MERKREDI bomaten, le 24 Zanvye 2018, lafanmir Betel Leta-z-Ini ek Kanada ti kontan pour tann en lanons spesyal: Frer Kenneth Cook, Jr. ti ganny apwente lo Konsey Direkter Temwen Zeova.

Frer Cook ti ne e grandi dan leta Pennsylvania, Leta-z-Ini. I ti aprann laverite avek enn son kanmarad lekol zis avan i ti termin lekol pos-segonder e i ti batiz le 7 Zen 1980. I ti konmans servis a plen tan konman en pionye ordiner le 1 Septanm 1982. Apre ki i ti’n fer pionye pour 2 an, i ti ganny envite pour al servi dan Betel Wallkill, New York, le 12 Oktob 1984.

Pandan 25 an, Frer Cook in fer diferan travay dan lenprimri e dan servis ki pran swen avek lafanmir Betel. I ti marye avek son madanm Jamie an 1996 e i ti travay ansanm avek li dan Betel Wallkill. An Desanm 2009, frer ek ser Cook ti ganny transfer kot Sant Ledikasyon Patterson, New York, kot frer Cook ti ganny demande pour travay dan Departman Korespondans. An Avril 2016, apre ki i ti’n retourn Betel Wallkill, frer ek ser Cook ti ganny transfer Brooklyn, New York. Senk mwan pli tar, zot ti ganny anvoye kot biro prensipal Temwen Zeova, Warwick, New York. An Zanvye 2017, Frer Cook ti ganny apwente pour servi konman en asistan dan komite redaksyon Konsey Direkter.