1. Ki tou bann serviter Bondye i oule fer e akoz? (Vwar portre lo kouvertir.)

ZEZI KRI ti donn son bann disip lord pour “al kot bann dimoun dan tou nasyon e fer zot vin [son] disip.” (Mat. 28:19) Tou bann serviter fidel Bondye i oule aprann ki mannyer zot kapab “akonpli byen” sa minister ki zot in ganny konfye. (2 Tim. 4:5) Apre tou, i vo lapenn fer sa travay parski i pli enportan e pli irzan ki okenn lezot travay. Par kont, i kapab difisil pour pas sa kantite letan ki nou ti a kontan dan predikasyon.

2. Kwa ki kapab fer li difisil pour nou akonpli nou minister?

² I annan lezot aktivite enportan ki pran nou letan ek lenerzi. Kekfwa nou bezwen travay plizyer erdtan par zour pour fer ase larzan pour ganny bann keksoz ki nou ek nou fanmir i bezwen. I osi kapab difisil pour nou desarz tou bann responsabilite fanmir ki nou annan oubyen i kapab ki nou malad, ganny depresyon ouswa nou pe konmans ganny bann douler akoz lavyeyes. Si nou pe fer fas avek sa bann difikilte, ki mannyer nou kapab akonpli byen nou minister?

3. Ki nou aprann dan Matye 13:23?

³ Nou pa devret dekouraze si nou sirkonstans pa permet nou pas bokou letan dan servis Zeova. Zezi ti konnen ki pa tou dimoun ki ti pou kapab raport menm kantite fri, setadir fer menm kantite pour anons sa mesaz Rwayonm. (Lir Matye 13:23.) Zeova i vreman apresye tou sa ki nou fer dan son servis osi lontan ki nou fer nou mye. (Ebr. 6:10-12) De lot kote, nou kapab santi ki nou sirkonstans ti pou permet nou fer plis. Dan sa lartik, nou pou vwar ki mannyer nou kapab fer nou minister vin nou priyorite, ki mannyer  nou kapab gard nou lavi senp e ki mannyer nou kapab amelyor nou abilite pour prese e ansennyen. Me avan sa, annou vwar ki savedir akonpli byen nou minister.

4. Ki savedir akonpli byen nou minister?

⁴ Ler nou akonpli byen nou minister, sa i vedir ki nou anons e ansenny sa bon nouvel o maksimonm posib. Me sa pa pe refer avek zis lakantite letan ki nou kapab prese. Rezon ki nou prese i osi enportan pour Zeova. Vi ki nou kontan Zeova ek nou prosen, nou akonpli nou minister Kretyen avek tou nou leker. * (Mark 12:30, 31; Kol. 3:23) Servi Zeova avek tou nou leker i vedir ki nou servi nou lafors ek lenerzi dapre nou abilite pour fer nou mye dan son servis. Ler nou konpran ki i en privilez pour fer sa travay predikasyon, nou fer tou sa ki nou kapab pour koz avek o tan dimoun posib lo sa bon nouvel.

5-6. Servi en legzanp pour montre ki mannyer en dimoun ki napa bokou letan i kapab fer predikasyon vin son priyorite.

⁵ Meton en zenn onm i kontan zwe gitar. I kontan zwe lanmizik nenport ki moman ki i gannyen. Pli tar, i ganny anploye pour zwe gitar dan en pti restoran pandan wikenn. Me selman, i pa fer ase larzan pour kouver son bann depans. Alor i travay konman en cashier dan en laboutik, Lendi ziska Vandredi. Menm si i pas laplipar son letan dan sa laboutik, son leker i dan son lanmizik. I anvi amelyor son abilite e vin en mizisyen. Antretan, i rod tou loportinite pour zwe lanmizik, menm pour bann pti peryod letan.

⁶ Pareyman, petet ou pa kapab pas sa kantite letan ki ou ti a voudre dan predikasyon. Pourtan, ou kontan predikasyon. Ou fer bokou zefor pour amelyor ou abilite pour tous leker dimoun avek sa bon nouvel. Me vi ki ou annan en ta keksoz pour fer, petet ou pe demann ou lekor ki mannyer ou kapab fer predikasyon vin ou priyorite.

7-8. Ki mannyer nou kapab annan menm latitid ki Zezi ti annan anver son minister?

⁷ Zezi ti annan en bon latitid anver son minister e i’n kit en bon legzanp pour nou. Pour li, koz lo Rwayonm Bondye ti sa keksoz pli enportan dan son lavi. (Zan 4:34, 35) I ti mars plizyer santenn kilomet pour anons sa bon nouvel avek otan dimoun posib. I ti servi tou loportinite pour koz avek bann dimoun kot zot lakour ouswa dan bann landrwa piblik. Tou sa ki Zezi ti fer ti annan pour fer avek son minister.

⁸ Nou kapab swiv legzanp Kris par rod bann fason pour koz lo sa bon nouvel nenport ki ler e partou kot nou kapab. Nou pare pour sakrifye nou prop konfor pour nou kapab prese. (Mark 6:31-34; 1 Pyer 2:21) Serten dan kongregasyon i kapab servi konman bann pionye spesyal, pionye ordiner ouswa pionye asistan. Lezot in aprann en lot langaz oubyen zot in al reste dan en lot landrwa kot i annan en bezwen pour plis proklanmater. Par kont, laplipar sa travay predikasyon pe ganny fer par bann proklanmater ki pa kapab servi dan sa bann fason, me ki kantmenm sa pe fer zot mye. Ki swa nou kapab fer en kantite ouswa en ptigin dan predikasyon, Zeova pa zanmen demann nou pour fer plis ki nou kapab. I anvi ki nou tou nou trouv lazwa dan nou servis anmezir ki nou anons “sa bon nouvel glorye ki sa Bondye ere in konfye” nou.​—1 Tim. 1:11; Det. 30:11.

9. (a) Ki mannyer Pol ti fer predikasyon son priyorite menm si i ti bezwen travay? (b) Dapre Akt 28:16, 30, 31, ki latitid Pol ti annan anver son minister?

⁹ Zapot Pol in kit en bon legzanp lo ki mannyer pour fer predikasyon sa keksoz pli enportan dan lavi. Ler i ti dan lavil Korent pandan son dezyenm vwayaz misyonner, i ti napa bokou larzan e i ti bezwen travay. I ti fer bann latant, me i pa ti vwar sa konman son travay pli enportan. I ti fer sa pour siport son lekor dan predikasyon, koumsa i ti kapab anons sa bon nouvel avek bann dimoun Korent “gratwitman,” akoz i pa ti anvi ki zot kouver son bann depans. (2 Kor. 11:7) Menm si Pol ti bezwen travay, son minister ti touzour son priyorite e i ti pres tou le Saba. Ler son sirkonstans ti amelyore, Pol ti kapab konsantre plis lo predikasyon. I “ti konmans pas tou son letan pe anons parol Bondye e rann temwannyaz avek bann Zwif pour prouve ki Zezi i Kris.” (Akt 18:3-5; 2 Kor. 11:9) Pli tar, ler i ti prizonnyen dan son lakaz Ronm pour de-z-an, Pol ti pres avek bann dimoun ki ti vin vizit li e i ti ekri bann let. (Lir Akt 28:16, 30, 31.) Pol ti determinen pour pa les nanryen enterfer avek son minister. I ti ekri: “Vi ki nou annan sa minister . . . , nou pa abandonnen.” (2 Kor. 4:1, not) Parey Pol, menm si nou bezwen travay pour siport nou lekor, nou ankor kapab fer travay Rwayonm sa keksoz pli enportan dan nou lavi.

10-11. Ki mannyer nou kapab akonpli byen nou minister si nou annan problenm lasante?

¹⁰ Si nou pa kapab pres kazankaz menm kantite ki nou ti a kontan akoz laz pe antre oubyen akoz nou annan bann problenm lasante, nou kapab pres dan lezot fason. Bann Kretyen dan premye syek ti pres avek bann dimoun nenport landrwa kot zot ti ete. Zot ti servi sak loportinite ki zot ti annan pour koz lo laverite “avek tou bann ki ti la,” ki swa kazankaz, dan landrwa piblik ouswa enformel. (Akt 17:17; 20:20) Si nou pa kapab mars bokou,  kekfwa nou kapab asiz dan en landrwa kot i annan en ta dimoun e pres avek bann dimoun ki pase. Oubyen nou kapab fer temwannyaz enformel, ekri bann let ouswa fer temwannyaz par telefonn. En kantite proklanmater ki pa kapab pres bokou kazankaz akoz problenm lasante e lezot problenm ankor, i kapab trouv lazwa ler zot pres dan sa bann lezot fason.

¹¹ Malgre bann problenm lasante, ou kapab akonpli byen ou minister. Ankor enn fwa, annou vwar legzanp zapot Pol. I ti dir: “Dan tou sirkonstans, mon annan lafors gras a sa enn ki donn mwan son pwisans.” (Fili. 4:13) Pol ti bezwen pwisans Bondye ler i ti tonm malad pandan enn son bann vwayaz misyonner. I ti eksplik bann frer ek ser dan lavil Galat: “Se akoz mon ti malad ki mon ti ganny loportinite pour anons sa bon nouvel avek zot pour premye fwa.” (Gal. 4:13) Pareyman, ou problenm lasante i kapab donn ou en kantite loportinite pour anons sa bon nouvel avek lezot, parey bann dokter, ners ek lezot dimoun ki ede pran swen avek ou. En kantite sa bann dimoun pe travay ler bann proklanmater i pas kot zot lakour.

12. Ki savedir gard ou lizye “senp”?

¹² Zezi ti dir: “Lizye i lalanp lekor. Alor, si ou lizye i get en sel keksoz, [oubyen “senp,” not] ou lekor antye pou dan lalimyer.” (Mat. 6:22) Ki i ti pe esey dir? Ki nou bezwen konsantre lo en sel lobzektif e pa ganny distrer. Zezi li menm ti fer sa. I ti konsantre lo son minister e i ti ansenny  son bann disip pour kontinyen konsantre lo servi Zeova ek Son Rwayonm. Nou swiv legzanp Zezi ler nou fer sa travay predikasyon sa keksoz pli enportan dan nou lavi e “kontinyen rod Rwayonm ek son ladrwatir premye.”​—Mat. 6:33.

13. Kwa ki kapab ed nou konsantre lo nou minister Kretyen?

¹³ En fason ki nou konsantre lo nou minister, i ler nou senplifye nou lavi pour ki nou pas plis letan pour ed bann dimoun aprann konn e kontan Zeova. * Par egzanp, eski nou kapab aziste nou ler travay pour nou pas plis letan dan predikasyon pandan lasemenn? Eski nou kapab pas mwens letan dan bann aktivite rekreasyonnel ki pran en ta letan?

14. Ki bann azisteman en koup ti fer pour pas plis letan e pli konsantre lo zot predikasyon?

¹⁴ Annou vwar sa ki en ansyen ki apel Elias ek son madanm ti fer. I eksplike: “Nou pa ti kapab konmans fer pionye deswit, me i ti annan bann keksoz ki nou ti kapab fer pour pas plis letan dan predikasyon. Alor nou ti fer bann pti sanzman ki ti permet nou pres plis. Par egzanp, nou ti koup nou bann depans. Nou ti osi realize ki nou ti pe pas tro bokou letan dan bann aktivite rekreasyonnel, alor nou ti redwir lakantite letan ki nou ti pase dan detant. Finalman, nou ti demann nou bann anplwayer pour sanz nou ler travay pour nou kapab annan plis letan pour predikasyon. Tousala ti ede pour nou fer temwannyaz aswar, kondwir plis letid Labib e menm sorti dan predikasyon pandan lasemenn de fwa par mwan. Nou’n ganny bokou lazwa ler nou’n fer sa!”

15-16. Dapre 1 Timote 4:13, 15, ki mannyer nou kapab kontinyen amelyor nou abilite konman bann predikater? (Vwar osi sa bwat “ Bann lobzektif ki pou ed mwan akonpli byen mon minister.”)

¹⁵ En lot fason ki nou kapab akonpli byen nou minister i ler nou amelyor nou abilite pour prese. I annan serten travay kot dimoun i bezwen kontinyen ganny plis formasyon pour ogmant zot konnesans e amelyor zot abilite. Sa i osi leka pour bann predikater Rwayonm. Nou bezwen kontinyen aprann ki mannyer pour devlop nou abilite dan predikasyon.​—Prov. 1:5, NWT; lir 1 Timote 4:13, 15.

¹⁶ Me ki mannyer nou kapab kontinyen progrese dan predikasyon? Nou bezwen ekout byen bann lenstriksyon ki nou gannyen pandan renyon Nou minister ek lavi Kretyen. Sa renyon lasemenn i donn nou en formasyon itil ki ed nou progrese e amelyor nou abilite dan predikasyon. Par egzanp, ler tyermenn i konsey sa etidyan ki’n fer son demonstrasyon, nou kapab aprann bann keksoz ki pou ed nou amelyore dan predikasyon. Laprosenn fwa ki nou anons sa bon nouvel avek en dimoun, nou kapab aplik sa bann keksoz ki nou’n aprann. Nou kapab demann nou sirveyan group predikasyon pour son led ouswa nou kapab travay avek li dan predikasyon. Nou osi kapab travay avek en proklanmater ouswa pionye eksperyanse oubyen avek sirveyan rezyonal. Anmezir ki nou aprann pli byen servi sak zouti ki form parti nou Zouti predikasyon, nou pou pli kontan prese e ansennyen.

17. Ki pou arive ler ou akonpli byen ou minister?

¹⁷ I en gran privilez ki Zeova i permet nou pour “travay ansanm avek” li! (1 Kor. 3:9) Ler ou “verifye sa ki pli enportan” e konsantre lo ou minister Kretyen, ou pou “servi [Zeova] avek lazwa.” (Fili. 1:10; Ps. 100:2) Konman enn bann serviter Bondye, ou kapab asire ki i pou donn ou sa lafors ki ou bezwen pour akonpli ou minister malgre okenn difikilte, problenm lasante ouswa lezot problenm ki ou fer fas avek. (2 Kor. 4:1, 7; 6:4) Ki swa ou sirkonstans i permet ou fer bokou ouswa en ptigin dan predikasyon, ou pou “kontan” ler ou fer li avek tou ou leker. (Gal. 6:4) Ler ou akonpli byen ou minister, ou montre ki ou kontan Zeova ek ou prosen. “Si ou fer sa, ou pou sov ou prop lekor ek sa bann ki ekout ou.”​—1 Tim. 4:16.