1. Akoz nou reponn pandan renyon?

 AKOZ nou asiste renyon? Sa rezon prensipal i pour nou loue Zeova. (Ps. 26:12; 111:1) Nou osi asiste renyon pour nou kapab ankouraz kanmarad pandan sa bann moman difisil. (1 Tesa. 5:11) Ler nou donn en larepons pandan renyon, nou pe loue Zeova e nou pe ankouraz kanmarad.

2. Ki loportinite nou annan pour reponn pandan renyon?

² Tou le semenn, nou annan loportinite pour reponn pandan renyon. Par egzanp, pandan renyon ki ganny fer dan wikenn, nou kapab partisipe dan Letid Latour Veyer. Dan renyon lasemenn, nou kapab donn larepons dan sa parti kot nou koz lo bann perl spirityel, pandan letid Labib kongregasyon e dan lezot parti kot lodyans i kapab partisipe.

3. Kwa ki kapab fer li difisil pour nou reponn pandan renyon e ki mannyer Ebre 10:24, 25 i kapab ed nou?

³ Nou tou nou anvi loue Zeova e ankouraz nou bann frer ek ser. Me i annan de keksoz ki kapab fer li difisil pour nou reponn pandan renyon. I kapab ki nou per pour reponn. Oubyen i kapab ki nou anvi donn plis larepons me parfwa sa frer ki pe kondwir sa parti renyon pa donn nou ankor loportinite pour reponn. Kwa ki kapab ed nou? Sa ki zapot Pol ti ekri pour bann Ebre i kapab ed nou trouv larepons sa kestyon. Ler zapot Pol ti koz avek zot lo lenportans pour rasanble ansanm, i ti dir ki zot devret “ankouraz kanmarad.” (Lir Ebre 10:24, 25.) Ler nou gard antet ki menm en pti larepons ki nou donnen pour demontre nou lafwa, i kapab ankouraz lezot, sa pou fer nou pa santi nou tro per pour lev nou lanmen pour reponn. Menm si nou pa ganny sa loportinite pour reponn souvan, nou kontan ki lezot dan kongregasyon i annan sa loportinite pour reponn.​—1 Pyer 3:8.

4. Ki nou pou vwar dan sa lartik?

 ⁴ Dan sa lartik, nou pou premyerman vwar ki mannyer nou kapab ankouraz kanmarad si nou dan en pti kongregasyon kot napa bokou dimoun pour reponn. Apre nou pou vwar ki mannyer nou kapab ankouraz kanmarad si nou dan en gran kongregasyon kot en kantite dimoun i lev zot lanmen pour reponn. Finalman nou pou vwar ki nou kapab fer pour ki sa ki nou dir i ankouraz lezot.

5. Ki mannyer nou kapab ankouraz kanmarad si napa bokou dimoun dan renyon?

⁵ Dan en pti kongregasyon oubyen group, i napa bokou dimoun ki lev lanmen pour reponn. Parfwa sa frer ki pe diriz sa parti dan renyon, i bezwen espere avan ki en dimoun i lev son lanmen. Sa i kapab fer renyon paret boring e pa ankourazan. Ki ou kapab fer? Fer zefor pour lev ou lanmen pli souvan. Sa i kapab motiv lezot pour lev zot lanmen pli souvan zot osi.

6-7. Kwa ki pou ed nou pour nou pa tro per pour donn en larepons pandan renyon?

⁶ Ki ou kapab fer si ou santi ki ou tro per pour reponn? En kantite dimoun i santi koumsa. Me ki ou kapab fer pour ou pli alez pour reponn pour ki ou ankouraz ou bann frer ek ser plis?

⁷ Petet i ti pou byen ki ou revwar serten sizesyon ki bann Latour Veyer dan lepase in donnen. b Par egzanp, ou kapab prepar byen. (Prov. 21:5) Pli ou konpran sa lenformasyon ki pe ganny diskite, pli ou pou santi ou pli alez pour lev ou lanmen pour reponn pandan renyon. Osi, donn bann larepons ki kourt. (Prov. 15:23; 17:27) I tre probab ki ou pa pou tro per si ou donn en larepons ki kourt. I pou pli fasil pour ou bann frer ek ser konpran en larepons ki kourt olye en gran larepons ki koz lo plizyer keksoz. Ler ou donn en larepons ki kourt e dan ou prop mo, sa pou montre ki ou’n byen prepare e ki ou konpran byen sa lenformasyon ki pe ganny diskite.

8. Ki mannyer Zeova i vwar sa zefor ki nou fer pour reponn pandan renyon?

⁸ Ki ou pou fer si apre ki ou’n aplik sa bann sizesyon, ou ankor per pour donn larepons plis ki en fwa? Ou kapab asire ki Zeova i apresye sa zefor ki ou pe fer. (Lik 21:1-4) Zeova pa demann nou pour fer plis ki sa ki nou kapab. (Fili. 4:5) Alor rode ki ou kapab fer, met en lobzektif pour fer sa ki ou’n deside e demann Zeova pour ed ou reste kalm. Petet o konmansman ou kapab met sa lobzektif pour donn en pti larepons kourt.

9. Kwa ki kapab fer li difisil pour donn en larepons si ou dan en gran kongregasyon?

⁹ Si ou dan en kongregasyon kot i annan en kantite proklanmater, petet ou fer fas avek en lot kalite problenm. I kapab ki i annan en kantite frer ek ser ki lev zot lanmen pour reponn e sa i fer ki souvandfwa ou pa ganny sans reponn. Par egzanp, en ser ki apel Danielle i toultan kontan reponn pandan renyon. c Danielle i vwar sa konman en keksoz ki  form parti son ladorasyon, konman en fason pour ankouraz lezot e konman en fason pour ranforsi son lafwa dan sa ki Labib i dir. Me ler i ti al dan en gran kongregasyon, i pa ti reponn sa sitan parey avan. Parfwa i pa ti ni menm ganny loportinite pour reponn pandan renyon. I dir: “Mon ti fristre. Mon ti santi konmsi mon ti’n mank en privilez. Ler en keksoz koumsa i kontinyen arive, ou konmans mazinen si sa frer pa pe fer par ekspre.”

10. Ki nou kapab fer pour nou annan plis loportinite pour reponn pandan renyon?

¹⁰ Eski ou’n deza santi parey Danielle? Si wi, petet ou ti anvi aret fer zefor pour reponn e zis ekout renyon. Me pa aret fer zefor pour reponn. Alor, ki ou kapab fer? Petet ou kapab prepar plizyer larepons pour ou reponn pandan renyon. Koumsa si ou pa ganny sans reponn o konmansman sa letid, ou pou annan lezot loportinite pour reponn anmezir renyon i kontinyen. Ler ou pe prepare pour Letid Latour Veyer, reflesir lo ki mannyer sak paragraf i relye avek tenm sa lartik. Si ou fer sa, i tre probab ki ou pou kapab donn bann bon larepons tou dilon sa letid. Osi, ou kapab prepare pour donn en larepons pour bann paragraf ki koz lo bann laverite ki pli o profon, ki pli difisil pour eksplike. (1 Kor. 2:10) Akoz i byen pour ou fer sa? Parski i kapab ki i napa bokou dimoun ki lev zot lanmen pour reponn pour bann paragraf koumsa. Me ki ou pou fer si apre ki ou’n aplik sa bann sizesyon, ou pa ganny loportinite pour reponn apre plizyer renyon? Petet avan renyon, ou kapab koz avek sa frer ki pou kondwir sa letid e dir li ki kestyon ki ou ti pou kontan reponn.

11. Ki Filipyen 2:4 i ankouraz nou pour fer?

¹¹ Lir Filipyen 2:4. Zeova ti enspir zapot Pol pour ankouraz bann Kretyen pour rod lentere lezot. Ki mannyer nou kapab aplik sa konsey pandan renyon? Nou kapab gard antet ki lezot osi i anvi partisipe pandan renyon.

12. Ki en bon fason ki nou kapab ankouraz lezot pandan renyon? (Vwar portre.)

¹² Reflesir lo sa: Ler ou pe koz avek ou  bann zanmi, eski ou koz en kantite ki ou bann zanmi pa ganny loportinite pour koze? Non, ou pa pou fer sa parski ou anvi ki zot osi zot koze. Pareyman, nou anvi ki otan dimoun posib i reponn pandan renyon. Anfet, enn bann pli bon fason ki nou kapab ankouraz nou bann frer ek ser i par les zot eksprim zot lafwa. (1 Kor. 10:24) Annou vwar ki mannyer nou kapab fer sa.

13. Ki nou kapab fer pour ki plis dimoun i ganny loportinite pour reponn pandan renyon?

¹³ En fason ki nou kapab ankouraz lezot pandan renyon, i ler nou gard nou larepons kourt pour ki lezot i kapab partisipe. Bann ansyen ek bann proklanmater eksperyanse i kapab vin en legzanp dan sa domenn. Menm ler ou pe donn en larepons ki kourt, evite koz lo plizyer pwen. Si ou koz lo tou sa ki dan paragraf, lezot pou napa nanryen pour koz lo la. Par egzanp, dan sa paragraf i annan de sizesyon ki’n ganny donnen, setadir ki nou gard nou larepons kourt e nou evite koz lo plizyer pwen. Si ou premye dimoun ki ganny loportinite pour reponn pour sa paragraf, akoz ou pa koz lo zis enn parmi sa bann pwen?

14. Kwa ki pou ed nou ler nou pe deside ki kantite fwa nou pou lev lanmen pour reponn pandan renyon? (Vwar portre.)

¹⁴ Servi bon zizman ler ou pe deside ki kantite fwa ou pou lev ou lanmen pour reponn. Si nou lev lanmen tro souvan, sa i kapab met sa frer ki pe kondwir letid anba presyon e fer li santi ki i bezwen donn ou pour reponn, menm si lezot ki’n lev lanmen pa ankor ganny loportinite pour reponn. Sa i kapab dekouraz lezot e fer zot pa anvi lev lanmen.​—Ekle. 3:7.

15. (a) Ki mannyer nou devret reazir si nou pa ganny sa loportinite pour reponn pandan renyon? (b) Ki mannyer sa frer ki pe kondwir letid i kapab demontre konsiderasyon anver tou dimoun? (Vwar sa bwat “ Si ou sa frer ki pe kondwir sa letid.”)

¹⁵ Ler en kantite proklanmater i lev  lanmen pour reponn pandan renyon, petet nou pa pou ganny loportinite pour reponn lakantite fwa ki nou ti ava kontan. Parfwa sa frer ki pe kondwir letid pa pou kapab donn nou loportinite pour reponn. Sa i kapab fer nou dezapwente me nou pa devret ofanse ler sa i arive.​—Ekle. 7:9.

16. Ki mannyer nou kapab ankouraz bann ki reponn pandan renyon?

¹⁶ Si ou pa ganny sa loportinite pour reponn sa kantite fwa ki ou ti ava kontan, akoz ou pa ekout byen larepons lezot ki pe partisipe e apre renyon, felisit zot pour zot larepons? Bann parol koumsa pour ankouraz ou bann frer ek ser zis parey ou larepons dan renyon ti pou ankouraz zot. (Prov. 10:21) Ler nou felisit lezot, sa i en lot fason ki nou kapab ankouraz kanmarad.

17. (a) Ki mannyer bann paran i kapab ed zot zanfan pour prepar bann larepons ki apropriye pour zot laz? (b) Dapre sa video, ki sa kat letap ki pou ed ou pour prepare pour reponn pandan renyon? (Vwar not.)

¹⁷ Ki lezot fason ki nou kapab ankouraz kanmarad pandan renyon? Si ou en paran, ed ou zanfan pour prepar en larepons ki apropriye pour zot laz. (Mat. 21:16) Parfwa i annan bann lartik ki  pe koz lo bann sityasyon serye. Par egzanp, konsernan bann problenm dan maryaz oubyen bann keksoz ki annan pour fer avek moralite. Me kantmenm sa, i annan bann paragraf ki bann zanfan i kapab reponn. Osi, ed ou zanfan pour konpran akoz ki zot pa pou toultan ganny sa loportinite pour reponn. Ler ou fer sa, sa pou ed ou zanfan pour pa dezapwente ler lezot i reponn.​—1 Tim. 6:18. d

18. Ki mannyer nou kapab evite atir latansyon lo nou lekor ler nou pe reponn pandan renyon? (Proverb 27:2)

¹⁸ Nou tou nou kapab prepar bann larepons ki onor Zeova e ki ankouraz nou bann frer ek ser. (Prov. 25:11) Menm si parfwa nou kapab koz lo nou prop leksperyans, nou pa devret koz tro bokou lo nou lekor. (Lir Proverb 27:2; 2 Kor. 10:18) O kontrer, nou devret fer zefor pour atir latansyon lo Zeova, son Parol ek son pep. (Rev. 4:11) Byensir si kestyon pour en paragraf i demann nou pour donn en leksperyans, nou kapab fer li. Nou kapab vwar en legzanp dan sa paragraf ki swiv.

19. (a) Ki pou arive ler nou demontre konsiderasyon pour tou bann ki asiste renyon? (Romen 1:11, 12) (b) Ki ou apresye avek sa privilez ki ou annan pour reponn pandan renyon?

¹⁹ Menm si i napa bann lalwa konsernan ki mannyer pour reponn pandan renyon, nou tou nou kapab esey ankouraz kanmarad. Sa i kapab vedir ki nou donn en larepons pli souvan. I kapab osi vedir ki nou satisfe avek lakantite fwa ki nou ganny loportinite pour reponn e ki nou kontan ki lezot i kapab reponn zot osi. Ler nou met lentere lezot avan sa ki pour nou, nou tou nou kapab “ankouraz kanmarad” pandan renyon.​—Lir Romen 1:11, 12.