Zenn—“Kontinyen travay dir . . . pour zot ganny sove”
“Zot in toultan obei, . . kontinyen travay dir avek gran respe ek lafreyer pour zot ganny sove.”—FILIPYEN 2:12.
1. Akoz batenm i en letap enportan? (Vwar portre o konmansman sa lartik.)
TOU le-z-an plizyer milye etidyan Labib i batize. En kantite parmi zot i bann zenn, bann adolesan oubyen menm pli zenn ki sa. I kapab ki zot in ganny elve dan laverite. Eski ou enn parmi sa bann zenn? Si wi, tre byen, ou’n fer en bon keksoz. Tou Kretyen i bezwen batize. Deplis, batenm i neseser pour ganny sove e viv pour touzour.—Matye 28:19, 20; 1 Pyer 3:21.
2. Akoz ou pa devret per pour dedye ou lavi avek Zeova?
2 Ler ou ti batize, Zeova ti konmans beni ou dan plizyer nouvo fason. Me ou ti osi ganny bann nouvo responsabilite. Dan ki fason? Zour ou ti batize, sa frer ki ti fer diskour batenm ti demande: “Lo baz sakrifis Zezi Kri, eski ou’n repantir ou bann pese e dedye ou lavi avek Zeova
pour fer son lavolonte?” Ou larepons ti wi. Ou ti promet pour kontan Zeova e pour fer sir ki servi li i sa keksoz pli enportan dan ou lavi. Eski ou devret regrete ki ou’n fer sa promes serye? Definitivman non! Ou pa pou zanmen regrete ki ou’n les Zeova gid ou. Bann ki pa konn Zeova i form parti lemonn Satan. Dyab pa enterese avek zot byennet e ni menm avek ou. Anfet, i ti pou kontan si ou ti perdi ou lespwar pour viv pour touzour vi ki ou’n pran son kote e rezet Zeova.3. Ki mannyer Zeova in beni ou vi ki ou’n dedye ou lavi avek li?
3 Reflesir lo ki mannyer Zeova in beni ou vi ki ou’n dedye ou lavi avek li e batize. Ou’n donn Zeova ou lavi, alor ou kapab dir avek konfyans: “Si [Zeova] i lo mon kote, mon pa per nanryen. Ki en zonm i kapab fer mwan?” (Psonm 118:6) Napa pli gran loner ki pran kote Zeova e konnen ki ou’n fer li fyer.
EN RESPONSABILITE PERSONNEL
4, 5. (a) Akoz nou kapab dir ki dedikasyon i en responsabilite personnel? (b) Ki bann defi ki tou Kretyen i annan?
4 Ou pa kapab vwar ou relasyon avek Zeova parey en propriyete oubyen en bout later lafanmir ki ou kapab erite. Menm si ou ankor pe reste avek ou paran, ou relasyon avek Zeova i ou responsabilite personnel. Akoz i enportan pour rapel sa? Personn pa kapab konnen ki mannyer son lafwa pou ganny teste dan lavenir. Par egzanp, i kapab ki ou’n batize avan ki ou ti vin en adolesan. Me la ki ou en adolesan, ou annan bann nouvo santiman ek bann nouvo problenm. En fiy adolesan ti dir: “Ordinerman, en zanfan pa pou anvi aret vin en Temwen Zeova zis akoz i pa’n ganny en bout gato lanniverser nesans kot lekol. Me dan detrwa lannen ler son dezir pour fer sèks i vin pli for, i pou bezwen vreman konvenki ki obei bann lalwa Zeova i toultan sa pli bon swa.”
5 Pa zis bann zenn ki pou annan bann nouvo defi. Menm lafwa bann ki batize ler zot adilt i ganny teste dan bann fason ki zot pa pe ekspekte. Zot kapab ganny bann tes dan zot lavi maryaz, akoz zot lasante oubyen dan travay. Nenport ki laz nou annan, nou tou nou pou bezwen reste fidel avek Zeova dan plizyer diferan sityasyon.—Zak 1:12-14.
6. (a) Ki savedir ki ou dedikasyon avek Zeova i san okenn kondisyon? (b) Ki ou kapab aprann dan Filipyen 4:11-13?
6 Pour ed ou reste fidel avek Zeova, toultan rapel ki sa promes ki ou ti fer avek Zeova i san okenn kondisyon. Sa i vedir ki ou ti promet Bondye Tre O pour servi li nenport kwa ki arive, menm si ou bann zanmi oubyen paran i arete. (Psonm 27:10) Dan tou sityasyon, fer sir ki ou demann Zeova pour ed ou gard ou promes ki ou ti fer avek li.—Lir Filipyen 4:11-13.
7. Ki savedir travay dir pour ganny sove “avek gran respe ek lafreyer”?
7 Zeova i oule ki ou vin son zanmi. Me, i demann bokou zefor pour gard sa lanmitye for e pour travay dir pour ganny sove. Filipyen 2:12 i dir: “Kontinyen travay dir avek gran respe ek lafreyer pour zot ganny sove.” Sa i vedir ki nou bezwen mazin seryezman lo ki mannyer nou pou kapab reste pros avek Zeova e reste fidel nenport kwa ki arive. Nou pa kapab zis dir ki nou pou fer li. Rapel ki menm bann ki ti servi Bondye pour plizyer lannen pa’n reste fidel. Ki bann keksoz pratik ki pou ed ou travay dir pour ganny sove?
LETID LABIB I ENPORTAN
8. Kwa ki enkli dan en letid personnel? Akoz sa i enportan?
8 Pour vin zanmi Zeova, nou bezwen ekout li e nou bezwen koz avek li. Sa fason prensipal ki nou ekout Zeova i ler nou etidye Labib. Sa i enkli lir e medit lo Parol Bondye ek bann piblikasyon baze lo Labib. Me ler ou pe etidye Labib ou pa pe zis aprann bann detay par ker konmsi ou ti pe etidye pour en legzanmen kot lekol. Plito, i parey en vwayaz eksitan kot ou eksplor e dekouver nouvo keksoz lo Zeova. Ler ou fer sa, ou pou vin pros avek Bondye e li osi i pou vin pros avek ou.—Zak 4:8.
Eski ou kominik byen avek Zeova? (Vwar paragraf 8-11)
9. Ki zouti ki’n ed ou dan ou letid personnel?
9 Lorganizasyon Zeova i donn plizyer zouti ki kapab ed ou avek ou progranm letid. Par egzanp, lo jw.org i annan en seri lartik ki apel “Bible Study Activities” dan seksyon “Teenagers” ki kapab ed ou aplik sa ki ou’n aprann dan bann resi Labib. Lo jw.org ou osi kapab trouv bann study guide pour sa liv “What Does the Bible Really ” ki kapab ed ou batir ou lafwa e ed ou pour eksplik ou krwayans avek lezot. Ou kapab trouv lezot nide pour ou letid personnel dan sa lartik “Young People Ask . . . How Can I Make Bible Reading Enjoyable?” ki dan Awake! Avril 2009. Letid ek meditasyon i de keksoz enportan ki pou ed ou travay dir pour ganny sove.—Lir Teach?Psonm 119:105.
OU BEZWEN PRIYE
10. Akoz en Kretyen ki’n batize i bezwen priye?
Ler ou trakase pour nenport ki rezon, “desarz tou ou fardo lo [Zeova]”
10 Ler nou etidye Labib, nou pe ekout Zeova e ler nou priye, nou pe koz avek li. Nou pa devret pran lapriyer konman en routin oubyen konman en portboner ki pou fer nou reisi. Lapriyer i ler nou kominik avek nou Kreater. Zis mazinen: Zeova i anvi tann sa ki ou annan pour dir! (Lir Filipyen 4:6.) Alor, ler ou trakase pour nenport ki rezon, Labib i dir “desarz tou ou fardo lo [Zeova].” (Psonm 55:22) Plizyer milyon frer ek ser i kapab dir ou ki sa konsey in ed zot. I kapab ed ou osi!
11. Akoz ou devret toultan remersye Zeova?
11 Par kont, nou pa devret priy zis ler nou anvi led Zeova. Labib i donn nou sa rapel: “Toultan montre zot rekonesans.” (Kolosyen 3:15) Par ler, nou sitan trakase akoz nou bann problenm ki nou pa vwar bann bon keksoz ki nou annan. Alor, esey fer sa: Sak zour, mazin lo omwen trwa keksoz ki ou rekonesan pour annan e apre remersye Zeova pour sa bann keksoz. En adolesan ki apel Abigail e ki ti batize ler i ti annan 12 an, i dir: “Mon santi ki Zeova i merite ki nou remersye li plis ki nenport ki dan liniver. Sak loportinite ki nou gannyen nou devret remersye li pour tou sa bann kado ki i’n donn nou.” Tanzantan, Abigail i demann son lekor en kestyon ki i’n deza tande: “Si demen ler mon leve mon annan zis bann keksoz ki mon’n priy lo la ozordi pour dir Zeova mersi, ki mon ti pou annan egzakteman?” * (Vwar not.)
VALER OU PROP LEKSPERYANS
12, 13. Ki mannyer ou’n eksperyans pour ou menm ki Zeova i bon e akoz i enportan pour mazin lo lafason ki Zeova in ed ou?
12 Zeova ti ed Lerwa David pour andir plizyer sityasyon difisil. Alor David ti pe koz lo son prop leksperyans ler i ti dir: “Goute e gete koman [Zeova] i bon! Sa enn ki pran li pour son labri i vreman ere.” (Psonm 34:8) Sa verse i montre ki nou bezwen eksperyans labonte Zeova pour nou menm. Ler ou lir Labib ek nou bann piblikasyon e asiste renyon, ou aprann ki mannyer Bondye in ed lezot pour reste fidel. Me, anmezir ki ou relasyon avek Zeova i vin pli for, ou bezwen vwar ki mannyer Zeova pe ed ou. Dapre ou prop leksperyans, ki mannyer ou’n santi labonte Zeova dan ou lavi?
Toultan apresye sa plas ki Zeova in donn ou dan son lorganizasyon
13 Tou Kretyen in eksperyans labonte Zeova dan en fason spesyal. Zeova ti envit sakenn nou pour vin pros avek li ek son Garson. Zezi ti dir: “Personn pa kapab vin kot mwan si mon Papa ki’n anvoy mwan pa atir li ver mwan.” (Zan 6:44) Eski ou santi ki Zeova in atir ou ver li? Ouswa eski ou panse, ‘Zeova ti atir mon paran ver li e mwan mon pe zis swiv zot’? Rapel ki ler ou ti dedye ou lavi avek Zeova e batize, ou ti annan ou prop relasyon spesyal avek li. Labib i dir nou: “Si en dimoun i kontan Bondye, Bondye i konn li.” (1 Korentyen 8:3) Toultan apresye sa plas ki Zeova in donn ou dan son lorganizasyon.
14, 15. Ki mannyer predikasyon i kapab ed ou pour annan en lafwa pli for?
14 En lot fason ki ou eksperyans labonte Zeova i ler i donn ou kouraz pour koz lo ou lafwa avek lezot, swa dan predikasyon ouswa kot lekol. I kapab difisil pour pres avek ou bann kanmarad lekol. Petet ou enkyet lo ki mannyer zot pou reakte. Ou kapab vreman per pour koz lo ou krwayans devan en kantite dimoun. Kwa ki kapab ed ou?
15 Mazin lo akoz ou krwar sa ki ou krwar. Si bann study guides lo jw.org i disponib dan ou langaz, fer sir ki ou servi zot. Zot kapab ed ou pour reflesir lo ou krwayans, lo akoz ou krwar sa e lo ki mannyer ou kapab eksplik ou krwayans avek lezot. Ler ou vreman konvenki e ou’n fer en bon preparasyon, ou pou anvi koz lo Zeova.—Zeremi 20:8, 9.
16. Kwa ki kapab donn ou kouraz pour koz lo ou krwayans?
16 Menm si ou’n byen prepare, i kapab ki ou ankor per pour eksplik ou krwayans. En ser ki annan 18 an e ki ti batize a laz 13 an, i dir: “Mon konnen ki mon krwar, me par ler mon vwar li difisil pour dir sa ki mon pe panse.” Alor, ler i koz lo laverite i esey rilaks e koz parey i abitye koze dan lavi toulezour. I dir: “Mon bann kanmarad lekol i santi zot alez pour koz lo bann keksoz ki zot fer. Alor, mwan osi mon devret santi mwan alez. Alor, dan koze mon mansyonn en keksoz tel parey, ‘Lotrozour ler mon ti pe ansenny Labib e . . .’ Apre mon kontinyen rakont mon zistwar. Menm si mon zistwar napa nanryen pour fer avek Labib, souvandfwa dimoun i anvi konnen ki mon fer ler mon pe ansenny Labib. Par ler, zot demann mwan kestyon lo la. Pli mon servi sa lapros, pli mon vwar li fasil. Apre ki mon’n fini koze, mon toultan santi mwan byen!”
17. Kwa ankor ki kapab ed ou pour koz avek lezot?
17 Ler lezot i santi ki ou vreman
annan zot lentere a ker e ki ou annan respe pour zot, i pli fasil pour zot annan respe pour ou ek ou krwayans. Olivia ki annan 17 an e ki ti batize ler i ti ankor bokou pli zenn, i dir: “Mon ti’n toultan per ki si mon mansyonn Labib dan mon konversasyon, dimoun ti pou krwar ki mon en fanatik.” Me apre i ti konmans get keksoz dan en lot fason. Olye konsantre lo son lafreyer, i ti dir dan li menm: “En kantite zenn pa konn nanryen lo Temwen Zeova. Nou sa bann sel Temwen Zeova ki zot an kontak avek. Alor, lafason ki nou konport nou i kapab annan en lefe lo lafason ki zot pou reakte. Me ki pou arive si nou timid oubyen vwar li difisil pour koz lo nou lafwa? Oubyen ki pou arive si ler nou koze nou donn sa lenpresyon ki nou anbarase? Petet zot pou pran nou konman bann dimoun ki pa fyer pour sa ki nou ete. Zot menm kapab mal reakte akoz nou pa konfidan. Par kont, si nou alez e koz lo nou krwayans avek konfidans dan nou konversasyon toulezour, i tre probab ki zot pou annan respe pour nou.”KONTINYEN TRAVAY DIR POUR OU GANNY SOVE
18. Ki ou bezwen fer pour travay dir pour ou ganny sove?
18 Nou’n vwar ki travay dir pour ou ganny sove i en gro responsabilite. Pour fer sa, ou bezwen lir e medit lo Parol Bondye, priy Zeova e reflesir byen lo tou bann fason ki i’n ed ou personnelman. Si ou fer sa bann keksoz, sa pou ed ou pour annan plis konfyans ki Zeova i ou Zanmi. Sa pou fer ou anvi koz lo ou krwayans avek lezot.—Lir Psonm 73:28.
19. Akoz i vo lapenn fer bokou zefor pour travay dir pour ou ganny sove?
19 Zezi ti dir: “Si en dimoun i oule swiv mwan, fodre i aret viv zis pour li menm e pran son poto martir e kontinyen swiv mwan.” (Matye 16:24) Pour kapab swiv Zezi, sak Kretyen i bezwen dedye son lavi avek Zeova e batize. Me sa i zis konmansman en lavi merveye la konmela e i pou ed nou ganny lavi eternel dan nouvo lemonn Bondye. Alor, fer tou sa ki ou kapab pour kontinyen travay dir pour ou ganny sove!
^ par. 11 Pour plis lenformasyon, vwar “Young People Ask—Why Should I Pray?” ek son worksheet lo jw.org.