LER lezot dimoun i demontre labonte anver nou, sa i fer nou santi nou byen. I rekonfortan pour konnen ki zot enterese avek nou. Vi ki nou kontan ler lezot i demontre labonte anver nou, ki mannyer nou kapab aprann demontre labonte anver lezot?

En dimoun ki demontre labonte i vreman enterese avek lezot e i montre sa dan sa ki i dir e fer. I pa zis demontre lapolites me i tret lezot avek labonte parski i kontan zot e konpran ki mannyer zot santi. Pli enportan ankor, labonte i en laspe fri lespri sen Bondye. (Galat 5:22, 23) Zeova i oule ki nou demontre labonte, alor annou vwar ki mannyer li ek son Garson in demontre labonte e ki mannyer nou kapab swiv zot legzanp.

Zeova i bon anver tou dimoun, menm anver bann ki “pa rekonesan e ki move.” (Lik 6:35) Par egzanp, Zeova “i fer soley tap lo bon konman move dimoun e i fer lapli tonm lo bann ki drwat e bann ki move.” (Matye 5:45) Menm bann dimoun ki pa krwar ki Zeova i Kreater, zot kapab benefisye avek son labonte e santi zot ere a en serten degre.

Nou vwar en gran legzanp labonte Zeova dan sa ki i ti fer pour Adan ek Ev. Apre ki zot ti’n fer pese, “zot ti koud fey fig ansanm pour kouver zot.” Par kont, Zeova ti konnen ki an deor zarden Edenn zot ti pou bezwen lenz ki donn zot plis proteksyon, parski later ti’n ganny modi e ranpli avek “rons ek pikan.” Alor Zeova ti demontre labonte anver zot e fer “lenz avek lapo zannimo” pour zot.​—Zenez 3:7, 17, 18, 21.

Menm si Zeova i demontre labonte anver “bon konman move dimoun,” i sirtou bon anver son bann serviter fidel. Par egzanp, pandan letan profet Zekarya, en lanz ti enkyet parski bann Izraelit ti’n aret konstri tanp Zeova Zerizalenm. Zeova ti ekout sa ki sa lanz ti annan pour dir e i ti reponn li avek bann “bon parol rekonfortan.” (Zekarya 1:12, 13, NWT) Zeova ti tret profet Eliya dan menm fason. I ti annan en letan kot sa profet ti santi li sitan dekouraze e tousel ki i ti demann Zeova pour pran son lavi. Zeova ti montre ki i ti pran aker santiman Eliya e i ti anvoy en lanz pour ankouraz li. I ti osi asir sa profet ki i pa ti tousel. Labonte Zeova ti ankouraz Eliya pour kontinyen fer sa travay ki i ti’n ganny konfye. (1 Lerwa 19:1-18) Me dan tou bann serviter Zeova, lekel ki ou ti pou dir in swiv legzanp labonte Zeova dan sa pli bon fason?

Ler Zezi ti lo later, dimoun ti kapab vwar ziska ki degre Zezi ti demontre labonte. I pa ti zanmen brit e i pa ti zanmen esey fors lezot pour fer sa ki i ti oule. I ti enterese avek lezot e i ti dir: “Vin kot mwan, zot tou ki pe rente e fatige e mon pou redonn zot lafors. . . . Parski i fasil pour vin mon disip.” (Matye 11: 28-30) Vi ki Zezi ti demontre labonte anver lezot, dimoun ti swiv li partou kot i ti ale. Ler Zezi ti vwar zot son leker ti fermal e i ti pran pitye pour zot, alor i ti donn zot manze, geri zot e ansenny zot “en kantite keksoz” lo son Papa.​—Mark 6:34; Matye 14:14; 15:32-38.

Zezi ti konpran santiman bann dimoun e i ti demontre labonte anver zot. Anfet, menm ler i ti fatige, i ti demontre labonte e ed tou dimoun ki ti vin kot li. (Lik 9:10, 11) Mazin lo sa ki ti arive avek sa madanm ki ti pe perdi disan. I ti anvi ganny geri, alor i ti tous lenz Zezi. Me dapre Lalwa Moiz, i pa ti’n devret fer sa parski i ti enpir. (Levitik 15:25-28) Ki mannyer Zezi ti reakte? I pa ti ankoler avek li. Zezi ti kapab vwar ki sa madanm ti per e i ti pran pitye pour li parski i ti’n soufer pour 12 an. I ti dir li: “Mon fiy, ou lafwa in fer ou byen. Al anpe, ou’n geri avek sa maladi ki ti pe fer ou soufer.” (Mark 5:25-34) Zezi ti vreman demontre labonte anver lezot!

Dan bann legzanp ki nou’n diskite, nou’n aprann ki si nou annan labonte, nou pou ed lezot. Zezi ti fer resorti ki kantite i enportan pour fer sa ler i ti donn legzanp sa bon Samariten. En Zwif ti’n ganny atake, vole, bate e kite o bor semen pour mor. Ler en Samariten ki ti pe pas dan sa semen ti vwar sa zonm, son leker ti fermal menm si bann Samariten ek bann Zwif ti ay kanmarad. Labonte ti pous li pour ed sa zonm ki ti’n ganny blese. I ti netway son bann blesir e anmenn li dan en pti lotel. Sa Samariten ti pey propriyeter sa pti lotel pour pran swen avek sa Zwif e menm ofer pour pey okenn lezot depans.​—Lik 10:29-37.

Labonte pou pous nou pour pran an konsiderasyon santiman lezot e pour ankouraz zot pa zis dan sa ki nou fer me osi dan sa ki nou dir. Labib i dir: “En leker ki trakase i fer en zonm tonm dan depi, me en bon parol i donn li lazwa.” (Proverb 12:25) Ler nou demontre labonte e fer sa ki byen, sa i pous nou pour dir lezot bann keksoz ankourazan ki pou fer zot pli ere. * (Vwar not.) Ler nou dir bann bon parol avek lezot, sa pou montre ki nou enterese avek zot e i pou fer li pli fasil pour zot andir bann problenm dan lavi.​—Proverb 16:24.

Nou tou nou annan sa abilite pour demontre labonte parski Bondye ti kree tou imen dan son resanblans. (Zenez 1:27) Par egzanp, en zofisye larme Romen ki apel Zilyis ti responsab pour anmenn zapot Pol Ronm. I ti “tret Pol avek labonte” e ler zot ti ariv lavil Sidon “i ti les li al kot son bann zanmi pour zot pran swen avek li.” (Akt 27:3) Ler Pol ek lezot ti fer nofraz pandan sa vwayaz, bann zabitan Malt ti “demontre en labonte remarkab” anver zot e menm alim en dife pour sof zot. (Akt 28:1, 2) Sa bann dimoun ti fer en bon keksoz. Par kont, pour fer Zeova kontan, en dimoun i bezwen toultan demontre labonte, pa zis en fwa dan rar.

Zeova i oule ki labonte i form parti nou personnalite ek fason viv. Sanmenm sa i dir nou “met” labonte lo nou. (Kolosyen 3:12, not) Me i pa fasil pour toultan demontre labonte. Akoz? Petet nou pa demontre labonte akoz nou timid, mank konfidans oubyen tant pour mazin zis nou prop lekor. Oubyen i kapab ki nou vwar li difisil pour demontre labonte anver bann dimoun ki pa tret nou byen. Me si nou priye pour ganny lespri sen e esey swiv legzanp Zeova, Zeova i kapab ed nou pour demontre vre labonte.​—1 Korentyen 2:12.

Ki nou bezwen fer pour demontre plis labonte? Demann ou lekor: ‘Eski mon ekout  lezot byen e esey konpran zot santiman? Eski mon remarke ler lezot dimoun i bezwen led? Ki dernyen fwa mon ti demontre labonte anver en dimoun apard ki mon fanmir ouswa zanmi pros?’ Apre sa, fikse bann lobzektif, tel parey aprann konn bann dimoun otour ou pli byen, sirtou bann dan kongregasyon. Dan sa fason ou kapab konn zot bann difikilte e sa ki zot bezwen. Apre sa, esey demontre labonte anver bann dimoun parey ou ti a voudre lezot i fer avek ou. (Matye 7:12) Finalman, demann Zeova led e i pou beni zefor ki ou pe fer pour demontre plis labonte.​—Lik 11:13.

Labonte ti enn parmi bann keksoz ki zapot Pol ti mansyonnen ki ti fer li vin en bon serviter. (2 Korentyen 6:3-6) Bann dimoun ti kontan Pol parski i ti demontre labonte dan tou sa ki i ti dir e fer e zot ti kapab santi ki i ti enterese avek zot. (Akt 28:30, 31) Pareyman, si nou demontre labonte, i kapab ki lezot dimoun pou anvi aprann plis lo laverite. Ler nou demontre labonte anver tou dimoun, menm anver bann ki pa tret nou byen, sa i kapab tous zot leker e petet zot pou sanz zot latitid. (Romen 12:20) Kekfwa avek letan zot pou menm anvi aprann laverite lo Labib.

Dan Paradi, tou dimoun pou demontre labonte anver kanmarad. Bann dimoun ki resisite pou ganny trete avek labonte e pour serten parmi zot, sa pou premye fwa ki zot eksperyans sa. Sirman sa pou pous zot pour demontre labonte anver lezot. Anfet, okenn dimoun ki pa demontre labonte e ki pa oule ed lezot pa pou ganny drwa viv anba Rwayonm Bondye. Zis bann dimoun ki demontre lanmour ek labonte ki pou viv pour touzour dan Paradi. (Psonm 37:9-11) I pou vreman en lemonn kot i pou annan lape ek sekirite! Par kont, menm avan ki sa i arive, nou kapab ganny bann byenfe ler nou demontre labonte. Dan ki sans?

Labib i dir: “En bon dimoun i ganny rekonpanse.” (Proverb 11:17) Dimoun i kontan pas letan avek en dimoun ki demontre labonte e souvan zot osi zot demontre labonte anver li. Zezi ti dir: “Mezir ki zot servi pour lezot, sanmenm mezir ki lezot pou servi pour zot osi.” (Lik 6:38) Alor i fasil pour en dimoun ki demontre labonte pour toultan annan bann bon zanmi.

Zapot Pol ti demann bann frer ek ser dan kongregasyon Efez pour “bon avek kanmarad, annan konpasyon ek tandres, pardonn kanmarad volonterman.” (Efezyen 4:32) Ler tou dimoun dan kongregasyon i demontre labonte ek konpasyon, kongregasyon i vin pli for e ini. Nou pa ti pou zanmen anvi kritik nou bann frer ek ser, koz lo zot oubyen dir zot en keksoz brit ouswa blesan, menm dan en dyok. O kontrer, sa ki nou dir i devret toultan itil e ankourazan. (Proverb 12:18) Sa i fer ki kongregasyon pou servi Zeova dan lazwa.

Parey nou’n aprann, labonte i en kalite ki ganny demontre dan tou sa ki nou dir e fer. Ler nou demontre labonte, nou swiv legzanp Zeova ki demontre lanmour ek zenerozite. (Efezyen 5:1) Sa i fer nou kongregasyon pli for e i ankouraz lezot pour servi Zeova. Alor annou fer tou sa ki nou kapab pour ki lezot dimoun i kapab vwar ki Temwen Zeova i en pep ki demontre labonte!