1. Kan ki Zezi ti fer son premye mirak? Eksplike.

 IMAZIN sa ki ti arive ver lafen lannen 29, ler Zezi ti konmans son minister lo later. Zezi, son manman Mari ek serten son bann disip ti’n ganny envite en maryaz Kana. Kana ti en vilaz ki ti dan nor Nazaret, sa lavil kot Zezi ti’n grandi. Mari ti en zanmi sa fanmir e i paret ki i ti pe ede pour pran swen avek bann envite. Me pandan sa maryaz, en keksoz ti arive ki ti’n kapab fer sa fanmir ek sa zenn koup anbarase. Diven ti’n fini. b Petet lakantite envite ti bokou plis ki zot ti pe ekspekte. Deswit Mari ti al kot son garson e i ti dir: “Diven in fini.” (Zan 2:1-3) Ki Zezi i fer? Zezi i fer en keksoz ekstraordiner. I fer delo vin en “bon diven.”​—Zan 2:9, 10.

2-3. (a) Ki serten mirak Zezi ti fer? (b) Ki byenfe nou kapab gannyen ler nou etidye bann mirak ki Zezi ti fer?

² Zezi ti fer lezot mirak pandan son minister. c I ti servi son pouvwar pour ed plizyer milye dimoun. Par egzanp, parmi bann mirak ki Zezi ti fer, i ti donn manze 5,000 zonm e pli tar 4,000 zonm. Si nou enkli bann madanm ek zanfan, i kapab ki an tou Zezi ti donn manze plis ki 27,000 dimoun. (Mat. 14:15-21; 15:32-38) Tou le de fwa, Zezi ti geri bann dimoun ki ti malad. (Mat. 14:14;  15:30, 31) Imazinen ki mannyer sa lafoul ti kontan ki Zezi ti’n geri zot e donn zot manze!

³ Ozordi nou kapab aprann en kantite keksoz avek bann mirak ki Zezi ti fer. Dan sa lartik, nou pou diskit lo serten leson ki nou kapab aprann avek sa bann mirak. Sa pou ed nou fer nou lafwa vin pli for. Apre nou pou vwar ki mannyer nou kapab demontre limilite ek konpasyon parey Zezi ti fer ler i ti fer bann mirak.

4. Bann mirak ki Zezi ti fer i ansenny nou lo lekel?

⁴ Atraver bann mirak ki Zezi ti fer, nou kapab aprann bann leson lo li e osi lo son Papa. Sa i akoz Zeova ki’n donn Zezi sa pouvwar pour fer sa bann mirak. Akt 10:38 i dir: “Bondye ti swazir [Zezi] avek lespri sen e donn li son pwisans. Parski Bondye ti avek li, i ti al partou dan sa pei pour fer dibyen e geri tou bann ki ti anba pouvwar Dyab.” Rapel ki Zezi ti reflekte fason panse ek santiman son Papa dan en fason parfe dan tou sa ki i ti dir e fer e sa i enkli ler i ti fer bann mirak. (Zan 14:9) Aprezan, annou vwar trwa leson ki nou kapab aprann avek bann mirak ki Zezi ti fer.

5. Kwa ki ti motiv Zezi pour fer bann mirak? (Matye 20:30-34)

⁵ Premyerman, Zezi ek son Papa i vreman kontan nou. Ler Zezi ti lo later, i ti montre ki kantite i kontan dimoun par servi son pouvwar pour ed bann ki ti pe soufer. En fwa, de zonm aveg ti sipliy li pour ed zot. (Lir Matye 20:30-34.) Remarke ki “leker Zezi ti fermal” e apre i ti geri zot. Dapre sa konteks, sa mo Ebre ki’n ganny tradwir “leker Zezi ti fermal” i refer avek konpasyon ki en santiman vreman for. En fason ki Zezi ti demontre lanmour i par demontre konpasyon. Sa kalite konpasyon ti osi motiv Zezi pour donn manze bann ki lafen e geri en dimoun ki ti annan lalep. (Mat. 15:32; Mark 1:41) Nou kapab asire ki Zeova, sa Bondye ki demontre “tandres ek konpasyon” ek son Garson i kontan nou e zot leker i fermal ler nou soufer. (Lik 1:78; 1 Pyer 5:7) Zot vreman anvi tir tou bann problenm ki fer imen soufer.

6. Ki pouvwar Bondye in donn Zezi?

⁶ Dezyenmman, Bondye in donn Zezi pouvwar pour rezourd tou problenm ki bann imen i annan. Ler Zezi ti fer bann mirak, i ti montre ki i kapab rezourd bann problenm ki nou pa pou zanmen kapab rezourd lo nou menm. Par egzanp, Zezi i annan sa pouvwar pour liber nou avek sours tou nou bann problenm, setadir pese ki nou’n erite avek Adan e tou sa ki arive akoz pese enkli maladi ek lanmor. (Mat. 9:1-6; Rom. 5:12, 18, 19) Bann mirak ki Zezi ti fer i montre ki Zezi i kapab geri “tou sort kalite” maladi e menm resisit bann dimoun mor. (Mat. 4:23; Zan 11:43, 44) Zezi i osi annan sa pouvwar pour kontrol bann gro tanpet e pour liber bann dimoun annan lenfliyans bann demon. (Mark 4:37-39; Lik 8:2) I vreman rekonfortan pour konnen ki Zeova in donn son Garson sa kalite pouvwar.

7-8. (a) Ki bann mirak Zezi i fer nou asire? (b) Ki mirak ki ou vreman anvi vwar dan nouvo lemonn?

⁷ Trwazyenmman, nou kapab asire ki bann bon keksoz ki Rwayonm Bondye pou anmennen pou vin vre. Bann mirak ki Zezi ti fer ler i ti lo later, i montre nou ki  Zezi pou fer pour later antye konman Lerwa dan Rwayonm Bondye. Annou vwar serten keksoz ki nou pou eksperyanse ler Zezi i diriz lo later antye. Nou pou annan en lasante parfe parski Zezi pou tir tou maladi ek dezabilite ki dimoun i annan. (Iza. 33:24; 35:5, 6; Rev. 21:3, 4) Nou pa pou zanmen lafen ouswa soufer akoz bann dezas natirel. (Iza. 25:6; Mark 4:41) Nou pou kontan pour akeyir bann dimoun ki nou kontan ler zot sorti dan “latonm.” (Zan 5:28, 29) Ki mirak ki ou vreman anvi vwar dan nouvo lemonn?

⁸ Ler Zezi ti fer bann mirak, i ti demontre limilite ek konpasyon e sa i de kalite ki nou devret demontre nou osi. Aprezan annou vwar de mirak ki Zezi ti fer. Premyerman, nou pou vwar sa resi konsernan ler Zezi ti al en maryaz Kana.

9. Ki Zezi ti fer dan en resepsyon maryaz? (Zan 2:6-10)

⁹ Lir Zan 2:6-10. Eski Zezi ti oblize fer en keksoz ler diven ti fini? Non. I ti napa en profesi ki ti predir ki Mesi ti pou fer mirak pour fer delo vin diven. Me zis mazinen ki mannyer ou ti pou santi si dan ou resepsyon maryaz labwason i fini. I tre probab ki Zezi ti annan konpasyon pour sa fanmir sirtou pour sa nouvo ek nouvel marye e i pa ti anvi ki zot santi  zot anbarase. Alor parey in ganny mansyonnen o konmansman sa lartik, Zezi ti fer en mirak. I ti fer 390 lit delo vin en bon diven. Petet i ti fer sa kantite diven pour ki i annan diven ki reste pour pli tar oubyen pour ki sa koup i kapab vann sa ki reste. I bezwen ki sa nouvo koup marye ti vreman apresye sa ki Zezi ti’n fer.

10. Ki serten detay enportan ki ou’n vwar dan sa resi ki dan Zan sapit 2? (Vwar portre.)

¹⁰ Annou vwar serten detay enportan dan sa resi ki dan Zan sapit 2. Eski ou remarke ki Zezi pa ti ranpli sa bann resipyan an ros li menm? Olye atir latansyon lo li menm, i ti demann bann ki ti pe servi pour ranpli bann resipyan. (Verse 6, 7) Menm apre ki i ti’n fer delo vin diven, i pa ti anmenn sa diven kot sa enn ki ansarz resepsyon. O kontrer i ti demann bann ki ti pe servi pour fer sa. (Verse 8) Zezi pa ti pran en pe sa diven, lev li anler devan bann envite e dir, ‘Gout en pe sa diven ki mon fek fer!’

11. Ki nou kapab aprann avek mirak ki Zezi ti fer?

¹¹ Ki nou kapab aprann avek sa resi konsernan ler Zezi ti fer delo vin diven? Nou aprann en leson lo konman pour demontre limilite. Zezi pa ti fer vantar konsernan sa mirak ki i ti fer. Anfet i pa ti zanmen fer vantar konsernan bann keksoz ki i ti fer. O kontrer i ti demontre limilite e i ti kontinyen donn laglwar son Papa. (Zan 5:19, 30; 8:28) Si nou swiv legzanp Zezi e nou annan en bon pwennvi lo nou lekor, nou pa pou fer vantar konsernan bann keksoz ki nou fer. Nenport keksoz ki nou fer dan servis Zeova, annou pa fer vantar konsernan bann keksoz ki nou pe fer, me fer vantar konsernan sa Bondye merveye ki nou pe servi. (Zer. 9:23, 24) Nou devret donn li sa loner ki i merite. Apre tou, nou pa ti pou zanmen kapab fer okenn bon keksoz san led Zeova.​—1 Kor. 1:26-31.

12. Ki en lot fason nou kapab swiv legzanp Zezi e demontre limilite? Donn en legzanp.

¹² Annou vwar en lot fason ki nou kapab swiv legzanp Zezi e demontre limilite. Meton en ansyen i pran letan pour ed en zenn serviter kongregasyon pour prepare pour son premye diskour piblik. Avek led sa ansyen, sa zenn frer i fer en bon diskour e sa i fer kongregasyon kontan. Apre renyon, en dimoun i vin kot sa ansyen e i dir, ‘Frer Entel in fer en zoli diskour.’ Eski sa ansyen i bezwen dir: ‘Wi me mon’n pas en kantite letan pe ed li’? Ouswa eski i devret demontre limilite e dir: ‘Wi i’n fer en bon diskour. Mon vreman fyer’? Ler nou annan limilite, nou pa pou fer vantar konsernan bann bon keksoz ki nou’n fer pour lezot. Nou kontan parski nou konnen ki Zeova i vwar e i apresye sa ki nou fer. (Konpar Matye 6:2-4; Ebr. 13:16) Ler nou swiv legzanp Zezi e demontre limilite, nou asire ki nou fer plezir Zeova.​—1 Pyer 5:6.

13. Ki Zezi ti vwar ler i ti pros pour ariv lavil Nain e ki i ti fer? (Lik 7:11-15)

¹³ Lir Lik 7:11-15. Imazin sa ki ti arive apepre enn an edmi apre ki Zezi ti’n konmans son minister. Zezi ti’n al Nain, en lavil Galile ki pa tro lwen avek Sounenm. Sounenm ti sa landrwa kot profet Elisa ti resisit garson en madanm apepre 900 z-an pli boner. (2 Rwa. 4:32-37) Ler Zezi i pros pour ariv kot baro lavil, i vwar en gran lafoul pe anmenn en lekor mor an  deor lavil. Sa i vreman fer lapenn parski en vev ti’n perdi son sel garson. Me sa manman pa tousel. I annan en gran lafoul avek li. Zezi i aret sa lafoul e i fer en keksoz remarkab pour sa manman. I resisit sa garson. Sa i sa premye parmi sa trwa rezireksyon ki Zezi ti fer ki ganny mansyonnen dan bann Levanzil.

14. Ki serten detay enportan ki ou’n aprann dan sa resi ki dan Lik sapit 7? (Vwar portre.)

¹⁴ Annou vwar serten detay enportan dan sa resi ki dan Lik sapit 7. Eski ou remarke ki sa verse i dir ki Zezi ti “vwar” sa manman e ki apre “son leker ti fermal”? (Verse 13) Petet Zezi ti vwar li pe plere anmezir i ti pe marse o bor lekor son garson e sa ti fer leker Zezi fermal. Zezi pa ti zis pran pitye pour sa manman, i ti osi demontre konpasyon anver li. San dout, Zezi ti koz avek li dan en fason rekonfortan e i ti dir: “Aret plere.” Apre Zezi ti fer en keksoz pour ed sa madanm. I ti resisit sa garson e i ti “donn li avek son manman.”​—Verse 14, 15.

15. Ki nou kapab aprann avek mirak ki Zezi ti fer?

¹⁵ Ki nou kapab aprann avek sa resi konsernan ler Zezi ti resisit garson en vev? Nou aprann ki nou bezwen demontre konpasyon anver bann ki dan dey. Byensir nou pa kapab resisit dimoun mor parey Zezi ti fer. Me parey Zezi, nou pou annan konpasyon pour bann ki dan dey si nou obzerv byen. Nou kapab demontre konpasyon par dir e fer sa ki nou kapab pour ed e rekonfort zot. d (Prov. 17:17; 2 Kor. 1:3, 4; 1 Pyer 3:8) Nou pa bezwen dir e fer bann gran keksoz me nou kapab dir e fer bann keksoz ki kapab ankouraz e rekonfort zot.

16. Ki ou aprann avek leksperyans en manman ki son pti fiy fek mor? (Vwar portre.)

¹⁶ Annou vwar en leksperyans. Detrwa lannen pase, en ser ti remarke ki en manman ki ti pe asiz pre o bor li ti pe plere ler zot ti pe sant kantik dan en renyon.  Sa kantik ti konsernan sa lespwar rezireksyon e resaman fiy sa manman ti’n mor. Vi ki sa ser ti konn sa, deswit i ti al o bor sa manman. I ti may li e zot ti kontinyen sant sa kantik ansanm. Pli tar sa manman ti dir ki sa ki sa ser ti’n fer ti fer li kontan son bann frer ek ser plis ankor. I ti vreman kontan ki i ti’n al renyon. I ti dir: “Nou ganny led nou bann frer ek ser kot Lasal Rwayonm.” Nou kapab asire ki Zeova i vwar e i apresye menm bann pti keksoz ki nou fer pour demontre konpasyon anver bann ki dan dey e ki “dekouraze.”​—Ps. 34:18.

17. Ki nou’n aprann dan sa lartik?

¹⁷ Ler nou etidye bann resi dan bann Levanzil konsernan bann mirak ki Zezi ti fer, sa i kapab ankouraz nou. Sa bann mirak i ansenny nou ki Zeova ek Zezi i vreman kontan nou, ki Zezi i annan sa pouvwar pour rezourd tou problenm ki bann imen i annan e ki nou kapab annan konfyans ki bann zoli promes pour lavenir pour vin vre tre byento ler Rwayonm Bondye pou diriz lo later. Ler nou etidye sa bann resi, nou kapab reflesir lo ki mannyer nou kapab demontre bann menm kalite ki Zezi ti demontre. Petet pandan ou letid personnel oubyen ladorasyon fanmir, ou kapab etidye lezot mirak ki Zezi ti fer. Dan ou letid, vwar ki leson ou kapab aprann e apre koz avek lezot lo sa ki ou’n aprann. Ler ou fer sa, ou pou annan bann konversasyon ki ankourazan.​—Rom. 1:11, 12.

18. Ki nou pou vwar dan sa lartik ki swiv?

¹⁸ Ver lafen son minister lo later, Zezi ti fer en trwazyenm rezireksyon. Sa i osi sa dernyen rezireksyon ki Zezi ti fer ki Labib i koz lo la. Me sa enn ti diferan parski i ti resisit enn son bon zanmi ki ti’n mor pour kat zour. Ki leson nou kapab aprann avek sa resi? Ki nou kapab fer ki pou ed nou pour annan plis konfyans dan sa promes ki bann mor pou resisite? Nou pou reponn sa bann kestyon dan sa lartik ki swiv.