DIANA i annan plis ki 80 an e in soufer en kantite pandan sa bann dernyen lannen ki’n pase. Son msye ki ti ganny Alzheimer e ki ti dan en rezidans pour bann dimoun aze in mor. Son de garson osi in mor e li i ti bezwen lalit avek kanser tete. Me ler bann frer ek ser i vwar Diana dan renyon ouswa dan predikasyon, i toultan zwaye.

John ti en sirveyan rezyonal pour plis ki 43 an. I ti kontan son responsabilite e i pa ti kapab imazin li pe fer en lot keksoz. Par kont, i ti bezwen aret servi konman en sirveyan pour pran swen avek en fanmir pros ki ti malad. Ler bann frer ek ser ki ti konn John ti zwenn li kot en lasanble, zot ti vwar li ankor parey, touzour zwaye.

Ki mannyer i posib pour Diana ek John annan lazwa? Ki mannyer en dimoun ki soufer i kapab zwaye? Ki mannyer en dimoun i kapab zwaye si i bezwen aret fer en keksoz ki i kontan? Labib i donn nou larepons. I dir: “Sa enn ki drwat pou rezoui dan Zeova.” (Psonm 64:10, NWT) Nou kapab pli byen konpran sa laverite si nou konnen kwa ki pou fer nou toultan zwaye ouswa non.

I annan serten keksoz ki toultan fer nou zwaye. Par egzanp, mazin de dimoun ki anmoure e ki marye. Oubyen mazin en dimoun ki vin en paran ouswa en dimoun ki ganny en nouvo responsabilite dan servis Zeova. Sa bann keksoz i anmenn lazwa parski tousala i bann kado sorti kot Zeova. I’n fer sa laranzman maryaz, i’n donn nou sa abilite pour annan zanfan e travay pour nou fer dan son lorganizasyon.​—Zenez 2:18, 22; Psonm 127:3; 1 Timote 3:1.

Park kont, serten keksoz ki anmenn lazwa i kapab tanporer. Malerezman, en konzwen i kapab vin enfidel ouswa mor. (Ezekyel 24:18; Osea 3:1) Bann zanfan i kapab dezobei zot paran ek Bondye e petet menm ganny ekskli dan kongregasyon. Par egzanp, bann garson Samyel pa ti servi Zeova dan en fason ki akseptab. Osi, David ti ganny en kantite problenm dan son fanmir parski i ti fer pese  avek Bat-Seba. (1 Samyel 8:1-3; 2 Samyel 12:11) Ler bann keksoz koumsa i arive, zot pa anmenn lazwa me zot anmenn sagrinasyon ek en kantite douler.

Pareyman, parfwa nou pa kapab kontinyen dan en responsabilite dan servis Zeova parski nou’n tonm malad ouswa nou bezwen pran swen avek nou fanmir oubyen akoz i annan en sanzman dan lorganizasyon. Plizyer ki’n bezwen arete dan en responsabilite i dir ki aprezan zot nepli annan sa menm lazwa ki zot ti annan ler zot ti dan sa servis.

Nou kapab fasilman vwar ki sa bann keksoz ki fer nou zwaye, pa toultan dire. Alor eski i annan en kalite lazwa ki dire menm ler lavi i vin difisil? I bezwen annan, parski Samyel, David ek lezot pa ti perdi zot lazwa ler zot ti pe fer fas avek bann leprev.

Zezi ti konnen ki savedir vre lazwa. Avan Zezi ti vin lo later, Labib i dir nou ki i ‘ti touzour kontan pour dan kote Zeova.’ (Proverb 8:30, NWT) Par kont, ler i ti vin lo later, parfwa i ti bezwen fer fas avek bann gro difikilte. Kantmenm sa, Zezi ti trouv lazwa dan fer lavolonte son papa. (Zan 4:34) Me ki nou pou dir lo son bann dernyen erdtan ki i’n soufer? Nou lir: “Akoz sa lazwa ki i ti pou gannyen, i pa ti pran kont laont pour mor lo en poto martir.” (Ebre 12:2) Alor nou kapab aprann en kantite avek de keksoz ki Zezi ti dir konsernan vre lazwa.

En fwa, ler 70 disip ti retourn kot Zezi apre predikasyon, zot ti dan lazwa akoz tou sa ki zot ti’n fer. Zot ti’n menm tir demon! Me Zezi ti dir zot: “Pa bezwen rezouir akoz bann demon in soumet avek zot, plito, rezouir akoz zot non in ganny ekrir dan lesyel.” (Lik 10:1-9, 17, 20) Alor, i bokou pli enportan pour ganny laprouvasyon Zeova e sa i anmenn plis lazwa ki okenn responsabilite.

En lot fwa, ler Zezi ti pe koz avek en lafoul, en madanm Zwif ti telman enpresyonnen par son lansennyman ki i ti dir ki manman Zezi ti bezwen vreman ere pour annan en garson parey li. Me Zezi ti reponn: “Non, plito, ere sa bann ki tann parol Bondye e  obei li!” (Lik 11:27, 28) Ler nou fyer akoz nou zanfan, sa i kapab fer nou ere. Me sa ki fer nou toultan zwaye i ler nou obei Zeova e annan en bon relasyon avek li.

Nou vreman zwaye ler nou santi ki nou’n fer Zeova kontan. Menm si i pa gou pour pas dan bann leprev, sa bann leprev pa kapab anpes nou santi ki nou’n fer Zeova kontan. Anfet, ler nou reste fidel dan leprev, nou vin pli zwaye. (Romen 5:3-5) Osi, Zeova i donn son lespri sen bann ki annan konfyans dan li e lazwa i en laspe fri lespri sen. (Galat 5:22) Sa i ed nou pour konpran akoz Psonm 64:10 i dir: “Sa enn ki drwat pou rezoui dan Zeova.”

Sa i osi eksplike akoz Diana ek John ti kapab reste zwaye menm si zot ti fer fas avek bann gro difikilte. Diana i dir: “Mon’n pran refiz dan Zeova, parey en zanfan ti pou fer avek son paran.” I azoute: “Mon santi ki i’n beni mwan avek sa abilite pour kontinyen pres regilyerman avek en sourir lo mon figir.” Kwa ki ti ed John pour reste zwaye e okipe dan predikasyon apre ki i ti’n kit son responsabilite konman sirveyan rezyonal? I dir: “Depi 1998 ler mon ti ganny sa responsabilite pour montre Lekol Formasyon Ministeryel, mon’n fer plis letid personnel ki zanmen oparavan.” I eksplike ki i ti pli fasil pour fer sa azisteman ki li ek son madanm ti bezwen fer parski zot ti toultan pare pour fer nenport kwa ki Zeova ti demann zot pour fer. I azoute: “Nou’n fer li san okenn regre.”

En kantite lezot in eksperyans sa ki Psonm 64:10 i dir. Pran par egzanp en koup ki’n servi pour plis ki 30 an dan Betel Leta-z-ini. Apre sa zot ti ganny demande pour fer pionye spesyal. Zot ti admet: “I normal pour sagren ler ou perdi en keksoz ki ou kontan.” Me zot ti azoute: “Ou pa kapab sagren pour touzour.” Deswit konman zot ti ganny zot nouvo responsabilite, zot ti konmans prese dan zot kongregasyon. Zot ti osi dir: “Nou ti priy lo bann keksoz pli spesifik. Apre, ler nou ti vwar ki nou lapriyer in ganny reponn sa ti donn nou kouraz ek lazwa. Zis apre ki nou ti’n arive, lezot dan kongregasyon ti konmans fer pionye e nou ti ganny beni avek de letid Labib ki ti byen progrese.”

Byensir, pa toultan ki nou pou dan lazwa. I pou annan letan kot nou pou sagren. Me Zeova i asir nou avek sa parol ki dan Psonm 64:10. Menm ler nou dekouraze, nou kapab asire ki si nou reste fidel malgre sa ki nou pas atraver, nou “pou rezoui dan Zeova.” Nou kapab osi enpasyan pour vwar sa promes Zeova kot i pou annan “en nouvo lesyel ek en nouvo later,” vin vre. Apre sa, tou dimoun pou vin parfe e zot pou “rezoui e viv dan lazwa pour touzour” akoz tou sa ki Zeova pou fer.​—Izai 65:17, 18.

Imazinen ki sa pou vedir. Nou pou annan en lasante parfe e toulezour nou pou leve ranpli avek lenerzi. Malgre nenport keksoz ki’n fer nou sagren dan lepase, zot pa pou fer nou soufer ankor. Zeova i asir nou ki “dimoun pou oubliy letan pase. Zot souvenir pa pou zanmen retourn dan lespri.” Nou pou akeyir bann dimoun ki nou kontan ki’n mor e nou pou santi parey sa paran ki Zezi ti resisit zot fiy 12 an: “Zot pa ti oule krwar telman zot ti kontan.” (Mark 5:42) Finalman, tou dimoun lo later pou vin drwat e zot pou “rezoui dan Zeova” pour touzour.