Mon ti ne an 1955 e mon pli zenn dan trwa frer. Mon’n grandi o bor lakot dan sid Finlenn, en landrwa ki ozordi dimoun i konn li konman lavil Vantaa.

Mon manman ti vin en Temwen Zeova detrwa lannen avan ki mon ti ne. Me mon papa ti opoz laverite e i pa ti les mon manman fer letid Labib avek nou oubyen anmenn nou renyon. Alor mon manman ti ansenny nou bann laverite de baz ler mon papa pa ti la.

Depi ler mon ti ankor zanfan, mon ti refize dezobei Zeova. Par egzanp, en fwa ler mon ti annan set an, mon ansenyan ti ankoler avek mwan parski mon pa ti oule manz verilättyjä (en kalite krep ki ganny fer avek disan, ki bann dimoun Finlenn i manze). Avek en lanmen, i ti pez mon lazou pour ouver mon labous e avek son lot lanmen, i ti esey fors en fourset ki ti annan en bout krep lo la dan mon labous. Mon ti reisi fer sa fourset tonbe.

Ler mon ti annan 12 an, mon papa ti mor e apre sa mon ti kapab konmans asiste renyon. Bann frer dan kongregasyon ti demontre labonte anver mwan e sa ti ed mwan pour vin pli pros avek Zeova. Mon ti konmans lir Labib toulezour e etidye nou bann piblikasyon o profon. Sa ti fer ki mon ti batize le 8 Out 1969, ler mon ti annan 14 an.

 Pa bokou letan apre ki mon ti fini lekol, mon ti konmans servi konman en pionye ordiner. Apre detrwa semenn, mon ti al servi kot i ti annan bezwen pour plis proklanmater dan en lavil ki ti apel Pielavesi, ki ti dan sant Finlenn.

Ler mon ti Pielavesi, mon ti zwenn Sirkka, sa fiy ki ti pou vin mon madanm. Mon ti vreman dakor avek li parski i ti en madanm ki annan limilite e ki kontan Zeova en kantite. I pa ti anvi vin popiler oubyen anvi tay deryer bann keksoz materyel. Nou tou le de, nou ti anvi donn nou meyer dan nou servis pour Zeova e nou ti pare pour servi dan nenport servis ki nou ti ganny donnen pour fer. Nou ti marye le 23 Mars 1974. Nou pa ti al lo honeymoon me nou ti al servi Karttula, en lavil ki ti annan bezwen pour plis proklanmater.

Depi o konmansman nou maryaz, Zeova in montre nou ki i pou donn nou sa ki nou bezwen si nou rod Rwayonm premye. (Mat. 6:33) Par egzanp, ler nou ti Karttula, nou ti napa en loto. O konmansman nou ti voyaz lo bisiklet. Me pandan liver i ti fer vreman fre. Alor pour nou kapab fer predikasyon dan sa gran teritwar ki tonm anba nou kongregasyon, nou ti bezwen en transpor. Me nou ti napa ase larzan pour aste enn.

Enn mon gran frer ti vin vizit nou san ki nou ti pe ekspekte. I ti ofer nou son loto. Lasirans sa loto ti’n fini ganny peye. Nou ti annan zis pour aste bennzin. Apre sa nou ti annan sa transpor ki nou ti bezwen.

Zeova ti montre nou ki in pran sa responsabilite pour donn nou sa ki nou ti bezwen. Nou ti annan zis pour met lentere Rwayonm premye dan nou lavi.

An 1978, ler nou ti pe asiste Lekol Pionye, Raimo Kuokkanen, a ki ti enn nou bann formater ti ankouraz nou pour fer laplikasyon pour Lekol Gilead. Alor nou ti konmans etidye Angle avek bi pour nou kalifye pour asiste sa lekol. Me an 1980, avan ki nou ti kapab fer laplikasyon, nou ti ganny envite pour servi kot Biro brans Finlenn. Sa letan, bann Betelit pa ti kapab fer laplikasyon pour Lekol Gilead. Me nou ti anvi al servi  kot Zeova ti krwar i pli bon olye kot nou, nou ti krwar i bon. Alor nou ti aksepte sa lenvitasyon. Kantmenm sa, nou ti kontinyen aprann Angle zis an ka nou ganny loportinite pour fer laplikasyon pour Lekol Gilead.

Detrwa lannen pli tar, Konsey Direkter ti dir ki bann Betelit ti pou kapab fer laplikasyon pour Lekol Gilead. Nou ti fer nou laplikasyon deswit me pa akoz nou pa ti kontan dan Betel. Me o kontrer nou ti anvi fer nou disponib pour servi kot i ti annan plis bezwen pour proklanmater, si nou ti kalifye. Nou ti ganny aksepte pour asiste 79enm laklas Lekol Gilead e an Septanm 1985 nou ti fini sa lekol. Nou ti ganny anvoye an Kolonbi.

Ler nou ti Kolonbi, premyerman nou ti ganny anvoye kot Biro brans. Mon ti fer tou sa ki mon ti kapab dan mon servis me apre enn an dan Biro brans, nou ti bezwen fer en sanzman. Pour sa premye e sa sel fwa dan mon lavi, mon ti demande pour fer en lot keksoz. Apre sa, nou ti ganny anvoye konman misyonner dan Lavil Neiva, ki dan rezyon Huila.

Mon’n toultan kontan fer predikasyon. Ler mon ti ankor selibater, pe fer pionye Finlenn, parfwa mon ti konmans fer predikasyon depi byen bomaten ziska tar aswar. Ler mon ti fek marye, nou de Sirkka, nou ti fer lazournen antye dan predikasyon. Ler nou ti al fer predikasyon dan bann landrwa ki ti lwen avek nou lakour, parfwa nou ti dormi dan nou loto. Sa ti fer ki nou pa ti bezwen pas bokou letan pe vwayaze e sa ti osi permet nou pour konmans fer predikasyon boner son lannmen.

Aprezan konman bann misyonner, nou ti santi sa menm devouman ki nou ti annan dan predikasyon oparavan. Nou kongregasyon ti agrandi e bann frer ek ser Kolonbi ti annan bokou respe, lanmour ek lapresyasyon.

Pa tro lwen avek kot nou ti pe servi Neiva, i ti annan lezot lavil kot i ti napa Temwen Zeova. Mon ti enkyet konsernan ki mannyer sa bon nouvel ti pou ariv dan sa bann landrwa. Me vi ki i ti annan bann solda rebel ki ti pe lager, sa ti fer ki sa bann landrwa ti danzere pour bann etranze. Alor mon ti priye pour en dimoun dan enn sa bann lavil vin en Temwen Zeova. Mon ti mazinen ki sa dimoun ti pou bezwen reste Neiva pour li kapab aprann laverite. Alor mon ti priye ki apre ki sa dimoun i batize, i pou vin en Kretyen matir e i pou retourn dan son lavil pour al fer predikasyon. Mon ti’n devret konnen ki sirman Zeova ti annan en pli bon solisyon ki sa.

Pa bokou letan apre, mon ti konmans fer letid Labib avek en zenn garson ki ti apel Fernando González. I ti reste Algeciras, ki ti enn sa bann lavil kot ti napa Temwen Zeova. Fernando ti vwayaz plis ki 50 kilomet pour li al travay Neiva. I ti prepar byen pour son letid Labib e deswit i ti konmans asiste tou renyon. Sa premye semenn ki Fernando ti konmans etidye Labib, i ti rasanble bann dimoun dan sa landrwa kot i ti’n grandi e ansenny zot sa ki i ti’n aprann dan son letid Labib.

Fernando ti batize Zanvye 1990, sis mwan apre ki i ti’n konmans etidye Labib. Apre sa i ti vin en pionye ordiner. Aprezan Biro brans ti kapab anvoy bann pionye spesyal Algeciras, vi ki i ti annan en Temwen Zeova ki reste dan sa landrwa.  An Fevriye 1992, en kongregasyon ti ganny formen dan sa landrwa.

Eski Fernando ti fer predikasyon zis dan sa lavil kot i ti’n grandi? Non! Apre ki Fernando ti’n marye, li ek son madanm, zot ti al reste San Vicente del Caguán, ki ti en lot lavil kot ti napa Temwen Zeova. Laba zot ti ede pour form en kongregasyon. An 2002, Fernando ti ganny apwente konman sirveyan rezyonal e ansanm avek son madanm Olga, zot in kontinyen dan sa servis ziska aprezan.

Sa leksperyans in montre mwan ki i vreman enportan pour priy konsernan bann keksoz spesifik ki annan pour fer avek bann responsabilite ki nou gannyen dan lorganizasyon Zeova. Zeova i fer sa ki nou pa kapab fer. Apre tou, sa i son rekolt e non pa nou rekolt.—Mat. 9:38.

An 1990, mon ti ganny apwente konman sirveyan rezyonal. Premye landrwa ki nou ti vizite ti Bogotá ki ti en gran lavil. Nou ti per ki nou pa ti pou fer byen dan sa servis. Mwan ek mon madanm, nou ti bann dimoun senp ki ti napa okenn abilite spesyal. Nou pa ti abitye dan bann gran lavil. Kantmenm sa, Zeova ti akonpli son promes ki trouve dan Filipyen 2:13, ki dir: “Bondye pe azir dan en fason ki fer li plezir, i fortifye zot e donn zot sa dezir ek lafors pour azir.”

Pli tar, nou ti ganny anvoye dan lavil Medellín, ki ti sa lavil ki mon ti mansyonnen o konmansman. Dimoun dan sa landrwa ti’n telman abitye avek vyolans partou lo semen ki sa pa ti trakas zot. Par egzanp, en fwa ler mon ti pe kondwir en letid Labib, serten dimoun ti konmans tir fizi lo kanmarad an deor sa lakaz kot mon ti pe fer letid. Mon ti pe al alonz ater me mon etidyan Labib ti reste kalm e i ti kontinyen lir paragraf. Ler i ti fini lir, i ti demann mwan pour eskiz li e i ti al deor. En pti pe letan pli tar, i ti retournen avek de zanfan e byen kalm i ti dir: “Eskiz mwan me mon ti bezwen al sers mon bann zanfan.”

I ti annan lezot fwa kot nou’n fer fas avek bann danze. En zour ler nou ti pe fer predikasyon kazankaz, mon madanm ti vin kot mwan an tayan. Son figir ti’n pal. I ti dir ki en dimoun in tir fizi lo li. Mon ti dan sok. Me apre nou ti realize ki sa dimoun ki ti’n tir fizi, i pa ti pe tir lo Sirkka me lo en zonm ki ti pe pase zis akote Sirkka.

Avek letan, nou ti nepli per sa bann vyolans parey avan. Sa kouraz ki bann frer ek ser ti annan pour fer fas avek sa bann sityasyon ek bann sityasyon pli terib, ti donn nou kouraz. Nou ti mazinen ki si Zeova ti pe ed zot, i pou ed nou osi. Nou ti toultan ekout konsey bann ansyen dan nou kongregasyon, pran prekosyon e kit lezot keksoz dan lanmen Zeova.

Byensir i ti annan serten sityasyon ki pa sitan danzere parey nou ti krwar. En zour mon ti tann de madanm pe ensilte kanmarad o bor en lakaz kot mon ti pe fer en vizit. Mon pa ti enterese pour get zot kot zot pe dispit me sa met lakour ti dir mwan vin anba lavarang. Me sa “dispit” ki mon ti pe tande, ti de peroke ki ti pe imit bann vwazen.

An 1997, mon ti ganny apwente konman en formater dan Lekol Formasyon Ministeryel. b Mon ti toultan kontan asiste bann lekol teokratik. Me mon pa ti zanmen imazinen ki mon ti pou ganny sa privilez pour ansenny dan enn sa bann lekol.

Pli tar, mon ti servi konman en sirveyan distrik. Me ler sa servis ti arete, mon ti al kontinyen servi konman sirveyan rezyonal. Alor pour plis ki 30 an, mon’n kontan pour servi konman en formater e konman en sirveyan rezyonal. Mon’n ganny en kantite benediksyon dan sa bann servis. Me i pa ti toultan fasil. Les mwan eksplik zot.

Mon en dimoun ki annan bokou konfidans e sa i fer ki mon annan en personnalite ki for. Sa in ed mwan pour fer fas avek bann sityasyon difisil. Me parfwa mon ti tro serye ler mon ti pe esey aranz keksoz dan kongregasyon. Parfwa mon ti met presyon lo lezot e dir zot ki zot devret demontre lanmour e rezonnab anver lezot. Me i ti dan sanmenm sa bann moman ki mwan menm mon pa ti pe demontre sa bann kalite.—Rom. 7:21-23.

Parfwa mon bann defo in fer mwan santi mwan vreman dekouraze. (Rom. 7:24) A en serten moman, mon ti priy Zeova e mon ti dir li ki i ti pou pli mye si mon aret mon servis misyonner e mon retourn Finlenn. Sa menm zour swar, mon ti asiste en renyon dan kongregasyon. Bann lankourazman ki mon ti gannyen ti konvenk mwan pour reste dan mon servis e pour kontinyen travay lo mon bann defo. Ziska ozordi, mon ankor ganny touse avek lafason ki Zeova ti reponn sa lapriyer dan en fason kler. Osi, mon vreman rekonesan pour lafason ki i’n ed mwan pour sirmont mon bann febles.

Mwan ek Sirkka, nou vreman rekonesan anver Zeova pour sa privilez ki nou’n annan pour pas laplipar nou lavi dan servis a plen tan. Mon vreman rekonesan anver Zeova parski in donn mwan en madanm ki’n fidel avek mwan e ki’n kontan mwan pandan tou sa lannen.

Byento mon pou ganny 70 an e mon pou aret mon servis konman formater ek sirveyan rezyonal. Me sa pa fer mwan sagren. Akoz? Parski mon konnen ki sa keksoz ki onor Zeova plis i lefet ki ler nou pe servi li, nou konn nou limit e nou onor li avek en leker ranpli avek lanmour ek rekonesans. (Mik. 6:8; Mark 12:32-34) Nou pa bezwen annan en servis enportan pour nou onor Zeova.

Ler mon mazin bann responsabilite ki mon’n gannyen, mon realize ki mon pa’n ganny sa bann responsabilite akoz mon ti pli meyer ki lezot. Osi mon pa’n ganny sa bann privilez parski mon annan abilite. O kontrer, Zeova ti donn mwan sa bann responsabilite akoz son labonte ekstraordiner. I’n donn mwan sa bann privilez malgre mon bann febles. Mon konnen ki sa sel rezon ki mon’n reisi desarz sa bann responsabilite i akoz Zeova in ed mwan. Mon kapab dir ki ler mon ti feb, Bondye in donn mwan plis lafors.—2 Kor. 12:9.