1-2. (a) Ki Zeova i vwar ler plizyer milyon dimoun i zwenn ansanm pour Repa Senyer? (Vwar portre lo kouvertir.) (b) Ki nou pou diskite dan sa lartik?

IMAZIN sa ki Zeova i vwar ler plizyer milyon dimoun dan lemonn pe zwenn ansanm pour selebre Repa Senyer. I pa get zis sa gran kantite dimoun me i remark sak endividi ki la prezan. Par egzanp, i vwar tou sa bann ki fidelman asiste Memoryal tou le zan. Parmi zot i annan bann dimoun ki asiste Memoryal menm si zot pe fer fas avek persekisyon. Lezot pa asiste renyon regilyerman, me pour zot, Memoryal i vreman enportan alor zot touzour prezan. Zeova i osi vwar sa bann ki vin Memoryal pour premye fwa, petet akoz zot enterese pour konnen kwa ki pase pandan sa renyon.

² Vreman, Zeova i kontan pour vwar sa kantite dimoun ki pe asiste Memoryal. (Lik 22:19) Kantmenm sa, sa ki enportan pour Zeova, i pa lakantite dimoun ki pou vini, me se rezon akoz zot asiste Memoryal ki pli enportan pour li. Dan sa lartik, nou pou reponn en kestyon vreman enportan: Akoz nou pa asiste zis Memoryal tou le zan me osi tou renyon ki Zeova i organize sak semenn pour sa bann ki kontan li?

3-4. (a) Akoz nou asiste renyon? (b) Ki nou prezans dan renyon i dir lo nou? (c) Dapre 1 Korentyen 11:23-26, akoz nou pa devret mank Memoryal?

³ Rezon pli enportan ki nou asiste renyon se akoz i form parti nou ladorasyon. Nou osi asiste renyon akoz nou  pe ganny ansennyen par Zeova. Bann dimoun ki orgeye i krwar ki zot pa bezwen ganny ansennyen. (3 Zan 9) Me nou, nou enpasyan pour ganny ansennyen par Zeova ek son lorganizasyon.​—Iza. 30:20; Zan 6:45.

⁴ Ler nou asiste renyon, sa i montre ki nou annan limilite, ki nou pare e anvi ganny ansennyen. Zour Memoryal lanmor Zezi, nou asiste sa levennman enportan pa zis akoz i en lobligasyon me osi akoz avek limilite, nou obei lord Zezi: “Kontinyen fer sa pour montre ki zot pe mazin mwan.” (Lir 1 Korentyen 11:23-26.) Memoryal i ranforsi nou lespwar pour lavenir e fer nou rapel ki kantite Zeova i kontan nou. Par kont, Zeova i konnen ki nou bezwen lankourazman ek lafors spirityel plis ki en fwa par lannen. Alor i fer provizyon pour nou ganny nou renyon sak semenn e i ankouraz nou pour asiste sa bann renyon. Limilite i pous nou pour obei. Sak semenn, nou pas plizyer erdtan pour prepar e osi asiste sa bann renyon.

5. Akoz dimoun ki annan limilite i aksepte lenvitasyon Zeova?

⁵ Sak lannen, Zeova i envit en kantite dimoun pour ganny ansennyen par li e avek limilite, bokou i aksepte son lenvitasyon. (Iza. 50:4) Zot kontan pour asiste Memoryal e apre zot konmans asiste lezot renyon osi. (Zeka. 8:20-23) Ansanm nou kontan pour ganny ansennyen e gide par Zeova, “[nou] sekour ek [nou] liberater.” (Ps. 40:17) Vreman, kwa ki pli gou oubyen pli enportan ki aksepte en lenvitasyon pour ganny ansennyen par Zeova ek Zezi, son garson ki i kontan en kantite?​—Mat. 17:5; 18:20; 28:20.

6. Ki mannyer limilite ti ed en msye asiste Memoryal?

⁶ Sak lannen, nou fer zefor pour envit plis dimoun posib pour asiste Memoryal lanmor Zezi. En kantite dimoun ki annan limilite in benefisye ler zot in aksepte nou lenvitasyon. Annou egzamin en legzanp. Plizyer lannen pase, en msye ti ganny en lenvitasyon pour Memoryal, me i ti dir sa frer ki ti donn li sa lenvitasyon ki i pa ti pou kapab asiste. Kantmenm sa, zour Memoryal sa frer ti sirprann pour vwar sa msye vin dan Lasal Rwayonm. Sa msye ti sitan enpresyonnen par lakey ki i ti gannyen ki i ti konmans asiste nou bann renyon tou le semenn. Annefe, i ti mank zis trwa renyon pour lannen swivan. Kwa ki ti ed li pour asiste tou lezot renyon? I ti annan ase limilite pour sanz son fason panse. Sa frer ki ti envit li ti dir, “Sa msye i annan bokou limilite.” San dout, Zeova ki ti atir sa msye pour ador Li e aprezan i’n batize.​—1 Pyer 5:5; Zan 6:44.

7. Ki mannyer sa ki nou aprann dan renyon e dan nou lektir Labib i kapab ed nou pour devlop limilite?

⁷ Sa ki nou aprann dan renyon e sa ki nou lir dan Labib i kapab ed nou pour devlop limilite. Dan bann semenn avan Memoryal, nou renyon i souvandfwa konsantre lo legzanp Zezi e limilite ki i ti demontre par donn son lavi konman en ranson. Detrwa zour avan Memoryal, i byen si nou kapab lir bann verse Labib ki koz lo lanmor Zezi ek son rezireksyon. Sa ki nou aprann dan renyon e sa ki nou lir dan Labib i ed nou pour pli byen apresye sa sakrifis ki Zezi in fer pour nou. Nou ganny pouse pour imit son limilite e pour fer lavolonte Zeova, menm ler i difisil pour nou.​—Lik 22:41, 42.

8. Ki mannyer Zezi ti demontre kouraz?

⁸ Nou osi esey imit Zezi par demontre kouraz. Mazin sa kouraz ki Zezi ti demontre avan son lanmor. I ti konn tre byen ki son bann lennmi ti pou imilye li, fwet li e klout li lo poto. (Mat. 20:17-19) Kantmenm sa, i ti pare pour li mor. Ler son letan ti arive, i ti dir son bann zapot ki ti avek li Zetsemane: “Leve, annou ale. Gete! Sa enn ki pou trai mwan in arive.” (Mat. 26:36, 46) Ler bann zonm arme ti vin aret li, i ti avans devan, idantifye son lekor e donn lord bann solda pour les son bann disip ale. (Zan 18:3-8) Zezi ti demontre en kouraz ekstraordiner! Ozordi, bann Kretyen swazir ek lezot mouton i fer zot mye pour imit legzanp Zezi par demontre kouraz. Ki mannyer?

9. (a) Akoz nou bezwen kouraz pour asiste renyon regilyerman? (b) Ki mannyer nou bon legzanp i kapab ankouraz nou bann frer ek ser ki dan prizon akoz zot lafwa?

⁹ Pour asiste renyon regilyerman, nou bezwen demontre kouraz espesyalman ler nou fer fas avek bann leprev. Serten nou bann frer ek ser i asiste renyon menm si zot pe soufer akoz sagrinasyon, dekourazman oubyen problenm lasante. Lezot i demontre kouraz e asiste renyon menm si zot fanmir oubyen gouvernman i opoz zot. Mazin en kou lo ki mannyer nou legzanp i kapab ankouraz nou bann frer ek ser ki dan prizon akoz zot lafwa. (Ebr. 13:3) Ler zot tande ki nou pe servi Zeova malgre leprev, zot ganny ankouraze pour gard zot lafwa, kouraz ek fidelite. Sa ki ti ariv zapot Pol i en pe parey. Ler i ti dan prizon Ronm, i ti kontan ler i ti tande ki son bann frer ti pe servi Bondye fidelman. (Fili. 1:3-5, 12-14) Zis avan oubyen zis apre ki i ti ganny large dan prizon, Pol ti ekri son let pour bann Kretyen Ebre. Dan sa let, i ti ankouraz bann Kretyen pour “kontinyen kontan kanmarad parey bann frer ek ser” e pour pa zanmen aret rasanble ansanm.​—Ebr. 10:24, 25; 13:1.

10-11. (a) Lekel ki nou devret envite pour Memoryal e akoz? (b) Dapre Efezyen 1:7 akoz nou devret envit zot?

¹⁰ Nou demontre kouraz ler nou envit nou fanmir, kanmarad lekol ek nou vwazen Memoryal. Akoz nou envit sa bann dimoun? Nou sitan rekonesan pour sa ki Zeova ek Zezi in fer pour nou ki nou anvi envit lezot pour asiste Memoryal. Nou anvi ki zot aprann ki mannyer zot osi zot kapab benefisye avek “labonte ekstraordiner” Zeova par mwayen sa ranson.​—Lir Efezyen 1:7; Rev. 22:17.

¹¹ Ler nou demontre kouraz par asiste renyon ansanm avek nou bann frer ek ser, nou osi demontre en zoli kalite, enn ki tou le de Bondye ek son Garson i demontre dan en fason remarkab.

12. (a) Ki mannyer nou renyon i ed nou pour kontan Zeova ek Zezi plis ankor? (b) Parey Zezi, ki 2 Korentyen 5:14, 15 i ankouraz nou pour fer?

¹² Nou asiste renyon akoz nou kontan Zeova ek Zezi. Osi sa ki nou aprann dan bann renyon i fer nou lanmour pour Zeova ek son Garson vin pli for. Dan renyon, nou souvan revwar sa ki zot in fer pour nou. (Rom. 5:8) Memoryal i rapel nou ki Zeova ek Zezi i vreman kontan nou tou, menm bann ki pa ankor konpran lenportans sa ranson. Avek bokou lapresyasyon, nou esey imit Zezi par lafason ki nou viv nou lavi sak zour. (Lir 2 Korentyen 5:14, 15.) Deplis, nou leker i motiv nou pour loue Zeova akoz i’n donn nou sa ranson. En fason ki nou kapab loue li, i par reponn avek tou nou leker dan renyon.

13. Ki mannyer nou kapab montre ki kantite nou kontan Zeova ek son Garson? Eksplike.

¹³ Nou kapab montre ki kantite nou kontan Zeova ek son Garson ler nou pare pour fer bann sakrifis pour zot. Souvandfwa, nou fer diferan kalite sakrifis pour nou kapab asiste renyon. Bokou kongregasyon i annan en renyon a lafen en lazournen travay ler laplipar dimoun i fatige. En lot renyon i ganny fer dan wikenn kan lezot dimoun pe repoze. Eski Zeova i vwar kan nou asiste renyon menm si nou fatige? Byensir! Anfet, pli nou fer zefor oubyen sakrifis pour vin renyon, pli Zeova i apresye lanmour ki nou demontre anver li.​—Mark 12:41-44.

14. Ki mannyer Zezi in kit en legzanp par demontre lanmour ekstraordiner?

¹⁴ Zezi in kit en legzanp pour nou swiv par demontre lanmour kot i ti met lentere lezot avan sa ki pour li. I ti pare pour mor pour son bann disip e osi pour viv sak zour dan en fason kot i ti met zot lentere avan sa ki pour li. Par egzanp, i ti zwenn avek son bann disip menm si i ti fatige fizikman oubyen i ti pe soufer emosyonnelman. (Lik 22:39-46) I ti konsantre lo sa ki i ti kapab donn lezot, pa lo sa ki lezot ti kapab donn li. (Mat. 20:28) Si nou vreman kontan Zeova ek nou bann frer ek ser, nou pou fer tou sa ki nou kapab pour asiste Repa Senyer ek tou lezot renyon osi.

15. Lekel ki nou sirtou anvi ede?

 ¹⁵ Nou form parti sa sel lasosyasyon frer ek ser kot i annan vre lanmour e nou kontan pas en kantite letan pour envit bann nouvo pour zwenn ansanm avek nou. Par kont, nou enterese pour ed “sirtou nou bann frer ek ser dan lafwa” ki’n vin inaktif. (Gal. 6:10) Nou montre ki nou kontan zot par ankouraz zot pour asiste renyon, espesyalman Memoryal. Parey Zeova ek Zezi, nou vreman kontan ler bann ki inaktif i retourn kot Zeova, nou Papa lanmour ek Berze.​—Mat. 18:14.

16. (a) Ki mannyer nou kapab ankouraz kanmarad e dan ki fason bann renyon i ed nou? (b) Akoz la i sa letan apropriye pour mazin parol Zezi dan Zan 3:16?

¹⁶ Dan bann semenn ki pe vini, envit plis dimoun posib pour asiste Memoryal Vandredi swar, le 19 Avril 2019. (Vwar sa bwat “ Eski ou pou envit zot?”) Pandan sa lannen ki pe vini, nou anvi fer tou sa ki nou kapab pour ankouraz kanmarad atraver nou legzanp par asiste tou renyon ki Zeova i envit nou. Anmezir ki lafen sa lemonn i aprose, nou byen bezwen asiste nou bann renyon akoz sa pou ed nou pour kontinyen devlop limilite, kouraz ek lanmour. (1 Tesa. 5:8-11) Annou montre Zeova ek son Garson ki nou kontan zot avek tou nou leker, akoz zot in demontre ki zot kontan nou en kantite!​—Lir Zan 3:16.