1. Ki mannyer pep Zeova ti ganny organize dan premye syek?

 SAK fwa Zeova i donn son pep en travay pour fer, i ekspekte ki zot fer li dan en fason organize. (1 Kor. 14:33) Par egzanp, Bondye i anvi ki sa bon nouvel i ganny anonse partou lo later. (Mat. 24:14) Zeova in donn Zezi sa responsabilite pour diriz sa travay. Zezi in fer sir ki sa travay i ganny fer dan en fason organize. Dan premye syek ler bann kongregasyon ti ganny etablir dan diferan landrwa, bann ansyen ti ganny apwente pour dirize dan bann kongregasyon. (Akt 14:23) I ti osi annan en group ansyen ki ti baze Zerizalenm, ki ti enkli bann zapot ek bann zonm aze, ki ti fer bann desizyon ki tou kongregasyon ti swiv. (Akt 15:2; 16:4) Ler bann frer ek ser dan sa bann kongregasyon ti obei bann lenstriksyon, “kongregasyon ti vin deplizanpli for e lakantite disip ti ogmante.”—Akt 16:5.

2. Depi 1919, ki mannyer Zeova in gid son pep e donn zot manze spirityel?

² Zeova i kontinyen organiz son pep ozordi. Depi 1919, Zezi pe servi en pti group zonm ki bann Kretyen swazir pour diriz sa travay predikasyon e pour donn son bann disip manze spirityel. a (Lik 12:42) I kler ki Zeova pe beni sa travay ki sa group frer pe fer.—Iza. 60:22; 65:13, 14.

3-4. (a) Ki byenfe nou gannyen lefet ki nou organize? Donn en legzanp. (b) Ki nou pou vwar dan sa lartik?

³ Si Zeova pa ti’n organiz son pep, nou pa ti pou kapab fer sa travay ki Zezi in donn nou pour fer. (Mat. 28:19, 20) Meton bann frer pa ti organize pour nou fer predikasyon  dan tou bann teritwar ki tonm anba nou kongregasyon. Sa ti pou fer ki bann proklanmater ti pou fer predikasyon nenport landrwa kot zot ti anvi. I kapab ki predikasyon ti pou ganny fer dan serten teritwar plizyer fwa tandis ki lezot teritwar pa ti pou ganny fer ditou. Eski ou kapab mazin lezot byenfe ki nou gannyen lefet ki nou organize?

⁴ Zis parey Zezi ti organiz son bann disip ler i ti lo later, i kontinyen organiz pep Bondye ozordi. Dan sa lartik, nou pou vwar legzanp ki Zezi in kite e lafason ki lorganizasyon i swiv son legzanp. Nou pou osi vwar ki mannyer nou kapab montre ki nou annan konfyans dan lorganizasyon Zeova.

NOU LORGANIZASYON I SWIV LEGZANP ZEZI

5. Ki en fason ki lorganizasyon Zeova i swiv legzanp Zezi? (Zan 8:28)

⁵ Zezi ti aprann ki pour dir e ki pour fer, avek son Papa ki dan lesyel. Lorganizasyon Zeova i swiv legzanp Zezi par servi Parol Bondye pour ed nou konnen kwa ki byen e kwa ki mal e pour gid nou. (Lir Zan 8:28; 2 Tim. 3:16, 17) Lorganizasyon Zeova i regilyerman donn nou bann rapel pour lir Parol Bondye e aplik sa ki nou aprann. Ki byenfe nou gannyen ler nou swiv sa konsey?

6. Ki en keksoz nou bezwen fer pour ganny bann byenfe ler nou etidye Labib?

⁶ Nou ganny en kantite byenfe ler nou servi bann piblikasyon ki baze lo Labib pour etidye Labib. Par egzanp, nou kapab konpar sa ki Labib i dir avek bann lenstriksyon ki nou gannyen avek lorganizasyon. Ler nou vwar ki bann lenstriksyon ki nou gannyen i baze lo Labib, sa i fer nou annan plis konfyans dan lorganizasyon Zeova.—Rom. 12:2.

7. Ki mesaz Zezi ti anonse e ki mannyer lorganizasyon Zeova i swiv son legzanp?

⁷ Zezi ti anons “sa bon nouvel lo Rwayonm Bondye.” (Lik 4:43, 44) Zezi ti osi donn son bann disip lord pour fer sanmenm. (Lik 9:1, 2; 10:8, 9) Ozordi tou sa ki asosye avek lorganizasyon Zeova, i anons sa bon nouvel lo Rwayonm nenport landrwa kot zot reste oubyen nenport kantite responsabilite ki zot annan dan lorganizasyon Zeova.

8. Ki privilez nou annan?

⁸ Nou vwar li en privilez pour koz avek lezot konsernan Rwayonm Bondye. Pa tou dimoun ki annan sa privilez pour fer sa. Par egzanp, ler Zezi ti lo later, i pa ti les bann demon rann temwannyaz lo li. (Lik 4:41) Ozordi, avan en dimoun i partisip dan predikasyon avek Temwen Zeova, i bezwen pe viv dan en fason ki fer Zeova plezir. Nou montre ki kantite nou apresye sa privilez pour anons sa bon nouvel par rann temwannyaz avek bann dimoun nenport landrwa kot nou ete e nenport moman. Parey Zezi, nou fer nou mye pour anons sa bon nouvel konsernan Rwayonm Bondye avek lezot e pour ansenny zot laverite.—Mat. 13:3, 23; 1 Kor. 3:6.

9. Ki mannyer lorganizasyon Zeova i fer dimoun konn non Bondye?

⁹ Zezi ti fer dimoun konn non Bondye. Dan lapriyer ki Zezi ti fer avek son Papa ki dan lesyel, i ti dir: “Mon’n fer zot konn ou non.” (Zan 17:26) Lorganizasyon Zeova i swiv legzanp Zezi par rod tou fason pour ed dimoun pour konn non Bondye. En fason ki lorganizasyon in fer sa i atraver Labib–Tradiksyon nouvo lemonn. Dan sa Labib, non Bondye in ganny mete dan bann landrwa kot i ti ete dan bann langaz ki Labib ti ganny ekrir. Sa tradiksyon Labib i disponib an antye oubyen  an parti dan plis ki 270 langaz. Dan sa brosir En led pour etidye Parol Bondye lo paz 1-13, ou pou vwar bann detay konsernan akoz e ki mannyer non Bondye in ganny remete dan Labib. Dan Appendix C, ki dan Study Bible an Angle i annan leksplikasyon konsernan akoz non Bondye i devret ganny mete 237 fwa dan Lekritir Grek Kretyen.

10. Ki ou aprann avek leksperyans en madanm ki reste Myanmar?

¹⁰ Parey Zezi, nou anvi ed lamazorite dimoun posib pour konn non Bondye. Ler en madanm ki reste Myanmar ki annan 67 an, ti aprann ki Bondye i annan en non, i ti konmans plere e i ti dir: “I premye fwa dan mon lavi ki mon tande non Bondye i Zeova. . . . Ou’n ansenny mwan sa keksoz pli enportan ki mon kapab aprann.” Parey nou vwar dan sa leksperyans, ler en dimoun i aprann non Bondye, sa i kapab sanz son lavi.

KONTINYEN MONTRE KI OU ANNAN KONFYANS DAN NOU LORGANIZASYON

11. Ki mannyer bann ansyen i montre ki zot annan konfyans dan lorganizasyon Bondye? (Vwar portre.)

¹¹ Ki en fason ki bann ansyen i kapab montre ki zot annan konfyans dan lorganizasyon Bondye? Ler bann ansyen i ganny lenstriksyon avek lorganizasyon, zot bezwen lir byen sa bann lenstriksyon e fer tou sa ki zot kapab pour aplik sa bann lenstriksyon. Par egzanp, zot ganny lenstriksyon lo ki mannyer pour prezant sak parti dan renyon, lo ki mannyer pour fer lapriyer pour kongregasyon e osi lo ki mannyer pour pran swen avek bann mouton Kris. Ler bann ansyen i swiv tou lenstriksyon ki sorti kot lorganizasyon, zot ed bann frer ek ser pour santi ki Zeova i kontan zot e pe pran swen avek zot.

12. (a) Akoz nou devret siport bann ki pe dirize dan kongregasyon? (Ebre 13:7, 17) (b) Akoz nou devret konsantre lo bon kalite ki bann ki pe dirize dan kongregasyon i annan?

¹² Ler nou ganny lenstriksyon avek bann ansyen, nou devret pare pour swiv. Ler nou fer sa, i pou pli fasil pour bann ansyen fer zot travay. Labib i ankouraz nou pour obei e soumet avek bann ki pe dirize dan kongregasyon. (Lir Ebre 13:7, 17.) Parfwa sa i kapab difisil. Akoz? Parski sa bann zonm i enparfe. Me si nou konsantre lo zot bann move tre olye lo zot bann bon kalite, nou pou pe ed nou bann lennmi. Akoz nou dir sa? Nou bann lennmi i anvi fer nou annan dout ki Bondye pe servi son lorganizasyon pour gid nou. Si nou mazin an mal lo bann ansyen, nou kapab konmans mazin an mal lo lorganizasyon osi e perdi konfyans dan lorganizasyon. Ki nou kapab fer pour idantifye e rezet mansonz nou bann lennmi?

PA LES LEZOT FER OU PERDI KONFYANS DAN NOU LORGANIZASYON

13. Ki mannyer bann lennmi Bondye i esey fer lorganizasyon Zeova paret konman en move lorganizasyon?

¹³ Bann ki opoz Bondye i esey fer krwar ki bann bon keksoz ki lorganizasyon Zeova i fer, i mal. Par egzanp, nou’n aprann dan Labib ki Zeova i ekspekte son bann serviter i reste prop fizikman, moralman e spirityelman. Zeova i dir ki okenn dimoun ki kontinyen fer sa ki mal e ki pa anvi sanz zot konportman, pa kapab kontinyen reste dan kongregasyon. (1 Kor. 5:11-13; 6:9, 10) Nou obei sa lord ki sorti dan Labib. Me bann ki opoz nou i servi sa pour dir konmkwa nou pa kontan dimoun, ki nou ziz zot e ki nou pa aksepte bann ki diferan.

14. Lekel ki par deryer bann mansonz ki ganny dir konsernan lorganizasyon Zeova?

 ¹⁴ Konnen lekel ki pe vreman atak lorganizasyon. Satan ki par deryer bann mansonz ki ganny dir konsernan lorganizasyon. I “papa mansonz.” (Zan 8:44; Zen. 3:1-5) Alor nou devret ekspekte ki Satan pou servi nou bann lennmi pour dir bann mansonz konsernan lorganizasyon Zeova. I sanmenm ki ti arive dan premye syek.

15. Ki bann sef relizye ti fer avek Zezi ek son bann disip?

¹⁵ Dan premye syek, Satan ti servi serten dimoun pour dir bann mansonz lo Zezi, menm si Zezi ti Garson Bondye, i ti parfe e i ti fer bann mirak. Par egzanp, bann sef relizye ti dir dimoun ki Zezi in ganny sa pouvwar pour sas demon avek “sef demon.” (Mark 3:22) Ler Zezi ti pe ganny anmennen ankour, bann sef relizye ti akiz li konmkwa in koz kont Bondye e zot ti persyad lafoul pour fer li ganny touye. (Mat. 27:20) Pli tar ler bann disip Zezi ti pe anons sa bon nouvel, bann ki ti pe opoz zot “ti ensit e met presyon lo dimoun” pour persekit sa bann Kretyen. (Akt 14:2, 19) Konsernan sa parol dan Akt 14:2, Latour Veyer le 1 Desanm 1998 an Angle, ti eksplike ki sa bann ki ti siport Satan e ki ti rezet sa mesaz ki bann Kretyen ti pe anonse ti osi dir bann move keksoz lo sa bann Kretyen pour ki dimoun pa ekout zot e ay zot.

16. Ki nou devret rapel si nou tann bann fo zistwar konsernan lorganizasyon Zeova?

¹⁶ Ozordi Satan i ankor pe dir bann mansonz. I pe “anbet dimoun lo later antye.” (Rev. 12:9) Si ou tann bann move keksoz konsernan lorganizasyon Zeova oubyen konsernan bann frer ki pe dirize, rapel  ki mannyer bann lennmi Bondye ti tret Zezi ek bann Kretyen dan premye syek. Ozordi, pep Zeova pe ganny persekite e dimoun pe dir mansonz lo zot zis parey Labib ti predir. (Mat. 5:11, 12) Nou pa pou krwar dan sa bann mansonz si nou rekonnet lekel ki par deryer sa bann fo zistwar e si nou azir vitman pour protez nou lekor. Ki mannyer nou kapab protez nou lekor?

17. Kwa ki pou ed nou evit bann fo zistwar? (2 Timote 1:13) (Vwar bwat “ Ki nou pou fer si nou tann bann fo zistwar?”)

¹⁷ Rezet bann fo zistwar. Zapot Pol ti donn bann lenstriksyon kler konsernan ki nou pou fer si nou tann bann fo zistwar. I ti dir Timote pour “donn lord serten sa bann dimoun pour pa . . . enteres zot avek bann fo zistwar” e pour “rezet bann fo zistwar ki pa an armoni avek sa ki sen.” (1 Tim. 1:3, 4; 4:7) Reflesir lo sa legzanp. En zanfan i kapab anmas en keksoz ater e met dan son labous. Me en adilt pa pou zanmen fer sa parski i konpran ki sa keksoz i sal e i kapab fer li malad. Nou rezet sa bann fo zistwar parski nou konn sours sa bann lenformasyon. O kontrer, nou ekout zis “bann bon lansennyman” setadir bann lansennyman ki sorti dan Labib.—Lir 2 Timote 1:13.

18. Ki mannyer nou kapab montre ki nou annan konfyans dan lorganizasyon Zeova?

¹⁸ Dan sa lartik, nou’n vwar zis trwa fason ki lorganizasyon Bondye i swiv legzanp Zezi. Anmezir ou etidye Labib, esey vwar lezot fason ki lorganizasyon pe swiv legzanp Zezi. Ed lezot dan ou kongregasyon pour annan plis konfyans dan lorganizasyon. Kontinyen montre ki ou annan konfyans dan lorganizasyon par reste fidel avek Zeova e reste pros avek sa lorganizasyon ki i pe servi pour akonpli son lavolonte. (Ps. 37:28) Annou toultan apresye sa privilez ki nou annan pour form parti pep Zeova ki en pep ki kontan kanmarad e ki fidel avek kanmarad.