1-2. Dan ki fason nou kapab swiv lepa Zezi? Donn en legzanp.

IMAZIN ou dan en group pe fer hike dan lafore. Sa landrwa i bwaze, i annan labou ek bokou lafoumbal. En gid eksperyanse pe gid zot. Anmezir ki i marse, i kit bann lepa dan labou. A en serten moman, ou nepli vwar sa gid. Me ou pa panik. O kontrer, ou ansanm avek lezot dan sa group zot swiv byen lepa sa gid.

² Sa move lemonn ki nou pe viv ladan ozordi, i parey ler nou pe fer en hike dan en lafore danzere. Erezman Zeova in donn nou en gid parfe e sa i son garson Zezi Kri. Nou kapab swiv son lepa fidelman. (1 Pyer 2:21) Dapre en referans Labib, dan sa verse, Pyer i konpar Zezi avek en gid. Parey en gid i kit son lepa deryer ler i marse, Zezi in kit son lepa pour nou swiv. Ki savedir swiv lepa Zezi? Akoz nou devret swiv lepa Zezi fidelman e ki mannyer nou kapab fer li? Aprezan nou pou reponn sa bann kestyon.

3. Ki savedir swiv lepa en dimoun?

³ Ki savedir swiv lepa en dimoun? Parfwa dan Labib, sa mo “mars” ek sa mo “lipye” i refer avek sa ki en dimoun i fer dan son lavi. (Zen. 6:9; Prov. 4:26, NWT) Lafason ki en dimoun i viv son lavi i kapab ganny konpare avek bann lepa ki i kit deryer ler i marse. Alor, pour swiv lepa en dimoun i vedir swiv son legzanp oubyen fer parey li.

4. Ki savedir swiv lepa Zezi?

⁴ Ki savedir swiv lepa Zezi? I vedir swiv son legzanp. Dan verse tenm sa lartik, zapot Pyer pe koz lo bon legzanp ki Zezi in kite ler i ti andire menm si i ti pe soufer. Par kont, i annan en kantite keksoz ki Zezi in fer ki nou kapab fer parey li. (1 Pyer 2:18-25) Alor, tou sa ki Zezi in dir e fer, i en legzanp pour nou swiv.

5. Eski bann imen enparfe i kapab swiv legzanp Zezi parfetman? Eksplike.

 ⁵ Konman bann imen enparfe, eski nou vreman kapab swiv legzanp Zezi? Wi, nou kapab. Rapel ki zapot Pyer ti ankouraz nou pour swiv lepa Zezi fidelman e non pa parfetman. Si nou swiv son lepa byen pros setadir si nou fer nou mye pour swiv son legzanp menm si nou bann imen enparfe, nou pou pe aplik sa ki zapot Zan ti dir: “Kontinyen viv parey li i ti viv.”​—1 Zan 2:6.

6-7. Akoz nou kapab dir ki ler nou swiv lepa Zezi nou vin pli pros avek Zeova?

⁶ Si nou swiv lepa Zezi, nou pou vin pli pros avek Zeova. Akoz nou kapab dir sa? Premyerman, Zezi in kit en bon legzanp lo ki mannyer pour viv dan en fason ki fer plezir Bondye. (Zan 8:29) Alor, ler nou swiv lepa Zezi, nou fer plezir Zeova e nou kapab asire ki nou Papa ki dan lesyel pou vin pli pros avek bann ki fer zefor pour vin son zanmi.​—Zak 4:8.

⁷ Dezyenmman, Zezi ti swiv legzanp son Papa dan en fason parfe. Sanmenm sa Zezi ti kapab dir: “Sa ki’n vwar mwan, i’n vwar mon Papa osi.” (Zan 14:9) Nou kapab swiv legzanp Zezi par demontre bann menm kalite ki i ti demontre e par tret lezot parey i ti tret lezot. Par egzanp, i ti pran pitye pour en lepre, i ti konpran santiman en madanm ki ti pe soufer avek en maladi grav e i ti annan konpasyon pour bann ki’n perdi en dimoun ki zot kontan dan lanmor. Ler nou swiv legzanp Zezi, nou osi swiv legzanp Zeova. (Mark 1:40, 41; 5:25-34; Zan 11:33-35) Pli nou demontre bann menm kalite ki Zeova i annan, pli nou vin pli pros avek li.

8. Eksplike akoz ler nou swiv lepa Zezi, sa i kapab ed nou pour “ranport laviktwar” lo lemonn.

 ⁸ Si nou swiv lepa Zezi, nou pa pou les sa move lemonn fer nou aret konsantre lo nou servis pour Zeova. Sa dernyen lannwit avan Zezi i mor, i ti dir: “Mon’n ranport laviktwar lo lemonn!” (Zan 16:33) I ti pe dir ki i pa’n les li ganny enfliyanse avek fason panse, lobzektif ek fason fer dimoun dan sa lemonn. Zezi pa ti zanmen oubliye ki i ti’n ganny anvoye lo later pour sanktifye non Zeova. Pareyman, dan sa lemonn i annan en kantite keksoz ki kapab fer nou aret konsantre lo nou servis pour Zeova. Me si nou konsantre lo fer lavolonte Zeova parey Zezi, nou osi nou pou “ranport laviktwar lo lemonn.”​—1 Zan 5:5.

9. Ki nou bezwen fer pour ganny lavi eternel?

⁹ Si nou swiv lepa Zezi, nou kapab viv pour touzour. Ler en zonm ris ti demann Zezi ki i bezwen fer pour ganny lavi eternel, Zezi ti dir li: “Vin mon disip.” (Mat. 19:16-21) Avek serten Zwif ki pa ti krwar ki Zezi i Kris, Zezi ti dir: “Mon bann mouton i . . . swiv mwan. Mon donn zot lavi eternel.” (Zan 10:24-29) Ler i ti pe koz avek Nikodenm ki ti en manm Sannedren e ki ti anvi konn plis lo bann lansennyman Zezi, Zezi ti dir ki bann ki “demontre lafwa dan li” pou “ganny lavi eternel.” (Zan 3:16) Nou demontre lafwa dan Zezi ler nou fer sa ki i ti dir e fer sa ki i ti fer. Si nou fer sa, nou pou ganny lavi eternel.​—Mat. 7:14.

10. Ki nou bezwen fer pour “aprann konn” Zezi pli byen? (Zan 17:3)

¹⁰ Avan nou kapab swiv lepa Zezi fidelman, nou bezwen aprann konn li. (Lir Zan 17:3.) Sa i en keksoz ki nou bezwen kontinyen fer. Nou bezwen kontinyen aprann konn li setadir aprann konn son bann kalite, son fason panse ek son bann standar. Nenport ki kantite letan nou dan laverite, nou bezwen fer zefor pour “aprann konn” Zeova ek son Garson.

11. Ki nou kapab aprann dan sa kat Levanzil?

¹¹ Zeova in met sa kat Levanzil dan son Parol pour ed nou aprann konn son Garson. Sa bann Levanzil i koz lo lavi Zezi ek son minister. I osi montre nou sa ki Zezi ti dir, fer e lafason ki i ti santi. Sa kat Levanzil i ed nou pour “reflesir byen lo legzanp” Zezi. (Ebr. 12:3) Sa bann resi dan sa kat Levanzil, i parey bann lepa ki Zezi in kit deryer. Alor, ler nou etidye sa kat Levanzil, nou kapab aprann konn Zezi pli byen e swiv son lepa fidelman.

12. Ki nou kapab fer pour aplik sa ki nou pe lir dan bann Levanzil?

¹² Pour nou kapab aplik sa ki i dir dan  bann Levanzil, nou bezwen fer plis ki zis lir. Nou bezwen pran letan pour etidye e medit lo sa ki nou lir. (Konpar Zozye 1:8.) Aprezan annou diskit lo de sizesyon ki kapab ed nou pour medit lo sa bann Levanzil e aplik li.

13. Ki mannyer ou kapab fer bann resi dan bann Levanzil vin pli reel pour ou?

¹³ Premyerman, fer sa resi dan sa Levanzil vin pli reel pour ou. Servi ou limazinasyon pour vwar, tande e santi sa ki ti pe arive. Pour ed ou fer sa, fer resers dan bann piblikasyon ki lorganizasyon Zeova i donnen. Get bann levennman ki’n arive avan e apre sa resi ki ou pe etidye. Rod plis lenformasyon lo bann dimoun e landrwa ki’n ganny mansyonnen dan sa resi. Konpar sa resi ki ou pe etidye avek en resi dan en lot Levanzil ki pe koz lo menm levennman. Parfwa en ekriven i kapab ekri en detay ki en lot pa’n mete dan son Levanzil.

14-15. Ki nou devret fer pour aplik sa ki nou aprann dan bann resi konsernan Zezi?

¹⁴ Dezyenmman, aplik sa ki ou pe aprann avek sa resi dan sa Levanzil. (Zan 13:17) Apre ki ou’n etidye byen en resi dan en Levanzil, demann ou lekor: ‘Eski i annan en leson dan sa resi ki mon kapab aplike? Ki mannyer mon kapab servi sa resi pour ed en lot dimoun?’ Esey mazin en dimoun ki ou konnen e avek lanmour ek labonte, koz lo sa ki ou’n aprann avek li.

¹⁵ Annou vwar en legzanp lo ki mannyer nou kapab aplik sa de sizesyon. Nou pou diskit lo sa resi konsernan en vev pov ki Zezi ti obzerve dan tanp.

16. Dekri sa ki ti pe arive dan Mark 12:41.

¹⁶ Fer sa resi vin pli reel pour ou. (Lir Mark 12:41.) Imazin sa ki ti pe arive. I le 11 Nizan lannen 33 mwens ki  en semenn avan ki Zezi i ganny touye. Zezi in pas preski en lazournen antye dan tanp pe ansennyen. Me bann sef relizye ti pe opoz li. Serten parmi zot ti pe kestyonn son lotorite. Lezot ti pe demann li bann kestyon ki zot krwar i pa ti pou kapab reponn. (Mark 11:27-33; 12:13-34) Aprezan Zezi i al dan en lot landrwa dan tanp. I kapab ki sa landrwa ti apel lakour bann madanm e laba i ti kapab vwar bwat kontribisyon. I asize e i obzerv bann dimoun anmezir ki zot met zot kontribisyon dan bwat. I vwar en kantite dimoun ris pe met bokou larzan dan bwat e petet i ase pros pour li tann byen sa tapaz larzan ki pe grennen dan bwat.

17. Ki sa “vev pov” dan Mark 12:42 ti fer?

¹⁷ Lir Mark 12:42. Apre en pe letan, Zezi i vwar en madanm ki en “vev pov.” (Lik 21:2) Lavi sa madanm i vreman difisil e i tre probab ki i napa ase larzan pour aste sa ki i bezwen pour viv. Kantmenm sa, i al kot enn sa bwat kontribisyon e dan en fason diskre, i larg de pti sou dan bwat. I kapab ki sa de pti sou pa’n fer preski okenn tapaz ler zot tonm dan bwat. Zezi i konnen ki sa madanm in mete dan bwat. I’n met de lepton ki ti sa pli pti kalen ki ti ganny servi sa letan. Sa pa ni menm ase pour aste en sren, ki enn bann zwazo pli bonmarse ki dimoun i aste pour manze.

18. Dapre Mark 12:43, 44, ki Zezi ti dir konsernan kontribisyon sa vev?

¹⁸ Lir Mark 12:43, 44. Zezi i vreman enpresyonnen avek sa vev. Alor, i kriy son bann disip e i montre zot sa vev. I dir zot: “Sa pov vev in met plis ki tou lezot dimoun.” Apre i eksplik zot: “Zot [espesyalman bann dimoun ris] tou zot in met sa ki zot ti annan an plis, me li, menm si i dan bezwen, i’n met tou sa ki i ti annan, tou sa ki i ti annan pour viv.” Ler sa vev fidel ti donn tou larzan ki ti reste li sa zour, i ti annan konfyans ki Zeova ti pou pran swen avek li.​—Ps. 26:3.

19. Ki leson enportan nou kapab aprann avek parol ki Zezi ti dir konsernan sa vev?

¹⁹ Aplik sa resi dan ou lavi. Demann ou lekor: ‘Ki leson mon kapab aprann avek parol ki Zezi ti dir konsernan sa vev?’ Mazin sa vev. I tre probab ki i ti anvi donn Zeova plis ki sa. Kantmenm sa, i’n fer sa ki i kapab e i’n donn Zeova son meyer. Zezi ti konnen ki son kontribisyon ti presye pour Zeova. Sa i en leson enportan pour nou. I montre nou ki Zeova i vreman kontan ler nou donn li nou meyer setadir ler nou servi li avek tou nou leker. (Mat. 22:37; Kol. 3:23) Zeova i kontan ler i vwar nou pe fer tou sa ki nou kapab pour servi li! Sa prensip i aplik pour lakantite letan ki nou kapab pase pe ador li e sa i enkli ler nou partisip dan predikasyon e asiste renyon.

20. Ki mannyer ou kapab aplik sa leson dan sa resi konsernan sa vev? Donn en legzanp.

²⁰ Ki mannyer ou kapab aplik sa leson dan sa resi konsernan sa vev? Esey mazin bann dimoun ki pou ganny ankouraze ler ou dir zot ki Zeova i kontan zefor ki zot pe fer pour li. Par egzanp, eski ou konn en ser aze ki annan problenm lasante, ki nepli annan lafors e ki petet i santi li koupab ouswa pa vo nanryen akoz i pa kapab fer parey i ti abitye dan predikasyon? Oubyen, eski ou kapab mazin en frer ki pe soufer avek en maladi  grav e ki dekouraze akoz i pa kapab asiste tou son renyon? Annou ed zot par dir zot bann keksoz “ki bon pour batir.” (Efe. 4:29) Koz avek zot lo sa leson ankourazan ki nou’n aprann dan sa resi konsernan sa vev pov. Ou bann parol ankourazan i kapab fer zot rapel ki Zeova i kontan ler nou donn li nou meyer. (Prov. 15:23; 1 Tesa. 5:11) Ler ou felisit lezot akoz zot donn Zeova zot meyer, menm si i pa bokou, ou pe swiv lepa Zezi fidelman.

21. Ki ou determinen pour fer?

²¹ Nou vreman rekonesan ki bann resi dan Levanzil i donn nou en kantite detay konsernan lavi Zezi, parski zot ed nou pour swiv son legzanp e pour swiv son lepa fidelman! Nou kapab servi sa bann Levanzil konman en proze pour nou letid personnel oubyen ladorasyon fanmir. Rapel ki pour nou ganny bann byenfe ler nou etidye sa bann Levanzil, nou bezwen fer sa bann resi vin pli reel pour nou e aplik sa ki nou etidye dan nou lavi. Nou bezwen fer sa ki Zezi ti fer me nou osi bezwen ekout sa ki i ti dir. Dan sa lartik ki swiv, nou pou vwar ki nou kapab aprann avek bann dernyen parol ki Zezi ti dir avan i ti mor.