Akoz Zezi ti sit parol David ki dan Psonm 22:1 avan i ti mor?

Parmi bann dernyen parol ki Zezi ti dir avan i mor, i sa ki’n ganny ekrir dan Matye 27:46: “Mon Bondye, mon Bondye, akoz ou’n abandonn mwan?” Ler Zezi ti dir sa, i ti akonpli sa ki David ti dir dan Psonm 22:1. (Mark 15:34) I ti pou mal pour dir ki Zezi ti sit sa bann parol akoz i ti dezapwente ouswa akoz i ti mank lafwa a sa moman. Zezi ti konpran akoz i ti bezwen mor e i ti pare pour li mor. (Mat. 16:21; 20:28) I ti osi konnen ki ler i ti pou mor, Zeova ti pou bezwen aret protez li. (Zob 1:10, NWT) Alor, Zeova ti aret protez Zezi, pour ki Zezi i kapab prouve ki i ti pou toultan reste fidel menm si son lanmor ti pou difisil.​—Mark 14:35, 36.

Alor, akoz Zezi ti dir sa bann parol ki dan sa Psonm? Menm si nou pa konnen egzakteman akoz, annou vwar serten posibilite. *

Ler Zezi ti dir sa bann parol, eski i ti pe met lanfaz lo lefet ki Zeova pa ti pou entervenir dan son lanmor? Zezi ti bezwen pey sa ranson san led Zeova. I ti en imen e i ti bezwen mor pour ki i kapab “mor pour tou dimoun.”​—Ebr. 2:9.

Ler Zezi ti sit serten mo dan Psonm 22, eski i ti anvi ki lezot i mazin sa Psonm antye? Dan sa letan, i ti en labitid pour bann Zwif rapel en kantite psonm par ker. Alor,  ler zot ti tann en verse dan en psonm, zot ti pou otomatikman rapel sa psonm antye. Si sanmenm ki Zezi ti anvi fer, i ti pou pe ed son bann disip ki ti Zwif pour rapel bann levennman ki ti pou arive avan, pandan e apre son lanmor, ki’n ganny ekrir dan Psonm 22. (Ps. 22:7, 8, 15, 16, 18, 24) Sa dernyen verse dan sa Psonm i loue Zeova e Zeova i ganny dekrir konman lerwa lo later antye.​—Ps. 22:27-31.

Ler Zezi ti sit parol ki David ti dir, eski i ti pe dir ki i inosan? Avan Zezi i ganny touye, i ti ganny zize dan en fason ilegal, konmkwa i koupab pour koz kont Bondye. (Mat. 26:65, 66) Sannedren ti zwenn ansanm pandan lannwit e pas sa zizman san obei bann standar legal. (Mat. 26:59; Mark 14:56-59) Ler Zezi ti sit sa bann parol, i ti kapab pe dir ki i pa ti’n fer nanryen mal e ki i ti napa rezon pour touy li.

Eski Zezi ti pe osi fer lezot rapel ki menm si David, ekriven sa Psonm ti pe soufer, sa pa vedir ki i ti’n perdi laprouvasyon Zeova? Sa kestyon ki David ti demande pa vedir ki i ti’n perdi lafwa dan Bondye. Parski apre sa i ti dir ki i annan konfyans ki Zeova i kapab sov son pep e Zeova ti kontinyen beni li. (Ps. 22:23, 24, 27) Pareyman, menm si Zezi “Garson David,” ti pe soufer lo poto, sa pa vedir ki Zezi ti’n perdi laprouvasyon Zeova.​—Mat. 21:9.

Eski Zezi ti sagren akoz Zeova ti’n aret protez li pour li kapab montre ki i ti pou reste fidel? I pa ti dan plan Zeova pour Zezi soufer e mor. Me Zezi ti bezwen mor apre ki Adan ek Ev ti dezobei. Zezi pa ti’n fer nanryen mal, me i ti bezwen soufer e mor pour li kapab reponn bann kestyon ki Satan ti’n leve e pour pey sa ranson pour imen reganny sa ki zot ti’n perdi. (Mark 8:31; 1 Pyer 2:21-24) Sa ti pou kapab arive si selman Zeova ti aret protez Zezi pour en serten letan dan son lavi.

Eski Zezi ti pe esey ed son bann disip pour konsantre lo rezon akoz Zeova ti les li mor lo en poto? * Zezi ti konnen ki pour li mor parey en kriminel lo en poto ti pou vin en lobstak pour bokou dimoun. (1 Kor. 1:23) Me si son bann disip ti konsantre lo sa vre rezon ki i ti mor, zot ti pou konpran vreman ki son lanmor i vedir. (Gal. 3:13, 14) Alor, zot ti pou konnen ki i zot Sover e i pa en kriminel.

Nenport ki rezon Zezi ti annan pour sit sa verse, i ti konnen ki i ti pe fer lavolonte Zeova ler i ti pou mor lo sa poto. Pa bokou letan apre ki Zezi ti sit sa bann verse dan Psonm, i ti dir: “I’n ganny akonplir!” (Zan 19:30; Lik 22:37) Lefet ki Zeova ti aret protez Zezi pour en serten letan sa ti permet Zezi pour akonpli tou sa ki i ti’n ganny anvoye lo later pour fer. I ti osi permet li pour akonpli serten keksoz ki’n ganny ekrir lo li “dan Lalwa Moiz, liv bann Profet ek bann Psonm.”​—Lik 24:44.