1-2. Ki nou bezwen fer anmezir ki nou pe esper sa nouvo lemonn?

 NOU vreman rekonesan ki Zeova in promet pour ranplas sa move lemonn avek en nouvo lemonn kot i annan ladrwatir. (2 Pyer 3:13) Menm si nou pa konnen kan ki sa pou arive, sa ki pe arive dan lemonn i montre nou ki nou pa pou bezwen esper ankor bokou letan.​—Mat. 24:32-34, 36; Akt 1:7.

² Nenport ki kantite letan ki nou’n dan laverite, pour le moman nou tou nou bezwen ranforsi nou lafwa dan sa promes. Akoz sa? Parski menm si nou annan en lafwa for, nou lafwa i kapab afebli. Anfet, zapot Pol ti dir ki en mank lafwa i en “pese ki kapab fasilman anpay nou.” (Ebr. 12:1) Pour anpes sa arive, nou bezwen regilyerman medit lo bann levidans ki montre ki byento, Zeova pou anmenn sa nouvo lemonn.​—Ebr. 11:1.

3. Ki nou pou vwar dan sa lartik?

³ Dan sa lartik, nou pou vwar trwa fason ki nou kapab ranforsi nou lafwa dan promes Zeova konsernan sa nouvo lemonn. Sa i par (1) medit lo sa ranson, (2) medit lo lefet ki Zeova i pwisan e (3) fer bann keksoz ki pou fer nou vin pli pros avek Zeova. Premyerman, annou vwar serten sityasyon ki nou kapab pe fer fas avek kot nou bezwen annan lafwa ki sa nouvo lemonn pou vini.

 BANN SITYASYON KOT NOU BEZWEN ANNAN EN LAFWA FOR

4. Ki bann desizyon nou bezwen fer kot nou bezwen annan en lafwa for?

⁴ Toulezour, i annan bann desizyon ki nou bezwen fer kot nou bezwen annan en lafwa for. Par egzanp, nou fer bann desizyon konsernan nou frekantasyon, divertisman, ledikasyon, maryaz, zanfan ek travay. I byen pour nou demann nou lekor: ‘Eski mon bann desizyon i montre ki mon asire ki sa lemonn i tanporer e ki byento i pou ganny ranplase par en nouvo lemonn? Oubyen eski mon pe fer bann menm keksoz ki bann dimoun ki pa krwar zot kapab viv pour touzour pe fer?’ (Mat. 6:19, 20; Lik 12:16-21) Si nou vreman annan lafwa ki sa nouvo lemonn i pros pour vini, nou pou fer bann bon desizyon.

5-6. Akoz nou bezwen annan en lafwa for ler nou pe fer fas avek problenm? Donn en legzanp.

⁵ Nou bezwen annan en lafwa for ler nou pe fer fas avek problenm. I kapab ki nou pe ganny persekite, nou annan en maladi grav oubyen lezot problenm ki kapab fer nou dekouraze. Petet o konmansman, nou krwar ki nou kapab andir nou problenm. Me bann problenm koumsa i souvan dire pour en kantite letan. Alor nou bezwen annan en lafwa for pour nou kapab andire e pour kontinyen servi Zeova avek lazwa.​—Rom. 12:12; 1 Pyer 1:6, 7.

⁶ Ler nou pe fer fas avek en problenm, petet nou santi ki nouvo lemonn pe tarde vini. Eski sa i vedir ki nou lafwa i feb? Pa neseserman. Annou vwar en legzanp. Pandan sezon lapli, i kapab ki nou santi ki i pa pou zanmen vin ansoleye ankor me apre en pe letan, nou reganny soley. Pareyman ler nou dekouraze, nou kapab santi ki nouvo lemonn pe tarde vini. Me si nou lafwa i for, nou konnen ki bann promes Bondye pou vin vre. (Ps. 94:3, 14, 15; Ebr. 6:17-19) Sa i fer ki nou pou kapab kontinyen met ladorasyon Zeova premye dan nou lavi.

7. Ki kalite latitid ki nou bezwen evite annan?

⁷ Nou osi bezwen annan en lafwa for pour kapab fer sa travay predikasyon. En kantite dimoun ki nou anons sa “bon nouvel” avek, pa krwar ki Bondye pou anmenn en nouvo lemonn. (Mat. 24:14; Ezek. 33:32) Nou bezwen fer atansyon ki nou osi nou pa zanmen dout sa ki Zeova pe ansenny nou. Pour anpes sa arive, nou bezwen kontinyen ranforsi nou lafwa. Annou vwar trwa fason ki nou kapab fer sa.

MEDIT LO SA RANSON

8-9. Ki mannyer ler nou medit lo sa ranson, sa i ranforsi nou lafwa?

⁸ En fason ki nou kapab ranforsi nou lafwa i par medit lo sa ranson. Sa ranson i fer nou asire ki bann promes Bondye pou vin vre. Ler nou pran letan pour reflesir lo akoz Zeova ti donn sa ranson e ki i ti fer pour donn sa ranson, sa i kapab ranforsi nou lafwa ki sa promes ki Bondye in fer pour nou viv pour touzour dan en lemonn meyer, pou sirman vin vre. Akoz nou kapab dir sa?

⁹ Annou vwar ki Zeova ti fer pour donn sa ranson. Zeova ti anvoy son Garson ki i kontan, ki ti osi son bon zanmi lo later pour li kapab ne konman en imen parfe. Ler Zezi ti lo later, i ti fer fas avek tou sort kalite problenm. Apre i ti soufer e i ti mor dan en fason kriyel. Pa sa ti en gran sakrifis ki Zeova ti fer! Nou  Bondye ki kontan nou pa ti pou zanmen les son Garson soufer e mor, zis pour ki nou kapab viv en pli bon lavi pour en pti pe letan. (Zan 3:16; 1 Pyer 1:18, 19) Vi ki Zeova in donn son Garson ki presye pour li pour ed nou, i pou fer sir ki nou pou viv pour touzour dan nouvo lemonn.

MEDIT LO LEFET KI ZEOVA I PWISAN

10. Dapre Efezyen 3:20, ki Zeova i kapab fer?

¹⁰ En dezyenm fason ki nou kapab ranforsi nou lafwa i ler nou reflesir lo ki kantite Zeova i pwisan. I annan sa pouvwar pour akonpli tou son bann promes. En kantite dimoun ozordi pa krwar ki nou kapab viv pour touzour dan nouvo lemonn. Me Zeova i souvandfwa promet bann keksoz ki imen pa pou zanmen kapab fer. Apre tou, i Bondye Tou Pwisan. (Zob 42:2; Mark 10:27) Alor nou pa sirprann ler i promet ki i pou fer bann keksoz merveye.​—Lir Efezyen 3:20.

11. Ki serten promes merveye Zeova in fer? (Vwar sa bwat “ Serten promes merveye ki’n ganny akonplir.”)

¹¹ Annou vwar serten keksoz ki Zeova ti promet son pep dan lepase ki ti paret enposib pour vin vre. I ti promet Abraam ek Sara ki zot ti pou ganny en garson menm si zot ti aze. (Zen. 17:15-17) I ti osi promet Abraam ki son desandans ti pou ganny donnen pei Kanaan. Pandan bann lannen ki bann Izraelit, ki ti desandans Abraam ti lesklav Lezip, i ti paret konmsi sa promes pa ti pou zanmen vin vre. Me i ti vin vre. Pli tar, Zeova ti dir ki Elizabet ti pou ganny en zanfan menm si i ti aze. I ti osi dir Mari, ki ti en vyerz ki i ti pou donn nesans son Garson. Sa ti pou akonpli en promes ki Zeova ti’n fer plizyer milye lannen pli boner dan zarden Edenn.​—Zen. 3:15.

12. Ki Zozye 23:14 ek Izai 55:10, 11 i fer nou asire konsernan pwisans Zeova?

¹² Ler nou medit lo tou bann promes ki Zeova in fer e lo lafason ki i’n akonpli sa bann promes, nou konpran ki Zeova i vreman pwisan. Sa pou fer nou annan plis lafwa dan sa promes konsernan en nouvo lemonn. (Lir Zozye 23:14; Izai 55:10, 11.) Sa pou fer nou pli kapab ed lezot konpran ki sa nouvo lemonn pou sirman arive. Zeova li menm ti dir sa konsernan sa nouvo lesyel ek sa nouvo later: “Sa bann parol i fidel e vre.”​—Rev. 21:1, 5.

FER BANN KEKSOZ KI POU FER OU VIN PLI PROS AVEK ZEOVA

13. Ki mannyer renyon i ranforsi nou lafwa? Eksplike.

¹³ En trwazyenm fason ki nou kapab ranforsi nou lafwa i par fer bann keksoz ki pou fer nou vin pli pros avek Zeova. Par egzanp, annou vwar ki byenfe nou gannyen ler nou asiste renyon. En ser ki apel Anna, ki’n pas plizyer lannen dan diferan form servis a plen tan i dir: “Renyon i ed mwan gard mon lafwa for. Menm si sa orater pa en bon ansenyan ouswa i pe dir en keksoz ki mon deza konnen, souvandfwa mon tann en keksoz ki ed mwan konpran Labib pli byen e ki ranforsi mon lafwa.” b Nou lafwa i osi vin pli for ler nou ekout larepons nou bann frer ek ser pandan renyon.​—Rom. 1:11, 12; 10:17.

14. Ki mannyer predikasyon i ranforsi nou lafwa?

¹⁴ Nou osi ranforsi nou lafwa ler nou partisip dan sa travay predikasyon.  (Ebr. 10:23) En ser ki apel Barbara, ki’n servi Zeova pour plis ki 70 an i dir: “Sa travay predikasyon in toultan ranforsi mon lafwa. Pli mon koz avek lezot lo bann zoli promes ki Zeova in fer, pli mon lafwa i vin pli for.”

15. Ki mannyer letid personnel i ranforsi nou lafwa? (Vwar portre.)

¹⁵ Annou vwar en lot keksoz ki ranforsi nou lafwa. Sa i letid personnel. Susan i dir ki i plàn kan ki i pou etidye e sa i ed li. I dir: “Son Dimans, mon etidye sa lartik Latour Veyer ki pou ganny fer son semenn answit. Dan Lendi ek Mardi, mon prepare pour renyon lasemenn. Larestan zour, mon travay lo en proze dan mon letid personnel.” Vi ki Susan i toultan gard son progranm pour letid, sa i ed li pour ranforsi son lafwa. Irene, ki’n servi pour plizyer lannen kot Biro prensipal Temwen Zeova i dir ki ler i etidye bann profesi ki dan Labib, sa i ranforsi son lafwa. I dir: “I enpresyonan pour vwar ki mannyer bann profesi ki Zeova i fer i ganny akonplir dan tou pti detay.” c

“SIRMAN I POU ARIVE”

16. Akoz sa parol ki Zeova ti dir Abakouk i aplik pour nou ozordi? (Ebre 10:36, 37)

¹⁶ Serten serviter Zeova ki’n servi Zeova pour en kantite letan, i ankor pe esper lafen sa move lemonn arive. Serten dimoun i krwar ki Bondye pe tarde pour akonpli son promes. Me Zeova i konnen ki mannyer son bann serviter i santi. Anfet i ti dir avek profet Abakouk: “Sa vizyon pou ganny akonplir dan son letan fikse. I pe al vitman ver son lakonplisman e i pa pou koz manti. Menm si i tarde, kontinyen esper li! Parski sirman i pou arive. I pa pou an retar!” (Aba. 2:3)  Eski sa parol ti aplik zis pour Abakouk? Ouswa eski i osi aplik pour nou? Zeova ti fer zapot Pol dir sa bann menm parol avek bann Kretyen, ki ti pe esper sa nouvo lemonn arive. (Lir Ebre 10:36, 37.) Alor nou kapab asire ki menm si i paret ki sa promes ki Zeova in fer pour sov nou pe tarde, “sirman i pou arive. I pa pou an retar!”

17. Ki mannyer en ser ti aplik sa konsey ki Zeova ti donn Abakouk?

¹⁷ En kantite serviter Zeova in aplik konsey Zeova e zot pe ‘kontinyen espere.’ Serten in espere pour plizyer lannen. Par egzanp, en ser ki apel Louise ti konmans servi Zeova an 1939. I dir: “Sa letan mon ti krwar ki Armagedon ti pou vin avan ki mon fini segonder. Sa pa ti arive. Pandan bann lannen, mon’n lir bann resi konsernan bann dimoun ki ti esper Zeova akonpli son promes. Mon ti lir konsernan Noe, Abraam, Zozef ek lezot ki ti bezwen esper en kantite letan pour Zeova rekonpans zot. Sa ti ed mwan pour mwan osi esper Zeova akonpli son bann promes. Ler nou toultan krwar ki bann promes Zeova pou ganny akonplir, sa in ed nou pour asire ki sa nouvo lemonn i vreman pros.” Lezot serviter Zeova ki’n servi Zeova pour en kantite letan, i dakor avek sa ki sa ser in dir.

18. Ki mannyer ler nou obzerv kreasyon, sa i ranforsi nou lafwa ki byento sa nouvo lemonn pou vini?

¹⁸ I vre ki nouvo lemonn pa ankor arive. Me reflesir lo serten keksoz ki deza la parey bann zetwal, bann pye dibwa, bann zannimo ek bann imen. Menm si i annan en letan ki sa bann keksoz pa ti egziste, nou tou nou konnen ki zot egziste. Zot la parski Zeova ki’n kree zot. (Zen. 1:1, 26, 27) Nou Bondye in osi promet ki i pou kree en nouvo lemonn. I pou akonpli sa promes. Dan nouvo lemonn, dimoun pou viv pour touzour e zot pou annan en lasante parfe. Nou kapab asire ki sa nouvo lemonn pou vin dan sa letan ki Bondye in deside.​—Iza. 65:17; Rev. 21:3, 4.

19. Ki mannyer ou kapab ranforsi ou lafwa?

¹⁹ Me antretan, servi tou loportinite ki ou annan pour ranforsi ou lafwa. Toultan rekonesan pour sa ranson. Medit lo lefet ki Zeova i pwisan. Fer bann keksoz ki pou fer ou vin pli pros avek Zeova. Ler ou fer sa, ou pou parmi bann ki “akoz zot lafwa ek pasyans” pou vwar lakonplisman bann promes.​—Ebr. 6:11, 12; Rom. 5:5.