1-2. (a) Ki lefe Izai 41:10 ti annan lo Yoshiko? (b) Lekel ankor ki kapab benefisye avek sa mesaz dan Izai 41:10?

EN SER fidel ki apel Yoshiko ti ganny en move nouvel. Son dokter ti dir li ki i annan zis detrwa mwan pour li viv. Ki mannyer i ti reazir? Yoshiko ti rapel enn son verse Labib prefere, Izai 41:10. (Lir.) Apre sa, dan en fason kalm, i ti dir son dokter ki i pa ti per akoz Zeova ti pe tyonbo son lanmen. * Sa mesaz rekonfortan ki ganny trouve dan sa verse ti ed nou ser met tou son konfyans dan Zeova. Sa menm verse i kapab ed nou pour nou pa tro enkyet ler nou pe fer fas avek bann gro leprev. Pour konpran ki mannyer nou kapab fer sa, premyerman annou egzaminen akoz Bondye ti donn Izai sa mesaz.

² O konmansman, Zeova ti demann Izai pour ekri sa parol pour rekonfort bann Zwif ki ti pou ganny anmennen an egzil Babilonn. Par kont, Zeova ti osi fer sa menm mesaz ganny mete dan Labib pour ki i benefisye pa zis bann Zwif ki ti an egzil me osi tou son bann serviter. (Iza. 40:8; Rom. 15:4) Ozordi, nou pe viv dan “letan vreman difisil” e plis ki zanmen oparavan nou bezwen sa lankourazman ki dan liv Izai.​—2 Tim. 3:1.

3. (a) Ki lasirans ki ganny trouve dan nou teks pour lannen 2019, ki dan Izai 41:10? (b) Akoz nou bezwen sa bann lasirans?

³ Dan sa lartik, nou pou vwar trwa lasirans oubyen promes Zeova dan Izai 41:10 ki pou ranforsi nou lafwa:  (1) Zeova pou avek nou, (2) i nou Bondye e (3) i pou ed nou. Nou bezwen sa bann lasirans * akoz parey Yoshiko, nou tou nou rankontre difikilte dan nou lavi. Nou anba en kantite presyon akoz sa bann move keksoz dan sa lemonn. Serten parmi nou bann frer ek ser pe ganny persekite par bann gouvernman pwisan. Annou egzamin sa trwa lasirans.

4. (a) Lekel sa premye lasirans ki nou pou egzaminen? (Vwar not.) (b) Ki mannyer Zeova i eksprim son santiman anver nou? (c) Ki mannyer sa ki Zeova i dir i fer ou santi?

⁴ Premyerman, Zeova i asir nou avek sa parol: “Pa bezwen per, akoz mon avek ou.” * Zeova i montre ki i avek nou akoz i vreman enterese avek nou e i kontan nou en kantite. Remarke ki mannyer Zeova i eksprim son santiman anver nou. Zeova i dir: “Ou annan gran valer pour mwan. Ou presye pour mwan e mon kontan ou.” (Iza. 43:4, nou ki’n met an italik.) Napa nanryen dan liniver ki kapab fer Zeova aret kontan son bann serviter. I pou toultan fidel avek nou. (Iza. 54:10) Vi ki i kontan nou e i nou zanmi, sa i donn nou en kantite kouraz. I pou protez nou zis parey i ti protez son zanmi Abram (Abraam). Zeova ti dir li: “Abram! Pa bezwen per. Mwan ou boukliye dan danze.”​—Zen. 15:1.

5-6. (a) Ki mannyer nou konnen ki Zeova i anvi ed nou ler nou fer fas avek leprev? (b) Ki nou aprann atraver legzanp Yoshiko?

⁵ Nou konnen ki Zeova i anvi ed nou dan leprev akoz i promet son pep: “Si ou travers lanmer, mon pou avek ou; si ou travers bann gran larivyer, ou pa pou ganny trennen. Si ou mars atraver dife, ou pa pou ganny brile, e bann laflanm pa pou fer ou dimal.” (Iza. 43:2, nou ki’n met an italik.) Ki sa parol i vedir?

⁶ Zeova pa promet pour tir bann problenm ki fer nou lavi difisil, me i pa pou les nou noye dan “larivyer” setadir dan nou problenm. Osi, Zeova pa pou les  “dife” bril nou, setadir i pa pou les bann leprev anpes nou servi li. I promet ki i pou avek nou e i pou ed nou “travers” sa bann leprev. Ki Zeova pou fer? I pou ed nou kontrol nou lafreyer pour ki nou reste fidel anver li menm si nou fer fas avek lanmor. (Iza. 41:13) Sa ti le ka pour Yoshiko ki nou ti koz lo la pli boner. Son fiy i dir: “Nou ti enpresyonnen avek lafason ki Manman ti kalm. Nou ti vwar ki Zeova ti vreman donn li lape lespri. Ziska zour son lanmor, Manman ti koz avek bann ners ek pasyan lo Zeova ek son bann promes.” Ki nou aprann atraver legzanp Yoshiko? Ler nou met nou konfyans dan sa promes Zeova, “Mon pou avek ou,” nou osi nou pou annan kouraz e nou pou annan lafors pour andir leprev.

7-8. (a) Lekel sa dezyenm lasirans ki nou pou egzaminen e ki i vedir? (b) Akoz Zeova ti dir bann Zwif: “Pa bezwen enkyet”? (c) Ki Izai 46:3, 4 i dir ki ti ed pep Zeova pour pa enkyet?

⁷ Remark sa dezyenm lasirans ki Izai ti ekri: “Pa bezwen enkyet, akoz mwan menm ou Bondye.” Ki sa mo “enkyet” i vedir dan sa verse? Dan langaz orizinal, sa mo “enkyet” i donn sa nide pour “get deryer akoz ou per pangar en keksoz oubyen en dimoun i fer ou dimal” ouswa “pour get otour ou parey en dimoun ki dan danze.”

⁸ Akoz Zeova ti demann bann Zwif ki ti pou al an egzil Babilonn pour “pa enkyet”? Akoz i ti konnen ki bann zabitan sa pei ti pou per. Kwa ki ti pou fer zot per? Babilonn ti pou ganny atake par bann larme Med ek Pers, ver lafen sa 70 lannen ki bann Zwif ti an egzil. Zeova ti pou servi sa larme pour delivre son pep Babilonn. (Iza. 41:2-4) Ler bann Babilonnyen ek lezot nasyon ti realize ki zot lennmi ti pros pour atak zot, zot ti ankouraz kanmarad par dir: “Pran kouraz.” Zot ti osi fer plis zidol an krwayan ki sa bann fo bondye ti pou protez zot. (Iza. 41:5-7) Antretan, Zeova ti ed bann Zwif ki ti an egzil pour pa enkyet par dir: “Me ou, Izrael, mon serviter, [ki diferan avek sa bann nasyon ki ador zidol] . . . Pa bezwen enkyet, akoz mwan menm ou Bondye.” (Iza. 41:8-10) Remarke ki Zeova i dir: ‘Mwan menm ou Bondye.’ Atraver sa parol, Zeova ti rasir son bann serviter fidel ki i pa ti’n oubliy zot. I ti dir zot: “Mwan menm ki pou soutenir ou e delivre ou.” San dout, sa parol rekonfortan ti ankouraz bann Zwif ki ti an egzil.​—Lir Izai 46:3, 4.

9-10. Akoz nou napa rezon pour nou enkyet? Donn en legzanp.

⁹ Ozordi, plis ki zanmen oparavan, dimoun i enkyet akoz kondisyon lemonn pe vin pli pir. Byensir, nou osi nou ganny afekte par sa bann menm problenm. Me napa rezon pour nou per. Zeova i dir nou: “Mwan menm ou Bondye.” Akoz sa parol i en bon rezon pour nou pa tro enkyet?

¹⁰ Imazin sa sityasyon: Jim ek Ben i dan en avyon ki pe pas dan gro divan. Anmezir ki sa divan i sekwe sa avyon, sa pilot i fer lanons: “Met zot sentir sekirite. Nou pou pas dan gro divan pour en pe letan.” Jim i konmans vreman enkyet. Me pilot i azoute: “Pa bezwen enkyet. Kaptenn ki pe koze.” Ler Jim i tann sa, i sekwe son latet e dir: “Ki kalite lasirans sa?” Me i remarke ki Ben pa per. Jim i demann li: “Akoz ou pa per?” Ben i fer en  pti sourir e dir: “Akoz mon konn sa pilot tre byen. Mon papa sa! Ma dir ou en keksoz lo li. Mon asire ki ler ou konn li ek leksperyans ki i annan konman en pilot, ou osi ou pa pou per.”

11. Ki nou aprann atraver legzanp Jim ek Ben?

¹¹ Ki nou kapab aprann atraver sa legzanp? Parey Ben, nou osi nou pa bezwen enkyet akoz nou konn Zeova, nou Papa ki dan lesyel, vreman byen. Nou konnen ki i pou ed nou andir bann difikilte ki nou pou rankontre pandan bann dernyen zour sa move lemonn. (Iza. 35:4) Vi ki nou annan konfyans dan Zeova, nou pa enkyet menm si lezot dimoun i vreman per. (Iza. 30:15) Parey Ben, nou osi nou koz avek lezot lo rezon akoz nou annan konfyans dan Bondye. Koumsa, zot osi zot kapab asire ki nenport ki difikilte ki zot rankontre, Zeova pou soutenir zot.

12. (a) Ki sa trwazyenm lasirans ki nou pou egzaminen? (b) Lefet ki Labib i koz lo “lebra” Zeova, ki sa i fer nou rapel?

¹² Annou egzamin sa trwazyenm lasirans ki Izai ti koz lo la: “Mon pou rann ou for, mon pou ed ou.” Izai ti’n fini dir ki mannyer Zeova ti pou donn son pep lafors oubyen kouraz par dir: “[Zeova] Bondye pe vini avek pwisans. Son lebra i donn li tou dominasyon.” (Iza. 40:10, nou ki’n met an italik.) Dan Labib, souvandfwa, sa mo “lebra” i vedir lafors. Alor, lefet ki Labib i dir ki son “lebra i donn li tou dominasyon” oubyen ki “son lebra pou dirize,” sa i fer nou rapel ki Zeova i en Lerwa pwisan. I ti servi son pwisans pour siport e defann son bann serviter dan lepase. I ankor pe kontinyen donn lankourazman ek proteksyon bann  ki annan konfyans dan li.​—Det. 1:30, 31; Iza. 43:10, not dan NWT.

13. (a) Dan ki sityasyon nou kapab asire ki Zeova i kapab ed nou? (b) Ki promes ki donn nou kouraz e fer nou konfidan?

¹³ Zeova i gard son promes sirtou ler nou lennmi i persekit nou. I ti dir: “Mon pou rann ou for.” Dan serten pei ozordi, nou bann lennmi pe fer tou sa ki zot kapab pour enterdi predikasyon ek nou lorganizasyon. Kantmenm sa, nou pa tro enkyet akoz sa bann kalite persekisyon. Sa ki Zeova in promet nou i donn nou en kantite kouraz e i fer nou pli konfidan. I promet nou: “Tou zarm ki’n ganny fabrike kont ou pa pou servi [dan] nanryen.” (Iza. 54:17) Sa parol i fer nou mazin trwa keksoz enportan.

14. Akoz nou pa devret sirprann ki bann lennmi Bondye i atak nou?

¹⁴ Premyerman, konman disip Kris, nou ekspekte ki dimoun pou ay nou. (Mat. 10:22) Zezi ti predir ki son bann disip ti pou ganny persekite en kantite pandan bann dernyen zour. (Mat. 24:9; Zan 15:20) Dezyenmman, profesi Izai i averti nou ki nou bann lennmi pa pou zis ay nou me zot pou servi diferan zarm kont nou. Sa bann zarm i enkli anbet dimoun lo sa ki Temwen Zeova i fer, koz manti lo nou e persekit nou dan en fason vyolan. (Mat. 5:11) Zeova pa pou anpes nou bann lennmi servi sa bann zarm pour lager kont nou. (Efe. 6:12; Rev. 12:17) Me nou pa devret per. Akoz?

15-16. (a) Ki sa trwazyenm keksoz ki nou bezwen rapel e ki mannyer Izai 25:4, 5 i montre sa? (b) Ki Izai 41:11, 12 i dir konsernan sa bann ki lager kont nou?

¹⁵ Annou egzamin sa trwazyenm keksoz ki nou bezwen rapel. Zeova ti dir ki “tou zarm” ki pou ganny servi kont nou ‘pa pou servi dan nanryen.’ Zis parey en miray i protez nou kont en gro tanpet, Zeova osi i protez nou kont “lakoler bann lennmi kriyel.” (Lir Izai 25:4, 5.)  Nou bann lennmi pa pou zanmen reisi anpes nou servi Zeova.​—Iza. 65:17.

¹⁶ Zeova i osi ranforsi nou konfyans dan li par donn nou bann detay konsernan sa ki pou arive avek sa bann ki “fase” oubyen ki dan en gran lakoler avek nou. (Lir Izai 41:11, 12.) Menm si nou bann lennmi i fer tou sa ki zot kapab pour anpes nou servi Zeova e ki zot latak i vreman entans, zot tou zot pou pas parey, zot “pou ganny detrir e zot pou vin en nanryen ditou.”

17-18. (a) Ki mannyer lir Labib i kapab ed ou devlop plis konfyans dan Zeova? Donn en legzanp. (b) Ler nou reflesi lo teks pour lannen 2019, ki mannyer sa i kapab ed nou?

¹⁷ Nou devlop plis konfyans dan Zeova ler nou aprann konn li pli byen. Sa sel fason ki nou kapab vreman konn Bondye, i par lir Labib atantivman e apre medit lo sa ki nou lir. I annan bann resi dan Labib ki montre ki mannyer Zeova ti protez son pep dan lepase. Sa bann resi i asir nou ki Zeova pou pran swen avek nou la konmela.

¹⁸ Annou vwar en legzanp dan liv Izai ki montre ki mannyer Zeova i protez nou. I konpar Zeova avek en berze e son bann serviter avek bann pti mouton. Izai i dir sa lo Zeova: “I pou rasanble bann mouton dan son lebra e anmenn zot lo son leker.” (Iza. 40:11) Ler nou santi ki Zeova in anmay nou dan son lebra for, nou pa per akoz nou santi son proteksyon e nou pa enkyet. Pour ki nou pa tro enkyet menm si nou rankontre leprev, lesklav fidel e pridan in swazir Izai 41:10 konman nou teks pour lannen 2019, “Pa bezwen enkyet, akoz mwan menm ou Bondye.” Medit lo sa parol rekonfortan pou ankouraz ou ler ou fer fas avek leprev a lavenir.