1, 2. Akoz bann Kretyen swazir i enterese avek Romen sapit 8?

PETET ou’n kapab lir Romen 8:15-17 pandan sezon Memoryal lanmor Kris. Sa bann verse i koz lo ki mannyer bann Kretyen swazir i konnen ki zot annan sa lespwar pour viv pour touzour dan lesyel. Romen 8:1 i koz lo bann Kretyen swazir konman “sa bann ki ini avek Kris.” Me, eski Romen sapit 8 i aplik zis pour bann Kretyen swazir? Oubyen, eski i kapab ed bann ki annan lespwar pour viv pour touzour lo later?

² Romen sapit 8 ti ganny ekrir espesyalman pour bann Kretyen swazir. Zot ti ganny “lespri sen” konman bann ki pe “esper avek enpasyans pour ganny adopte konman bann garson e ganny libere avek sa lekor imen.” (Romen 8:23) Dan lavenir, zot pou vin bann garson Bondye dan lesyel. Gras a ranson, Zeova  in pardonn zot pese. I’n aprouv zot konman drwat pour ki zot vin son bann garson.​—Romen 3:23-26; 4:25; 8:30.

3. Akoz bann ki annan lespwar pour viv pour touzour lo later i devret egzamin Romen sapit 8?

³ Par kont, o konmansman liv Romen, Pol ti ekri konsernan en zonm ki pa ti en Kretyen swazir me ki ti ganny aprouve konman drwat par Zeova. Sa zonm ti Abraam. Sa zonm fidel ti viv en bann letan avan ki Zezi ti donn son lavi konman en ranson. (Lir Romen 4:20-22.) Ozordi osi, Zeova i kapab vwar bann Kretyen fidel ki annan lespwar pour viv pour touzour lo later konman drwat. Zot osi zot kapab benefisye avek sa konsey ki dan Romen sapit 8.

4. Ler nou lir Romen 8:21, ki nou devret demann nou lekor?

⁴ Dan Romen 8:21, nou vwar ki Zeova i garanti ki son nouvo lemonn pou vini e ki bann imen pou ganny libere avek pese ek lanmor. Sa verse i osi dir ki zot pou ganny “laglwar ek laliberte bann zanfan Bondye.” Eski ou vwar ou dan sa nouvo lemonn? Si wi, annou vwar ki nou bezwen fer pour viv dan nouvo lemonn Bondye.

5. Ki Pol ti dekrir dan Romen 8:4-13?

⁵ Lir Romen 8:4-13. Dan wityenm sapit let pour bann Romen, Pol ti dekrir  de diferan kalite dimoun, bann ki viv “dapre lekor enparfe” e bann ki viv “dapre lespri sen.” Serten dimoun i krwar ki Pol ti pe dekrir bann ki ti Kretyen e bann ki pa ti Kretyen. Me la, Pol ti pe ekri bann Kretyen, bann ki’n “ganny swazir pour vin bann sen.” (Romen 1:7) Alor, bann ki ti viv “dapre lekor enparfe” ek bann ki ti viv “dapre lespri sen” ti bann Kretyen. Ki mannyer zot ti diferan avek kanmarad?

6, 7. (a) Ki bann diferan sinifikasyon sa lekspresyon “lekor enparfe”? (b) Ki mannyer sa lekspresyon “lekor enparfe” in ganny servi dan Romen 8:4-13?

⁶ Ler Labib i servi sa lekspresyon “lekor enparfe,” i pe refer avek plizyer keksoz. Par ler i vedir nou lekor fizik. (Romen 2:28; 1 Korentyen 15:39, 50) I kapab osi vedir manm en fanmir. Par egzanp, Labib i dir ki Zezi ti “en desandans David” e Pol ti apel bann Zwif “mon bann frer, mon fanmir.”​—Romen 1:3; 9:3.

⁷ Alor, ki Pol ti oule dir ler i ti pe koz konsernan bann ki viv “dapre lekor enparfe,” dan Romen 8:4-13? Pour trouv larepons nou kapab get dan Romen 7:5. I ti ekri: “Ler nou ti pe viv dapre bann dezir nou lekor enparfe, bann move dezir pour fer pese ki ti ganny revele par Lalwa ti pe travay dan nou lekor.” Pol ti eksplike ki bann dimoun ki viv “dapre lekor enparfe” i bann ki zis konsantre e swiv zot prop  dezir pour fer pese e fer sa ki zot anvi.

8. Akoz Pol ti bezwen averti bann Kretyen swazir kont viv “dapre lekor enparfe”?

⁸ Akoz Pol ti averti bann Kretyen swazir kont viv “dapre lekor enparfe”? Akoz bann Kretyen i bezwen ganny sa lavertisman ozordi? Parski nenport serviter fidel Bondye i kapab konmans fer son prop dezir vin sa keksoz pli enportan dan son lavi. Par egzanp, Pol ti ekri ki serten bann frer Ronm ti bann lesklav “zot move dezir.” I kapab ki Pol ti pe koz lo relasyon seksyel, manze oubyen lezot plezir ti sa keksoz pli enportan dan zot lavi. (Romen 16:17, 18; Filipyen 3:18, 19; Zid 4, 8, 12) An plis ki sa, pour en serten letan, i ti annan en sityasyon dan kongregasyon kot en zonm ti annan relasyon seksyel “avek madanm son papa.” (1 Korentyen 5:1) I kler alor ki sa bann Kretyen dan premye syek ti bezwen lavertisman Pol konsernan viv “dapre lekor enparfe.”​—Romen 8:5, 6.

9. Ki Pol pa ti pe esey dir dan Romen 8:6?

⁹ Sa lavertisman i osi aplikab ozordi. Menm en dimoun ki’n servi Zeova pour plizyer lannen i kapab konmans viv “dapre lekor enparfe.” Alor, eski Pol ti pe dir ki nou pa devret mazin lo bann keksoz tel parey manze, lanplwa, detant ouswa relasyon romantik? Byensir non. Sa i bann keksoz normal dan lavi. Menm Zezi ti apresye manze e donn lezot manze. I ti osi realize ki i ti bezwen repo e Pol ti ekri ki relasyon seksyel i en keksoz enportan dan maryaz.

10. Ki sa mo “mazin” i vedir?

¹⁰ Ki Pol ti oule dir par sa mo “mazin”? Sa mo Grek ki Pol ti servi i vedir konsantre lo en keksoz e fer plan pour ganny sa keksoz. En spesyalis ti eksplike ki sa mo pe refer avek bann dimoun ki “annan en profon lentere, kontinyen koz” e konsantre zis lo zot bann dezir egois. Zot les sa bann dezir kontrol zot fason viv.

11. Ki serten keksoz ki kapab vin tro enportan pour nou?

¹¹ Bann Kretyen Ronm ti bezwen analiz zot lekor e rode kwa ki zot ti pe mazin lo la. Eski ti “bann move dezir”? Ozordi, nou osi nou bezwen mazin lo sa ki pli enportan pour nou. Ki nou kontan koz lo la? Ki nou vreman kontan fer? Serten i kapab realize ki zot pe kontinyen mazin lo gout diferan kalite diven, dekor zot lakaz, aste nouvo lenz, envesti zot larzan oubyen pe plàn pour al vakans. Napa nanryen mal avek sa bann keksoz. Zot bann keksoz normal dan nou lavi. Par egzanp, Zezi ti fer delo vin diven dan en maryaz e Pol ti dir Timote bwar “en ptigin diven” pour son lasante. (1 Timote 5:23; Zan 2:3-11) Me diven pa ti sa keksoz pli enportan dan zot lavi. Ki  nou pou dir lo nou menm? Kwa ki nou pli enterese avek?

12, 13. Akoz nou devret fer atansyon lo sa ki nou konsantre lo la?

¹² Pol ti averti: “Mazin bann move dezir i vedir lanmor.” (Romen 8:6) Ki i ti oule dir par sa? Si nou viv “dapre lekor enparfe,” nou pou kapab perdi nou relasyon avek Zeova e perdi nou lavi a lavenir. Me sa i pa bezwen arive. En dimoun i kapab sanze. Eski ou rapel sa zonm ki ti annan en lavi imoral e ti ganny ekskli dan kongregasyon Korent? I ti sanze e i ti aret swiv son bann dezir imoral e apre i ti rekonmans servi Zeova dan en fason pir.​—2 Korentyen 2:6-8.

¹³ Menm si sa zonm ti en pli move legzanp lo viv “dapre en lekor enparfe,” me i ti kapab sanze. Alor, menm si en Kretyen in konmans swiv son bann move dezir dan plas standar Zeova, li osi i kapab sanze. Ler nou rapel lavertisman ki Pol ti donnen, sa i kapab motiv nou pour fer bann sanzman neseser.

14, 15. (a) Lo kwa ki Pol ti ankouraz nou pour mazin lo la? (b) Ki “mazin lo sa ki annan pour fer avek lespri sen” pa vedir?

¹⁴ Apre ki Pol ti’n koz lo bann danze ki vin avek “mazin bann move dezir,” i ti eksplike: “Mazin bann keksoz ki annan pour fer avek lespri sen i vedir lavi ek lape.” Pa sa i en zoli rekonpans ki nou kapab gannyen!

¹⁵ Me “mazin bann keksoz ki annan pour fer avek lespri sen” pa vedir ki sa dimoun i lwen avek larealite lavi. I pa vedir ki en dimoun i zis mazin e koz lo Zeova oubyen Labib. Par egzanp, bann serviter Bondye dan premye syek ti viv en lavi normal. Zot ti manze, bwar, marye, annan zot prop fanmir e zot ti annan en lanplwa.​—Mark 6:3; 1 Tesalonisyen 2:9.

16. Ki ti sa keksoz pli enportan dan lavi Pol?

¹⁶ Me Pol ek bann Kretyen dan premye syek pa ti les sa bann aktivite normal vin bann keksoz pli enportan dan zot lavi. Par egzanp, nou konnen ki Pol ti fer latant pour ganny son lavi. Me son metye pa ti sa keksoz pli enportan dan son lavi. Sa ki ti pli enportan dan lavi Pol ti servi Bondye. Pol ti konsantre lo prese e ansenny lezot. (Lir Akt 18:2-4; 20:20, 21, 34, 35.) I ti neseser ki bann frer ek ser Ronm ti imit Pol e nou osi nou kapab fer parey.​—Romen 15:15, 16.

17. Ki bann byenfe nou gannyen ler nou “mazin bann keksoz ki annan pour fer avek lespri sen”?

¹⁷ Ki mannyer nou lavi pou ete si nou konsantre lo servi Zeova? Romen 8:6 i dir: “Mazin lo bann keksoz ki annan pour fer avek lespri sen i vedir lavi ek lape.” Pour fer sa i enkli les nou lespri ganny dirize par lespri sen  Zeova e aprann pour mazin parey i mazinen. Zeova i promet nou en lavi ere e satisfezan la konmela e lavi eternel a lavenir.

18. Ki mannyer nou ganny lape ler nou “mazin bann keksoz ki annan pour fer avek lespri sen”?

¹⁸ Ler Pol ti dir “mazin bann keksoz ki annan pour fer avek lespri sen” i vedir lape, ki i ti oule dir? Tou dimoun i anvi lape, sirtou lape lespri, me pa bokou ki trouv li. Gras a Zeova nou kapab trouv sa vre lape lespri. Nou osi kapab annan lape avek nou manm fanmir ek bann frer ek ser dan kongregasyon. Vi ki nou enparfe, par ler nou kapab ganny bann problenm avek nou bann frer ek ser. Ler sa i arive, nou swiv konsey Zezi: “Al fer lape avek ou frer.” (Matye 5:24) Pa oubliye ki ou frer ek ser i osi servi Zeova, “sa Bondye ki donn lape.”​—Romen 15:33; 16:20.

19. Ki kalite lape nou kapab gannyen?

¹⁹ Si nou “mazin bann keksoz ki annan pour fer avek lespri sen” nou pou osi annan lape avek Bondye. Profet Izai ti ekri: “Avek en lespri ferm, ou [Zeova] gard zot dan lape, lape akoz zot met zot konfyans dan ou.”​—Izai 26:3; lir Romen 5:1.

20. Akoz ou rekonesan pour sa konsey ki trouve dan Romen sapit 8?

²⁰ Ki swa nou annan lespwar pour viv pour touzour dan lesyel ouswa lo later, nou tou nou kapab benefisye avek sa bann parol saz ki dan Romen sapit 8. Nou rekonesan ki Labib i ankouraz nou pour plito konsantre lo servi Zeova ki nou bann prop dezir. Nou konnen ki ler nou “mazin bann keksoz ki annan pour fer avek lespri sen,” nou kapab ganny en rekonpans merveye. Pol ti ekri: “Sa kado ki Bondye i donnen se lavi eternel gras a Kris Zezi nou Senyer.”​—Romen 6:23.