel lo Zezi ki nou kapab lir dan sa kat resi.

En kantite dimoun ki etidye Parol Bondye in konpar bann levennman ek detay ki ganny trouve dan Matye, Mark, Lik ek Zan e met zot dan lord. Anviron lannen 170, en ekriven Siryen ki apel Tatian ti esey fer sa. I ti rekonnet ki sa kat liv i egzakt e enspire par Bondye. I ti fer en liv (Diatessaron) kot i ti rakont lavi ek minister Zezi dan lord ki i’n arive.

Sa liv Zezi i semen, laverite ek lavi i fer parey me i pli egzakt e konplet. Sa i akoz aprezan nou pli byen konpran ki mannyer bann profesi ek legzanp Zezi i ganny akonplir. Sa i ed nou pli byen konpran sa ki i ti dir e fer dan lord ki sa bann levennman ti arive. Bann arkeolog in dekouver serten keksoz ki donn leklersisman lo serten detay e lo fason ki bann ekriven ti vwar keksoz. Byensir, personn pa kapab san poursan asire dan ki lord sa bann levennman ti arive, me sa liv Zezi i semen, laverite ek lavi i rakont sa bann levennman dan en lord ki fer sans e ki lozik.

Anmezir ki ou lir sa liv, esey konsantre lo sa mesaz prensipal ki i annan pour ou ek bann dimoun ki ou kontan. Rapel ki Zezi Kri li menm ti dir zapot Toma: “Mwan menm semen, laverite ek lavi. Napa personn ki ariv kot mon Papa san pas par mwan.”​—Zan 14:6.

Sa liv Zezi i semen, laverite ek lavi pou ed ou apresye ki Zezi i definitivman sa “semen.” Sel fason ki nou kapab priy Zeova se atraver Zezi. Deplis, Zezi i sa semen parski i ed nou pour rekonsilye avek Bondye. (Zan 16:23; Romen 5:8) Alor, sel fason ki nou kapab annan en bon relasyon avek Bondye se atraver Zezi.

Zezi i “laverite.” Zezi ti toultan koz e viv an armoni avek laverite. I ti akonpli en kantite profesi, ki ti vin “‘wi’ atraver” li. (2 Korentyen 1:20; Zan 1:14) Sa bann profesi i ed nou vwar ki i zwe en rol enportan pour ede akonpli plan Bondye.​—Revelasyon 19:10.

Finalman, Zezi Kri i “lavi.” Zezi ti donn son lavi ek disan parfe konman ranson e sa in fer li posib pour nou ganny “sa vre lavi,” setadir, “lavi eternel.” (1 Timote 6:12, 19; Efezyen 1:7; 1 Zan 1:7) A lavenir, i pou osi prouve ki i “lavi” pour plizyer milyon dimoun ki’n mor par resisit zot e donn zot sa lespwar pour viv dan Paradi pour touzour.​—Zan 5:28, 29.

Nou tou nou bezwen konpran e apresye sa rol ki Zezi i zwe pour ede akonpli plan Bondye. Nou swete ki zot pran plezir pour aprann plis lo Zezi ki “semen, laverite ek lavi.”