1. Ki nou tou nou bezwen fer?

ESKI ou pou anvi tay dan en lakours ki ou konnen i difisil, espesyalman si ou santi ou malad oubyen fatige? I tre probab ki ou pa pou anvi. Me zapot Pol ti dir ki tou vre Kretyen i dan en lakours. (Ebr. 12:1) Nou tou, zenn konman vye, ki swa nou annan lafors oubyen nou fatige, nou bezwen andire ziska lafen si nou anvi ganny sa pri ki Zeova i ofer nou.​—Mat. 24:13.

2. Dapre 2 Timote 4:7, 8, akoz Pol ti kapab donn sa konsey?

² Pol ti kapab donn sa konsey akoz i ti’n “fini sa lakours.” (Lir 2 Timote 4:7, 8.) Me ki sa lakours ki Pol ti koz lo la?

3. Ki sa lakours ki Pol ti koz lo la?

³ Parfwa, Pol ti ekri lo bann keksoz ki ti pase dan bann konpetisyon atletik ki ti ganny fer dan letan lontan Lagres, pour ansenny bann leson enportan. (1 Kor. 9:25-27; 2 Tim. 2:5) Dan plizyer lokazyon, Pol ti konpar lavi en Kretyen avek letan en atlet pe taye dan en lakours. (1 Kor. 9:24; Gal. 2:2; Fili. 2:16) En dimoun i konmans sa “lakours,” ler i dedye son lavi avek Zeova e batize. (1 Pyer 3:21) I ariv lo laliny finisyon ler Zeova i donn li sa pri ki lavi eternel.​—Mat. 25:31-34, 46; 2 Tim. 4:8.

4. Ki nou pou vwar dan sa lartik?

⁴ Ki serten similarite i annan ant en lakours maraton e viv en lavi Kretyen? I annan plizyer keksoz ki parey. Annou vwar trwa parmi sa bann keksoz. Premyerman, nou bezwen swiv sa bon semen. Dezyenmman, nou bezwen konsantre lo laliny finisyon. Trwazyenmman, nou bezwen kontinyen taye menm si nou ganny problenm dan semen.

5. Ki kalite lavi nou bezwen viv e akoz?

⁵ Pour en dimoun ganny en pri dan en lakours, sa dimoun i bezwen swiv sa semen ki i’n ganny demande pour swiv. Pareyman, si nou anvi ganny sa pri ki lavi eternel, nou bezwen viv sa lavi ki en Kretyen i devret viv. (Akt 20:24; 1 Pyer 2:21) Me Satan ek bann ki swiv son legzanp pa anvi ki nou viv en lavi Kretyen. Zot anvi ki nou “kontinyen viv sa menm lavi . . . parey zot.” (1 Pyer 4:4) Zot sikann nou akoz nou viv en lavi ki en Kretyen i devret viv. Zot dir ki zot fason viv i pli meyer e ki i fer en dimoun lib. Me sa ki zot dir pa vre.​—2 Pyer 2:19.

6. Ki ou aprann avek legzanp Brian?

⁶ Dimoun ki viv parey bann ki ganny enfliyanse par lemonn Satan i dekouver ki sa semen ki zot in swazir pa fer zot lib. O kontrer, zot en lesklav Satan ek zot prop dezir. (Rom. 6:16) Annou vwar legzanp Brian. Son paran ti ankouraz li pour viv en lavi Kretyen. Me ler i ti adolesan, i ti demande si sa semen ti pou fer li ere. Brian ti deside swiv bann ki ti pe viv dapre standar Satan. I dir: “San realize, sa laliberte ki mon ti pe rode ti pe fer mwan vin en adikt. . . . Avek letan mon ti konmans abiz drog ek lalkol e viv en lavi dezord. Pandan plizyer lannen apre, mon ti konmans servi bann drog pli danzere e konmans vin zot lesklav. . . . Mon ti konmans vann drog pour siport mon adiksyon.” Avek letan, Brian ti deside pour viv dapre bann standar Zeova. I ti sanz son lavi e i ti batize an 2001. Aprezan, i vreman kontan ki i pe swiv sa lavi Kretyen. *

7. Dapre Matye 7:13, 14, lekel sa de semen ki devan nou?

⁷ I vreman enportan ki nou swazir sa bon semen pour swiv! Satan i anvi ki nou tou nou aret tay lo sa semen difisil ki “anmenn ver lavi” e al lo sa semen fasil ki laplipar dimoun dan lemonn i lo la. Me sa semen i “anmenn ver destriksyon.” (Lir Matye 7:13, 14.) Pour reste lo sa bon semen e pa ganny anbete par bann dimoun ki pa swiv standar Zeova, nou bezwen met nou konfyans dan Zeova e ekout li.

8. Si en atlet i tonbe, ki i pou fer?

⁸ Bann atlet dan en lakours maraton i get byen sa semen ki zis drwat devan zot,  pour zot pa tonbe. Kantmenm sa, zot kapab tonbe akoz en lot atlet i may dan zot lipye oubyen akoz en trou dan semen. Si zot tonbe, zot releve e kontinyen taye. Zot pa konsantre lo sa ki’n fer zot tonbe me lo sa laliny finisyon ek sa pri ki zot anvi gannyen.

9. Si nou tonbe, ki nou devret fer?

⁹ Dan nou lakours, plizyer fwa nou tonbe ler nou fer fot dan sa ki nou dir e fer. Oubyen, i kapab ki nou bann frer ek ser i fer bann fot ki fer nou ditor. Nou pa devret sirprann si sa i arive. Nou tou nou enparfe e nou tou nou pe tay lo sa semen difisil ki anmenn ver lavi. Alor, i normal ki parfwa nou tap avek kanmarad. Pol ti fer remarke ki parfwa nou donn kanmarad “rezon pour konplent.” (Kol. 3:13) Me dan plas konsantre lo sa ki’n fer nou tonbe, annou konsantre lo sa pri ki devan nou. Si nou tonbe, annou releve e kontinyen taye. Si nou ankoler e refize releve pour kontinyen servi Zeova, nou pa pou ariv kot laliny finisyon e nou pa pou ganny sa pri. An plis, nou kapab vin en lobstak pour lezot ki pe esey tay lo sa semen difisil ki anmenn ver lavi.

10. Ki mannyer nou kapab evite vin “en lobstak” pour lezot?

¹⁰ En lot fason ki nou kapab evite vin “en lobstak” pour nou bann frer ek ser, i par les zot fer keksoz dan zot fason ler i posib, olye ki nou ensiste ki zot fer keksoz dan nou fason. (Rom. 14:13, 19-21; 1 Kor. 8:9, 13) Dan sa fason enportan, nou pa parey bann atlet dan en lakours. Zot fer paryaz avek lezot atlet e sak atlet i fer zefor pour ganny sa pri zis pour li tousel. Sa bann atlet, zot zis mazinen kwa ki pou ed zot ranport laviktwar. Alor, zot kapab esey pous lezot atlet pour zot kapab ariv devan. Me nou, nou pa pe fer paryaz avek kanmarad. (Gal. 5:26; 6:4) Nou bi i pour ed plis dimoun posib pour ariv kot laliny finisyon ansanm avek nou, pour nou antre dan nouvo lemonn Bondye e viv pour touzour. Alor, nou esey aplik sa konsey ki Pol in donn nou pour “pa rod zis [nou] prop lentere, me lentere lezot osi.”​—Fili. 2:4.

11. Ki en atlet i konsantre lo la e akoz?

 ¹¹ An plis, bann atlet dan en lakours pa zis get lo semen ki drwat devan zot me zot osi konsantre lo laliny finisyon. Menm si zot pa kapab vwar sa laliny avek zot lizye, zot kapab imazin zot pe ariv laba e pe resevwar sa pri. Zot reste motive par kontinyen mazin sa pri.

12. Ki Zeova in donn nou?

¹² Dan sa lakours ki nou pe taye, Zeova in donn son pep en garanti ki i pou rekonpans zot, si zot fini sa lakours. I pou donn zot lavi eternel swa dan lesyel ouswa dan Paradi lo later. Labib i dekri sa rekonpans, pour nou kapab imazinen ki mannyer lavi pou ete. Ler nou kontinyen mazin sa lavenir ki Zeova in promet nou, nou pou pli determinen pour andire.

13. Ki lavantaz nou annan lo sa bann atlet?

¹³ Bann atlet Lagres ti bezwen sirmont bann difikilte, parey lafatig ek douler. Me zot ti bezwen depan zis lo zot lantrennman ek zot prop lafors. Parey sa bann atlet, nou ganny antrennen lo ki mannyer pour tay sa lakours ki nou ladan. Me nou annan en lavantaz lo sa bann atlet. Nou kapab ganny lafors avek Zeova e napa okenn limit lo kantite i kapab ed nou. Si nou depan lo Zeova, i pa zis promet pour ed nou me pour osi fer nou for!​—1 Pyer 5:10.

14. Ki mannyer 2 Korentyen 12:9, 10 i ed nou fer fas avek bann difikilte?

¹⁴ Pol ti bezwen fer fas avek bokou difikilte. An plis ki ganny ensilte e persekite par lezot, parfwa i ti santi li feb e i ti bezwen andir sa ki i ti apel “en pikan ki pe pik [li].” (2 Kor. 12:7) Me dan plas vwar sa bann difikilte konman bann rezon pour aret servi Zeova, i ti vwar zot konman en loportinite pour depan lo Zeova. (Lir 2 Korentyen 12:9, 10.) Vi ki Pol ti annan sa fason panse, Zeova ti ed li dan tou son bann difikilte.

15. Si nou imit Pol, ki nou pou eksperyanse?

¹⁵ Nou osi nou kapab ganny ensilte oubyen persekite akoz nou lafwa. Nou kapab osi fer fas avek problenm lasante oubyen lafatig. Me si nou imit Pol, sak sa bann difikilte i kapab vin en loportinite pour eksperyans sipor ki Zeova i donn nou avek lanmour.

16. Menm si ou lasante pa tro bon, ki ou kapab fer?

¹⁶ Eski ou lo en lili oubyen ou dan en wiltyer? Eski ou annan problenm zenou oubyen ou pa vwar byen kler? Si wi, eski ou kapab servi Zeova ansanm avek bann ki zenn e an bonn sante? Definitivman ou kapab! Bokou frer ek ser ki pli aze e ki lasante pa tro bon, pe tay lo sa semen ki anmenn ver lavi. Zot pa kapab fer sa travay avek zot prop lafors. O kontrer, zot depan lo lafors Zeova, par swiv bann renyon Kretyen par telefonn oubyen atraver bann video ki’n ganny rikorde. Zot partisip dan sa travay pour fer disip par anons sa bon nouvel avek bann dokter, ners e zot fanmir.

17. Ki mannyer Zeova i santi anver bann ki lasante pa tro bon?

¹⁷ Si ou pa kapab fer tou keksoz ki ou anvi pour Zeova, pa bezwen dekouraze e mazinen ki ou pa pou kapab andire ziska lafen. Zeova i kontan ou pour lafwa ki ou’n demontre dan li ek tou sa bann keksoz ki ou’n fer pour li dan lepase. Ou bezwen son led la konmela plis ki zanmen oparavan e i pa pou abandonn ou. (Ps.  9:10) O kontrer i pou vin pli pros avek ou. Annou vwar ki en ser ki annan serten problenm lasante, i dir: “Anmezir ki mon bann problenm lasante i ogmante, i vin pli difisil pour mwan partaz laverite avek lezot. Me mon konnen ki menm mon bann pti zefor ki mon fer, i anmenn lazwa dan leker Zeova e sa i fer mwan ere.” Ler ou santi ou dekouraze, mazinen ki ou pa tousel. Mazin legzanp Pol e rapel son bann parol ankourazan: “Mon kontan ler mon feb, . . . parski ler mon feb, lanmenm ler ki mon for.”​—2 Kor. 12:10.

18. Ki difikilte serten dimoun pe fer fas avek?

¹⁸ Serten ki pe tay lo sa semen ki anmenn ver lavi i fer fas avek en lot difikilte. Zot pe fer fas avek bann problenm ki lezot pa konnen. Par egzanp, zot bezwen fer fas avek depresyon oubyen lenkyetid. Akoz sa bann serviter fidel Zeova pe fer fas avek sa bann problenm ki vreman difisil? Parski ler en dimoun i annan en lebra ki’n kase oubyen i dan en wiltyer, tou dimoun i vwar sa problenm ki i pe fer fas avek e zot anvi ed li. Par kont, bann ki pe fer fas avek problenm emosyonnel oubyen problenm mantal, i pa paret ki zot annan en problenm. Zot sityasyon i difisil zis parey pour sa bann ki annan en lebra oubyen lipye kase, me vi ki lezot pa kapab vwar ki zot pe soufer, petet dimoun pa donn zot sa lanmour ek lafeksyon ki zot bezwen.

19. Ki nou aprann avek legzanp Mefiboset?

¹⁹ Si ou annan serten problenm lasante e ou santi ki lezot pa konpran ou, petet ou kapab ganny ankouraze avek legzanp Mefiboset. (2 Sam. 4:4) I ti bezwen fer fas avek son dezabilite e Lerwa David ti mal ziz li. I pa ti lafot Mefiboset ki i ti annan en dezabilite. Kantmenm sa, i pa ti ankoler. I ti apresye bann bon keksoz ki ti arive avek li. I ti rekonesan pour tou sa ki David ti’n fer pour li dan lepase. (2 Sam. 9:6-10) Alor, ler David ti mal ziz li, Mefiboset ti konpran akoz David ti’n azir dan sa fason. I pa ti les fot David fer li ankoler. Osi, i pa ti blanm Zeova pour sa ki David in fer. Mefiboset ti konsantre lo sa ki i kapab fer pour siport lerwa ki Zeova in swazir. (2 Sam. 16:1-4; 19:24-30) Zeova in met legzanp Mefiboset dan Labib pour ki nou kapab aprann avek son legzanp.​—Rom. 15:4.

20. Ki mannyer lenkyetid i afekte serten dimoun me ki zot kapab asire?

²⁰ Vi ki serten nou bann frer ek ser i annan bokou lenkyetid, parfwa zot pa santi  zot alez parmi lezot. Petet zot vwar li difisil pour dan en gran group, me zot kontinyen asiste renyon ek lasanble. Zot vwar li difisil pour koz avek dimoun ki zot pa konnen, kantmenm sa, zot koz avek dimoun dan predikasyon. Si sa i leka avek ou, asire ki ou pa tousel. Bokou dimoun i santi parey ou. Rapel ki Zeova i kontan sa ki ou pe fer avek tou ou leker. Lefet ki ou pa’n abandonnen, i montre ki i pe beni ou e i pe donn ou sa lafors ki ou bezwen. * (Fili. 4:6, 7; 1 Pyer 5:7) Si ou pe servi Zeova malgre ou pe fer fas avek bann problenm lasante, ou kapab annan konfyans ki ou pe fer plezir Zeova.

21. Avek led Zeova, ki nou tou nou pou reisi fer?

²¹ Erezman i annan en diferans ant en lakours ek sa enn ki Pol ti koz lo la. Dan en lakours dan letan Labib zis en dimoun ki ti ganny pri. Par kont, tou dimoun ki fidelman andire dan sa lakours Kretyen i ganny sa pri ki lavi eternel. (Zan 3:16) Tou sa ki ti taye dan en lakours ti bezwen an form. Si zot pa ti an form, zot pa ti pou kapab ranport laviktwar. Par kont, bokou parmi nou napa en bon lasante me kantmenm sa nou pe andire. (2 Kor. 4:16) Avek led Zeova, nou tou nou pou tay dan sa lakours ziska finisyon!