1. Kote nou’n ganny sa abilite pour koze?

 NOU abilite pour koze i en kado sorti kot nou Bondye ki kontan nou. Apre ki Bondye ti kree Adan, sa premye imen, Adan ti servi bann mo pour koz avek son Papa ki dan lesyel. I ti osi kapab fer bann nouvo mo. Adan ti servi sa abilite pour koze pour donn non tou bann zannimo. (Zen. 2:19) I ti vreman kontan ler i ti koz avek en lot imen pour premye fwa. Sa ti son zoli madanm Ev.​—Zen. 2:22, 23.

2. Ki mannyer sa abilite pour koze ti ganny mal servi dan lepase e pe ganny mal servi dan nou letan?

² Pa bokou letan apre, sa abilite pour koze ti ganny mal servi. Satan ti koz manti avek Ev e sa in fer ki imen i fer pese e zot in vin enparfe. (Zen. 3:1-4) Adan ti mal servi son abilite pour koze ler i ti blanm Ev ek Zeova pour bann fot ki i ti’n fer. (Zen. 3:12) Kaen ti koz manti avek Zeova apre ki i ti’n touy son frer Abel. (Zen. 4:9) Pli tar, en desandans Kaen ki ti apel Lamek ti konpoz en poenm ki ti montre ki dan sa letan ki i ti pe viv, dimoun ti vreman vyolan. (Zen. 4:23, 24) Eski keksoz in sanze ozordi? Nou vwar ki bann sef politik pa kanmi pour zoure an piblik. I osi difisil pour trouv en film ki napa bann parol sal ladan. Bann manrmay lekol i tann bann parol sal kot lekol e bann adilt i osi tann sa bann kalite parol dan zot landrwa travay. Tousala i montre ki sa lemonn in vin pli move.

3. Ki danze ki nou bezwen fer atansyon e ki nou pou vwar dan sa lartik?

³ Si nou pa fer atansyon, nou kapab sitan abitye tann bann move parol ki nou menm nou konmans servi sa bann parol. Konman Kretyen nou anvi fer plezir Zeova e sa i vedir ki nou pa zis evite dir bann parol sal. O kontrer, nou anvi servi nou abilite pour koze, dan sa bon fason setadir pour loue Bondye. Dan sa lartik, nou pou vwar ki  mannyer nou kapab fer sa (1) dan predikasyon, (2) dan renyon e (3) dan nou bann konversasyon. Me avan, annou vwar akoz nou fason koze i enportan pour Zeova.

4. Dapre Malaki 3:16, akoz sa ki nou dir i enportan pour Zeova?

⁴ Lir Malaki 3:16. Eski ou konnen akoz Zeova i ekri dan son “liv souvenir” non bann ki montre par zot fason koze ki zot annan en gran respe pour li e ki zot medit lo son non? Nou fason koze i montre sa ki dan nou leker. Zezi ti dir: “Labous i koz sa ki deborde dan leker.” (Mat. 12:34) Sa ki nou swazir pour koz lo la, i montre ki kantite nou kontan Zeova. Zeova i anvi ki sa bann ki kontan li, i viv ere pour touzour dan en nouvo lemonn.

5. (a) Ki mannyer sa ki nou dir i annan pour fer avek nou ladorasyon? (b) Parey nou vwar dan portre, ki nou devret realize konsernan sa ki nou dir?

⁵ Nou fason koze i annan en lefe lo si Zeova pou aksepte nou ladorasyon oubyen non. (Zak 1:26) Serten dimoun ki pa kontan Zeova i koz dan en fason brit, avek lakoler e dan en fason arogan. (2 Tim. 3:1-5) Nou pa anvi fer parey zot. Nou anvi fer plezir Zeova par sa ki nou dir. Me si nou koz dan en bon fason ler nou al renyon ouswa predikasyon me nou koz dan en fason brit avek nou fanmir kot dimoun pa vwar nou, eski sa pou fer plezir Zeova?​—1 Pyer 3:7.

6. Ki bon keksoz ki ti arive akoz Kimberly ti koz dan en bon fason?

⁶ Ler nou byen servi nou abilite pour koze, nou montre lezot ki nou en serviter Zeova. Nou kapab ed zot pour vwar ki i annan en diferans “ant enn ki pe servi Bondye e enn ki pa pe servi li.” (Mal. 3:18) Sanmenm ki ti arive avek en ser ki apel Kimberly. b I ti ganny demande pour travay avek en lot etidyan lo en proze pour lekol. Apre ki sa etidyan ti’n travay avek Kimberly pour en pe letan, i ti remarke ki Kimberly ti diferan.  Kimberly pa ti kritik lezot, i ti koz dan en bon fason e i pa ti zoure. Sa ti enpresyonn sa etidyan e pli tar i ti konmans etidye Labib avek Kimberly. Zeova i vreman kontan ler nou koz dan en fason ki fer dimoun anvi aprann konn li.

7. Ki mannyer ou kapab servi ou abilite pour koze?

⁷ Nou tou nou anvi koz dan en fason ki anmenn loner pour Zeova e ki fer nou vin pli pros avek nou bann frer ek ser. Aprezan, annou vwar bann fason ki nou kapab kontinyen vin “en legzanp . . . par [nou] fason koze.”

8. Ki legzanp Zezi in kite pour nou dan lafason ki i ti koze ler i ti lo later?

⁸ Koz dan en bon fason e avek respe ler lezot pa koz avek nou byen. Ler Zezi ti lo later, dimoun ti dir ki i ti kontan bwar diven, i ti manz tro bokou, i ti travay pour Dyab, i ti kas lalwa Saba e i ti koz kont Bondye. (Mat. 11:19; 26:65; Lik 11:15; Zan 9:16) Kantmenm sa, Zezi pa ti koz avek zot dan en fason brit. Parey Zezi, nou pa devret zanmen reponn dan en fason brit menm si dimoun pa koz avek nou byen. (1 Pyer 2:21-23) Byensir, i pa fasil pour fer sa. (Zak 3:2) Me kwa ki kapab ed nou?

9. Kwa ki kapab ed nou pour vey lafason ki nou koze ler nou dan predikasyon?

⁹ Esey reste kalm ler en met lakour pa koz avek ou byen. En frer ki apel Sam i dir: “Mon esey konsantre lo ki kantite sa met lakour i bezwen konn laverite lo Bondye e mon gard antet ki i kapab sanze.” Parfwa, en met lakour i ankoler zis akoz nou pa’n vin dan sa bon moman. Ler nou koz avek en dimoun ki ankoler, nou kapab fer sa ki en ser ki apel Lucia ti fer. Nou kapab fer en pti lapriyer pour demann Zeova pour ed nou pour reste kalm e pour pa dir oubyen fer okenn keksoz ki pa demontre respe pour sa met lakour.

10. Dapre 1 Timote 4:13, ki lobzektif nou devret annan?

¹⁰ Vin en pli bon ansenyan. Timote ti en proklanmater ki ti annan en kantite leksperyans. Me kantmenm sa, i ti bezwen kontinyen amelyor lafason ki i ansennyen. (Lir 1 Timote 4:13.) Kwa ki kapab ed nou pour vin bann pli bon ansenyan? Nou bezwen prepar byen. Nou annan diferan zouti ki kapab ed nou vin bann pli bon ansenyan. Ou pou vwar bann lenformasyon itil dan sa brosir Amelyor ou abilite pour lir e ansennyen e dan sa seksyon “Prepar byen pour predikasyon” ki dan Nou minister ek lavi Kretyen​—Kaye renyon.  Eski ou pe servi sa bann piblikasyon? Ler nou prepar byen pour predikasyon, nou pa pou tro per e nou pou kapab koz avek konfidans.

11. Ki mannyer serten frer ek ser in vin bann pli bon ansenyan?

¹¹ Nou kapab osi vin en pli bon ansenyan par obzerv lezot dan kongregasyon e aprann avek zot. Sam, ki’n ganny mansyonnen pli boner, i reflesir lo kwa ki fer serten frer ek ser bann bon ansenyan. I ekout byen ler zot ansennyen e i esey fer parey. En ser ki apel Talia ti obzerv lafason ki bann orater ki annan leksperyans i fer bann diskour piblik. Sa in fer ki i’n aprann ki mannyer pour koz lo bann topik ki dimoun i souvan koz lo la dan predikasyon.

12. Kwa ki difisil pour serten fer?

¹² Nou tou nou kapab kontribye pour fer nou renyon pas byen. Nou fer sa par sant bann kantik e donn bann larepons ki’n byen prepare. (Ps. 22:22) Serten i vwar li difisil pour sant kantik ouswa pour donn en larepons pandan renyon. Eski ou santi koumsa? Si wi, ou pou kontan pour konnen kwa ki’n ed lezot pour sirmont zot lafreyer.

13. Kwa ki kapab ed ou sant avek tou ou leker dan renyon?

¹³ Sant avek tou ou leker. Sa rezon pli enportan ki nou sant bann kantik pandan renyon, i pour loue Zeova. En ser ki apel Sara pa krwar ki i en bon santer. Kantmenm sa, i anvi loue Zeova atraver bann kantik. Alor, ler i pe prepare pour renyon, i osi prepare pour sant bann kantik. I practice sa bann kantik e i esey vwar ki mannyer sa kantik i relye avek bann topik ki pou ganny diskite dan renyon. I dir: “Sa i ed mwan pour konsantre lo sa ki i dir dan sa kantik olye lo si mon sant byen ouswa non.”

14. Si ou en dimoun ki timid, kwa ki kapab ed ou donn en larepons dan renyon?

¹⁴ Regilyerman donn en larepons dan renyon. Sa i kapab vreman difisil pour serten frer ek ser. Talia, ki’n ganny mansyonnen pli boner, i dir: “Mon vreman per pour koze devan lezot dimoun. Alor, i vreman difisil pour mwan donn en larepons dan renyon.” Me sa pa anpes Talia pour partisipe dan renyon. Anmezir ki i prepare pour renyon, i gard antet ki sa premye larepons i devret kourt e i reponn sa kestyon direkteman. Talia i dir: “Sa i vedir ki i oke si mon larepons i kourt, senp e i fer sorti sa pwen  prensipal. Parski sanmenm sa ki sa frer ki pe diriz sa letid i anvi.”

15. Ki nou devret rapel konsernan nou bann larepons pandan renyon?

¹⁵ Menm bann frer ek ser ki pa timid i ezite pour donn en larepons dan renyon. Akoz sa? En ser ki apel Juliet i dir: “Parfwa, mon ezite pour reponn dan renyon parski mon krwar ki mon larepons i tro senp e i pa alaoter.” Kantmenm sa, rapel ki Zeova i anvi ki nou donn li nou meyer. c I vreman kontan ler nou fer nou mye pour reponn pandan renyon menm si nou per.

16. Ki kalite keksoz ki nou pa devret dir?

¹⁶ Pa servi parol ki ensilte lezot. (Efe. 4:31) Parey i’n ganny mansyonnen pli boner, en Kretyen pa devret zanmen zoure. Me i annan lezot fason ki nou kapab ensilte lezot, ki pa sitan evidan. Alor nou bezwen vey byen ki nou pa fer sa. Par egzanp, nou bezwen fer atansyon pour nou pa dir bann move keksoz konsernan en dimoun ki sorti dan lezot kiltir, tribi ouswa pei. An plis, nou pa anvi bles santiman lezot par dir bann keksoz lo zot ki abes zot. En frer i dir: “Parfwa mon ti dir bann keksoz ki mon ti krwar i gou e napa nanryen mal avek me an realite, sa pa ti byen e i ti bles santiman lezot. Pandan bann lannen ki’n pase, mon madanm in ed mwan en kantite. Ler mon ti dir bann keksoz ki anbarasan e ki ti bles son santiman ek santiman lezot, i ti koz lo la avek mwan an prive.”

17. Dapre Efezyen 4:29, ki mannyer nou kapab ankouraz lezot?

¹⁷ Koz dan en fason ki ankouraz lezot. Dan plas kritik lezot ouswa konplent, pa ezite pour felisit zot. (Lir Efezyen 4:29.) Menm si bann Izraelit ti annan en kantite rezon pour zot rekonesan, zot ti konplent. Ler nou annan en labitid pour konplent, sa i kapab fer lezot osi konplent. Rapel sa ki ti arive ler dis espyon ti anmenn en move rapor. Sa ti fer ki “tou bann Izraelit ti . . . konplent kont Moiz.” (Nom. 13:31–14:4) De lot kote, ler nou felisit lezot, sa i kapab ed tou dimoun pour pli zwaye. Nou kapab asire ki fiy Zefta ti ganny ankouraze pour kontinyen dan son servis kot tanp parski son bann zanmi ti felisit li. (Ziz 11:40) Sara, ki’n ganny mansyonnen pli boner, i dir: “Ler nou felisit lezot, sa i fer zot santi ki  Zeova i kontan zot e ki zot annan en plas dan Son lorganizasyon.” Alor, rod loportinite pour felisit lezot.

18. Dapre Psonm 15:1, 2, akoz nou devret koz laverite e ki sa i enplike?

¹⁸ Koz laverite. Nou pa kapab fer plezir Zeova si nou koz manti. I ay tou sort kalite mansonz. (Prov. 6:16, 17) Menm si en kantite dimoun ozordi i krwar ki i normal pour koz manti, nou nou evite koz manti parski Zeova i dir ki i mal pour fer sa. (Lir Psonm 15:1, 2.) Byensir, nou evite koz manti me nou osi evite gard bann lenformasyon ki pou fer lezot tonm lo sa move konklizyon.

19. Ki en lot keksoz nou bezwen vey byen?

¹⁹ Evite koz an mal lo lezot. (Prov. 25:23; 2 Tesa. 3:11) Juliet, ki’n ganny mansyonnen pli boner, i eksplike ki mannyer ler i’n tann lezot pe koz an mal lo lezot, sa in annan en lefe lo li. I dir: “Ler mon tann lezot pe koz an mal lo lezot, sa i dekourazan. Sa i fer mwan perdi konfyans dan sa dimoun ki pe koz an mal. Apre tou, ki mannyer mon konnen ki i pa pou koz an mal lo mwan avek en lot dimoun.” Si dan pe koz avek lezot, ou remarke ki zot pe konmans koz an mal lo lezot, sanz konversasyon e koz lo en keksoz ki ankourazan.​—Kol. 4:6.

20. Ki ou anvi fer avek ou abilite pour koze?

²⁰ Vi ki nou viv dan en lemonn kot en kantite dimoun i annan en move fason koze, nou devret fer sir ki sa ki nou dir i fer plezir Zeova. Rapel ki sa abilite pour koze i en kado sorti kot Zeova e i anvi ki nou servi sa kado dan en bon fason. I pou beni nou ler nou servi nou abilite pour koze pour loue li dan predikasyon, dan renyon e dan nou bann konversasyon. Ler Zeova i detri sa move lemonn, i pou pli fasil pour loue Zeova par sa ki nou dir. (Zid 15) Me antretan, annou fer sir ki nou parol i fer plezir Zeova.​—Ps. 19:14.