AVAN ki sa ti arive, mon ti’n deza enterese avek laverite. Mon manman ti ganny detrwa piblikasyon baze lo Labib e sa ki mon ti aprann ladan ti enpresyonn mwan. Mon ti vreman kontan bann portre. Mon papa pa ti anvi mon manman i koz avek mwan konsernan sa ki i ti pe aprann. Par kont, mon ti anvi konn plis, alor mon ti demann kestyon e ler mon papa pa ti kot lakaz, manman ti etidye avek mwan. Sa ti fer ki mwan osi mon ti anvi dedye mon lavi avek Zeova. Mon ti batize Blackpool, Langleter an 1943 ler mon ti annan di-z-an.

Depi sa letan, mwan ek mon manman ti regilye dan predikasyon. Sa letan nou ti servi granmofonn pour prese. En granmofonn ti gro, lour e i ti pez apepre kat kilo edmi. Zis mazin mwan, en zenn garson pe esey trenbal enn sa.

Ler mon ti annan 14 an mon ti anvi fer  pionye. Mon manman ti dir ki mon devret premyerman koz avek en servant to the brethren (ki ozordi i apel sirveyan rezyonal). Sirveyan ti dir ki mon devret aprann en metye ki ti pour kapab soutenir mwan pandan ki mon fer servis pionye e sanmenm ki mon ti fer. Apre ki mon ti’n travay pour de-z-an mon ti demann en lot sirveyan rezyonal si mon kapab fer pionye. I ti dir, “Ale, fer li!”

Alor an Avril 1949, mwan ek mon manman nou ti debaras nou avek tou nou meb e nou ti al reste Middleton, pre avek Manchester kot nou ti konmans fer pionye. Apre kat mwan, mon ti rod en frer pour fer pionye avek mwan. Apre sa, biro brans ti demann nou pour al dan en nouvo kongregasyon ki ti’n fek ganny formen Irlam. Mon manman ti al fer pionye avek en ser dan en lot kongregasyon.

Mon ti annan zis 17 an sa letan, me mwan ek mon konpanyon pionye ti responsab pour kondwir renyon akoz ti annan zis detrwa frer kalifye dan sa nouvo kongregasyon. Pli tar, mon ti al dan kongregasyon Buxton ki ti napa bokou proklanmater e zot ti bezwen led. Sa bann leksperyans ti prepar mwan pour bann responsabilite ki mon ti pou gannyen pli tar.

An 1951, mon ti fer laplikasyon pour asiste Lekol Gilead. Me an Desanm 1952, mon ti ganny demande pour fer servis militer. Mon ti demande pour pa fer servis militer parski mon ti en serviter a plen tan, me lakour pa ti aksepte mon demann e zot ti kondann mwan sis mwan prizon. Ler mon ti laba, mon ti ganny mon lenvitasyon pour venndezyenm laklas Gilead. An Zilyet 1953, deswit apre ki mon ti ganny large mon ti al New York lo en bato ki apel Georgic.

Dek ki mon ti arive laba sa menm lannen, mon ti asiste New World Society Assembly. Pli tar mon ti pran tren e al South Lansing, New York kot lekol ti ete. Mon ti’n fek sorti dan prizon, alor mon ti napa en kantite  larzan. Ler mon ti debarke, mon ti bezwen demann prete 25 sou avek en pasaze pour pey mon bis pour al South Lansing.

Dan Lekol Gilead nou ti ganny bann bon formasyon pour ed nou “vin tou, pour tou sort kalite dimoun.” (1 Korentyen 9:22) Mwan, Paul Bruun ek Raymond Leach ti ganny anvoye Filipin, me nou ti bezwen esper detrwa mwan pour ganny viza. Apre sa nou ti pran bato pour al Rotterdam, Laolann. Apre sa, nou ti travers Lanmer Mediterane, Suez Canal e dan Losean Endyen ziska Malezi, apre nou ti ariv Hong Kong. Finalman apre 47 zour lo lanmer, nou ti ariv Manila, Filipin le 19 Novanm 1954.

Laba, nou ti bezwen adapte avek en nouvo kiltir, en nouvo pei ek en nouvo langaz. Par kont, o konmansman nou tou le trwa nou ti ganny anvoye dan en kongregasyon Quezon City kot bokou dimoun ti koz Angle. Alor, apre sis mwan nou ti zis konn detrwa mo dan langaz Tagalog. Nou lot responsabilite ti pou sanz sa.

An Me 1955, ler nou ti ariv kot lakour apre predikasyon mwan ek frer Leach ti vwar detrwa let. Dan sa bann let, nou ti vwar ki nou ti’n ganny apwente sirveyan rezyonal. Mon ti annan zis 22 an, me konman sirveyan rezyonal, mon ti pou aprann en nouvo fason pour “vin tou, pour tou sort kalite dimoun.”

Par egzanp, konman en sirveyan rezyonal, mon ti donn mon premye diskour piblik o bor en laboutik dan en vilaz. Sa letan Filipin, bann diskour piblik ti ganny fer dan bann landrwa piblik! Anmezir mon ti vizit diferan kongregasyon dan nou rezyon, mon ti donn diskour dan bann zarden piblik, kot bann bazar, devan bann lasal piblik oubyen kort basket e osi dan bann kwen semen. En zour dan lavil San Pablo mon pa ti kapab donn mon diskour dan bazar akoz lapli ti pe  tonbe. Alor mon ti demann sa bann frer ki responsab si mon kapab fer sa diskour dan Lasal Rwayonm. Apre, sa bann frer ti demande si zot ti kapab met sa lo rapor konman en diskour piblik, vi ki i pa ti ganny fer dan en landrwa piblik.

Mon ti toultan reste kot bann frer ek ser. Menm si sa bann lakaz ti senp, zot ti prop. Plizyer fwa mon ti dormi lo en nat ater. Sel landrwa pour bennyen ti an deor lakaz kot tou dimoun ti kapab vwar mwan, alor mon ti bezwen veye ki mannyer mon bennyen. Mon ti vwayaz par bis e par ler bato pour al lo bann zil. Pandan tou sa letan ki mon’n dan servis mon pa’n zanmen annan en loto.

Mon ti aprann koz Tagalog menm si mon pa ti fer li dan en laklas ki montre sa langaz. Mon ti fer sa par ekout bann frer ek ser koze dan predikasyon ek dan renyon. Bann frer ti anvi ed mwan pour aprann sa langaz e mon ti apresye zot pasyans ek zot lonnekte anver mwan.

Avek letan mon ti bezwen fer ankor bann azisteman akoz mon ti ganny bann nouvo responsabilite. An 1956, ler frer Nathan Knorr ti vin vizit nou, nou ti annan en lasanble nasyonal. Mon ti ganny sa responsabilite konman port parol. Mon ti napa okenn leksperyans dan sa domenn, me bann frer ti ed mwan pour aprann. Apepre enn an pli tar, nou ti ganny en lot lasanble nasyonal e mon ti servi konman sirveyan lasanble. Frer Frederick Franz sorti kot biro prensipal ti vizit nou e mon ti aprann en  kantite avek li. Ler i ti fer diskour piblik, Frer Franz ti met en barong Tagalog ki en lenz tradisyonnel Filipin. Sa ti fer bann frer lokal vreman kontan e sa ti fer mwan aprann pour toultan adapte avek lezot.

Mon ti bezwen fer plis pour adapte ankor ler mon ti vin sirveyan distrik. Sa bann letan nou ti montre sa film The Happiness of the New World Society. Laplipar ditan, vi ki nou ti zwe sa film dan bann landrwa piblik, par ler bann zensek ti enteronp nou akoz zot ti ganny atrakte avek lalimyer prozekter e zot ti pri ladan. Pa i ti en louvraz pour netway sa prozekter apre! I pa ti fasil pour organiz sa bann levennman, me nou ti kontan ler dimoun ti vini e aprann konn lorganizasyon enternasyonal Zeova.

Bann sef pret Katolik dan serten landrwa ti met presyon lo lotorite pour ki zot pa donn nou permisyon pour fer nou bann rasanbleman. Pour ki personn pa kapab tann sa orater, zot ti sonn laklos legliz ler ti annan en diskour piblik pros avek zot legliz. Malgre sa, bann dimoun ti kontinyen aprann laverite e i annan bokou ki pe ador Zeova dan sa bann landrwa ozordi.

An 1959 mon ti ganny demande pour servi kot biro brans. Mon ti aprann bokou keksoz laba. Apre en pe letan mon ti ganny demande pour al vizit lezot pei konman sirveyan zòn. Lo enn sa bann vizit mon ti aprann konn Janet Dumond, ki ti en misyonner Taylenn. Nou ti ekrir let kanmarad pour en pe letan e pli tar nou ti marye. Nou ti servi Zeova dan lazwa pour 51 an.

Ti en plezir pour mwan vizit pep Zeova dan 33 pei. Mon vreman kontan ki dan mon  bann premye responsabilite ki mon ti gannyen ti ed mwan aprann ki mannyer pour reazir avek dimoun ki annan diferan kiltir ek koutim. Sa bann vizit ti ed mwan konpran ki Zeova i kontan tou sort kalite dimoun.​—Akt 10:34, 35.

I ti en lazwa pour mwan ek Janet servi avek bann frer ek ser Filipin e nou ankor pe servi kot biro brans dan Lavil Quezon. Aprezan, i annan dis fwa plis proklanmater isi ki ler mon ti konmans servi 60 an pase. Menm apre tou sa lannen, mon ankor bezwen pare pour fer bann azisteman dan tou sa ki Zeova i demann mwan pour fer. Par egzanp, parski in annan bann sanzman resaman dan lorganizasyon, nou ti bezwen pare pour fer plis bann azisteman.

Nou’n fer tou sa ki nou ti kapab pour swiv direksyon Zeova e napa en lavi ki pli satisfezan ki sa. Nou’n osi esey fer nenport azisteman ki ti neseser pour ki nou pli byen servi nou bann frer ek ser. Wi, otan ki Zeova i anvi, nou determinen pour “vin tou, pour tou sort kalite dimoun.”