1. Dapre Efezyen 6:10-13, ki enn bann fason pli tousan ki Zeova i demontre son lanmour pour nou? Eksplike.

ENN bann fason pli tousan ki Zeova i demontre son lanmour pour nou, i ler i ed nou reziste nou bann lennmi. Konman son bann serviter, nou pli gran lennmi i Satan ek bann demon. Zeova i averti nou konsernan sa bann lennmi e i donn nou sa ki nou bezwen pour reziste zot. (Lir Efezyen 6:10-13.) Ler nou aksepte led Zeova e depan lo li konpletman, nou kapab reisi opoz Dyab. Nou kapab annan menm konfyans ki zapot Pol ti annan. I ti ekri: “Si Bondye i pour nou, lekel ki pou kapab kont nou?”​—Rom. 8:31.

2. Ki nou pou diskite dan sa lartik?

² Konman bann vre Kretyen, nou pa konsantre lo Satan ek bann demon. Nou pli konsantre lo aprann konn Zeova e lo lafason ki nou kapab servi li. (Ps. 25:5) Par kont, nou bezwen konn bann keksoz ki Satan i fer. Akoz? Pour ki nou pa les nou ganny anbete par li. (2 Kor. 2:11) Dan sa lartik, nou pou diskit lo enn bann fason prensipal ki Satan ek bann demon i esey anbet dimoun. Nou pou osi vwar ki mannyer nou kapab reisi reziste zot.

3-4. (a) Kisisa pratik demonyak ouswa grigri? (b) Ki kantite dimoun ki krwar dan bann pratik demonyak?

³ Enn bann fason prensipal ki Satan ek bann demon i esey anbet bann dimoun i atraver bann pratik demonyak oubyen grigri. Bann dimoun ki fer grigri i dir ki zot konn  ouswa ki zot kapab kontrol bann keksoz ki normalman bann imen pa kapab konnen ouswa kontrole. Par egzanp, serten i dir ki zot annan sa abilite pour devinen oubyen predir lavenir ouswa lezot i dir ki zot servi astrolozi pour konnen ki pou arive a lavenir. Lezot i kapab fer krwar ki zot pe koz avek bann dimoun ki’n mor. Serten i fer mazik ouswa bann pratik sorsye e zot kapab esey zet en sor lo en dimoun. *

⁴ Ki kantite dimoun ki krwar ki bann pratik demonyak ouswa grigri i marse? En resers ki ti ganny fer dan 18 pei Lanmerik Latin ek Karaib ti vwar ki en tyer bann dimoun ki ti partisipe ti krwar dan mazik ek bann sorsye e ki preski menm kantite ti krwar ki i posib pour kominik avek bann demon ouswa dimoun mor. En lot resers ti ganny fer dan 18 pei Lafrik. Laba, anviron lanmwatye dimoun ki ti partisipe ti dir ki zot krwar dan bann sorsye. Byensir, nenport landrwa ki nou reste nou bezwen protez nou kont bann pratik demonyak ouswa grigri. Apre tou, Satan pe esey rod fason pour anbet “dimoun lo later antye.”​—Rev. 12:9.

5. Ki mannyer Zeova i santi konsernan bann pratik demonyak?

⁵ Zeova i “Bondye fidel” ouswa Bondye laverite. (Ps. 31:5) Alor ki mannyer i santi konsernan bann pratik demonyak? I ay tousala! Zeova ti dir bann Izraelit: “Personn parmi zot pa devre ofer son garson, oubyen son fiy an sakrifis, ni fer divinasyon, ni predir lavenir, ni pratik mazik, ni fer sorsye, oubyen zet move sor, konsilte move lespri, oubyen medyonm, oubyen konsilte dimoun mor. Annefe, [Zeova] pa kontan sa enn ki fer sa bann keksoz.” (Det. 18:10-12) Bann Kretyen pa anba Lalwa ki Zeova ti donn bann Izraelit. Par kont, nou konnen ki i ankor pa kontan bann pratik demonyak.​—Mal. 3:6.

6. (a) Ki mannyer Satan i servi bann pratik demonyak pour fer ditor dimoun? (b) Dapre Eklezyast 9:5, ki i vreman arive avek en dimoun ler i mor?

⁶ Zeova i averti nou konsernan bann pratik demonyak parski i konnen ki Satan i servi sa pour fer ditor dimoun. Satan i servi bann pratik demonyak pour promot bann mansonz, ki enkli sa mansonz ki bann dimoun mor i ankor vivan kek par. (Lir Eklezyast 9:5.) Satan i osi servi bann pratik demonyak pour fer dimoun per e pour elwanny zot avek Zeova. I anvi ki dimoun ki fer bann pratik demonyak i met konfyans dan bann demon olye Zeova.

7. Ki Zeova i dir nou?

⁷ Parey nou’n vwar pli boner, Zeova i dir nou sa ki nou bezwen konnen koumsa nou kapab evite ganny anbete par Satan ek bann demon. Annou vwar serten keksoz ki nou kapab fer pour lager kont Satan ek bann demon.

8. (a) Ki sa fason prensipal ki nou rezet bann demon? (b) Ki mannyer Psonm 146:4 i devwal bann mansonz ki Satan i propaze lo lanmor?

⁸ Lir e medit lo Parol Bondye. Sa i fason  prensipal ki nou rezet bann mansonz ki bann demon i fannen. Parol Bondye i parey en lepe byen fite ki kapab devwal bann mansonz ki Satan i propaze. (Efe. 6:17) Par egzanp, Parol Bondye i montre ki sa nide ki bann mor i kominik avek nou i en mansonz. (Lir Psonm 146:4.) I osi rapel nou ki zis Zeova ki kapab predir lavenir dan en fason egzakt. (Iza. 45:21; 46:10) Si nou lir e medit lo Parol Bondye regilyerman, sa pou ed nou rezet e ay bann mansonz ki bann demon i anvi nou krwar ladan.

9. Ki serten pratik demonyak ki nou evite?

⁹ Refize annan okenn keksoz pour fer avek bann pratik demonyak. Konman bann vre Kretyen, nou pa zanmen pran par dan okenn pratik demonyak. Par egzanp, nou pa al vwar bann sorsye ek bonnonm dibwa ouswa esey kominik avek bann dimoun mor dan okenn fason. Parey nou’n diskite dan sa lartik avan, nou pa pran par dan okenn koutim lanterman ki baze lo sa krwayans ki bann mor i ankor vivan kek par. An plis, nou pa servi astrolozi ouswa okenn lezot mwayen pour esey konn lavenir. (Iza. 8:19, NWT) Nou konnen ki tou sa bann pratik i vreman danzere e zot kapab met nou an kontak direk avek Satan ek bann demon.

10-11. (a) Ki serten dimoun dan premye syek ti fer ler zot ti aprann laverite? (b) Dapre 1 Korentyen 10:21, akoz nou devret swiv legzanp bann Kretyen dan premye syek e ki mannyer nou kapab fer li?

¹⁰ Zet okenn lobze ki annan pour fer avek bann keksoz mistik. Serten dimoun dan lavil Efez dan premye syek ti fer bann pratik demonyak. Ler zot ti aprann laverite, zot ti pran aksyon. “En bon pe dimoun ki ti fer mazik ti anmas zot liv e bril zot devan tou dimoun.” (Akt 19:19) Zot ti fer tou sa ki zot ti kapab pour reziste bann demon. Zot bann liv mazik ti kout en kantite larzan. Me dan plas donn sa bann liv ouswa vann zot, zot ti detri sa  bann liv. I ti pli enportan pour zot fer plezir Zeova olye konsantre lo konbyen sa bann liv ti koute.

¹¹ Ki mannyer nou kapab swiv legzanp sa bann Kretyen dan premye syek? I ti pou byen ki nou zet okenn keksoz ki annan pour fer avek bann keksoz mistik. Sa i enkli bann portboner, gardkor, meday, lapriyer ki dimoun i met anpandan ouswa okenn lezot lobze ki dimoun i servi pour esey protez zot kont bann demon.​—Lir 1 Korentyen 10:21.

12. Ki bann kestyon nou devret demann nou lekor konsernan nou divertisman?

¹² Analiz ou bann divertisman. Demann ou lekor: ‘Eski mon lir bann liv, magazin ouswa lartik lo Enternet ki annan pour fer avek bann keksoz mistik? Ki mon pou dir lo bann lanmizik ki mon ekoute, bann film ek progranm lo televizyon ki mon gete ouswa bann zwe video ki mon zwe? Eski okenn mon bann divertisman i annan pour fer avek bann pratik demonyak? Eski i montre bann keksoz parey bann vampire, zombie ouswa bann keksoz paranormal? Eski i donn lenpresyon ki mazik ouswa zet sor i gou e ki napa nanryen mal avek?’ Byensir, pa tou zistwar envante oubyen imaziner, parey bann fairy tale, ki neseserman annan pour fer avek bann pratik demonyak. Ler ou analiz ou divertisman, reste determinen pour fer bann swa ki pou ed ou reste lwen avek okenn keksoz ki Zeova pa kontan. Nou anvi fer nou mye “pour gard en konsyans kler” devan nou Bondye.​—Akt 24:16. *

13. Ki nou devret evite fer?

 ¹³ Evite rakont zistwar lo bann demon. Pour kapab fer sa, nou devret swiv legzanp Zezi. (1 Pyer 2:21) Avan Zezi ti vin lo later, i ti dan lesyel e i ti konn en kantite lo Satan ek bann demon. Me i pa ti rakont zistwar lo sa ki bann demon ti’n fer. Zezi ti anvi ansenny dimoun lo Zeova, pa lo Satan. Nou kapab swiv legzanp Zezi e pa rakont zistwar lo bann demon. Plito, nou montre par sa ki nou koz lo la ki “en bon keksoz in tous [nou] leker,” setadir laverite.​—Ps. 45:1, NWT.

14-15. (a) Akoz nou pa devret per bann demon? (b) Ki levidans i annan ki Zeova i protez son pep ozordi?

¹⁴ Pa bezwen per bann demon. Dan sa lemonn ozordi, bann keksoz mal i kapab arive avek nou. Par egzanp, aksidan, maladi oubyen menm lanmor i kapab arive san ekspekte. Me nou pa devret krwar ki sa i lafot bann demon. Labib i eksplike ki “letan ek levennman san ekspekte i ariv” lo tou dimoun. (Ekle. 9:11, NWT) Zeova in montre ki i bokou pli pwisan ki bann demon. Par egzanp, Bondye pa ti les Satan touy Zob. (Zob 2:6) Dan letan Moiz, Zeova ti demontre ki i ti pli pwisan ki bann pret Ezipsyen ki ti fer mazik. (Egz. 8:18; 9:11) Pli tar dan lesyel, Zeova ti donn Zezi lotorite lo Satan ek bann demon, alor Zezi ti pous zot dan lesyel e zet zot lo later. Dan lavenir, zot pou ganny zete dan labim kot zot pa pou kapab fer ditor personn.​—Rev. 12:9; 20:2, 3.

¹⁵ I annan en kantite levidans ki Zeova i protez son pep ozordi. Reflesi lo sa: Nou pe prese e ansenny laverite partou dan lemonn. (Mat. 28:19, 20) Sa i fer ki nou devwal bann move keksoz ki Dyab i fer. Vreman, si Satan ti kapab aret nou travay, i ti pou fer li, me i pa kapab. Alor nou pa bezwen per bann demon. Nou konnen ki Zeova “i pronmnen son regar partou lo later pour soutenir bann ki zot leker i konpletman atase avek li.” (2 Kron. 16:9) Si nou fidel avek Zeova, bann demon pa pou kapab fer nou okenn ditor permanan.

16-17. Donn en legzanp ki montre ki nou bezwen annan kouraz pour reziste bann demon.

¹⁶ Nou bezwen annan kouraz pour reziste bann demon, espesyalman ler nou bann zanmi oubyen fanmir i opoz nou. Me Zeova i beni bann ki demontre sa kalite kouraz. Annou vwar legzanp en ser ki apel Erica ki reste Ghana. Erica ti annan 21 an ler i ti aksepte en letid Labib. Vi ki son papa ti en pret ki pratik mazik, son fanmir ti ekspekte ki i pran par dan en koutim kot i ti pou bezwen manz lavyann ki ganny ofer konman sakrifis avek bann bondye son papa pandan en seremoni. Ler Erica ti refize, son fanmir ti vwar sa konmsi i ti pe ensilte zot bann bondye. Zot ti krwar ki bann bondye ti pou pini zot avek bann maladi mantal e fizik.

¹⁷ Fanmir Erica ti esey fors li pour swiv sa koutim, me i ti refize menm si sa ti vedir ki i ti bezwen kit lakour son paran. Serten Temwen ti les li reste avek zot. Dan sa ka, Zeova ti beni Erica par donn li en nouvo fanmir, setadir bann frer ek ser Kretyen ki ti vin parey bann frer ek ser pour li. (Mark 10:29, 30) Menm si fanmir Erica ti abandonn li e bril tou son bann keksoz, i ti reste fidel avek Zeova, batize e la i pe servi konman en pionye ordiner. I pa per bann demon. Erica i dir sa konsernan son fanmir, “Toulezour mon priye ki mon fanmir i aprann konn Zeova, ki zot ganny libere avek bann fo krwayans e ki zot servi sa Bondye ki kontan nou.”

18. Ki bann benediksyon nou gannyen ler nou met nou konfyans dan Zeova?

¹⁸ Pa nou tou ki nou lafwa pou ganny teste dan sa fason. Par kont, nou tou nou bezwen reziste bann demon e met nou konfyans dan Zeova. Si nou fer sa, nou pou ganny bokou benediksyon e nou pou evite ganny anbete par bann mansonz Satan. Osi, nou pa pou les lafreyer pour bann demon fer nou aret servi Zeova. An plis ki sa, nou pou ranforsi nou lanmitye avek Zeova. Disip Zak ti ekri: “Soumet avek Bondye, me opoz Dyab e i pou sov lwen avek zot. Vin pros avek Bondye e i pou vin pros avek zot.”​—Zak 4:7, 8.