1, 2. Ki Ebre 13:4 i devret pous nou pour fer?

 NOU tou nou anvi onor Zeova. I merite ganny onore e i promet pour onor nou an retour. (1 Samyel 2:30; Proverb 3:9, NWT; Revelasyon 4:11) I osi anvi ki nou onor lezot dimoun, tel parey bann zofisye gouvernman. (Romen 12:10; 13:7) Me i annan en domenn kot nou sirtou bezwen demontre loner. Sa i dan maryaz.

² Zapot Pol ti ekri: “Maryaz i devret ganny onore par tou dimoun e zot pa devret sali lili maryaz.” (Ebre 13:4) Pol pa ti pe zis koz an zeneral lo maryaz. I ti pe dir bann Kretyen ki zot bezwen onor maryaz, savedir, vwar maryaz konman presye. Eski koumsa ki ou konsider maryaz, espesyalman ou prop maryaz si ou’n marye?

3. Ki konsey enportan lo maryaz Zezi ti donnen? (Vwar portre o konmansman sa lartik.)

³ Si ou vwar maryaz konman en keksoz presye, ou pe swiv en bon legzanp. Zezi ti onor maryaz. Ler bann Farizyen ti demann li konsernan divors, i ti mansyonn sa ki  Bondye ti dir konsernan sa premye maryaz: “Se pour sa rezon ki en zonm pou kit son papa ek son manman e zot de pou vin en sel pour ki zot nepli de me en sel.” Zezi ti azoute: “Sa ki Bondye in ini ansanm, zonm pa devret separe.”​—Lir Mark 10:2-12; Zenez 2:24.

4. Ki Zeova ti oule ler i ti etabli maryaz?

⁴ Zezi ti dakor ki Bondye ti sa enn ki ti etabli maryaz e ki maryaz i devret permanan. Ler Bondye ti fer sa premye maryaz, i pa ti dir Adan ek Ev ki zot ti kapab divorse. O kontrer, i ti oule ki “zot de” zot reste ini dan maryaz pour touzour.

5. Ki mannyer lanmor in afekte maryaz?

⁵ Par kont, ou konnen ki ler Adan ti fer pese, en kantite keksoz ti sanze. Enn sa bann sanzman i ki bann imen ti konmans mor e sa sanzman ti afekte maryaz. Zapot Pol ti eksplik bann Kretyen ki lanmor i termin en maryaz e ki sa konzwen ki ankor vivan i lib pour remarye.​—Romen 7:1-3.

6. Ki Lalwa Moiz i ansenny nou konsernan pwennvi Bondye lo maryaz?

⁶ Sa Lalwa ki Bondye ti donn pep Izrael ti donn bann detay lo maryaz. Par egzanp, en zonm Izraelit ti ganny drwa annan plis ki en madanm. Sa koutim ti la menm avan ki Bondye ti donn Lalwa. Par kont, Lalwa ti protez bann madanm ek zanfan pour ki zot pa ganny mal trete. Par egzanp, si en zonm Izraelit ti marye avek en lesklav e pli tar marye avek en dezyenm madanm, i ti ankor bezwen pran swen avek son premye madanm parey i ti fer avan. Bondye ti ekspekte ki sa msye i kontinyen protez e pran swen avek son premye madanm. (Egzod 21:9, 10) Nou pa anba Lalwa Moiz ozordi.  Me Lalwa i montre nou ki Bondye i vwar maryaz konman en keksoz vreman presye. Sirman sa i ed nou pour onor maryaz.

7, 8. (a) Dapre Deterononm 24:1, ki Lalwa ti dir lo divors? (b) Ki pwennvi Zeova lo divors?

⁷ Ki Lalwa ti dir konsernan divors? Menm si i pa ti zanmen lentansyon Zeova ki en msye ek en madanm i divorse, Lalwa ti permet en zonm Izraelit pour divors son madanm si i ti’n “dekouver en keksoz ki pa apropriye avek li.” (Lir Deterononm 24:1.) a (Vwar not.) Lalwa pa ti dekrir kwa ki kapab ganny konsidere konman “en keksoz ki pa apropriye.” Par kont, i bezwen ki i ti en keksoz ki fer onte oubyen vreman grav e pa zis en pti lofans. (Deterononm 23:14) Malerezman, ler Zezi ti vin lo later en kantite Zwif ti deza pe divorse avek zot madanm “pour nenport ki rezon.” (Matye 19:3) Byensir, nou nou pa anvi devlop sa kalite latitid.

⁸ Dan letan profet Malaki, en kantite zonm ti divorse avek zot premye madanm, petet pour marye avek en madanm pli zenn ki pa servi Zeova. Me Bondye ti fer byen kler ki mannyer i vwar divors. I ti dir: “Mon ay divors.” (Malaki 2:14-16) Pwennvi Bondye lo maryaz pa’n sanze. Depi o konmansman i ti dir ki en zonm pou “atas li avek son fanm, e tou le de zot vin en sel laser.” (Zenez 2:24) Zezi ti annan menm pwennvi avek son Papa ler i ti dir: “Sa ki Bondye in ini ansanm zonm pa devret separe.”​—Matye 19:6.

9. Ki parol Zezi dan Mark 10:11, 12 i vedir?

⁹ Serten i kapab demande, ‘Eski i annan okenn rezon pour en Kretyen divorse e remarye?’ Remark sa ki Zezi ti dir: “Nenport zonm ki divors son madanm e marye avek en lot i komet adilter kont li e si zanmen en madanm i marye apre ki i’n divorse avek son msye, i komet adilter.” (Mark 10:11, 12; Lik 16:18) I kler ki Zezi ti onor maryaz e i ti anvi ki lezot i fer parey. Si en zonm ti divors son madanm fidel e remarye, i ti pou pe komet adilter. Sa ti pou osi leka si en madanm ti divors son msye fidel. Sa i akoz divors lo li menm pa termin en maryaz. Bondye i ankor konsider sa koup konman “en sel laser.” Zezi ti osi dir ki si en zonm i divors son madanm ki inosan, sa madanm ti pou riske komet adilter. Akoz sa ti kapab arive? Dan sa letan, en madanm ki ti’n divorse ti kapab santi ki i bezwen remarye pour rezon finansyel. Sa kalite maryaz ti pou ganny konsidere konman adilter.

10. Ki sa sel rezon en Kretyen i kapab divorse e lib pour remarye?

 ¹⁰ Zezi ti ansennyen ki i annan en sel rezon ki en dimoun i kapab divorse: “Mwan mon dir zot ki nenport zonm ki divors son madanm, eksepte si i’n komet imoralite seksyel e i marye avek en lot i komet adilter.” (Matye 19:9) I ti fer resorti sa menm nide dan Sermon lo Montanny. (Matye 5:31, 32) Tou le de fwa, Zezi ti refer avek “imoralite seksyel.” Imoralite seksyel i enkli adilter, prostitisyon, relasyon seksyel ant bann dimoun ki pa’n marye, omoseksyalite ek sèks avek zannimo. Si par egzanp en zonm marye i komet imoralite seksyel, son madanm i kapab deside si i pou divorse avek li oubyen non. Si son madanm i divorse avek li, Bondye pou nepli vwar zot konman de dimoun marye.

11. Akoz en Kretyen i kapab deside pour pa divorse menm si son konzwen in komet imoralite seksyel?

¹¹ Remarke ki Zezi pa ti dir ki si en dimoun marye i komet imoralite seksyel, sa konzwen inosan i bezwen divorse avek li. Par egzanp, en madanm i kapab swazir pour reste marye avek son msye menm si son msye in komet imoralite seksyel. Akoz? I kapab ki i ankor kontan li e pare pour pardonn li e travay ansanm avek li pour amelyor zot maryaz. Osi, si sa madanm i divorse e pa remarye, i pou rankontre serten difikilte. Par egzanp, ki mannyer i pou pran swen avek son bezwen materyel ek seksyel? Eski i pou santi li tousel? Ki lefe divors pou annan lo son bann zanfan? Eski i pou vin pli difisil pour elve zot dan laverite? (1 Korentyen 7:14) I kler alor ki en konzwen inosan ki swazir pour divorse pou annan bann gro problenm.

12, 13. (a) Ki ti arive dan maryaz Osea? (b) Akoz Osea ti reaksepte Gomer e ki nou kapab aprann avek son maryaz?

¹² Legzanp profet Osea i ed nou aprann en kantite lo pwennvi Bondye konsernan maryaz. Bondye ti demann Osea pour marye avek en madanm ki apel Gomer, ki ti pou vin “en fanm prostitye” e son “zanfan ava ne dan prostitisyon.” Gomer ek Osea ti ganny en garson. (Osea 1:2, 3) Pli tar, Gomer ti ganny en fiy ek en lot garson, tre probab pour en lot zonm. Menm si Gomer ti komet adilter plis ki en fwa, Osea ti reste marye avek li. Finalman, i ti kit Osea e vin en lesklav. Kantmenm sa, Osea ti reaste li. (Osea 3:1, 2) Zeova ti servi legzanp Osea pour montre lafason ki plizyer fwa I ti pardonn pep Izrael apre ki zot ti’n enfidel anver Li par ador lezot bondye. Ki nou kapab aprann avek maryaz Osea?

¹³ Si konzwen en Kretyen i komet imoralite, sa Kretyen inosan pou bezwen fer en desizyon. Zezi ti dir ki sa konzwen inosan pou annan en rezon valab pour rod divors e apre i pou lib pour remarye. Par kont, i pa pou mal si sa enn ki inosan i swazir pour pardonn son konzwen. Osea ti reaksepte Gomer. Apre ki i ti retourn kot Osea, Osea ti dir li ki i pa kapab annan relasyon seksyel avek okenn lezot zonm. Osea pa ti “annan relasyon seksyel” avek  Gomer pour en pe letan. (Osea 3:3, not dan NWT) Me avek letan, i bezwen ki Osea ti annan relasyon seksyel avek son madanm ankor. Sa ti reprezant lafason ki Bondye ti pare pour reaksepte bann Izraelit e kontinyen annan en relasyon avek zot. (Osea 1:11; 3:3-5) Ki sa i montre nou lo maryaz ozordi? Si en konzwen inosan i konmans annan relasyon avek son konzwen ki koupab, sa pou montre ki sa enn inosan in pardonn son konzwen. (1 Korentyen 7:3, 5) Alor i ti pou nepli annan en rezon valab pour divorse. Apre sa, msye ek madanm i devret travay ansanm e ed kanmarad pour annan pwennvi Bondye lo maryaz.

14. Dapre 1 Korentyen 7:10, 11, kwa ki kapab arive dan en maryaz?

¹⁴ Tou Kretyen i devret onor maryaz parey Zeova ek Zezi i fer. Par kont, parfwa serten pa fer sa, parski nou tou nou enparfe. (Romen 7:18-23) Alor nou pa devret sirprann ki serten Kretyen dan premye syek ti annan bann difikilte dan zot maryaz. Pol ti ekri ki “en madanm marye pa devret separe avek son msye.” Me parfwa sa ti arive.​—Lir 1 Korentyen 7:10, 11.

15, 16. (a) Ki lobzektif en koup i devret annan ler i annan problenm dan zot maryaz e akoz? (b) Ki mannyer sa i aplikab si en konzwen pa servi Zeova?

¹⁵ Pol pa ti dir kwa ki ti fer bann koup separe. Me nou konnen ki i pa ti akoz imoralite seksyel. Akoz nou dir sa? Parski meton sa msye ti’n komet imoralite seksyel, sa madanm ti pou’n annan en rezon pour divorse e remarye. Me Pol ti ekri ki en madanm ki separe avek son msye i devret “reste tousel si non i bezwen rekonsilye avek son msye.” Alor Bondye ti ankor konsider zot konman en koup marye. Pol ti dir ki malgre nenport problenm oubyen difikilte ki en koup i annan, si ni enn ant zot pa ti’n komet imoralite seksyel, zot devret annan sa lobzektif pour rekonsilye, setadir rezourd zot problenm e reste ansanm. Zot kapab rod led avek bann ansyen. Bann ansyen pa pran kote, me zot kapab ofer bann konsey pratik baze lo Labib.

¹⁶ Par kont, ki en Kretyen ki’n marye avek en dimoun ki pa servi Zeova pou fer? Ler i annan problenm dan zot maryaz, eski separasyon i akseptab? Parey i’n ganny mansyonnen avan, Labib i dir ki imoralite seksyel i sa sel rezon  valab pour divorse. Me Labib pa spesifye bann rezon ki en koup i kapab separe. Pol ti ekri: “Si en madanm i annan en msye ki pa krwar dan Bondye e sa msye i dakor pour reste avek li, pa fodre i kit son msye.” (1 Korentyen 7:12, 13) Sa i ankor aplikab ozordi.

17, 18. Akoz serten Kretyen ti reste marye menm ler zot ti dan bann sityasyon vreman difisil?

¹⁷ Par kont, in annan serten ka kot “en msye ki pa krwar dan Bondye” in montre ki i pa “dakor pour reste avek” son madanm. Par egzanp, petet i abiz son madanm fizikman ziska ki son madanm i santi ki son lasante ek lavi i an danze. I kapab ki i refize okip bezwen materyel son madanm ek lafanmir oubyen i fer li difisil pour son madanm servi Bondye. Dan sa bann ka, en madanm Kretyen i kapab deside ki malgre sa ki son msye i dir, son msye pa “dakor pour reste avek” li e ki zot bezwen separe. Me lezot Kretyen dan menm sityasyon in deside pour reste avek zot konzwen. Zot in andire e esey travay pour amelyor zot maryaz. Akoz zot deside fer sa?

¹⁸ Si dan en sityasyon koumsa en koup i deside separe, zot pou ankor marye e zot pou annan bann difikilte parey sa ki nou’n mansyonnen avan. Zapot Pol ti osi donn en lot rezon pour en koup reste ansanm. I ti ekri: “Sa msye ki pa krwar dan Bondye i ganny sanktifye akoz son madanm e sa madanm ki pa krwar dan Bondye i ganny sanktifye akoz sa frer, si non zot zanfan ti pou enpir, me aprezan zot sen.” (1 Korentyen 7:14) Plizyer Kretyen ti deside pour reste avek zot konzwen ki pa ti servi Zeova menm si zot sityasyon ti vreman difisil. Pli tar, ler zot konzwen ti vin Temwen Zeova, zot ti vreman kontan ki zot ti’n fer sa sakrifis.​—Lir 1 Korentyen 7:16; 1 Pyer 3:1, 2.

19. Akoz i annan en kantite maryaz ki reisi dan kongregasyon Kretyen?

¹⁹ Zezi ti donn bann konsey lo divors e zapot Pol ti donn konsey lo separasyon. Tou le de ti anvi ki bann serviter Bondye i onor maryaz. Ozordi dan lemonn antye i annan bokou maryaz ki pe reisi dan bann kongregasyon Kretyen. I tre probab ki ou kapab trouv bann koup marye ere dan ou kongregasyon, kot bann msye fidel i kontan zot madanm e zot madanm i annan respe pour zot. Zot tou zot montre ki maryaz i kapab ganny onore. Deplis, nou kontan ki plizyer milyon msye ek madanm marye pe montre ki sa parol Bondye i vre: “Se pour sa rezon ki en zonm pou kit son papa ek son manman e i pou atase avek son madanm e zot de pou vin en sel.”​—Efezyen 5:31, 33.