1, 2. Akoz i saz pour ekout ou Kreater ler ou pe deside ki ou pou fer avek ou lavi? (Vwar bann portre o konmansman sa lartik.)

SI OU en zenn, i tre probab ki ou ganny en kantite konsey lo ou lavenir. I kapab ki bann ansenyan, konseye kot lekol ouswa lezot dimoun i dir ou ki ou bezwen fer letid avanse oubyen rod en karyer ki pou ed ou fer en kantite larzan. Me konsey ki Zeova i donnen i diferan. Byensir, i anvi ki ou travay dir lekol pour ou kapab ganny en travay e siport ou lekor. (Kolosyen 3:23) I osi konnen ki ler ou zenn, ou bezwen fer bann desizyon enportan ki pou annan en lefe lo ou lavenir. Alor, i donn bann prensip pour gid e ed ou viv dan en fason ki pou fer li plezir pandan sa bann dernyen zour.​—Matye 24:14.

² Rapel ki Zeova i konn tou keksoz. I konnen ki pou arive dan lavenir e i konn egzakteman ki lafen sa lemonn i pros. (Izai 46:10; Matye 24:3, 36) Zeova i osi konn ou.  I konnen kwa ki pou fer ou ere e kwa ki pou fer ou malere. Konsey imen i kapab paret bon, me si i pa baze lo Parol Bondye, i pa en konsey ki saz.​—Proverb 19:21, NWT.

3, 4. Ler Adan ek Ev ti ekout move konsey, ki mannyer sa ti afekte zot ek zot desandans?

³ Depi lontan in annan bann move konsey. Satan ki ti premye pour donn bann imen move konsey. I ti dir Ev ki zot de Adan zot ti pou pli ere si zot desid pour zot menm ki mannyer pour viv zot lavi. (Zenez 3:1-6) Me Satan ti egois! I ti anvi ki Adan ek Ev e osi tou zot desandans, i obei e ador li e non pa Zeova. Me Satan pa ti’n fer nanryen pour bann imen. Zeova ki ti’n donn zot tou sa ki zot ti annan. I ti donn zot en zoli zarden kot zot ti kapab reste, en lekor parfe ki ti kapab dire pour touzour e zot ti annan konpanni kanmarad.

⁴ Malerezman, Adan ek Ev ti dezobei Bondye. Ler zot ti fer sa, zot ti nepli kapab profit bann keksoz sorti kot sa Enn ki ti donn zot lavi. Sa ti anmenn maler pour zot. Parey bann fler ki’n ganny kase avek en plant, Adan ek Ev ti gradyelman vyeyi e mor. Zot zanfan osi ti soufer e sa i enkli nou. (Romen 5:12) Laplipar dimoun ozordi i inyor sa ki Bondye i dir e zot zis fer sa ki zot anvi. (Efezyen 2:1-3) Ki rezilta sa in anmennen? Labib i dir ki “napa okenn lasazes” ler dimoun i opoz Zeova.​—Proverb 21:30.

5. Ki konfyans Bondye ti annan dan bann imen e eski i ti annan rezon?

⁵ Zeova ti annan konfyans ki i ti pou annan dimoun ki anvi konn li e servi li e sa i enkli bann zenn. (Psonm 103:17, 18; 110:3) Sa bann zenn i vreman presye pour Zeova! Eski ou enn parmi zot? Si wi, definitivman ou annan “bann bon keksoz” sorti kot Bondye e sa i fer ou annan en lavi pli ere. (Lir Psonm 103:5; * Proverb 10:22) (Vwar not.) Nou pou diskit lo kat sa bann keksoz: Manze spirityel, bann bon zanmi, bann bon lobzektif ek vre laliberte.

6. Akoz ou devret rod gidans Bondye e ki Zeova i donnen pour ed ou?

⁶ Bann zannimo pa bezwen gidans Bondye, andotmo, zot pa santi ki zot bezwen konn zot Kreater. Me nou nou bezwen son gidans. (Matye 4:4) Ler nou ekout Bondye, nou ganny bon zizman, lasazes ek lakontantman. Zezi ti dir: “Ere bann ki rekonnet ki zot bezwen gidans Bondye.” (Matye 5:3) Bondye i donn nou Labib e i servi “lesklav fidel e pridan” pour donn nou bann piblikasyon ki ede batir nou lafwa. (Matye 24:45) Nou apel sa bann piblikasyon manze spirityel parski zot nouri nou lafwa e fer nou relasyon avek Zeova vin pli for. Nou annan en kantite varyete manze spirityel!​—Izai 65:13, 14.

7. Ki mannyer manze spirityel ki Bondye i donnen pou ed ou?

 ⁷ Manze spirityel i kapab donn ou lasazes ek abilite pour reflesi ki kapab protez ou dan plizyer fason. (Lir Proverb 2:10-14.) * (Vwar not.) Par egzanp, sa bann kalite i kapab ed ou rekonnet bann mansonz, tel parey sa mansonz ki dir napa en Kreater ouswa ki larzan ek keksoz materyel pou fer ou ere. Sa bann kalite pou osi ed ou evit bann dezir ouswa labitid ki pou fer ou ditor. Alor, fer tou sa ki ou kapab pour vin saz e pour reflesi byen. Si ou fer sa, ou pou vwar pour ou menm ki Zeova i kontan ou e i anvi sa ki pli bon pour ou.​—Psonm 34:8; Izai 48:17, 18.

8. Akoz ou devret vin pros avek Bondye depi la konmela e ki mannyer sa pou benefisye ou dan lavenir?

⁸ Byento, sak parti lemonn Satan pou ganny detrir. Zis Zeova ki pou kapab protez nou e donn nou bann keksoz ki nou bezwen, sa i kapab enkli nou prosen repa. (Abakouk 3:2, 12-19) Alor la i sa moman pour vin pros avek Bondye e ranforsi ou konfyans dan li. (2 Pyer 2:9) Si ou fer sa, malgre nenport kwa ki arive otour ou, ou pou santi parey David ki ti dir: “Mon toultan gard Zeova devan mwan. Parski i dan mon kote drwat, mon pa pou zanmen tranble.”​—Psonm 16:8, NWT.

9. (a) Dapre Zan 6:44, ki Zeova i fer? (b) Kwa ki spesyal ler ou rankontre lezot Temwen?

⁹ Premye fwa ki ou zwenn en dimoun ki pa dan laverite, ki ou vreman konnen lo li? Petet ou konn son non e ou’n deza vwar li, me i tre probab ki ou pa  konn plis ki sa. Par kont, i totalman diferan ler ou fek zwenn en dimoun ki dan laverite. Ou konnen ki i kontan Zeova. Ou konnen ki Zeova ti vwar en keksoz bon dan li e i ti envit li pour form parti son fanmir adorater. (Lir Zan 6:44.) Nenport ki landrwa i sorti ouswa nenport ki fason ki i’n ganny elve, ou deza konn en kantite lo li e i konn en kantite lo ou!

10, 11. Ki pep Zeova i annan an komen e ki lefe sa i annan lo ou?

¹⁰ Osito ki ou zwenn en lot Temwen, ou konnen ki deza zot annan bann keksoz ki pli enportan an komen. Ou konnen ki menm si zot koz diferan langaz, zot koz sa menm “langaz pir” ki laverite. (Zefanya 3:9, NWT) Sa i vedir ki zot tou lede zot krwar dan Bondye, zot viv dapre menm standar moral e zot annan menm lespwar pour lavenir. Sa bann keksoz i ed zot pour annan konfyans dan kanmarad e batir en lanmitye for ki pou dire pour touzour.

¹¹ Alor ler ou ador Zeova, ou annan rezon pour dir ki ou annan bann pli bon zanmi. Ou annan bann zanmi partou dan lemonn, menm si ou pa ni ankor zwenn zot. Napa personn ankor ki annan sa kado presye ki pep Zeova i rezoui!

12. Ki bann bon lobzektif ou kapab fikse?

¹² Lir Eklezyast 11:9–12:1. Eski ou annan okenn lobzektif ki ou pe esey atenn? Petet ou annan lobzektif pour lir Labib toulezour oubyen pour amelyor bann komanter ouswa prezantasyon ki ou fer dan renyon. Ouswa petet ou pe esey servi Labib pli byen dan predikasyon. Ki mannyer ou santi ler ou remarke ki ou pe amelyore ouswa ler lezot i dir ou ki ou pe amelyore? I tre probab ki ou santi ou vreman kontan e ou annan rezon pour santi koumsa! Akoz? Parski ou pe fer sa ki Zeova i anvi ou fer, zis parey Zezi ti fer.​—Psonm 40:8; Proverb 27:11.

13. Akoz i pli bon pour servi Bondye olye konsantre lo bann lobzektif ki sa lemonn i ofer?

¹³ Ler ou konsantre lo ou servis pour Zeova, ou pe fer en travay ki pou fer ou ere e donn ou en bi dan lavi. Pol ti donn sa konsey: “Reste ferm, solid, toultan annan bokou keksoz pour fer dan travay Senyer, rapel byen ki zot travay pour Senyer i pa anven.” (1 Korentyen 15:58) Me ler dimoun i konsantre lo bann lobzektif ki sa lemonn i ofer, tel parey fer larzan ouswa vin en dimoun renonmen, zot pa vreman ere. Menm si zot reisi, souvandfwa zot santi zot vid anndan. (Lik 9:25) Nou aprann sa atraver legzanp Lerwa Salomon.​—Romen 15:4.

14. Ki ou kapab aprann avek sa tes ki Salomon ti fer?

¹⁴ Dan tou bann dimoun ki’n deza viv, Salomon ti enn bann dimoun pli ris e enn bann dimoun ki ti annan plis pouvwar. I ti deside fer en tes, alor i ti dir dan li menm: “Mon pou teste ou avek bann plezir e fer ou konnen kisisa boner.” (Eklezyast 2:1-10) Alor Salomon ti konstri bann gran lakaz deliks, fer plan pour bann zoli zarden e i ti fer  nenport kwa ki i ti anvi. Eski i ti ere e satisfe? Ler Salomon ti get tou sa ki i ti’n fer, i ti dir: “Tousala i vanite.” I ti azoute: “I pa vreman anmenn okenn lavantaz.” (Eklezyast 2:11) Eski ou pou aprann en leson atraver sa tes ki Salomon ti fer?

15. Dapre Psonm 32:8, akoz ou bezwen lafwa e ki mannyer i pou ed ou?

¹⁵ Serten dimoun i aprann bann leson dan lavi zis ler zot fer fot e sibir bann move konsekans. Zeova pa anvi ki sa i arive avek ou. I anvi ki ou ekout li e obei li. Sa i demann lafwa, me ou pa pou zanmen regret bann swa ki ou’n fer gras a ou lafwa. Zeova pa pou zanmen oubliy “lanmour ki ou’n demontre pour son non.” (Ebre 6:10) Alor travay dir pour fer ou lafwa for. Koumsa, ou pou fer bann bon swa dan lavi e ou pou vwar pour ou menm ki ou Papa ki dan lesyel i anvi sa ki pli bon pour ou.​—Lir Psonm 32:8.

16. Akoz nou devret apresye laliberte e servi li dan en fason saz?

¹⁶ Pol ti ekri: “Kot lespri sen Zeova i ete, i annan laliberte.” (2 Korentyen 3:17) Zeova i kontan laliberte e i ti kree ou pour kontan laliberte ou osi. Me i anvi ki ou servi ou laliberte dan en fason saz ki pou protez ou. Petet serten ou kanmarad i get pornografi, komet imoralite seksyel, riske zot lavi par fer bann sport danzere ouswa abiz lalkol oubyen drog. Premye kou, sa bann keksoz i kapab paret gou ouswa eksitan, me zot souvandfwa anmenn bann move konsekans, parey maladi, adiksyon e menm lanmor. (Galat 6:7, 8) Bann zenn ki fer sa bann keksoz i kapab mazinen ki zot lib, me sa i pa leka.​—Tit 3:3.

17, 18. (a) Ki mannyer lobeisans anver Bondye i fer nou vreman lib? (b) Dan ki sans Adan ek Ev ti annan plis laliberte ki bann imen ozordi?

¹⁷ De lot kote, lobeisans anver Zeova i bon pour nou. I bon pour nou lasante e i fer nou vreman lib. (Psonm 19:7-11) Ler ou servi ou laliberte dan en fason saz, setadir, ler ou swazir pour obei bann lalwa ek prensip parfe Bondye, ou montre Bondye ek ou paran ki ou en dimoun responsab. I tre probab ki ou paran pou annan plis konfyans dan ou e donn ou plis laliberte. Deplis, Zeova i promet ki byento i pou donn tou son bann serviter fidel laliberte parfe, ki Labib i apel “laliberte bann zanfan Bondye.”​—Romen 8:21.

¹⁸ Sa i sa laliberte ki Adan ek Ev ti annan. Dan zarden Edenn, i ti annan zis en keksoz ki Bondye ti demann zot pour pa fer. Zot pa ti devret manz fri dan zis en pye dibwa an partikilye. (Zenez 2:9, 17) Eski ou krwar ki Bondye ti enzis oubyen tro strik ler i ti donn zot sa lalwa? Definitivman non! Zis mazin sa kantite lalwa ki zonm in fer e fors lezot pour obei. Me Zeova ti donn Adan ek Ev zis en lalwa.

19. Ki Zeova ek Zezi pe ansenny nou ki pou ed nou vin lib?

 ¹⁹ Zeova i vreman saz dan lafason i tret nou. Dan plas donn nou en kantite lalwa, avek pasyans i ansenny nou pour obei lalwa baze lo lanmour. I ansenny nou pour viv dapre son bann prensip e pour ay sa ki mal. (Romen 12:9) Dan Sermon lo Montanny, son Garson Zezi, ti ed nou konpran akoz dimoun i fer bann move keksoz. (Matye 5:27, 28) Dan nouvo lemonn, konman Lerwa dan Rwayonm Bondye, Zezi pou kontinyen ansenny nou pour annan menm pwennvi avek li lo sa ki byen ek sa ki mal. (Ebre 1:9) Zezi pou osi fer nou annan en lekor ek lespri parfe. Zis mazinen ki mannyer lavi pou ete ler nou pa pou ganny tante pour fer bann keksoz mal e ler nou pa pou soufer akoz lenperfeksyon. Alafendefen nou pou ganny “laglwar ek laliberte bann zanfan Bondye” ki Zeova i promet.

20. (a) Ki mannyer Zeova i servi son laliberte? (b) Ki mannyer ou kapab swiv son legzanp?

²⁰ Dan nouvo lemonn, nou laliberte pour ankor annan limit. Dan ki fason? Nou pou toultan bezwen ganny motive par nou lanmour pour Bondye e nou lanmour pour lezot. Ler nou aksyon i ganny gide par lanmour, nou pe swiv legzanp Zeova. Menm si Zeova i annan laliberte total, i swazir pour les lanmour gid li dan tou sa ki i fer, enkli dan lafason ki i tret nou. (1 Zan 4:7, 8) Alor i fer sans ki sel fason ki nou kapab vreman lib i ler nou swiv legzanp Bondye.

21. (a) Ki mannyer David ti santi anver Zeova? (b) Ki nou pou diskite dan sa lot lartik?

²¹ Eski ou rekonesan pour tou sa bann bon keksoz ki Zeova in donn ou? I’n donn ou manze spirityel, bann bon zanmi, bann bon lobzektif, lespwar pour ganny laliberte parfe a lavenir ek bokou lezot kado merveye. (Psonm 103:5, NWT) I tre probab ki ou santi parey David dan Psonm 16:11, ler i ti priye: “Ou fer mwan konn semen lavi. I annan labondans lazwa dan ou prezans. Pre avek ou, lakontantman pa zanmen fini.” Dan sa lot lartik, nou pou diskit lo lezot laverite presye ki dan Psonm 16. Sa bann laverite pou ed ou vwar ki mannyer ou kapab annan sa pli bon lavi posib!