1. Ki mannyer serten proklanmater i santi konsernan koz avek dimoun dan predikasyon? (Vwar portre.)

 KONMAN pep Zeova, nou anons sa bon nouvel avek lezot parski nou kontan nou Papa ki dan lesyel e nou anvi ed bann dimoun pour aprann konn li. En kantite proklanmater i kontan fer predikasyon. Me i annan lezot ki pa vreman kontan pour fer predikasyon. Akoz? Petet i annan serten ki kanmi e zot santi ki zot pa bann bon ansenyan. Serten pa santi zot konfortab pour al kot lakour dimoun ler zot pa’n ganny envite. Serten i per ki dimoun pou ankoler avek zot. Serten i’n grandi avek sa labitid pour evit konfli. Menm si serten sa bann frer ek ser i kontan Zeova en kantite, zot vwar li difisil pour koz lo sa bon nouvel avek dimoun ki zot pa konnen. Kantmenm sa, zot realize ki sa travay i enportan e zot partisip dan predikasyon regilyerman. Ler zot fer sa, zot fer Zeova plezir!

2. Akoz ou pa devret dekouraze si parfwa ou pa kontan fer predikasyon?

² Eski parfwa ou vwar li difisil pour trouv lazwa dan predikasyon parski ou pa vreman kontan predikasyon? Si wi, pa dekouraze. Si ou napa konfidans dan ou lekor, sa i kapab montre ki ou en dimoun ki annan limilite ki ou pa anvi atir latansyon lo ou menm e ki ou pa anvi antre dan bann gran diskisyon avek lezot dimoun. Personn pa anvi lezot i ankoler avek zot sirtou ler zot pe esey fer sa ki byen pour lezot. Ou Papa ki dan lesyel i konn egzakteman ki mannyer ou pe santi e i anvi donn ou sa led ki ou bezwen. (Iza. 41:13) Dan sa lartik, nou pou vwar senk sizesyon lo ki mannyer pour fer fas avek sa bann santiman e ki mannyer pour ganny plis lazwa dan predikasyon.

 ROD LAFORS DAN PAROL BONDYE

3. Kwa ki ti ed profet Zeremi pour anons mesaz Bondye avek lezot?

³ Tou dilon listwar, sa mesaz sorti kot Bondye in donn bann serviter Bondye sa lafors ki zot bezwen ler zot ti annan en travay difisil pour fer. Annou vwar legzanp profet Zeremi. Ler Zeova ti donn li sa responsabilite pour al anons en mesaz avek bann dimoun, profet Zeremi ti per. I ti dir: “Mon pa konn koze parski mon zis en garson.” (Zer. 1:6) Kwa ki ti ed li pour annan sa konfidans pour li fer sa travay ki Zeova ti’n donn li pour fer? Sa ki Zeova ti dir li ti ed li pour ganny sa lafors ki i ti bezwen. Zeremi ti dir: “Son parol ti vin parey en dife ki pe brile anndan dan mon lezo e mon ti nepli kapab gard li anndan.” (Zer. 20:8, 9) Menm si dimoun pa ti ekout Zeremi e zot ti opoz sa travay ki i ti pe fer, sa mesaz ki Zeremi ti pe anonse ti donn li sa lafors ki i ti bezwen pour fer sa travay.

4. Ki i arive ler nou lir Parol Bondye e nou medit lo la? (Kolosyen 1:9, 10)

⁴ Bann Kretyen i ganny lafors atraver Parol Zeova ki dan Labib. Dan sa let ki zapot Pol ti ekri pour bann Kretyen dan kongregasyon Kolos, i ti dir ki ler zot aprann plis konsernan lavolonte Zeova, sa pou ed zot pour kontinyen “raport fri dan tou sa ki zot fer” e dan sa fason, zot pou kapab “viv dan en fason ki onor Zeova.” (Lir Kolosyen 1:9, 10.) Ler Pol i dir ki zot pou kontinyen “raport fri dan tou sa ki zot fer,” sa i enkli sa travay pour anons sa bon nouvel. Alor ler nou lir Parol Bondye e nou medit lo la, sa i fer nou lafwa vin pli for e nou konpran pli byen akoz i enportan pour anons sa bon nouvel konsernan Rwayonm.

5. Ki mannyer nou kapab ganny plis byenfe ler nou lir e etidye Labib?

⁵ Pour ganny bann byenfe dan Parol Bondye, nou devret pran letan pour lir, etidye e medite. Si ou lir en verse ki ou pa tro konpran, pa bezwen inyor sa verse. O kontrer esey konn plis konsernan sa verse par fer resers dan Watch Tower Publications Index oubyen dan Liv resers pour Temwen Zeova. Si ou pran letan ler ou etidye Parol Bondye, sa pou fer ou pli asire ki sa ki Labib i dir i vre. (1 Tesa. 5:21) Pli ou asire ki sa ki Labib i dir i vre, pli ou pou kontan pour partaz sa ki ou’n aprann avek lezot.

 PREPAR BYEN POUR PREDIKASYON

6. Akoz nou devret prepar byen pour predikasyon?

⁶ Si ou prepar byen pour predikasyon, i tre probab ki ou pou santi ou pli konfortab ler ou pe koz avek lezot dimoun. Zezi ti ed son bann disip pour prepare avan i ti anvoy zot dan predikasyon. (Lik 10:1-11) Bann disip Zezi ti aplik sa ki Zezi ti ansenny zot. Sa ti fer ki zot ti fer en kantite bon keksoz e sa ti fer zot vreman zwaye.—Lik 10:17.

7. Ki mannyer nou kapab prepare pour predikasyon? (Vwar portre.)

⁷ Ki mannyer nou kapab prepare pour predikasyon? Nou bezwen reflesir lo ki mannyer nou kapab partaz sa laverite ki dan Labib dan en fason ki natirel e dan nou prop mo. Osi i byen pour reflesir lo serten fason ki dimoun i kapab reazir e apre mazin lo ki mannyer nou pou reponn zot. Apre, ler nou koz avek dimoun, nou esey relaks, nou fer en sourir e nou koz dan en fason zantiy.

8. Akoz zapot Pol ti dir ki bann Kretyen i parey bann resipyan later?

⁸ Zapot Pol ti dir son bann frer ek ser Kretyen: “Nou parey bann resipyan later ki’n ganny sa trezor.” (2 Kor. 4:7) Ki sa trezor ki nou’n gannyen? I sa travay pour anons sa mesaz Rwayonm ki sov lavi. (2 Kor. 4:1) Lekel sa bann resipyan later? Zot reprezant bann serviter Bondye ki anons sa bon nouvel avek lezot. Dan letan zapot Pol, bann marsan ti servi bann resipyan later pour transport bann keksoz ki annan valer, parey manze, diven ek larzan. Pareyman, Zeova in konfye nou sa bon nouvel ki en mesaz ki presye. Avek led Zeova, nou kapab ganny sa lafors ki nou bezwen pour kontinyen anons sa mesaz fidelman.

DEMANN ZEOVA POUR DONN OU KOURAZ

9. Ki mannyer nou kapab sirmont lafreyer zonm? (Vwar portre.)

⁹ Parfwa nou kapab per ki dan predikasyon dimoun i opoz nou e ki zot pa anvi ekout nou. Ki mannyer nou kapab fer fas avek sa santiman? Mazin sa lapriyer ki bann zapot ti fer ler zot ti ganny en lord pour aret fer predikasyon. Zot pa ti les sa lafreyer fer zot aret fer predikasyon, o kontrer zot ti demann Zeova pour ed zot  “kontinyen anons [son] parol avek lardyes.” Zeova ti reponn zot lapriyer deswit. (Akt 4:18, 29, 31) Si parfwa nou osi nou annan lafreyer zonm, nou devret demann Zeova pour ed nou. Demann Zeova pour ed ou pour annan plis lanmour pour bann dimoun parski sa pou ed ou pour ou pa per pour anons sa bon nouvel avek zot.

10. Ki mannyer Zeova i ed nou pour akonpli nou rol konman son bann Temwen? (Izai 43:10-12)

¹⁰ Zeova in swazir nou pour vin son bann Temwen e i promet ki i pou ed nou pour annan kouraz. (Lir Izai 43:10-12.) Annou vwar kat fason ki Zeova i fer sa. Premyerman, Zezi i avek nou sak fwa ki nou anons sa bon nouvel. (Mat. 28:18-20) Dezyenmman, Zeova in apwent bann lanz pour ed nou. (Rev. 14:6) Trwazyenmman, Zeova in donn nou son lespri sen pour ed nou rapel bann keksoz ki nou’n aprann. (Zan 14:25, 26) Katriyenmman, Zeova in donn nou bann frer ek ser pour travay ansanm avek nou dan predikasyon. Avek led Zeova e avek sipor nou bann frer ek ser ki kontan nou, nou annan tou sa ki nou bezwen pour nou annan kouraz e pour kontinyen fer predikasyon.

ADAPTE AVEK BEZWEN BANN DIMOUN E RESTE POZITIF

11. Ki mannyer nou kapab trouv plis dimoun dan predikasyon? (Vwar portre.)

¹¹ Eski ou dekouraze ler ou pa zwenn bokou dimoun kot zot lakour? Petet demann ou lekor: ‘Kote sa bann dimoun i ete sa ler ki mon pe pase?’ (Akt 16:13) ‘Eski zot pe travay oubyen pe fer zot konmisyon?’ Si sa i leka, petet ou ti pou trouv plis dimoun si ou fer temwannyaz piblik? En frer ki apel Joshua i dir: “Mon’n ganny plizyer loportinite pour anons sa bon nouvel dan bann landrwa kot dimoun pe fer konmisyon e dan lezot landrwa piblik.” Joshua ek son madanm, Bridget, in trouv plis dimoun kot zot lakour ler zot fer predikasyon apre travay e osi dan Dimans apremidi.—Efe. 5:15, 16.

12. Ki mannyer nou kapab konnen ki dimoun i krwar ladan oubyen kwa ki enteres zot?

¹² Si en dimoun pa tro enterese avek sa mesaz ki ou pe anonse, esey rode kwa ki  i krwar ladan oubyen kwa ki enteres li. Joshua ek Bridget i servi sa kestyon ki lo kouvertir en trak ler zot pe konmans koz avek dimoun. Par egzanp, ler zot servi sa trak Ki ou pwennvi lo Labib? zot dir: “Serten dimoun i krwar ki Labib i en liv sorti kot Bondye me lezot dimoun pa krwar ki Labib i sorti kot Bondye. Ki ou panse ou?” Souvandfwa sa i ede pour zot konmans en konversasyon.

13. Akoz nou kapab dir ki nou’n atenn nou lobzektif dan predikasyon menm ler dimoun pa ekout nou? (Proverb 27:11)

¹³ Menm si dimoun pa ekout nou dan predikasyon, nou’n atenn nou lobzektif. Akoz nou kapab dir sa? Parski nou’n fer sa ki Zeova ek son Garson i anvi nou fer setadir nou’n donn en temwannyaz. (Akt 10:42) Alor menm ler nou pa zwenn en dimoun pour koz avek oubyen zot pa aksepte nou mesaz, nou kapab annan lazwa parski nou konnen ki nou pe fer nou Papa ki dan lesyel plezir.—Lir Proverb 27:11.

14. Akoz nou kapab zwaye ler en lot proklanmater i zwenn en dimoun ki enterese?

¹⁴ Nou kapab osi annan lazwa ler en lot proklanmater i zwenn en dimoun ki enterese. Latour Veyer i konpar nou travay predikasyon avek ler en group dimoun pe rod en zanfan ki’n perdi. En kantite dimoun i ede pour rod sa zanfan e zot kapab al plizyer landrwa pour rod li. Ler sa zanfan i ganny trouve, tou dimoun i kontan pa zis sa dimoun ki’n trouv li. Pareyman tou dimoun dan kongregasyon i partisip dan sa travay pour fer disip. Nou bezwen tou dimoun dan kongregasyon pour ede anons sa bon nouvel avek tou dimoun dan teritwar e nou tou nou kontan ler en dimoun i konmans asiste renyon.

KONSANTRE LO OU LANMOUR POUR ZEOVA EK OU PROSEN

15. Ki mannyer ler nou aplik sa ki dan Matye 22:37-39, sa i kapab ed nou pour annan plis lazwa dan predikasyon? (Vwar lo kouvertir.)

¹⁵ Pour nou kapab annan plis lazwa dan predikasyon, nou bezwen konsantre lo nou lanmour pour Zeova ek nou prosen. (Lir Matye 22:37-39.) Zis mazinen ki mannyer Zeova i kontan ler i vwar nou pe partisip dan sa travay predikasyon e ki mannyer dimoun pou zwaye ler  zot konmans etidye Labib. Osi rapel ki bann ki ekout nou mesaz e ki deside pour servi Zeova, i kapab viv pour touzour.—Zan 6:40; 1 Tim. 4:16.

16. Ki mannyer nou kapab trouv lazwa dan predikasyon ler nou pa kapab kit nou lakour? Donn legzanp.

¹⁶ Eski pour en rezon ou en lot ou pa kapab kit ou lakour? Si wi, konsantre lo sa ki ou kapab fer pour montre ki ou kontan Zeova ek ou prosen. Pandan pandemi COVID-19, Samuel ek Dania pa ti kapab kit zot lakour. Pandan sa letan difisil, zot ti regilyerman fer predikasyon par telefonn, ekri let e fer letid Labib lo Zoom. Samuel ti anons sa bon nouvel avek bann ki i ti zwenn dan sa klinik kot i ti ale pour ganny tretman pour kanser. Samuel i dir: “Ler nou pas dan difikilte, nou kapab enkyet, fatige e nou lafwa i kapab ganny teste. Pour nou trouv lazwa, nou bezwen kontinyen dan nou servis pour Zeova.” Pandan tou sa bann problenm, Dania ti tonbe e i ti bezwen reste lo lili pour trwa mwan. Apre sa, i ti bezwen reste dan en wiltyer pour sis mwan. Dania i dir: “Mon ti fer tou sa ki mon ti kapab dapre mon sirkonstans. Mon ti kapab anons sa bon nouvel avek en ners ki ti vin vizit mwan e mon ti koz avek bann dimoun ki ti vin anmenn konmisyon kot mwan. Mon ti osi ganny bann bon konversasyon lo telefonn avek en madanm ki travay dan en lakonpannyen ki vann bann lekipman medikal.” Menm si Samuel ek Dania pa ti kapab fer sa kantite ki zot ti fer avan, zot ti fer sa ki zot ti kapab e zot ti zwaye avek sa ki zot ti kapab fer.

17. Ki nou kapab fer pour ganny bann byenfe avek bann sizesyon ki dan sa lartik?

¹⁷ Esey aplik sa senk sizesyon ki’n ganny mansyonnen dan sa lartik. Sak sa bann sizesyon i parey en zengredyen ki ganny servi dan en reset. Ler ou met tou sa bann zengredyen ki dan sa reset ansanm, ou pou ganny en manze ki goute. Ler nou aplik tou sa bann sizesyon, nou pou pli kapab fer fas avek bann santiman negatif e nou pou trouv plis lazwa dan predikasyon.