1-2. Kwa sa ranson e akoz nou bezwen li?

LER Adan ki ti en zonm parfe, ti fer pese, li ansanm avek tou son desandans ti perdi sa loportinite pour viv pour touzour. I ti napa okenn leskiz pour sa ki Adan ti fer. I ti swazir pour fer pese. Me son bann zanfan pa’n fer nanryen mal e zot pa’n fer Adan fer pese. (Rom. 5:12, 14) Adan ti merit lanmor pour sa ki i’n fer. Me eski Zeova i kapab fer en keksoz pour ki bann zanfan Adan i viv pour touzour? Wi! Pa lontan apre ki Adan ti’n fer pese, Zeova ti konmans montre ki mannyer i ti pou liber plizyer milyon zanfan Adan dan pese ek lanmor. (Zen. 3:15) Dan son moman apropriye, Zeova ti pou anvoy son Garson sorti dan lesyel pour “donn son lavi konman en ranson pour liber bokou dimoun.”​—Mark 10:45; Zan 6:51.

² Kwa sa ranson? Dapre Lekritir Grek, ranson i sa pri ki Zezi ti peye pour reaste sa ki Adan ti’n perdi. (1 Kor. 15:22) Akoz nou bezwen sa ranson? Parski standar Zeova lo lazistis ki trouve dan Lalwa Moiz, i dir ki en lavi i ganny donnen pour en lavi. (Egz. 21:23, 24) Adan ti perdi son lavi parfe e pour ki lazistis Bondye i ganny fer, Zezi ti donn son lavi parfe. (Rom. 5:17) Alor, Zezi i vin “Papa eternel” pour tou bann ki annan lafwa dan sa ranson.​—Iza. 9:6; Rom. 3:23, 24.

3. Dapre Zan 14:31 ek 15:13, akoz Zezi ti pare pour sakrifye son lavi parfe?

³ Zezi ti pare pour sakrifye son lavi akoz son gran lanmour ki i ti annan pour son Papa ki dan lesyel e pour nou. (Lir Zan 14:31; 15:13.) Vi ki i ti kontan Zeova ek nou en kantite, i ti determinen pour reste fidel tou son lavi e pou akonpli lavolonte son Papa. Sa i fer ki plan Zeova pour bann imen e pour later pou ganny akonplir. Dan sa lartik,  nou pou vwar akoz Bondye ti les Zezi soufer en kantite avan i mor. Nou pou osi pas an bref lo legzanp en ekriven Labib ki ti vreman apresye sa ranson. Finalman, nou pou diskit lo ki mannyer nou kapab demontre e ogmant nou lapresyasyon pour sa ranson ki Zeova ek Zezi in donn nou.

4. Eksplike ki mannyer Zezi ti mor.

⁴ Imazin sa ki ti arive sa dernyen zour avan Zezi i ganny touye. Menm si i ti kapab demande pour ganny led en kantite lanz, pour defann li, i pa ti fer li. O kontrer, i ti les bann solda Romen aret li e fwet li. (Mat. 26:52-54; Zan 18:3; 19:1) Zot ti servi en fwet ki ti fer li en kantite dimal. Pli tar, zot ti fer li anmenn en poto lour lo son ledo ki ti pe sennyen. Zezi ti esey anmenn sa poto ziska sa landrwa kot i ti pou ganny touye. Me bann solda Romen pa ti tarde pour fors en lot zonm pour anmennen pour li. (Mat. 27:32) Ler Zezi ti ariv sa landrwa kot i ti pou mor, bann solda ti klout son lipye ek son lanmen lo sa poto. Ler zot ti met sa poto debout, Zezi ti dan bokou plis douler akoz pwa son lekor ti desir kot klou in perse. Son bann zanmi ek son manman ti plere me bann sef Zwif ti boufonn li. (Lik 23:32-38; Zan 19:25) Zezi ti soufer pour plizyer erdtan. Lafason ki son lekor ti ganny koute lo sa poto, ti met presyon lo son leker ek son poumon e sa ti fer li difisil pour li respire. Zezi ti konnen ki i’n reste fidel e zis avan i mor, i ti priy Zeova pour en dernyen fwa. Apre sa, i ti bes son latet e i ti mor. (Mark 15:37; Lik 23:46; Zan 10:17, 18; 19:30) Sa fason ki Zezi ti mor ti vreman fermal e anbarasan.

5. Pour Zezi, ki ti sa keksoz pli terib ki lafason ki i ti ganny touye?

⁵ Pour Zezi, lafason ki i ti ganny touye pa ti sa keksoz pli terib. Sa ki ti fer li vreman sagren ti sa lakizasyon ki ti ganny fer kont li pour li ganny touye. I ti ganny akize konmkwa i ti napa respe pour Bondye oubyen Son non. (Mat. 26:64-66) Sa lakizasyon ti telman fatig li, ki i ti swete ki son Papa pa les li ganny imilye dan sa fason. (Mat. 26:38, 39, 42) Akoz Zeova ti les son Garson soufer e mor? Annou vwar trwa rezon.

6. Akoz Zezi ti bezwen ganny mete anpandan lo en poto?

⁶ Premyerman, Zezi ti bezwen mor lo en poto pour liber bann Zwif anba en malediksyon. (Gal. 3:10, 13) Zot ti ganny sa malediksyon parski zot ti’n promet pour obei Lalwa Bondye me zot pa ti fer li. Alor, zot ti annan sa malediksyon lo zot e zot ti osi merit lanmor akoz zot ti bann desandans Adan. (Rom. 5:12) Lalwa ki Bondye ti donn bann Izraelit ti dir ki en zonm ki fer en pese ki merit lanmor, i devret ganny egzekite. Apre sa, dan serten ka son lekor mor ti ganny mete lo en poto. * (Det. 21:22, 23; 27:26) Alor, vi ki Zezi ti ganny kloute lo en poto, bann Zwif ti pou kapab ganny libere anba sa malediksyon e son sakrifis ti pou kapab ed zot menm si zot ti rezet li.

7. Ki en dezyenm rezon akoz Bondye ti les son Garson soufer?

⁷ Annou vwar en dezyenm rezon akoz Bondye ti les son Garson soufer. I ti pe  form Zezi pour ler i vin Granpret. Zezi i konnen ki kantite i difisil pour obei Bondye dan bann moman vreman difisil. Telman i ti anba presyon, i ti priye pour ganny led “avek gran leokri ek larm.” Alor, vi ki Zezi in soufer en kantite, i konpran sa ki nou bezwen e ‘i kapab ed nou ler nou pe ganny teste.’ Nou vreman rekonesan ki Zeova in donn nou en Granpret ki pran pitye e ki kapab “konpran nou febles”!​—Ebr. 2:17, 18; 4:14-16; 5:7-10.

8. Ki en trwazyenm rezon akoz Bondye ti les Zezi ganny teste en kantite?

⁸ Trwazyenmman, Zeova ti les Zezi soufer en kantite pour kapab reponn en kestyon enportan: Eski bann imen i kapab reste fidel avek Zeova menm ler zot pas dan bann gro leprev? Satan i dir non! I dir ki bann imen i servi Bondye akoz zot anvi ganny en keksoz avek Bondye. I krwar ki zot pa kontan Zeova zis parey Adan. (Zob 1:9-11, NWT; 2:4, 5) Zeova ti annan konfyans ki son Garson ti pou reste fidel, alor i ti les li ganny teste en kantite. Zezi ti reste fidel e i ti montre ki Satan i en manter.

9. Ki legzanp zapot Zan in kite pour nou?

⁹ Lafwa en kantite Kretyen in vin pli for avek sa ki zot in aprann lo ranson. Zot in kontinyen prese malgre lopozisyon e zot in andir tou sort leprev dan zot lavi antye. Annou vwar legzanp zapot Zan. I tre probab ki i ti anons sa bon nouvel konsernan Zezi ek sa ranson pour plis ki 60 an. Ler i ti annan apepre 100 an, gouvernman Romen ti panse ki i ti telman danzere ki zot ti anvoy li konman en prizonnyen lo zil Patmos. Ki i ti’n fer mal? I ti pe “koz lo Bondye e rann temwannyaz konsernan Zezi.” (Rev. 1:9) Zan in kit en bon legzanp lafwa ek landirans!

10. Ki mannyer sa ki Zan ti ekri i montre ki i ti apresye ranson?

¹⁰ Dan bann liv Labib ki Zan ti ekri, i ti ekri lo ki kantite i ti kontan Zezi e ki kantite i ti rekonesan pour son sakrifis. I ti koz plis ki 100 fwa lo ranson oubyen lo bann bon keksoz ki’n posib gras a ranson. Par egzanp, Zan ti ekri: “Si en dimoun i fer en pese, nou annan en asistan ki avek nou Papa e sa se Zezi Kri, sa enn ki drwat.” (1 Zan 2:1, 2) Sa ki Zan ti ekri ti osi met lanfaz lo lenportans pour “rann temwannyaz lo Zezi.” (Rev. 19:10) I kler ki Zan ti vreman apresye sa ranson. Ki mannyer nou kapab montre ki nou osi nou apresye sa ranson?

11. Kwa ki kapab ed nou pour reziste tantasyon?

¹¹ Reziste tantasyon. Si nou vreman apresye sa ranson, nou pa pou mazinen: ‘Mon pa bezwen fer zefor pour mon pa fer pese ler mon ganny tante. Mon kapab fer en keksoz mal e apre demann pardon.’ O kontrer, ler nou ganny tante, nou pou dir: ‘Non! Apre tou sa ki Zeova ek Zezi in fer pour mwan, mon pa pou zanmen kapab fer en keksoz koumsa.’ Anliny avek sa, nou kapab demann Zeova lafors e sipliy li pour: ‘Pa les mwan tonm dan tantasyon.’​—Mat. 6:13.

12. Ki mannyer nou kapab aplik sa konsey dan 1 Zan 3:16-18?

¹² Kontan ou bann frer ek ser. Ler nou demontre sa kalite lanmour, nou osi  demontre nou lapresyasyon pour sa ranson. Akoz? Parski Zezi ti donn son lavi pour nou e osi pour nou bann frer ek ser. Vi ki Zezi ti pare pour mor pour zot, sa i montre ki i kontan zot en kantite. (Lir 1 Zan 3:16-18.) Nou demontre nou lanmour pour nou bann frer ek ser par lafason ki nou tret zot. (Efe. 4:29, 31–5:2) Par egzanp, nou ed zot ler zot malad oubyen ler zot pe fer fas avek bann gro leprev ki enkli dezas natirel. Me ki nou devret fer ler en frer oubyen ser i fer ouswa dir en keksoz ki ofans nou?

13. Akoz nou devret pardonnen?

¹³ Eski parfwa ou vwar li difisil pour pardonn en frer oubyen en ser? (Lev. 19:18) Si wi, swiv sa konsey: “Kontinyen siport kanmarad e pardonn kanmarad volonterman menm si en dimoun i annan rezon pour konplent akoz en lot. Parey Zeova in volonterman pardonn zot, zot osi zot devret fer parey.” (Kol. 3:13) Sak fwa nou pardonn en frer oubyen ser, nou montre nou Papa ki dan lesyel ki nou vreman apresye sa ranson. Ki mannyer nou kapab ogmant nou lapresyasyon pour sa kado ki Bondye in donn nou?

14. Ki en fason ki nou kapab ogmant nou lapresyasyon pour ranson?

¹⁴ Remersye Zeova pour sa ranson. En ser 83 an ki apel Joanna e ki reste dan Lenn, i dir: “Mon krwar ki i enportan pour mansyonn sa ranson toulezour dan mon lapriyer e pour remersye Zeova pour sa.” Sak zour ler ou fer ou lapriyer, dir Zeova ki ou’n fer mal e demann li pour pardonn ou. Byensir, si ou’n fer en fot grav, ou pou osi bezwen led bann ansyen. Zot pou ekout ou e donn ou bann bon konsey ki sorti dan Parol Bondye. Zot pou priy avek ou e demann Zeova pour pardonn ou pour ki ou kapab annan en bon lanmitye avek Zeova ankor.​—Zak 5:14-16.

15. Akoz ou devret pran letan pour lir konsernan sa ranson e medit lo la?

¹⁵ Medit lo sa ranson. En ser 73 an ki apel Rajamani i dir: “Sak fwa mon lir lo bann soufrans ki Zezi in pas atraver, mon larm i koule.” Ou osi ou kapab vin emosyonnel ler ou mazin ki mannyer Garson Bondye ti soufer en kantite. Me pli ou medit lo sa sakrifis ki Zezi in fer,  ou lanmour pour li ek son Papa pou vin pli for. Pour ed ou medit lo sa ranson, petet ou kapab etidye sa topik.

16. Ler nou ansenny lezot lo ranson, ki mannyer sa i kapab ed zot? (Vwar portre lo kouvertir.)

¹⁶ Ansenny lezot lo sa ranson. Sak fwa nou koz avek lezot lo sa ranson, nou pou devlop plis lapresyasyon. Nou annan bann bon piblikasyon ek video ki ed nou eksplik lezot akoz Zezi ti bezwen mor pour nou. Par egzanp, nou kapab servi leson 4 dan sa brosir Bon nouvel sorti kot Bondye! Sa leson i annan pour tit “Lekel Zezi Kri?” Oubyen, nou kapab refer avek sapit 5 dan sa liv Ki Labib i dir? Sa sapit i annan pour tit “Ranson i pli gro kado Bondye.” Sak lannen nou ogmant nou lapresyasyon pour ranson ler nou asiste Memoryal lanmor Zezi e ler nou determinen pour envit lezot pour zwenn avek nou. Zeova in donn nou sa gran privilez pour ansenny lezot konsernan son Garson.

17. Akoz ranson i sa pli gro kado ki Bondye in donn nou?

¹⁷ San dout, nou annan bon rezon pour devlop e ogmant nou lapresyasyon pour ranson. Gras a sa ranson, nou kapab annan en lanmitye pros avek Zeova menm si nou enparfe. Gras a sa ranson, lemal ki Dyab in fer pour ganny eliminen. (1 Zan 3:8) Gras a sa ranson, plan Zeova pour later pou ganny akonplir. Later antye pou vin en paradi. Tou dimoun ki ou pou zwenn pou kontan e servi Zeova. Annou toulezour kontinyen rod bann fason pour demontre nou lapresyasyon pour sa ranson, setadir sa pli gro kado ki Bondye in donn nou!