1-3. (a) Akoz Zeova ti kontan Salomon e ki benediksyon i ti gannyen? (b) Ki kestyon nou pou reponn dan sa lartik?

SALOMON ti vin lerwa Izrael ler i ti ankor en zenn onm. Ler i ti’n fek vin lerwa, Zeova ti aparet avek li dan en rev e dir: “Demann mwan sa ki ou oule.” Salomon ti reponn: “Mwan mon ankor zenn e mon napa leksperyans. . . . Alor, silvouple donn mwan en leker obeisan pour ziz ou pep.” (1 Rwa. 3:5-10, NWT) Salomon ti rekonnet ki i ti bezwen led Zeova, sanmenm i ti demann li “en leker obeisan.” Nou kapab konpran akoz Zeova ti kontan Salomon. (2 Sam. 12:24) Zeova ti telman kontan sa ki sa zenn lerwa ti’n demann li ki i ti donn Salomon “lasazes ek disernman.”​—1 Rwa. 3:12.

² Tan ki Salomon ti reste fidel, i ti ganny en kantite benediksyon. I ti ganny privilez pour konstri en tanp “an loner non Zeova, Bondye Izrael.” (1 Rwa. 8:20, NWT) Salomon ti vin popiler akoz son lasazes ki Bondye ti’n donn li. Osi, bann keksoz ki Bondye ti enspir li pour dir in ganny ekrir dan trwa liv dan Labib. Enn sa bann liv i Proverb.

³ Dan liv Proverb dan Tradiksyon nouvo lemonn an Angle, sa mo “leker” i aparet apepre san fwa. Par egzanp, Proverb 4:23 (NWT) i dir: “Plis ki tou lezot keksoz ki ou devret proteze, protez ou leker.” Dan sa verse, ki “leker” i reprezante? Nou pou reponn sa kestyon dan sa lartik. Nou pou osi egzamin larepons de lezot kestyon: Ki mannyer Satan i esey target oubyen enfliyans nou leker? Ki  nou kapab fer pour protez nou leker? Pour nou reste fidel avek Bondye, nou bezwen konpran larepons sa bann kestyon enportan.

4-5. (a) Ki mannyer Psonm 51:6 i ed nou konpran ki sa mo “leker” i refer avek? (b) Ki mannyer nou lasante i kapab ed nou konpran ki nou bezwen pran swen avek nou spirityalite?

⁴ Dan Proverb 4:23, sa mo “leker” pe refer avek “sa ki en dimoun i vreman ete anndan” oubyen “sa ki en dimoun i ete ki lezot pa vwar.” (Lir Psonm 51:6; vwar not dan NWT.) Andotmo, “leker” pe refer avek nou bann panse, santiman, motivasyon ek dezir. Se sa ki en dimoun i vreman ete anndan, me pa neseserman sa ki lezot i vwar.

⁵ Annou pran legzanp nou lasante. Sa pou ed nou konpran lenportans pour vey byen sa ki nou ete anndan. Premyerman, pour nou reste an bonn sante, nou bezwen annan en bon ladyet e fer legzersis regilyerman. Pareyman, pour nou byen spirityelman, nou bezwen annan en bon ladyet spirityel e fer bann keksoz pour demontre nou lafwa dan Zeova regilyerman. Nou demontre lafwa dan Zeova ler nou aplik sa ki nou aprann e koz lo nou lafwa. (Rom. 10:8-10; Zak 2:26) Dezyenmman, nou kapab paret an bonn sante me anndan nou kapab malad san ki nou realize. Dan menm fason, ler nou get nou routin spirityel, nou kapab krwar ki nou lafwa i for me ki an realite, nou pe les bann move dezir devlop dan nou. (1 Kor. 10:12; Zak 1:14, 15) Pa bliye ki Satan i anvi enfliyans nou avek son fason panse. Ki mannyer i kapab esey fer sa? Ki mannyer nou kapab protez nou lekor?

6. Ki lobzektif Satan e ki mannyer i esey atenn sa lobzektif?

⁶ Parey li, Satan i anvi ki nou rebel e inyor bann standar Zeova. I osi anvi ki nou mazin zis nou prop lekor. Par kont, Satan pa kapab fors nou pour azir oubyen rezonn parey li. Alor, i esey ganny  nou par servi lezot taktik. Par egzanp, nou ganny antoure avek dimoun ki deza anba lenfliyans Satan. (1 Zan 5:19) Satan pou byen kontan si nou pas letan avek sa bann dimoun menm si nou konnen ki move frekantasyon pou “gat” oubyen annan en move lefe lo nou fason panse ek aksyon. (1 Kor. 15:33) Lerwa Salomon ti tonm dan sa kalite pyez. I ti marye avek en kantite madanm payen e avek letan zot ti enfliyans li e dousman dousman zot ti “detourn son leker” avek Zeova.​—1 Rwa. 11:3, vwar not dan NWT.

7. Kwa ankor ki Satan i servi pour esey propaz son fason panse e akoz nou bezwen fer atansyon?

⁷ Satan i servi bann film ek progranm televizyon pour propaz son fason panse. Par egzanp, Satan i konnen ki dimoun i kontan bann zistwar dan bann film oubyen progranm televizyon. Me Satan i servi sa pour fer nou panse, azir e annan menm santiman ki li. Zezi ti rakont bann zistwar pour ansennyen. Par egzanp, i ti rakont legzanp sa bon Samariten ek sa garson perdi ki ti gaspiy son leritaz. (Mat. 13:34; Lik 10:29-37; 15:11-32) Me bann ki anba lenfliyans Satan i kapab osi servi bann zistwar pour sali nou lespri. Nou bezwen annan en pwennvi balanse. Nou kapab detann oubyen menm aprann serten keksoz dan bann film oubyen progranm televizyon san ki sa i annan en move lefe lo nou fason panse. Me nou bezwen fer byen atansyon. Ler nou pe swazir nou divertisman, i byen pour nou demann nou lekor, ‘Eski sa film oubyen progranm televizyon i ansenny mwan ki i normal pour satisfer mon bann move dezir?’ (Gal. 5:19-21; Efe. 2:1-3) Ki ou devret fer si ou remarke ki en progranm televizyon pe promot fason panse Satan? Reste lwen, zis parey ou ti pou reste lwen avek en dimoun ki annan en maladi kontazye.

8. Ki mannyer paran i kapab ed zot zanfan pour protez zot leker?

 ⁸ Paran, zot annan en gran responsabilite pour protez zot zanfan kont lenfliyans Satan. Nou asire ki zot fer tou sa ki zot kapab pour protez zot zanfan kont bann maladi. Zot gard zot lakour prop e zot zet tou keksoz ki kapab fer zot oubyen zot zanfan malad. Pareyman, ou devret protez ou zanfan e vey byen bann film, progranm televizyon, zwe elektronik ek sit Enternet ki ti kapab afekte ou zanfan e propaz fason panse Satan. Zeova in donn ou lotorite pour pran swen avek lasante spirityel ou zanfan. (Prov. 1:8; Efe. 6:1, 4) Alor, pa bezwen per pour etabli bann lareg kot lakour ki baze lo bann standar Labib. Dir ou zanfan sa ki zot annan drwa gete e sa ki zot pa kapab gete. Ed zot pour konpran akoz ou’n fer sa desizyon. (Mat. 5:37) Anmezir ki ou zanfan i vin pli gran, ed zot pour servi zot abilite pour konpran sa ki byen ek sa ki mal dapre bann standar Zeova. (Ebr. 5:14) Pa bliye, ou zanfan pou aprann atraver sa ki ou dir me i pou osi aprann en kantite atraver sa ki ou fer.​—Det. 6:6, 7; Rom. 2:21.

9. Ki Satan i promote e akoz i danzere?

⁹ Satan i esey atak nou leker par fer nou met nou konfyans dan lasazes imen olye dan fason panse Zeova. (Kol. 2:8) Annou egzamin zis en keksoz ki Satan i promote. Satan i anvi fer nou krwar ki i vreman enportan pour vin ris dan lavi. Dimoun ki mazin koumsa i kapab vin ris oubyen i kapab pa leka. Me ki swa zot vin ris oubyen non, sa i danzere. Akoz? Akoz bann dimoun koumsa i kapab telman konsantre lo fer larzan ki zot negliz zot lasante, zot fanmir e menm zot lanmitye avek Bondye zis pour vin ris. (1 Tim. 6:10) Nou devret rekonesan anver nou Papa Zeova akoz i saz e i ed nou pour annan en pwennvi balanse lo larzan.​—Ekle. 7:12; Lik 12:15.

10-11. (a) Ki nou devret fer pour protez nou lekor? (b) Ki bann gardyen ti fer dan letan lontan e ki mannyer nou konsyans i kapab azir parey en gardyen?

¹⁰ Si nou anvi protez nou leker, nou bezwen kapab idantifye bann danze e protez nou lekor deswit. Dan Proverb 4:23, sa mo ki’n ganny tradwir “protez” i fer nou mazin en dimoun ki vey en landrwa. Dan letan Lerwa Salomon, bann gardyen ti debout lo miray lavil e zot ti bezwen averti lezot si zot ti vwar en danze. Sa legzanp i ed nou konpran ki nou devret fer pour anpes Satan enfliyans nou fason panse.

¹¹ Dan letan lontan, bann gardyen ki ti vey lo miray ti travay pros avek bann gardyen ki ti veye kot baro. (2 Sam. 18:24-26) Zot ti travay ansanm pour protez lavil, par fer sir ki baro lavil ti fermen si i ti annan en lennmi dan zanmirant. (Nee. 7:1-3) Nou konsyans * ki’n ganny antrennen par Labib i kapab azir parey en gardyen e averti nou ler Satan i esey atak nou panse, santiman, motivasyon oubyen dezir. Sak fwa ki nou konsyans i averti nou, nou bezwen ekout li e fer tou sa ki nou kapab pour ferm baro, andotmo evite tonm dan latrap Satan.

12-13. Ki nou kapab ganny tante pour fer, me ki nou devret fer?

 ¹² Annou egzamin en legzanp ki pou ed nou vwar ki mannyer nou kapab protez nou lekor kont fason panse Satan. Zeova in ansenny nou ki “imoralite seksyel, [ek] tou sort kalite lenpirte . . . pa devret ni menm ganny mansyonnen parmi [nou].” (Efe. 5:3) Me ki nou pou fer si nou bann koleg travay oubyen kanmarad lekol i konmans koz lo bann keksoz imoral? Nou konnen ki nou devret “rezet bann kondwit ki dezonor Bondye ek bann dezir sa lemonn.” (Tit 2:12) Nou gardyen, setadir nou konsyans i kapab averti nou. (Rom. 2:15) Me eski nou pou ekout li? Petet, nou kapab ganny tante pour ekout nou bann koleg oubyen pour get bann portre ki zot pe montre. Me la i sa letan pour ferm bann baro lavil, setadir, sanz konversasyon oubyen kit sa landrwa.

¹³ I demann kouraz pour reziste presyon lezot pour ki nou pa mazin oubyen fer bann move keksoz. Nou kapab asire ki Zeova i vwar nou zefor e i pou donn nou lafors ek lasazes ki nou bezwen pour rezet bann panse Satan. (2 Kron. 16:9; Iza. 40:29; Zak 1:5) Me ki nou kapab kontinyen fer pour protez nou leker?

14-15. (a) Akoz nou bezwen ouver nou leker e ki mannyer nou fer sa? (b) Ki mannyer Proverb 4:20-22 i ed nou pour pli byen benefisye avek nou lektir Labib? (Vwar osi bwat “ Ki mannyer pour medite?”)

¹⁴ Pour protez nou leker, nou pa devret zis rezet bann move lenfliyans me nou devret pare pour les nou ganny enfliyanse par sa ki bon. Reflesi ankor en fwa lo legzanp sa lavil ki ganny proteze par en miray. En gardyen ti ferm baro pour anpes bann lennmi antre dan lavil, me normalman i ti ouver baro pour les manze ek lezot provizyon antre. Si baro pa ti zanmen ganny ouver, zabitan sa lavil ti pou mor lafen. Pareyman, nou bezwen ouver nou leker pour les panse Zeova enfliyans nou regilyerman.

¹⁵ Nou pou trouv bann panse Zeova dan Labib, alor sak fwa ki nou lir li, nou les bann panse Zeova enfliyans nou fason panse, santiman ek aksyon. Ki mannyer nou kapab pli byen benefisye avek nou lektir Labib? Lapriyer i vreman enportan. En ser i dir: “Avan mon lir Labib, mon priy Zeova e demann li pour ed mwan ‘vwar klerman bann keksoz merveye’ dan son Parol.” (Ps. 119:18, NWT) I enportan osi pour medit oubyen reflesi lo sa ki nou lir. Ler nou priye, lir e medite, Parol Bondye pou ariv ‘dan fon nou leker’ e nou pou aprann kontan bann panse Zeova.​—Lir Proverb 4:20-22; Ps. 119:97.

16. Ki mannyer en kantite dimoun in benefisye avek Televizyon JW?

¹⁶ Nou osi les bann panse Bondye enfliyans nou ler nou get bann progranm ki disponib lo Televizyon JW. En koup i dir: “Bann progranm tou le mwan ki nou gannyen i vreman larepons nou lapriyer! Zot in vreman donn nou lafors ek lankourazman ler nou sagren oubyen santi nou tousel. Osi kot lakour, nou toultan ekout bann sanson orizinal. Nou ekout zot ler nou pe kwi manze, netwaye oubyen menm ler nou pe bwar dite.” Sa bann progranm i ed nou pour protez nou leker. Zot ansenny nou pour mazin parey Zeova e pour reziste presyon ki lezot i met lo nou pour aksepte fason panse Satan.

17-18. (a) Parey 1 Lerwa 8:6 i montre, ki arive ler nou met an pratik sa ki nou aprann avek Zeova? (b) Ki nou kapab aprann avek legzanp Lerwa Ezekya? (c) Parey lapriyer David ki dan Psonm 139:23, 24, ki nou kapab priy lo la?

 ¹⁷ Sak fwa nou vwar byenfe ki nou gannyen ler nou fer sa ki byen, nou lafwa i vin pli for. (Zak 1:2, 3) Nou kontan akoz nou’n fer Zeova fyer pour konsider nou konman enn son zanfan e osi akoz nou dezir pour fer li plezir i vin pli for ankor. (Prov. 27:11) Sak leprev ki nou rankontre i vin en loportinite pour montre ki nou pe servi nou Papa, Zeova avek tou nou leker. (Ps. 119:113) Nou montre ki nou kontan Zeova avek tou nou leker e nou determinen pour obei son bann komannman e fer son lavolonte.​—Lir 1 Lerwa 8:61.

¹⁸ Eski nou pou fer fot? Wi, akoz nou enparfe. Si i arive ki nou fer en fot, mazin legzanp Lerwa Ezekya. I ti fer bann fot. Me i ti repantir e i ti kontinyen servi Zeova “avek en leker konplet.” (Iza. 38:3-6, NWT; 2 Kron. 29:1, 2; 32:25, 26) Alor, annou pa les Satan enfliyans nou avek son fason panse. Priye pour ki nou devlop “en leker obeisan.” (1 Rwa. 3:9, NWT; lir Psonm 139:23, 24.) Nou pou reste fidel avek Zeova si plis ki tou lezot keksoz, nou protez nou leker.