1. Ki Zeova i remarke dan son pep?

ZEOVA i “pran plezir dan son pep.” (Ps. 149:4) Sa i fer nou vreman kontan! Zeova i vwar nou bann bon kalite, i vwar sa bon dimoun ki nou kapab vini e i ed nou pour vin son zanmi. Si nou reste fidel avek li, i pou reste pros avek nou pour touzour!​—Zan 6:44.

2. Akoz serten i vwar li difisil pour krwar ki Zeova i kontan zot?

² Serten i kapab dir: ‘Mon konnen ki Zeova i kontan son pep konman en group me ki mannyer mon kapab asire ki Zeova i kontan mwan personnelman?’ Akoz en dimoun i kapab demann sa kestyon? Oksana * ki ti soufer en kantite ler i ti ankor zanfan, i dir: “Mon ti vreman kontan ler mon ti batize e vin en pionye. Me 15 an pli tar, mon ti konmans mazin bann move keksoz ki’n arive avek mwan ler mon ti ankor zanfan. Mon ti konmans krwar ki mon ti’n perdi laprouvasyon Zeova e ki i pa ti pou kapab kontan mwan.” En ser pionye ki apel Yua e ki li osi in soufer en kantite ler i ti ankor zenn, i dir: “Mon’n dedye mon lavi avek Zeova parski mon ti anvi fer li kontan. Me mon ti asire ki i pa ti pou zanmen kapab kontan mwan.”

3. Ki nou pou aprann dan sa lartik?

³ Parey sa de ser fidel ki fek ganny mansyonnen, ou kontan Zeova en kantite me ou kapab doute ki Zeova i kontan ou. Akoz ou bezwen asire ki i vreman kontan ou? Kwa ki kapab ed ou ler ou krwar ki Zeova pa kontan ou? Nou pou reponn sa bann kestyon.

4. Akoz i danzere pour doute ki Zeova i kontan nou?

⁴ Lanmour i kapab motiv en dimoun pour fer en keksoz. Si nou asire ki Zeova i kontan nou, nou pou anvi fer nou mye pour servi li menm ler nou lavi pa fasil. De lot kote, si nou annan dout ki Zeova i kontan nou, nou “lafors pou ptigin.” (Prov. 24:10, NWT) Ler nou dekouraze e nou konmans krwar ki Bondye pa kontan nou, nou pa pou reisi reziste bann latak Satan.​—Efe. 6:16.

5. Ki’n arive avek bann frer ek ser ki pa ti krwar ki Bondye i kontan zot?

 ⁵ Lafwa serten nou bann frer ek ser in afebli akoz zot in konmans krwar ki Zeova pa kontan zot e ki i pa enterese avek zot. En ansyen ki apel James i dir: “Menm si mon ti pe servi Betel e mon ti dan en kongregasyon ki koz en lot langaz, mon pa ti asire si Zeova ti kontan sa ki mon ti pe fer pour li. Mon ti menm konmans demande si Zeova ti pe vreman ekout mon lapriyer.” Eva, en ser ki li osi i dan servis a plen tan i dir: “Mon’n aprann ki i danzere pour krwar ki Zeova pa kontan nou akoz sa i annan en lefe lo tou sa ki nou fer pour li. I fer nou aret anvi fer bann keksoz pour Zeova e nou nepli servi Zeova dan lazwa.” Michael, en pionye ordiner e en ansyen i dir: “Si ou pa krwar ki Bondye i enterese avek ou, ou pou dekil lwen avek li.”

6. Ki nou bezwen fer ler nou konmans krwar ki Bondye pa kontan nou?

⁶ Sa bann leksperyans i montre ki nou lafwa i kapab afeblir si nou krwar ki Zeova pa kontan nou. Me ki nou devret fer ler nou konmans krwar ki Zeova pa kontan nou? Nou bezwen aret mazin lo la deswit! Demann Zeova pour ed ou ranplas sa bann “panse ki pe trakas” ou avek ‘lape Bondye ki kapab protez ou leker ek lespri.’ (Ps. 139:23, NWT; Fili. 4:6, 7) Rapel ki pa zis ou ki annan sa bann panse. Lezot frer ek ser pe lager avek bann panse negatif. Menm bann serviter Zeova dan lepase in bezwen lager avek sa bann santiman. Annou vwar ki nou kapab aprann avek legzanp zapot Pol.

7. Ki problenm Pol ti fer fas avek?

⁷ Eski parfwa ou santi ki ou annan tro bokou responsabilite e ki i tro difisil pour fer tou sa ki ou annan pour fer? Si  wi, ou pou konpran zapot Pol. I ti enkyet pa zis pour en kongregasyon me “pour tou bann kongregasyon.” (2 Kor. 11:23-28) Eski ou annan bann problenm lasante ki kapab fer ou perdi ou lazwa? Pol ti annan en problenm ki ti fer li soufer en kantite. I kapab ki sa ti en problenm lasante e i ti anvi ki sa problenm i ale. (2 Kor. 12:7-10) Eski parfwa ou dekouraze akoz ou lenperfeksyon? Pol osi parfwa i ti santi koumsa. Telman i ti bezwen lager pour fer sa ki byen, i ti dir: “Pov mwan!”​—Rom. 7:21-24.

8. Kwa ki ti ed Pol pour fer fas avek son bann problenm?

⁸ Menm si Pol ti bezwen andir tou sa bann problenm, i ti kontinyen servi Zeova. Kwa ki ti donn li lafors pour fer sa? Menm si i ti konnen ki i annan son bann lenperfeksyon, i ti annan en lafwa for dan ranson. I ti osi konn sa promes Zezi ki dir: “Nenport ki ki demontre lafwa dan [Zezi] . . . i ganny lavi eternel.” (Zan 3:16; Rom. 6:23) Pol ti annan lafwa dan sa ranson. I ti asire ki Zeova i anvi pardonn menm bann ki’n fer bann pese grav, si zot repantir senserman.​—Ps. 86:5.

9. Ki nou aprann avek sa ki Pol ti dir dan Galat 2:20?

⁹ Pol ti osi annan lafwa ki Bondye ti kontan li en kantite akoz i ti konnen ki Bondye ti anvoy Zezi pour mor pour li. (Lir Galat 2:20.) Remark sa parol rekonfortan lo finisyon sa verse. Pol ti dir: “Garson Bondye [i] kontan mwan e [i’n] donn son lavi pour mwan.” Pol pa ti santi ki i ti sitan move ki Bondye pa ti pou kapab kontan li. I pa ti mazinen: ‘Mon konnen akoz Bondye i kontan mon bann frer me i pa pou zanmen kapab kontan mwan.’ Pol ti dir avek bann Kretyen dan lavil Ronm: “Kris in mor pour nou ler nou ti ankor dan pese.” (Rom. 5:8) Napa nanryen ki kapab fer Bondye aret kontan nou!

10. Ki nou aprann avek Romen 8:38, 39?

¹⁰ Lir Romen 8:38, 39. Pol ti konnen ki kantite Bondye i kontan nou. I ti ekri ki napa nanryen ki ‘pou kapab anpes Bondye kontan nou.’ Pol ti konnen ki Zeova in annan bokou pasyans avek pep Izrael. I ti osi konnen ki Zeova in pran pitye pour li. Alor, nou kapab dir ki Pol ti pe dir: ‘Vi ki Zeova in anvoy son prop Garson pour mor pour mwan, mon pa  devret annan dout ki Zeova i kontan mwan.’​—Rom. 8:32.

11. Menm si Pol ti’n fer bann fot parey i ganny mansyonnen dan 1 Timote 1:12-15, akoz i ti asire ki Bondye i kontan li?

¹¹ Lir 1 Timote 1:12-15. I tre probab ki Pol ti santi li mal ler i ti mazin bann keksoz ki i ti fer avan i vin en Kretyen. Nou pa sirprann ki i ti dir ki parmi bann lezot dimoun, li i sa enn “ki pli pir.” Avan Pol ti aprann laverite, i ti persekit bann Kretyen dan tou bann lavil kot i ti ale. I ti met serten dan prizon e i ti dakor avek lakour ler zot ti deside pour touy lezot Kretyen. (Akt 26:10, 11) Nou kapab asire ki si Pol ti zwenn en zenn Kretyen ki son paran ti’n ganny touye akoz li, Pol ti pou santi li mal. Pol ti regrete pour son bann fot me i ti konnen ki i pa ti pou kapab sanz sa ki ti’n pase. I ti aksepte ki Zezi in mor pour li e i ti ekri: “Gras a labonte ekstraordiner Bondye, mon sa ki mon ete.” (1 Kor. 15:3, 10) Ki leson pour nou? Ou bezwen asire ki Kris in mor pour ou e i’n fer li posib pour ou annan en bon lanmitye avek Zeova. (Akt 3:19) Sa ki enportan pour Bondye i sa ki nou fer la konmela e dan lavenir, non pa bann fot ki nou’n fer dan lepase ki swa nou ti en Temwen Zeova sa letan oubyen non.​—Iza. 1:18, NWT.

12. Ki mannyer sa parol dan 1 Zan 3:19, 20 i ed nou si nou santi ki nou pa vo nanryen oubyen ki personn pa kapab kontan nou?

¹² Ler ou mazinen ki Zezi in donn son lavi pour ou pese, ou kapab dir ‘Mon pa krwar ki mon merit en kado presye koumsa.’ Akoz ou kapab santi koumsa? Nou leker enparfe i kapab anbet nou e fer nou santi ki nou pa vo nanryen e ki personn pa kapab kontan nou.  (Lir 1 Zan 3:19, 20.) Ler nou konmans santi koumsa, nou bezwen rapel ki “Bondye i pli gran ki nou leker.” Menm si nou santi ki Zeova pa kontan nou oubyen ki i pa pou pardonn nou, nou Papa ki dan lesyel i kontan nou e i pou pardonn nou. Nou bezwen konvenk nou lekor ki Zeova i kontan nou. Pour fer sa, nou bezwen etidye son Parol regilyerman, priy souvan e pas letan avek bann dimoun ki ador li. Akoz i enportan pour fer sa bann keksoz?

13. Ki mannyer ler nou etidye Parol Bondye sa i kapab ed nou? (Vwar osi sa bwat “ Lafason ki Parol Bondye in ed zot.”)

¹³ Etidye Parol Bondye sak zour e ou pou konpran pli byen bann zoli kalite Zeova. Ou pou konpran ki kantite i kontan ou. Ler ou medit lo Parol Bondye sak zour, sa i kapab ed ou pour reflesir byen, “pour remet keksoz drwat,” dan ou lespri ek ou leker. (2 Tim. 3:16) En ansyen ki apel Kevin e ki ti pe lager avek sa santiman ki i pa vo nanryen, i dir: “Ler mon ti lir e medit lo Psonm 103, sa in ed mwan pour sanz mon fason panse e pour konpran ki mannyer Zeova i vwar mwan.” Eva, ki’n ganny mansyonnen pli boner i dir: “A lafen lazournen, mon pran letan pour reflesir lo ki mannyer Zeova i santi. Sa i donn mwan lape lespri e i batir mon lafwa.”

14. Ki mannyer lapriyer i kapab ed nou?

¹⁴ Toultan priye. (1 Tesa. 5:17) Ler ou anvi fer zanmi avek en lot dimoun, ou bezwen koz avek li souvan e dir li ki mannyer ou santi. Pour vin zanmi avek Zeova i parey. Ler nou dir li sa ki nou santi, sa ki nou panse ek nou bann lenkyetid, nou montre ki nou annan konfyans dan li e ki nou konnen i kontan nou. (Ps. 94:17-19; 1 Zan 5:14, 15) Yua, ki’n ganny mansyonnen pli boner i dir: “Ler mon priye, mon pa zis dir Zeova sa ki’n arive avek mwan pandan lazournen. Mon dir li sa ki mon pe vreman mazinen e santi. Avek letan, mon’n aprann pour pa vwar Zeova konman sef en gran lakonpannyen me konman en Papa ki vreman kontan son zanfan.”​—Vwar sa bwat “ Eski ou’n lir ouswa etidye sa liv?”

15. Ki mannyer Zeova i demontre lentere personnel dan nou?

¹⁵ Pas letan avek bann bon zanmi parski zot en kado sorti kot Zeova. (Zak 1:17) Nou Papa ki dan lesyel i demontre en lentere personnel dan nou par donn nou bann frer ek ser dan kongregasyon ki “toultan demontre lanmour.” (Prov. 17:17, NWT) Dan son let pour bann Kretyen dan lavil Kolos, Pol ti mansyonn  serten Kretyen ki ti’n siport li e i dir ki zot ti “en gran sours rekonfor.” (Kol. 4:10, 11) Menm Kris ti bezwen sipor e i ti apresye led ki i ti gannyen avek son bann zanmi, ki swa zot ti bann lanz ouswa bann imen.​—Lik 22:28, 43.

16. Ki mannyer bann zanmi fidel i kapab ed nou vin pli pros avek Zeova?

¹⁶ Eski ou demann led e aksepte led ou bann zanmi dan kongregasyon? Ler nou koz avek en zanmi ki annan en bon lanmitye avek Zeova konsernan nou bann problenm, sa pa vedir ki nou lafwa i feb. O kontrer i kapab protez nou. Annou vwar sa ki James, ki’n ganny mansyonnen pli boner, i dir: “Vin zanmi avek bann ki annan en bon lanmitye avek Zeova in ed mwan en kantite. Ler bann panse negatif i fatig mwan, sa bann bon zanmi i ekout mwan avek pasyans e zot dir mwan ki zot kontan mwan. Ler zot fer sa, mon vwar ki Zeova i kontan mwan e i enterese avek mwan.” I vreman enportan ki nou vin zanmi pros avek nou bann frer ek ser.

17-18. Lekel ki nou devret ekoute e akoz?

¹⁷ Satan i anvi ki nou aret lager pour fer sa ki byen. I anvi fer nou krwar ki Zeova pa kontan nou e ki nou pa merite ganny sove. Me parey nou’n vwar, sa i pa vre.

¹⁸ Zeova i kontan ou. Ou vreman presye pour li. Si ou obei li, ou pou “reste dan son lanmour” pour touzour, zis parey Zezi. (Zan 15:10) Alor, pa ekout Satan oubyen ou leker ler ou santi ki Zeova pa kontan ou. O kontrer, ekout Zeova ki vwar sa ki bon dan sakenn parmi nou. Asire ki i “pran plezir dan son pep” e sa i enkli ou!