1. Ki lobzektif nou kapab mete dan nou servis pour Zeova?

 KONMAN bann vre Kretyen, nou kontan Zeova en kantite. Nou anvi donn nou meyer dan nou servis pour Zeova. Me pour nou kapab fer tou sa ki nou kapab pour li, nou bezwen met bann lobzektif dan son servis. Par egzanp, nou bezwen devlop bann kalite ki fer plezir Zeova, devlop bann abilite ki itil dan Son servis e rod fason pour ed lezot.

2. Akoz nou devret met bann lobzektif dan servis Zeova e fer zefor pour atenn sa bann lobzektif?

² Akoz nou devret anvi met e atenn bann lobzektif dan servis Zeova? Sa rezon pli enportan i akoz nou anvi fer plezir nou Papa ki dan lesyel ki kontan nou. Zeova i kontan ler i vwar nou pe byen servi nou abilite dan son servis. En lot rezon akoz nou anvi fer plis dan servis Zeova i pour nou kapab ed nou bann frer ek ser plis. (1 Tesa. 4:9, 10) Nenport ki kantite letan nou pe servi Zeova, nou tou nou kapab fer plis dan Son servis. Aprezan, annou vwar ki mannyer nou kapab fer sa.

3. Dapre 1 Timote 4:12-16, ki zapot Pol ti ankouraz Timote pour fer?

³ Ler zapot Pol ti ekri sa premye let pour Timote, Timote ti ankor zenn e i ti en ansyen ki ti annan leksperyans. Kantmenm sa, Pol ti ankouraz li pour kontinyen fer plis dan servis Zeova. (Lir 1 Timote 4:12-16.) Anmezir ou reflesir lo sa ki Pol ti dir, ou pou vwar ki i ti anvi Timote i amelyore dan de fason. Premyerman, i ti anvi ki Timote i devlop bann kalite parey lanmour, lafwa ek lapirte.  Dezyenmman, i ti anvi ki Timote i amelyor son bann abilite parey lir an piblik, donn konsey e ansennyen. Dan sa lartik, nou pou diskit lo legzanp Timote. Nou pou vwar ki mannyer ler nou annan bann lobzektif ki rezonnab, sa i kapab ed nou pour vin bann pli bon serviter Zeova. Nou pou osi vwar serten fason ki nou kapab fer plis dan predikasyon.

4. Dapre Filipyen 2:19-22, kwa ki ti fer Timote itil pour Zeova?

⁴ Kwa ki ti fer Timote itil pour Zeova? I ti annan bann kalite ki ti fer plezir Bondye. (Lir Filipyen 2:19-22.) Sa ki Pol ti dir lo Timote i montre nou ki Timote ti annan limilite, i ti fidel, i ti travay dir e lezot ti kapab depan lo li. I ti kontan son bann frer ek ser en kantite. Sa ti fer ki Pol ti kontan Timote e i pa ti ezite pour donn li bann responsabilite ki pli difisil. (1 Kor. 4:17) Pareyman, ler nou devlop bann kalite ki Zeova i kontan, Zeova pou kontan nou e nou pou pli kapab ed lezot dan kongregasyon.​—Ps. 25:9; 138:6.

5. (a) Ki mannyer ou kapab deside ki kalite ou ti ava kontan devlope? (b) Parey nou vwar dan portre, ki mannyer en zenn ser pe esey atenn son lobzektif pour konpran santiman lezot pli byen?

⁵ Swazir en lobzektif spesifik. Priye e reflesir lo kwa ki ou bezwen amelyore dan ou personnalite. Swazir en kalite ki ou ti ava kontan devlope. Par egzanp, eski ou kapab esey konpran santiman lezot pli byen oubyen devlop plis sa dezir pour ed ou bann frer ek ser? Eski ou bezwen pli pare pour fer lape e pli pare pour pardonnen? Petet i ti ava byen ki ou demann en bon zanmi pour dir ou bann fason ki ou kapab amelyore.​—Prov. 27:6.

6. Ki mannyer ou kapab devlop en kalite?

⁶ Fer zefor pour atenn ou lobzektif. Ki mannyer ou kapab fer sa? En fason i par etidye sa kalite ki ou ti ava kontan devlope. Meton ou deside pour fer zefor pour pli pare pour pardonn lezot. Ou kapab konmans par lir e medit lo legzanp serten dimoun dan Labib ki ti pare pour pardonn lezot ek bann ki pa ti pare pour pardonnen. Annou vwar legzanp Zezi. Zezi ti pare pour pardonn lezot.  (Lik 7:47, 48) I pa ti konsantre lo zot defo me lo sa ki zot ti kapab fer. De lot kote, bann Farizyen dan letan Zezi ti “konsider lezot konman nanryen ditou.” (Lik 18:9) Apre ki ou’n medit lo sa bann legzanp, ou kapab demann ou lekor: ‘Ler mon get lezot, ki mon swazir pour konsantre lo la?’ Si ou vwar li difisil pour pardonn en dimoun, esey fer en lalis tou bann bon kalite ki sa dimoun i annan. Apre demann ou lekor: ‘Ki mannyer Zezi i vwar sa dimoun? Eski i ti pou pardonn li?’ Si nou fer sa, nou pou kapab sanz nou fason panse. Petet o konmansman, i pou difisil pour pardonn en dimoun ki’n ofans nou. Me si nou kontinyen fer zefor, avek letan, nou pou pli pare pour pardonn li.

7. Ki mannyer Proverb 22:29 i montre ki Zeova i servi bann travayer ki annan abilite?

⁷ En lot lobzektif ki nou kapab annan, i pour devlop en abilite ki itil. Mazin lo sa kantite travayer ki neseser pour konstrir bann Betel, Lasal Lasanble ek Lasal Rwayonm. En kantite sa bann travayer in devlop zot abilite par travay ansanm avek bann frer ek ser ki annan leksperyans. Parey nou vwar dan portre, bann frer ek ser pe devlop bann abilite ki zot bezwen pour ede dan mentenans bann Lasal Lasanble ek Lasal Rwayonm. Dan sa fason e dan lezot fason ankor, Zeova “Lerwa leternite” ek Zezi Kri ‘Lerwa bann lerwa’ pe servi bann travayer ki annan abilite pour akonpli bann keksoz merveye. (1 Tim. 1:17; 6:15; lir Proverb 22:29.) Nou anvi travay dir e servi nou abilite pour glorifye Zeova, pa nou lekor.​—Zan 8:54.

8. Ki mannyer ou kapab konnen ki abilite ou pou devlope?

⁸ Swazir en lobzektif spesifik. Ki abilite ou kapab devlope? Demann ansyen dan ou kongregasyon ouswa ou sirveyan rezyonal ki abilite zot vwar ou kapab devlope. Meton zot sizere ki ou amelyor ou abilite pour koze e ansennyen. Ou kapab demann zot pour ed ou pour idantifye en kalite spesifik ki ou bezwen travay lo la, ki pou ed ou amelyor ou abilite pour koze. Apre sa, fer bokou zefor pour amelyore. Ki mannyer ou kapab fer sa?

9. Ki mannyer ou kapab fer zefor pour devlop en abilite?

⁹ Fer zefor pour atenn ou lobzektif. Meton ou anvi amelyor ou abilite pour ansennyen. Ou kapab etidye sa brosir Amelyor ou abilite pour lir e ansennyen. Ler ou ganny en size pour fer pandan renyon lasemenn, ou kapab demann en ansyen ouswa serviter kongregasyon pour ekout ou size avan e donn ou bann sizesyon lo ki mannyer pour amelyore. Prepar ou size davans pour ki dimoun i vwar ki ou travay dir e ki zot kapab depan lo ou.​—Prov. 21:5; 2 Kor. 8:22.

10. Ki mannyer nou kapab amelyor en abilite? Donn en legzanp.

¹⁰ Ki ou kapab fer si sa abilite ki ou anvi devlope i en keksoz ki difisil pour ou fer? Kontinyen fer zefor. En frer ki apel Garry pa kapab lir byen. I dir ki i ti anbarase ler i ti esey lir pandan renyon. Me i ti kontinyen fer zefor pour amelyore. I dir ki sa formasyon ki i’n gannyen in ed li pour fer diskour dan renyon e dan lasanble.

11. Parey Timote, kwa ki pou ed nou pour fer plis dan nou servis pour Zeova?

¹¹ Eski Timote ti vin en bon orater ouswa  en bon ansenyan? Labib pa dir. Me nou kapab asire ki Timote ti desarz byen son responsabilite parski i ti swiv konsey Pol. (2 Tim. 3:10) Pareyman, si nou devlop nou bann abilite, nou pou kapab fer plis dan nou servis pour Zeova.

12. Ki mannyer lezot in ed ou?

¹² Nou tou nou ganny led avek lezot. Par egzanp, ler nou dan lopital, nou kontan ler bann ansyen ki lo Komite lyezon lopital (HLC) ouswa Patient Visitation Groups i vizit nou. Ler nou annan en problenm, nou kontan ler en ansyen i pran letan pour ekout nou e rekonfort nou. Ler nou bezwen led avek en letid Labib, nou kontan ler en pionye eksperyanse i asiste sa letid e donn nou sizesyon. Tou sa bann frer ek ser i kontan pour ed nou. Nou kapab annan sa menm lazwa si nou pare pour ed nou bann frer ek ser. Zezi ti dir: “I annan plis lazwa pour donnen ki pour resevwar.” (Akt 20:35) Ki ou pou fer si ou anvi fer plis pour Zeova dan sa bann fason ki’n ganny mansyonnen ouswa dan lezot fason?

13. Ki nou devret gard antet ler nou pe met en lobzektif?

¹³ Ou bezwen fer atansyon ler ou pe met en lobzektif. Par egzanp, ou kapab mazinen ki ou anvi fer plis dan kongregasyon. Me i kapab difisil pour ou konnen ki mannyer pour atenn sa lobzektif e i kapab difisil pour ou konnen ler ou’n atenn li. Alor, met en lobzektif ki spesifik e kler. Ou menm kapab ekri sa lobzektif e ki mannyer ou pou atenn li.

14. Akoz nou bezwen pare pour adapte ler nou pe met bann lobzektif?

¹⁴ Nou bezwen pare pour adapte ler nou pe met bann lobzektif. Akoz sa? Parski i annan keksoz ki kapab arive ki nou napa kontrol lo la. Par egzanp, zapot Pol ti’n ede pour form en nouvo kongregasyon dan lavil Tesalonik. San dout, i ti annan lentansyon pour reste dan sa lavil e ed bann ki ti’n fek vin Kretyen. Me Pol ti bezwen kit sa lavil akoz i ti pe ganny opoze. (Akt 17:1-5, 10) Si Pol ti’n reste, i ti pou’n met son bann frer ek  ser an danze. Me Pol pa ti abandonn zot. O kontrer, i ti adapte avek sa sanzman e pli tar i ti anvoy Timote pour ed sa bann Kretyen pour annan en lafwa for. (1 Tesa. 3:1-3) I bezwen ki bann Kretyen dan lavil Tesalonik ti vreman kontan ki Timote ti pare pour al servi kot i ti annan bezwen.

15. Ki lefe nou sirkonstans i kapab annan lo nou bann lobzektif? Donn en legzanp.

¹⁵ Nou kapab aprann en leson avek sa ki ti arive avek Pol dan lavil Tesalonik. Petet nou pe esey kalifye pour en servis me nou sirkonstans pa permet nou pour fer sa servis. (Ekle. 9:11) Si ou dan en sityasyon parey, ou bezwen pare pour sanz ou lobzektif e swazir enn ki ou kapab atenn. Sanmenm ki en koup ki apel Ted ek Hiedi ti fer. Zot ti bezwen aret zot servis dan Betel akoz zot ti annan en problenm lasante. Me zot lanmour pour Zeova ti motiv zot pour rod lezot fason pour fer plis dan predikasyon. Sa ti fer zot pran servis pionye ordiner. Pli tar, zot ti ganny apwente konman pionye spesyal e Ted ti ganny formasyon pour li vin en ranplasan pour sirveyan rezyonal. Me apre, laz ki en dimoun i bezwen annan pour servi konman sirveyan rezyonal ti sanze. Ted ek Hiedi ti realize ki zot ti’n sot laz pour servi konman sirveyan rezyonal. Menm si zot ti dezapwente, zot ti konnen ki zot ti kapab servi Zeova dan lezot fason. Ted i dir: “Nou’n aprann ki nou kapab servi Zeova dan diferan fason.”

16. Ki nou aprann dan Galat 6:4?

¹⁶ Nou pa kapab kontrol tou sa ki arive avek nou. Alor i enportan ki nou pa krwar ki sa servis ki nou annan ki fer nou annan valer pour Zeova. I osi enportan ki nou pa konpar nou avek lezot ki annan bann privilez ki nou, nou napa. Hiedi i dir: “Si ou konpar sa ki pe arive avek ou avek sa ki pe arive avek lezot, ou pa pou ere.” (Lir Galat 6:4.) I enportan ki nou rod fason pour fer plis dan servis Zeova. b

17. Ki ou kapab fer pour ou kalifye pour ganny bann responsabilite dan servis Zeova?

¹⁷ Fer ou disponib pour fer plis dan servis Zeova par annan en lavi senp e evite fer bann det ki pa neseser. Met bann pti lobzektif ki pou ed ou atenn bann lobzektif ki pou pran letan pour atenn. Par egzanp, si a lavenir ou anvi vin en pionye ordiner, petet ou kapab fer pionye asistan  tou le mwan la konmela. Si ou lobzektif i pour servi konman en serviter kongregasyon, petet ou kapab pas plis letan dan predikasyon e vizit bann frer ek ser aze e bann ki malad dan kongregasyon. Sa leksperyans ki ou gannyen la konmela, i kapab ed ou pour servi Zeova dan lezot fason a lavenir. Alor, donn ou meyer dan nenport responsabilite ki ou ganny donnen.​—Rom. 12:11.

18. Parey ou vwar dan portre, ki ou aprann avek legzanp Beverley?

¹⁸ Nou pa zanmen tro vye pour met e atenn bann lobzektif dan servis Zeova. Annou vwar legzanp en ser ki apel Beverley ki annan 75-z-an. I ti annan en problenm lasante ki ti fer li difisil pour li marse. Me Beverley ti anvi fer plis dan predikasyon pour kanpanny Memoryal. Alor, i ti met bann lobzektif spesifik. I ti vreman kontan ler i ti atenn sa bann lobzektif. Son zefor ti motiv lezot pour travay dir dan predikasyon zot osi. Zeova i vreman apresye travay ki bann frer ek ser aze i fer menm si zot pa kapab fer bokou dan son servis.​—Ps. 71:17, 18.

19. Ki serten lobzektif ki ou kapab mete dan servis Zeova?

¹⁹ Met bann lobzektif ki ou kapab atenn. Devlop bann kalite ki pou fer Zeova plezir. Devlop bann abilite ki pou ed ou fer plis pour Zeova ek son lorganizasyon. Rod bann fason pour ed ou bann frer ek ser plis. c Parey Timote, Zeova pou beni ou e tou dimoun pou ‘vwar ki ou pe progrese.’​—1 Tim. 4:15.