1-2. Akoz lespri Zezi ti fatige?

SA DERNYEN zour ki Zezi ti pase konman en imen lo later, son lespri ti fatige. I ti reste zis en ptigin letan avan ki i ganny tortire e ganny touye par bann move dimoun. Me Zezi pa ti zis enkyet akoz i ti pe al mor. I ti vreman kontan son Papa e i ti anvi fer li plezir. Zezi ti konnen ki si i reste fidel pandan sa tes difisil ki i ti pe al pas atraver, i ti pou ede zistifye non Zeova. Zezi ti osi kontan bann dimoun e i ti konnen ki sel fason ki nou kapab ganny sa lespwar pour viv pour touzour, i si i reste fidel avek Zeova ziska son lanmor.

² Menm si Zezi ti anba bokou presyon, i ti anpe. I ti’n dir son bann zapot: “Mon donn zot mon lape.” (Zan 14:27) I ti annan “lape Bondye,” setadir sa trankilite ki en dimoun i gannyen gras a son bon relasyon avek Zeova. Sa lape ti ed Zezi pour pa trakase.​—Fili. 4:6, 7.

3. Ki nou pou diskite dan sa lartik?

³ Napa ni enn ant nou ki pou bezwen fer fas avek sa menm presyon ki Zezi ti bezwen sibir, me selman tou bann ki swiv Zezi pou rankontre bann problenm. (Mat. 16:24, 25; Zan 15:20) Parey Zezi, nou osi nou lespri pou fatige par ler. Ki nou kapab fer pour ki nou pa tro trakase e perdi nou lape lespri? Annou vwar trwa keksoz ki Zezi ti fer pandan son minister lo later e vwar ki mannyer nou kapab swiv son legzanp ler nou rankontre bann problenm.

4. Avek 1 Tesalonisyen 5:17 antet, donn serten legzanp ki montre ki Zezi ti priy plizyer fwa pandan son dernyen zour lo later?

⁴ Lir 1 Tesalonisyen 5:17. Zezi ti priy plizyer fwa pandan  son dernyen zour lo later. Ler i ti montre ki mannyer pour komemor son lanmor, i ti priy lo sa dipen ek diven. (1 Kor. 11:23-25) Avan ki zot ti kit sa landrwa kot zot ti’n selebre Lapak, i ti priy avek son bann disip. (Zan 17:1-26) Ler zot ti ariv kot Montanny Pye Zoliv sa zour swar, Zezi ti priy plizyer fwa. (Mat. 26:36-39, 42, 44) Osi, bann dernyen mo ki Zezi ti dir avan i mor ti en lapriyer. (Lik 23:46) Zezi ti priy Zeova konsernan bann keksoz enportan ki ti arive pandan dernyen zour son lavi lo later.

5. Akoz bann zapot ti napa ase kouraz?

⁵ En rezon ki Zezi ti kapab andir son leprev i akoz i ti depan lo son Papa dan lapriyer. De lot kote, bann zapot pa ti persevere dan lapriyer sa zour swar. Sa ti fer ki zot ti napa ase kouraz ler zot ti pas atraver en difikilte. (Mat. 26:40, 41, 43, 45, 56) Ler nou rankontre bann difikilte, sel fason ki nou pou reste fidel i si nou swiv legzanp Zezi e “kontinyen priye.” Ki nou kapab priy lo la?

6. Ki mannyer lafwa pou ed nou gard lape lespri ek leker?

⁶ Nou kapab priy Zeova pour “donn nou plis lafwa.” (Lik 17:5; Zan 14:1) Nou bezwen annan lafwa parski Satan pou teste tou bann ki swiv Zezi. (Lik 22:31) Ki mannyer lafwa pou ed nou gard nou lape lespri ek leker menm ler nou bezwen fer fas avek problenm enn apre lot? Ler nou’n fer tou sa ki nou kapab pour sirmont en difikilte, lafwa pou ed nou pour aret enkyet parski nou konnen ki Zeova pou donn nou sa pli bon solisyon dan sa pli bon moman. Vi ki nou annan  konfyans ki Zeova i pli byen konnen ki pour fer, nou annan lape lespri ek leker.​—1 Pyer 5:6, 7.

7. Ki ou’n aprann atraver sa ki Robert in dir?

⁷ Lapriyer i ed nou gard lape lespri malgre nenport ki problenm nou rankontre. Annou vwar legzanp en ansyen ki apel Robert, ki dan son 80 an. I dir: “Sa konsey dan Filipyen 4:6, 7 in ed mwan fer fas avek bokou problenm dan mon lavi. Mon’n pas atraver problenm larzan. E pour en pe letan mon ti perdi mon privilez pour servi konman ansyen.” Kwa ki’n ed Robert pour gard son lape lespri? I dir: “Dek ki mon konmans santi mwan enkyet, mon priye. Mon krwar ki ler mon priy pli souvan e pli o profon, mon santi mwan pli anpe.”

8. Parey in ganny dir dan Zan 8:29, ki en lot rezon akoz Zezi ti annan lape lespri?

⁸ Lir Zan 8:29. Zezi ti annan lape lespri menm ler i ti pe ganny persekite parski i ti konnen ki i ti pe fer son Papa kontan. I ti kontinyen obei ler i ti difisil pour li fer li. I ti kontan son Papa e i ti fer son servis pour Zeova sa keksoz pli enportan dan son lavi. Avan ki i ti vin lo later, i ti “zouvriye abil” Bondye. (Prov. 8:30, NWT) Ler i ti lo later, avek devouman i ti ansenny lezot lo son Papa. (Mat. 6:9; Zan 5:17) Sa travay ti donn Zezi bokou lazwa.​—Zan 4:34-36.

9. Akoz nou annan lape lespri ler nou bizi dan predikasyon?

⁹ Nou kapab swiv legzanp Zezi par  obei Zeova e “toultan annan bokou keksoz pour fer dan travay Senyer.” (1 Kor. 15:58) Ler nou ‘pas tou letan’ ki nou kapab dan predikasyon, nou kapab vwar nou bann problenm dan en lot fason. (Akt 18:5) Par egzanp, souvandfwa bann dimoun ki nou zwenn dan predikasyon pe fer fas avek bann problenm ki bokou pli pir ki pour nou. Par kont, ler zot aprann pour kontan Zeova e aplik son konsey, zot annan en pli bon lavi e zot vin pli ere. Sak fwa ki nou vwar sa arive, nou santi nou pli konfidan ki Zeova pou pran swen avek nou. Sa lasirans i ed nou pour gard nou lape lespri. En ser ki tou son lavi in santi ki i pa vo nanryen e ki soufer avek depresyon, i’n vwar ki sa i vre. I dir: “Ler mon bizi dan predikasyon, mon pli kapab kontrol mon bann santiman e mon pli ere. Mon krwar sa i akoz ler mon dan predikasyon, mon santi mwan pli pros avek Zeova.”

10. Ki ou’n aprann atraver sa ki Brenda ti dir?

¹⁰ Annou vwar legzanp en lot ser ki apel Brenda. Li ek son fiy i annan en maladi kronik ki apel multiple sclerosis. Brenda pa kapab marse alor i bezwen servi en wiltyer e i napa bokou lenerzi. Ler i kapab, i pres kazankaz me laplipar ditan i ekri bann let. I dir: “Ler mon ti konpran e aksepte ki mon maladi pa ti pou ganny geri dan sa lemonn, mon ti pli byen kapab konsantre lo mon minister. Anfet, ler mon pe prese mon pa pe mazin mon bann lenkyetid. O kontrer, mon bezwen konsantre lo sa ki mon kapab fer pour ed bann ki mon kontakte dan teritwar. An plis, i fer mwan rapel sa lespwar ki mon annan pour lavenir.”

11-13. (a) Ki bann zapot ek lezot ti fer pour montre ki zot ti bann vre zanmi Zezi? (b) Ki mannyer bann zanmi Zezi ti fer li santi?

¹¹ Tou dilon minister Zezi, bann zapot fidel ti bann vre zanmi pour Zezi. Zot ti sa bann kalite zanmi ki ganny dekrir dan en proverb ki dir: “En vre zanmi i pli lwayal ki en frer.” (Prov. 18:24) Zezi ti apresye sa bann zanmi. Pandan son minister, ni enn son bann frer pa ti met lafwa dan li. (Zan 7:3-5) A en serten moman, son bann fanmir ti menm krwar ki i ti’n perdi lespri. (Mark 3:21) De lot kote, sa zour swar avan Zezi i mor, i ti kapab dir son bann zapot fidel: “Zot menm zot sa bann ki’n toultan la avek mwan dan mon bann leprev.”​—Lik 22:28.

¹² I ti annan serten lokazyon kot bann zapot ti dezapwent Zezi, me i pa ti konsantre lo zot bann defo. O kontrer, i ti vwar ki zot ti annan lafwa dan li. (Mat. 26:40; Mark 10:13, 14; Zan 6:66-69) Sa dernyen zour swar ki Zezi ti pase avek sa bann zonm fidel avan i ganny met a mor, i ti dir zot: “Mon apel zot zanmi akoz mon’n fer zot konn tou keksoz ki mon’n tande avek mon Papa.” (Zan 15:15) San dout, bann zanmi Zezi ti en gran sours rekonfor pour li. Sa led ki zot ti donn Zezi dan son minister ti fer son leker zwaye.​—Lik 10:17, 21.

¹³ Apard ki bann zapot, Zezi ti annan lezot zanmi. I ti annan bann zonm ek madanm ki ti ed li dan bann fason pratik pandan son minister. Serten ti envit li kot zot, koumsa i ti annan en landrwa pour pran en repa. (Lik 10:38-42; Zan 12:1, 2) Lezot ti vwayaz avek li e partaz zot keksoz materyel avek li. (Lik 8:3)  Zezi ti annan bann bon zanmi akoz i ti en bon zanmi an retour. I ti fer bann bon keksoz pour zot e i pa ti ekspekte ki zot fer plis ki zot kapab. Zezi ti parfe, me i ti apresye sipor son bann zanmi enparfe. An plis, nou kapab asire ki zot ti ed li gard son lape lespri.

14-15. Ki mannyer nou kapab fer bann bon zanmi e ki mannyer zot kapab ed nou?

¹⁴ Bann bon zanmi pou ed nou reste fidel avek Zeova. Sa pli bon fason pour fer bann bon zanmi se pour vin en bon zanmi. (Mat. 7:12) Par egzanp, Labib i ankouraz nou pour servi nou letan ek lenerzi pour ed lezot, sirtou bann ki “dan bezwen.” (Efe. 4:28) Eski ou kapab mazin en dimoun dan ou kongregasyon ki ou kapab ede? Eski ou kapab al fer konmisyon pour en proklanmater ki pa kapab kit son lakaz akoz maladi ouswa lavyeyes? Eski ou kapab prepar en repa pour en fanmir ki annan problenm larzan? Si ou konnen ki mannyer pour servi nou sit Enternet jw.org^® ek JW Library^® app, eski ou kapab ed lezot dan ou kongregasyon pour aprann servi zot? Ler nou okipe pe ed lezot, i annan plis sans ki nou pou ere.​—Akt 20:35.

¹⁵ Bann zanmi ki nou fer pou siport nou ler nou annan problenm e zot pou ed nou gard nou lape lespri. Zis parey Eliou ti ekoute ler Zob ti koz lo son bann defi, nou bann zanmi pou ekout nou ler nou dir zot ki mannyer nou santi. (Zob 32:4) Nou pa devret ekspekte ki nou bann zanmi i dir nou ki pour fer, me  i saz pour nou ekout zot konsey ki sorti dan Labib. (Prov. 15:22) Osi, zis parey Lerwa David ti annan limilite pour aksepte led avek son bann zanmi, nou pa devret tro fyer pour aksepte led ki nou bann zanmi i ofer ler nou dan bezwen. (2 Sam. 17:27-29) Bann bon zanmi koumsa i en kado sorti kot Zeova!​—Zak 1:17.

16. Dapre Filipyen 4:6, 7, ki sa sel fason ki nou kapab ganny lape lespri? Eksplike.

¹⁶ Lir Filipyen 4:6, 7. Akoz Zeova i dir ki nou kapab ganny son lape “par Kris Zezi”? Parski nou ganny lape lespri ek leker si selman nou konpran e annan lafwa dan sa rol ki Zezi i annan dan plan Zeova. Par egzanp, gras a sakrifis Zezi, tou nou bann pese i kapab ganny pardonnen. (1 Zan 2:12) Pa sa i en gran soulazman! Konman Lerwa dan Rwayonm Bondye, Zezi pou retir tou soufrans ki nou pas atraver akoz Satan ek son lemonn. (Iza. 65:17; 1 Zan 3:8; Rev. 21:3, 4) Sa i donn nou en zoli lespwar! Menm si Zezi in donn nou en travay difisil pour fer, i avek nou pe siport nou pandan bann dernyen zour sa lemonn. (Mat. 28:19, 20) Sa i donn nou kouraz! Soulazman, lespwar ek kouraz i bann keksoz vreman enportan ki nou bezwen pour annan lape lespri.

17. (a) Ki mannyer en Kretyen i kapab gard lape lespri? (b) Parey in ganny promet dan Zan 16:33, ki nou pou kapab fer?

¹⁷ Me ki mannyer ou kapab gard ou lape lespri ler ou pe lalit avek bann problenm? Fer bann keksoz ki Zezi ti fer. Premyerman, priye e kontinyen priye malgre nenport kwa ki arive. Dezyenmman, obei Zeova e anons sa bon nouvel avek devouman, menm ler i difisil pour fer li. Trwazyenmman, depan lo ou bann zanmi ki pou ed ou pandan ou bann problenm. Koumsa, lape Bondye pou protez ou lespri ek leker. Zis parey Zezi, ou pou ranport laviktwar lo tou ou problenm.​—Lir Zan 16:33.