1-2. Ki Zezi ti pe esey dir dan Zan 4:35, 36?

ZEZI ti pe marse dan plantasyon e i tre probab dible ti pe konmans pouse. (Zan 4:3-6) I pou pran apepre kat mwan pour sa bann plant pare pour rekolt. Alor, i ti kapab paret drol ler Zezi ti dir: “Get bann plantasyon, pa zot in pare pour rekolt?” (Lir Zan 4:35, 36.) Ki Zezi ti pe esey dir?

² Aparaman, Zezi ti pe koz konsernan rasanble bann dimoun me pa rekolte bann lagrenn. Annou vwar ki ti arive zis avan sa. Menm si bann Zwif pa ti koz avek bann Samariten, Zezi ti’n anons sa bon nouvel avek en madanm Samariten e sa madanm ti’n ekoute. Anfet, ler Zezi ti pe koz konsernan bann plantasyon ki ti “pare pour rekolt,” en kantite Samariten ki ti’n tann sa madanm koz konsernan Zezi ti vin kot Zezi pour aprann plis avek li. (Zan 4:9, 39-42) En spesyalis Labib i dir ki lefet ki dimoun ti taye pour vin kot Zezi e pour ekout li, sa ti montre ki zot ti parey bann lagrenn ki ti’n pare pour rekolt.

3. Si ou vwar dimoun parey Zezi ti vwar, ki mannyer ou pou vin en pli bon proklanmater?

³ Ki mannyer ou vwar sa bann dimoun ki ou anons sa bon nouvel avek? Eski ou vwar zot konman bann lagrenn ki’n pare pour rekolt? Si wi, i annan trwa keksoz ki pou arive. Premyerman, ou pou anons sa bon nouvel o pli vit posib. Letan pour fer rekolt i kourt e napa letan pour gaspiye. Dezyenmman, ou pou kontan ler ou vwar dimoun i ekout sa bon nouvel. Labib i dir ki dimoun i rezouir pandan letan rekolt. (Iza. 9:3) Trwazyenmman, ou pou vwar sak dimoun konman enn ki kapab vin disip Kris alor ou pou adapte ou prezantasyon dapre zot lentere.

4. Dan sa lartik, ki nou pou aprann avek zapot Pol?

⁴ Petet serten disip Zezi ti krwar ki bann Samariten  pa ti pou zanmen vin disip Zezi me Zezi pa ti mazin koumsa. O kontrer i ti vwar zot konman bann dimoun ki ti kapab vin son bann disip. Nou osi nou bezwen vwar bann dimoun dan nou teritwar konman bann dimoun ki kapab vin disip Kris. Zapot Pol in kit en legzanp remarkab pour nou swiv. Ki nou kapab aprann avek li? Dan sa lartik, nou pou vwar ki mannyer zapot Pol ti (1) aprann en keksoz lo krwayans sa bann dimoun ki i ti koz avek, (2) konpran kwa ki zot ti enterese ladan e (3) vwar zot konman bann dimoun ki kapab vin disip Zezi.

5. Akoz Pol ti kapab konpran sa bann dimoun ki ti dan sinagog Tesalonik?

⁵ Pol ti souvan anons sa bon nouvel dan bann sinagog Zwif. Par egzanp, “pour trwa saba, i ti rezonn avek [bann Zwif] lo Lekritir,” dan sinagog Tesalonik. (Akt 17:1, 2) I tre probab ki Pol ti santi li konfortab dan sa sinagog. Pol ti grandi konman en Zwif. (Akt 26:4, 5) I ti kapab konpran bann Zwif, alor avek konfidans i ti kapab anons sa bon nouvel avek zot.​—Fili. 3:4, 5.

6. Ki mannyer sa bann dimoun dan bazar Atenn ti diferan avek sa bann ki Pol ti koz avek dan sinagog?

⁶ Apre ki Pol ti bezwen kit Tesalonik ek Bere akoz i ti pe ganny persekite, i ti ariv lavil Atenn. Ankor enn fwa, “i ti konmans rezonn avek bann Zwif ek lezot dimoun ki ti ador Bondye dan sinagog.” (Akt 17:17) Me ler i ti pe anons sa bon nouvel dan bazar, i ti annan en lot lodyans. Parmi sa bann ki ti pe ekout li, i ti annan bann filozof ek bann dimoun lezot nasyon ki ti vwar mesaz Pol konman en “nouvo lansennyman.” Zot ti dir li: “Ou pe dir bann nouvo keksoz ki paret drol pour nou.”​—Akt 17:18-20.

7. Dapre Akt 17:22, 23, ki mannyer Pol ti aziste son prezantasyon?

⁷ Lir Akt 17:22, 23. Lafason ki Pol ti koz avek bann dimoun lezot nasyon Atenn, ti diferan avek lafason ki i ti koz avek bann Zwif dan sinagog. I tre probab ki Pol ti reflesi lo kwa ki sa bann dimoun Atenn ti krwar ladan. I ti obzerv byen otour li e etidye byen zot bann koutim relizye. Apre sa, ler Pol ti koz avek sa bann dimoun lo laverite dan Labib, i ti konmans avek bann keksoz ki zot ti deza aksepte. En spesyalis Labib i dir:  “Konman en Kretyen Zwif, i ti realize ki sa bann Grek ki ti payen pa ti ador sa ‘vre’ Bondye ki bann Zwif ek bann Kretyen ti adore. Me i ti esey fer zot vwar ki sa Bondye ki i pe koz lo la i an realite pa nouvo pour sa bann dimoun Atenn.” Alor Pol ti pare pour adapte son prezantasyon. I ti dir sa bann dimoun ki son mesaz ti sorti kot sa “Bondye enkoni” ki zot ti pe esey adore. Menm si sa bann dimoun lezot nasyon pa ti konn Labib, Pol pa ti krwar ki zot pa ti pou zanmen vin Kretyen. Plito, i ti vwar zot konman bann lagrenn ki ti’n pare pour rekolt e i ti aziste son prezantasyon.

8. (a) Kwa ki kapab ed ou pour konnen ki bann dimoun dan ou teritwar i krwar ladan? (b) Si en dimoun i dir ou ki i annan son larelizyon, ki ou pou dir?

⁸ Parey Pol, fodre ou obzerv byen. Rod bann keksoz ki kapab ed ou konpran sa ki bann dimoun dan ou teritwar i krwar ladan. Ki mannyer sa met lakour in dekor son lakour oubyen son transpor? Eski son non, son lenz, son laparans e menm son fason koze i montre ki larelizyon i ete? Petet i’n dir ou ki i annan son larelizyon. Ler en dimoun ti dir sa avek en pionye spesyal ki apel Flutura, i ti reponn: “Mon pa la pour enpoz mon krwayans lo ou, me pour koz avek ou lo sa size . . . ”

9. Ki nou kapab koz lo la avek en dimoun relizye?

⁹ Ki size ou kapab diskit lo la avek en dimoun ki relizye? Esey trouv bann keksoz ki sa dimoun i krwar ladan e ki ou osi ou krwar ladan. I kapab ki i ador zis en Bondye, i kapab rekonnet Zezi konman sa enn ki’n sov limanite oubyen i kapab krwar ki nou pe viv dan en letan kot i annan bokou keksoz mal e ki byento sa pou fini. Servi sa bann keksoz ki zot tou le de zot krwar ladan pour montre li sa ki Labib i dir.

10. Ki nou devret esey fer e akoz?

¹⁰ Gard antet ki petet dimoun pa krwar tou sa ki zot larelizyon i ansennyen. Menm apre ki ou’n konn son larelizyon, esey trouve ki sa dimoun i krwar ladan. David, en pionye spesyal sorti Lostrali, i dir: “Bokou dimoun i melanz filozofi avek zot krwayans relizye.” Donalta, sorti Lalbani, i dir: “Serten dimoun ki nou zwenn i dir ki zot dan en larelizyon me pli tar zot admet ki zot pa krwar dan Bondye.” En frer ki en misyonner Larzantin i fer remarke ki serten dimoun i dir ki zot krwar dan Trinite me zot pa krwar ki Papa, Garson e lespri sen i en  sel Bondye. I dir: “Ler mon rapel ki sa dimoun pa krwar tou sa ki son larelizyon i ansennyen, i fer li pli fasil pour trouv en keksoz ki sa dimoun i krwar ladan e ki mwan osi mon krwar ladan.” Alor, esey rode ki dimoun i vreman krwar ladan. Parey Pol, ou kapab “vin tou, pour tou sort kalite dimoun.”​—1 Kor. 9:19-23.

11. Dapre Akt 14:14-17, ki mannyer Pol ti adapte son prezantasyon dan en fason ki ti enteres bann dimoun dan lavil Lis?

¹¹ Lir Akt 14:14-17. Pol ti vwar ki keksoz ki ti enteres bann dimoun e i ti adapte son prezantasyon. Par egzanp, dan sa lafoul ki i ti koz avek dan lavil Lis, i annan ki pa ti konn bokou keksoz lo Labib ouswa pa ti konn nanryen lo Labib. Alor, Pol ti koz dan en fason ki zot ti kapab konpran. I ti koz lo bon rekolt ek abilite pour apresye lavi. I ti servi bann mo ek legzanp ki zot ti kapab byen konpran.

12. Ki mannyer ou pou konnen ki keksoz ki enteres en dimoun pour ou adapte ou prezantasyon?

¹² Obzerv byen e reflesir pour ou kapab konnen ki bann keksoz ki enteres dimoun dan ou teritwar e adapte ou prezantasyon. Ki mannyer ou pou konnen ki keksoz ki enteres en dimoun ler ou pe apros li oubyen son lakour? Ankor enn fwa, fodre ou obzerv byen. I kapab ki i pe plante, lir en liv, aranz en transpor oubyen i pe fer en lot keksoz. Petet ou kapab koz lo sa ki i pe fer pour konmans en konversasyon. (Zan 4:7) Menm lenz en dimoun i kapab dir ou en keksoz lo li. Son lenz i kapab dir ou ki pei i sorti, son metye oubyen son tim prefere. Gustavo i dir: “Mon ti konmans en konversasyon avek en garson 19 an ki lo son triko ti annan portre en santer popiler. Mon ti demann li konsernan sa portre ki lo son triko e i ti dir mwan akoz i kontan sa santer. Sa konversasyon ti fini par en letid Labib e aprezan sa garson i en frer.”

13. Ki mannyer ou kapab ofer en letid Labib dan en fason ki enteresan?

 ¹³ Ler ou ofer en dimoun en letid Labib, fer li enteresan pour li e montre li ki mannyer sa letid pou ed li. (Zan 4:13-15) Par egzanp, en ser ki apel Poppy, ti ganny envite dan lakaz en madanm ki ti demontre lentere. Ler Poppy ti vwar sertifika sa madanm lo miray ki montre ki i ti en profeser dan ledikasyon, i ti dir ki nou osi nou ansenny bann dimoun atraver nou progranm letid Labib ek nou bann renyon. Sa madanm ti aksepte en letid Labib, i ti al renyon son lannmen e pli tar i ti asiste lasanble rezyonal. Enn an pli tar, i ti batize. Demann ou lekor: ‘Ki mon bann retourn vizit i enterese ladan? Eski mon kapab eksplik nou progranm letid Labib dan en fason ki zot pou vwar li enteresan?’

14. Ki mannyer ou kapab prepar byen pour en letid Labib?

¹⁴ Apre ki ou’n konmans en letid Labib avek en dimoun, prepar byen sak fwa ki ou pou fer letid avek li. Mazin son fanmir, son ledikasyon, son leksperyans e sa ki enteres li. Anmezir ou pe prepare, deside ki verse ou pou lir, ki video ou pou montre e ki legzanp ou pou servi pour eksplik bann laverite ki dan Labib. Demann ou lekor, ‘Kwa ki pou vreman enteres sa etidyan e tous son leker?’ (Prov. 16:23) En madanm ki reste Lalbani e ki ti pe etidye avek en pionye spesyal ki apel Flora, ti dir: “Mon pa kapab aksepte sa lansennyman lo rezireksyon.” Flora pa ti esey fors sa madanm pour aksepte sa lansennyman deswit. I dir: “Mon ti realize ki avan ki sa madanm i krwar dan rezireksyon, i pou bezwen krwar dan sa Bondye ki promet rezireksyon.” Apartir sa moman, lo sak letid, Flora ti met lanfaz lo lanmour, lasazes ek pwisans Zeova. Pli tar, son etidyan ti pare pour aksepte sa lansennyman lo rezireksyon. Aprezan, i en Temwen Zeova devoue.

15. Dapre Akt 17:16-18, ki bann dimoun ti pe fer Atenn ki ti fatig Pol e akoz i pa ti aret anons sa bon nouvel?

¹⁵ Lir Akt 17:16-18. Pol pa ti dekouraze avek sa bann dimoun Atenn, menm si sa lavil ti ranpli avek pratik idolatri ek imoralite seksyel e zot ti krwar dan bann filozofi payen. I pa ti aret anons sa bon nouvel menm si zot ti ensilte li. Li menm li Pol ti’n vin en Kretyen menm si dan lepase i ti “koz an mal lo Bondye, persekit lezot e [i] ti arogan.” (1 Tim. 1:13) Zis parey Zezi ti vwar ki Pol ti kapab vin en disip, Pol osi ti annan konfyans ki sa bann dimoun Atenn ti pou kapab vin disip Kris e i ti annan rezon.​—Akt 9:13-15; 17:34.

16-17. Kwa ki montre ki tou sort kalite dimoun i kapab vin disip Kris? Donn en legzanp.

¹⁶ Dan premye syek, tou sort kalite dimoun ti vin disip Zezi. Ler Pol ti ekri bann Kretyen ki ti reste Korent dan lavil Grek, i ti dir ki serten dan sa kongregasyon ti deza bann kriminel dan lepase oubyen zot ti pe viv en lavi imoral. I ti osi dir: “Sanmenm ki serten parmi zot ti ete. Me zot in ganny lave e zot prop.” (1 Kor. 6:9-11) Eski ou, ou ti pou vwar sa bann dimoun konman bann ki ti pou kapab vin disip Kris?

¹⁷ Ozordi, bokou dimoun i pare pour fer bann sanzman neseser pour vin disip Kris. Par egzanp, en pionye spesyal ki reste Lostrali e ki apel Yukina, ti aprann  ki tou sort kalite dimoun i kapab aksepte mesaz Labib. En fwa, dan en landrwa biznes, i ti vwar en zenn madanm ki ti annan plizyer tatou lo li. Yukina ti dir: “Mon ti ezite pour en moman, me apre mon ti konmans koz avek li. Mon ti dekouver ki i ti sitan enterese avek Labib ki serten son bann tatou ti bann verse dan Psonm!” Sa madanm ti konmans etidye Labib e asiste renyon. *

18. Akoz nou pa devret ziz dimoun?

¹⁸ Eski Zezi ti vwar ki plantasyon ti’n pare pour rekolt akoz i ti pe ekspekte ki tou dimoun ti pou swiv li? Non. Labib ti predir ki en pti gin dimoun ti pou met lafwa dan li. (Zan 12:37, 38) Zezi ti annan sa abilite pour lir dan leker. (Mat. 9:4) Menm si i ti konsantre lo bann ki ti pou krwar dan li, i ti anons sa bon nouvel avek tou dimoun. Nou pa kapab lir dan leker, alor nou definitivman pa devret ziz en dimoun ki nou zwenn oubyen dimoun dan teritwar! O kontrer, vwar zot konman en dimoun ki kapab vin disip Kris. Marc, ki en misyonner Boukina Faso, i dir: “Bann dimoun ki mon krwar pou progrese, zot menm ki aret etidye me bann dimoun ki mon krwar pa pou fer bokou progre souvan zot progres byen. Alors mon’n aprann ki i pli bon pour les lespri sen Zeova diriz nou.”

19. Ki mannyer nou devret vwar bann dimoun dan nou teritwar?

¹⁹ O konmansman, ou kapab krwar ki napa bokou dimoun dan teritwar ki parey lagrenn ki’n pare pour rekolt. Me rapel sa ki Zezi ti dir son bann disip. Plantasyon in pare, savedir zot in pare pour rekolt. Dimoun i kapab sanze e vin disip Kris. Zeova i vwar bann dimoun konman bann ki kapab vin disip Kris parey “bann keksoz presye.” (Aga. 2:7, NWT) Si nou vwar bann dimoun parey Zeova ek Zezi i vwar, nou pou aprann konn tou sort kalite dimoun ek zot lentere. Nou pa pou vwar zot konman bann etranze me konman bann dimoun ki kapab vin nou bann frer ek ser.