1. Ki mannyer en garson ti montre ki i vreman annan konfyans dan sa promes konsernan rezireksyon?

 EN PTI garson ki apel Matthew i annan en maladi grav e sa i fer ki in bezwen fer en kantite loperasyon. Ler i ti annan set an, li avek son fanmir ti pe get sa progranm ki nou gannyen tou le mwan lo Televizyon JW. Ver lafen sa progranm, zot ti vwar en video lanmizik konsernan ler nou pou akeyir bann dimoun ki nou kontan ki’n resisite. b Apre ki zot ti’n get sa progranm, Matthew ti al o bor son paran, atrap zot lanmen e dir: “Ou vwar manmi ek dadi, menm si mon mor mon pou resisite. Zot kapab esper mwan. Tou keksoz pou oke.” Eski ou kapab imazinen ki mannyer sa bann paran ti santi ler zot ti vwar ki zot garson i vreman annan konfyans dan sa promes konsernan rezireksyon?

2-3. Akoz i byen pour nou reflesir lo sa promes konsernan rezireksyon?

² I ti pou byen si tanzantan nou reflesir lo sa promes konsernan rezireksyon. (Zan 5:28, 29) Akoz? Parski nou pa zanmen konnen kan ki nou kapab ganny en maladi grav oubyen kan ki en dimoun ki nou kontan i kapab mor en sel kou. (Ekle. 9:11; Zak 4:13, 14) Nou lespwar konsernan rezireksyon i kapab ed nou fer fas avek bann problenm koumsa. (1 Tesa. 4:13) Labib i asir nou ki nou Papa ki dan lesyel i konn nou byen e i kontan nou en kantite. (Lik 12:7) Reflesir lo ki kantite Zeova i bezwen konn nou byen pour li kapab resisit nou avek sa menm personnalite ek souvenir ki nou ti annan. Zeova i kontan nou en kantite e in fer li posib pour nou viv pour touzour. Menm si nou mor, i pou resisit nou.

³ Dan sa lartik, nou pou vwar akoz nou kapab annan konfyans dan sa promes konsernan rezireksyon. Apre nou pou etidye sa resi Labib kot nou verse tenm i sorti. Nou verse tenm i dir: “Ou frer pou resisite.” (Zan 11:23) Nou pou  osi vwar ki nou kapab fer pour annan plis konfyans dan sa promes konsernan rezireksyon.

4. Pour annan konfyans dan en promes, kwa ki nou bezwen asire? Donn en legzanp.

⁴ Pour annan konfyans dan en promes, nou bezwen asire ki sa enn ki fer sa promes i anvi akonpli sa promes e i annan sa pouvwar oubyen abilite pour fer li. Annou pran en legzanp. Meton en tanpet in andomaz ou lakaz. En zanmi i vin kot ou e i promet pour ed ou rekonstri ou lakaz. I senser e ou asire ki i anvi ed ou. Si i en dimoun ki fer konstriksyon e i annan tou zouti ki neseser, ou konnen ki i pou kapab ed ou. Alor ou annan konfyans dan son promes. Me ki nou pou dir lo promes Bondye konsernan rezireksyon? Eski Bondye i anvi akonpli sa promes e eski i annan sa pouvwar pour fer li?

5-6. Akoz nou kapab asire ki Zeova i anvi resisit bann dimoun ki’n mor?

⁵ Eski Zeova i anvi resisit bann dimoun ki’n mor? Nou kapab asire ki i anvi resisit bann dimoun ki’n mor. I’n enspir plizyer ekriven Labib pour ekri konsernan son promes pour resisit bann dimoun ki’n mor dan lavenir. (Iza. 26:19; Ose. 13:14; Rev. 20:11-13) Ler Zeova i fer en promes, i toultan akonpli sa promes. (Zoz. 23:14) Anfet, Zeova i vreman anvi resisit bann dimoun ki’n mor. Akoz nou dir sa?

⁶ Annou vwar sa ki Zob ti dir. Zob ti asire ki menm si i mor, Zeova ti pou vreman anvi resisit li. (Zob 14:14, 15) Zeova i santi menm parey pour tou son bann serviter ki’n mor. I anvi resisit zot pour zot kapab an bonn sante e ere. Me ki mannyer Zeova i santi anver tou sa bann dimoun ki’n mor avan ki zot in ganny loportinite pour aprann laverite konsernan li. Nou Bondye i kontan bann imen e i anvi resisit zot osi. (Akt 24:15) I anvi ki zot ganny sa loportinite pour vin son zanmi e pour viv pour touzour lo later. (Zan 3:16) Alor i kler ki Zeova i anvi resisit bann dimoun ki’n mor.

7-8. Akoz nou kapab asire ki Zeova i annan sa pouvwar pour resisit bann dimoun ki’n mor?

⁷ Eski Zeova i annan sa pouvwar pour resisit bann dimoun ki’n mor? Definitivman! Parski i “sa enn Tou Pwisan.” (Rev. 1:8) Zeova i sitan pwisan ki i kapab ranport laviktwar lo tou son lennmi, menm lanmor. (1 Kor. 15:26) Ler nou konn sa, sa i fer nou annan lafors e i rekonfort nou. Annou vwar leksperyans en ser ki apel Emma Arnold. Pandan Dezyenm Lager Mondyal, Emma ek son fanmir ti fer fas avek bann problenm ki ti fer li difisil pour zot reste fidel avek Zeova. Vi ki bann dimoun ki zot ti kontan ti mor dan kan konsantrasyon Nazi, Emma ti rekonfort son fiy e dir: “Si dimoun ki’n mor pa ti pou zanmen kapab reviv ankor, sa i vedir ki nou lennmi lanmor i pli pwisan ki Bondye! Me sa pa vre.” I napa nanryen ki pli pwisan ki Zeova! Bondye i tou pwisan, in kree lavi alor nou asire ki i annan sa pouvwar pour redonn lavi bann dimoun ki’n mor.

⁸ En lot rezon akoz nou konnen ki Bondye i kapab resisit bann dimoun ki’n mor, i akoz i pa oubliy nanryen. I konn tou bann zetwal. (Iza. 40:26) I osi rapel bann dimoun ki’n mor. (Zob 14:13; Lik 20:37, 38) I kapab fasilman rapel sak pti detay konsernan bann dimoun ki pou resisite enkli zot laparans, personnalite,  bann keksoz ki zot in pas ladan ek zot souvenir.

9. Akoz ou annan konfyans dan sa promes ki dan lavenir Zeova pou resisit bann dimoun ki’n mor?

⁹ Nou kapab annan konfyans dan sa promes ki dan lavenir Zeova pou resisit bann dimoun ki’n mor parski nou konnen ki Zeova i anvi resisit zot e i annan sa pouvwar pour fer li. I annan en lot rezon akoz ki nou kapab annan konfyans dan sa promes. Sa i akoz Zeova in deza resisit dimoun dan lepase. Dan letan Labib, i ti donn serten zonm fidel enkli Zezi, sa pouvwar pour resisit bann dimoun ki’n mor. Aprezan nou pou vwar en resi dan Zan sapit 11 konsernan en rezireksyon ki Zezi ti fer.

10. Ki ti arive ler Zezi ti lot kote larivyer Zourden pe fer predikasyon e ki i ti fer? (Zan 11:1-3)

¹⁰ Lir Zan 11:1-3. Imazin sa ki ti arive ver lafen lannen 32. Lazar ek son de ser Mari ek Mart i trwa bon zanmi Zezi ki reste Betani. (Lik 10:38-42) Me Lazar i tonm malad e son de ser i enkyet. Zot anvoy en mesaz pour Zezi ki lo lot kote larivyer Zourden ki apepre de zour marse avek Betani. (Zan 10:40) Malerezman apepre sa menm letan ki sa mesaze i ariv kot Zezi, Lazar i mor. Menm si Zezi i konnen ki son zanmi fek mor, Zezi i reste dan sa landrwa kot i ti ete pour ankor de zour e apre i al Betani. Alor, ler Zezi i ariv laba, kat zour in pase depi ki Lazar in mor. Zezi pe al fer en keksoz ki pou anmenn byenfe pour son bann zanmi e ki pou glorifye Bondye.​—Zan 11:4, 6, 11, 17.

11. Ki nou aprann dan sa resi konsernan lanmitye?

¹¹ Dan sa resi, nou aprann en leson konsernan lanmitye. Reflesir lo sa: Ler Mari ek Mart ti anvoy mesaz pour Zezi, zot pa ti demann li pour vin Betani. Zot ti zis dir li ki son zanmi ti malad. (Zan 11:3) Ler Lazar ti mor, Zezi ti’n kapab resisit li menm si i ti lwen. Me Zezi ti deside pour al Betani pour vwar Mari ek Mart. Eski ou annan en zanmi ki pou vin ed ou san ki ou bezwen demann li? Si wi, ou konnen ki ou kapab depan lo li “dan letan maler.” (Prov. 17:17) Annou swiv legzanp Zezi e vin sa kalite zanmi pour lezot. Aprezan annou kontinyen lir sa resi e vwar ki i arive apre.

12. Ki promes Zezi ti fer avek Mart e akoz Mart ti kapab annan konfyans dan sa promes? (Zan 11:23-26)

¹² Lir Zan 11:23-26. Ler Mart i tande ki Zezi i pros pour ariv Betani, deswit i al zwenn li e i dir: “Senyer, si ou ti la, mon frer pa ti pou’n mor.” (Zan 11:21) I vre ki Zezi ti’n kapab geri Lazar me Zezi ti anvi fer en keksoz pli remarkab. I ti dir: “Ou frer pou resisite.” I ti donn Mart en lot rezon pour annan konfyans dan son promes ler i ti dir: “Mwan menm rezireksyon ek lavi.” Bondye in donn Zezi sa pouvwar pour resisit bann dimoun ki’n mor. Pli boner Zezi ti resisit en pti fiy pa bokou letan  apre ki sa pti fiy ti’n mor. I ti osi resisit en garson sa menm zour ki sa garson ti mor. (Lik 7:11-15; 8:49-55) Me eski i ti pou kapab resisit en dimoun ki’n mor pour kat zour e ki son lekor in konmans pouri?

13. Dapre Zan 11:32-35, ki Zezi ti fer ler i ti vwar Mari ek lezot pe plere? (Vwar portre.)

¹³ Lir Zan 11:32-35. Imazin sa ki ti arive apre. Mari, ki ti sa lot ser Lazar, ti al zwenn Zezi e i ti dir Zezi sa menm keksoz ki son ser ti’n dir. I ti dir: “Senyer si ou ti la, mon frer pa ti pou’n mor.” Mari ek lezot dimoun ki ti la ti vreman sagren. Ler Zezi ti vwar e tann zot pe plere, i ti vreman sagren li osi. Vi ki son leker ti fermal, son larm ti koule. Zezi i konnen ki kantite i fermal ler en dimoun ki nou kontan i mor. Nou kapab asire ki i vreman anvi retir tou sa ki fer nou plere.

14. Ki nou kapab aprann lo Zeova avek lafason ki Zezi ti reazir ler i ti vwar Mari pe plere?

¹⁴ Lafason ki Zezi ti reazir ler i ti vwar Mari pe plere, i montre nou ki Zeova i en Bondye ki annan tandres ek konpasyon. Akoz nou dir sa? Parey nou’n vwar dan sa lartik avan, Zezi i reflekte fason panse ek santiman son Papa dan en fason parfe. (Zan 12:45) Labib i dir ki ler Zezi ti vwar son bann zanmi dan dey, son leker ti sitan fermal ki i ti plere. Sa i montre nou ki Zeova i sagren ler i vwar nou pe plere akoz nou dan dey. (Ps. 56:8) Pa sa i fer nou anvi vin pli pros avek nou Bondye ki annan konpasyon?

15. Dapre Zan 11:41-44, ki ti arive kot latonm Lazar? (Vwar portre.)

¹⁵ Lir Zan 11:41-44. Ler Zezi i ariv kot sa kavern kot lekor Lazar ti ete, i demann zot pour retir sa ros ki devan sa kavern. Mart pa oule e i dir ki i bezwen ki lekor Lazar i pi. Zezi i dir li: “Pa mon’n dir ou ki si ou krwar ou pou vwar laglwar Bondye?” (Zan 11:39, 40) Apre sa Zezi i get ver lesyel e i fer en lapriyer aotvwa. I anvi donn Zeova tou loner pour sa ki pe al arive. Apre sa, Zezi i kriye: “Lazar, sorti!” Lazar i sorti dan sa kavern! Zezi ti’n fer sa ki serten dimoun ti krwar ki i enposib  pour fer.​—Vwar not letid dan nwtsty dan Zan 11:17.

16. Ki mannyer sa resi ki dan Zan sapit 11 i fer nou annan plis konfyans dan sa promes konsernan rezireksyon?

¹⁶ Sa resi dan Zan sapit 11 i fer nou annan plis konfyans dan sa promes konsernan rezireksyon. Ki mannyer sa? Mazin sa promes ki Zezi ti fer avek Mart. I ti dir: “Ou frer pou resisite.” (Zan 11:23) Zis parey son Papa, Zezi i anvi resisit bann dimoun ki’n mor e i annan sa pouvwar pour fer li. Ler Zezi ti plere, sa ti montre ki Zezi i vreman anvi resisit bann dimoun ki’n mor e retir sa sagrinasyon ki lanmor i anmennen. Ler Lazar ti sorti dan latonm, ankor enn fwa, Zezi ti montre ki i annan sa pouvwar pour resisit bann dimoun ki’n mor. Osi, mazin sa ki Zezi ti dir Mart: “Pa mon’n dir ou ki si ou krwar ou pou vwar laglwar Bondye?” (Zan 11:40) Nou annan bon rezon pour krwar ki Zeova pou gard son promes pour resisit bann dimoun ki’n mor. Alor ki nou kapab fer pour annan plis konfyans dan sa promes?

17. Ki nou devret gard antet anmezir ki nou lir lo bann resi ki koz lo rezireksyon?

¹⁷ Lir e medit lo bann resi ki koz lo bann rezireksyon ki’n arive dan lepase. Dan Labib, i annan wit resi ki koz lo bann dimoun ki ti ganny resisite lo later. c Petet ou kapab etidye sa bann resi. Anmezir ki ou fer sa, rapel ki sa bann dimoun ki swa msye, madanm ek zanfan ti vreman egziste. Rod bann leson ki ou kapab aprann. Reflesir lo ki mannyer sak sa bann leson i montre ki Bondye i anvi resisit bann dimoun ki’n mor e ki i annan sa pouvwar pour fer li. Me fer sir ki ou reflesir lo sa rezireksyon ki pli enportan setadir rezireksyon Zezi. Rapel ki plizyer santenn dimoun ti vwar Zezi apre ki i ti’n resisite. Sa  i fer nou annan plis konfyans ki a lavenir bann dimoun ki’n mor pou ganny resisite.​—1 Kor. 15:3-6, 20-22.

18. Ki mannyer ou kapab byen servi nou bann sanson ki baze lo sa promes konsernan rezireksyon? (Vwar not.)

¹⁸ Ekoute, sante e reflesir lo bann kantik oubyen original songs ki baze lo sa promes konsernan rezireksyon. d (Efe. 5:19) Sa bann sanson i fer nou annan plis konfyans dan sa lespwar konsernan rezireksyon. Ekout sa bann sanson e aprann pour ou kapab sant zot byen. Pandan ladorasyon fanmir, diskit lo sa mesaz ki sa sanson pe pase. Aprann sa bann sanson par ker e reflesir lo sa mesaz ki sa bann sanson pe pase parski sa pou fer ou lafwa vin pli for e i pou tous ou leker. Koumsa si ou fer fas avek en sityasyon kot ou lavi i an danze, oubyen en dimoun ki ou kontan i mor, lespri sen Zeova i kapab ed ou rapel sa bann sanson. Sa pou rekonfort ou e donn ou lafors.

19. Ki mannyer nou kapab servi nou limazinasyon ler nou pe mazin lo rezireksyon? (Vwar sa bwat “Ki ou pou demann zot?”)

¹⁹ Servi ou limazinasyon. Zeova in donn nou sa abilite pour imazin nou dan nouvo lemonn. En ser i dir: “Mon’n pas sitan en kantite letan pe imazin mwan dan nouvo lemonn, ki i konmsi mon kapab santi bann roz ki pe fleri dan Paradi.” Imazin ou pe zwenn bann zonm ek madanm fidel ki ti viv dan letan Labib. Lekel ki ou ti pou kontan zwenn? Ki kestyon ou ti pou demann sa dimoun? Imazin ou pe revwar bann dimoun ki ou kontan ki’n mor. Imazinen ki sa premye keksoz ki ou pou dir zot. Imazin ou pe may zot e ki mannyer ou pou kontan ler ou pou vwar zot.

20. Ki nou devret determinen pour fer?

²⁰ Nou vreman rekonesan pour sa promes ki Zeova in fer konsernan rezireksyon. Nou kapab asire ki sa promes pou vin vre parski Zeova i anvi resisit bann dimoun ki’n mor e i annan sa pouvwar pour fer li. Annou determinen pour kontinyen annan plis konfyans dan sa promes. Ler nou fer sa, nou pou vin pli pros avek nou Bondye ki’n promet sakenn parmi nou ki bann dimoun ki nou kontan pou resisite.