1-2. Ki nou aprann avek leksperyans Angelito?

ESKI ou paran i Temwen Zeova? Si wi, ou bezwen rapel ki ou pa en zanmi Zeova zis akoz ou paran i zanmi Zeova. Ki swa nou paran i en serviter Bondye oubyen non, nou tou nou bezwen devlop nou prop lanmitye avek Zeova.

² Annou vwar leksperyans en frer ki apel Angelito. Son fanmir antye ti Temwen Zeova. Par kont, ler Angelito ti ankor zenn, i pa ti santi ki i ti vreman pros avek Bondye. I dir: “Mon ti pe servi Zeova zis akoz mon ti anvi fer sa ki mon fanmir pe fer.” Alor, Angelito ti deside pour pas plis letan pour lir e medit lo Parol Bondye. I ti osi konmans priy Zeova pli souvan. Ki ti arive? I dir: “Mon ti aprann ki sel fason pour mwan vin pros avek mon Papa, Zeova, mon bezwen aprann konn li mwan menm.” Leksperyans Angelito i fer nou demann bann kestyon enportan parey: Ki diferans i annan ant konn serten keksoz lo Zeova e vreman konn li byen? Ki nou kapab fer pour konn Zeova byen?

3. Ki diferans i annan ant konn serten keksoz lo Zeova e vreman konn li byen?

³ Nou kapab krwar ki nou konn Zeova zis akoz nou konn son non oubyen serten keksoz ki i’n dir ouswa fer. Me sa pa vedir ki nou konn Zeova byen. Pour konn Zeova  i enplik plis ki sa. Nou bezwen pran letan pour aprann lo Zeova ek son bann zoli kalite. I selman apre sa ki nou pou kapab konpran rezon akoz i dir e fer keksoz. Sa pou ed nou konnen si Zeova i kontan sa ki nou pe mazinen e fer. Enn fwa ki nou konnen ki Zeova i oule nou fer, nou bezwen fer li.

4. Ler nou egzamin bann legzanp dan Labib, ki mannyer sa i kapab ed nou?

⁴ Serten dimoun i kapab sikann nou akoz nou anvi vin en serviter Zeova e zot kapab opoz nou plis ankor ler zot vwar nou konmans asiste renyon. Si nou annan konfyans dan Zeova, i pa pou zanmen abandonn nou. Nou pou pe konmans en lanmitye avek Bondye ki pou dire tou dilon nou lavi. Me eski nou vreman kapab konn Zeova byen? Byensir! Legzanp bann zonm enparfe parey Moiz ek Lerwa David, i prouve ki sa i posib. Anmezir ki nou diskit lo sa ki sa bann zonm ti fer, nou pou reponn de kestyon: Ki mannyer zot ti aprann konn Zeova? Ki leson nou aprann avek zot legzanp?

5. Ki Moiz ti swazir pour fer?

⁵ Moiz ti swazir pour servi Bondye. Ler Moiz ti annan 40 an, i ti swazir pour zwenn ansanm avek bann Izraelit, ki ti pep Bondye, dan plas ganny konsidere konman “garson fiy Faraon.” (Ebr. 11:24) Moiz ti refize annan en pozisyon enportan Lezip. Ler i ti siport bann Izraelit, i ti konnen ki Faraon ti pou vreman ankoler. Faraon ti en lerwa vreman pwisan e bann Ezipsyen ti krwar ki i ti en bondye. Sa i montre ki Moiz ti annan en lafwa for. Moiz ti annan konfyans dan Zeova e sa ti en rezon enportan akoz Moiz ti annan en lanmitye pros avek Zeova ki ti dire tou dilon son lavi.​—Prov. 3:5.

6. Ki nou aprann avek legzanp Moiz?

⁶ Ki leson nou aprann? Parey Moiz, nou tou nou annan en desizyon pour fer. Eski nou pou swazir pour vin en serviter Bondye e zwenn ansanm avek son pep? Petet nou bezwen fer bann sakrifis pour vin en serviter Bondye e i kapab ki serten ki pa servi Zeova pou opoz nou. Me si nou annan konfyans dan nou Papa ki dan lesyel, nou kapab asire ki i pou siport nou!

7-8. Ki Moiz ti kontinyen aprann?

⁷ Moiz ti kontinyen aprann lo bann kalite Zeova e i ti fer Son lavolonte. Par egzanp, ler Zeova ti demann Moiz pour ed bann Izraelit sorti dan lesklavaz Lezip, i ti napa konfyans dan son lekor e plizyer fwa i ti dir Zeova ki i pa santi i kapab fer sa. Sa ki Bondye ti dir Moiz ti montre ki I annan konpasyon, setadir ki i ti konpran santiman Moiz e i ti ed Moiz. (Egz. 4:10-16) Sa ti fer ki Moiz ti kapab anons bann mesaz zizman avek Faraon. Apre, Moiz ti vwar Zeova servi Son pwisans pour sov bann Izraelit e detri Faraon ansanm avek son larme dan Lanmer Rouz.​—Egz. 14:26-31; Ps. 136:15.

⁸ Apre ki Moiz ti’n ed bann Izraelit sorti Lezip, bann Izraelit ti konplent tou lazournen. Kantmenm sa, Moiz ti vwar ki kantite pasyans Zeova ti demontre anver bann dimoun ki I ti’n libere dan lesklavaz. (Ps. 78:40-43) Moiz ti osi vwar ki mannyer Zeova ti demontre limilite ler Zeova pa ti detri bann Izraelit apre ki Moiz ti’n demann li pour pa detri zot.​—Egz. 32:9-14.

9. Dapre Ebre 11:27, ki mannyer lanmitye Moiz ti ete avek Zeova?

 ⁹ Apre ki bann Izraelit ti’n kit Lezip, lanmitye Moiz avek Zeova ti vin sitan for, i konmsi i ti kapab vwar son Papa dan lesyel. (Lir Ebre 11:27.) Labib i montre ki kantite zot lanmitye ti for, ler i dir: “[Zeova] ti abitye koz avek Moiz fas a fas parey en zonm i koz avek son zanmi.”​—Egz. 33:11.

10. Ki nou bezwen fer pour nou konn Zeova byen?

¹⁰ Ki leson nou aprann? Pour nou konn Zeova byen, nou pa devret zis aprann lo son bann kalite me nou devret osi fer son lavolonte. Ozordi, Zeova i anvi ki “tou sort kalite dimoun i ganny sove e ganny konnesans egzakt lo laverite.” (1 Tim. 2:3, 4) En fason ki nou fer lavolonte Zeova i ler nou ansenny lezot lo Zeova.

11. Anmezir ki nou ansenny lezot lo Zeova, ki mannyer nou aprann konn li pli byen?

¹¹ Souvandfwa, i ler nou pe ansenny dimoun lo Zeova ki nou menm nou aprann konn li pli byen. Par egzanp, nou vwar konpasyon Zeova ler i ed nou pour trouv bann dimoun ki annan sa bon kondisyon leker. (Zan 6:44; Akt 13:48) Nou vwar ki Parol Bondye i pwisan parski i ed nou bann etidyan Labib aret zot bann move labitid e devlop sa nouvo personnalite. (Kol. 3:9, 10) Nou vwar ki Zeova i annan pasyans akoz i donn bann dimoun dan nou teritwar plizyer loportinite pour aprann konn li pour zot kapab ganny sove.​—Rom. 10:13-15.

12. Dapre Egzod 33:13, ki Moiz ti demann Zeova e akoz?

¹² Moiz ti apresye son lanmitye avek Zeova. Zeova ti’n servi Moiz pour fer en kantite mirak e alor Moiz ti konn Zeova byen. Me kantmenm sa, i ti demann Zeova pour ed li konn Li pli byen. (Lir Egzod 33:13.) Moiz ti annan plis ki 80 an ler i ti demann Zeova pour ed li konn Li pli byen, me i ti konnen ki i ti ankor annan en kantite pour aprann lo son Papa ki dan lesyel.

13. Ki en fason nou kapab montre ki nou apresye nou lanmitye avek Bondye?

¹³ Ki leson nou aprann? Nenport kantite letan ki nou en serviter Zeova, nou devret toultan apresye lanmitye ki nou annan avek Zeova. En fason ki nou montre ki nou apresye nou lanmitye avek Bondye, i ler nou koz avek li dan lapriyer.

14. Akoz lapriyer i vreman enportan pour nou aprann plis lo Bondye?

¹⁴ Si ou anvi annan en bon lanmitye avek en dimoun, ou bezwen koz avek li souvan. Alor, pour nou kapab vin pros avek Zeova, nou bezwen koz avek li dan lapriyer souvan e nou pa devret per pour dir li tou sa ki nou pe mazinen e santi. (Efe. 6:18) Krista, en ser ki reste Latirki, i dir: “Mon lanmour pour Zeova ek mon konfyans dan li i ogmante sak fwa ki mon eksprim mon bann panse dan lapriyer e mon vwar ki mannyer i ed mwan. Ler mon vwar lafason ki Zeova in reponn mon lapriyer, sa in ed mwan vwar Zeova konman en Papa ek Zanmi.”

15. Ki Zeova ti dir lo Lerwa David?

¹⁵ Ler Lerwa David ti ne, son fanmir ek tou dimoun otour li ti pe servi Zeova. Menm si fanmir David ti servi Zeova, sa pa ti rezon akoz David ti servi Zeova. I ti batir son prop lanmitye avek Zeova e Zeova ti kontan li en kantite. Zeova  ti dir ki David ti “en zonm ki fer [Li] plezir.” (Akt 13:22) Ki mannyer David ti vin sitan pros avek Zeova?

16. Ki David ti aprann lo Zeova ler i ti obzerv kreasyon?

¹⁶ David ti aprann konn Zeova atraver kreasyon. Ler David ti ankor zenn, i ti pas bokou letan deor pour li pran swen avek mouton son papa. I kapab ki pandan sa bann moman, i ti konmans reflesir lo bann keksoz ki Zeova ti’n kree. Par egzanp, ler David ti get dan lesyel aswar, i ti vwar plizyer milye zetwal. Me i pa ti vwar zis sa bann zetwal. David ti kapab vwar bann kalite sa Enn ki ti’n kree tou sa bann zetwal. David ti ekri: “Lesyel i rakont laglwar Bondye; tou bann zetwal i proklanm travay son lanmen.” (Ps. 19:1, 2, NWT) Ler David ti reflesir lo sa fason merveye ki bann imen in ganny kree, i ti vwar ki mannyer Zeova i vreman saz. (Ps. 139:14) Ler David ti reflesir lo bann keksoz ki Zeova ti’n fer, i ti realize ki i vreman pti konpare avek Zeova.​—Ps. 139:6, NWT.

17. Ki nou kapab aprann si nou medit lo kreasyon?

¹⁷ Ki leson nou aprann? Esey aprann plis lo kreasyon. Pran letan pour obzerv bann zoli keksoz ki Zeova in kree parski ou pou vreman enpresyonnen! Toulezour, reflesir lo ki ou kapab aprann lo Zeova atraver bann keksoz ki i’n kree, tel parey bann plant, zannimo ek dimoun. Si ou fer sa, toulezour ou pou aprann plis keksoz lo ou Papa ki kontan ou. (Rom. 1:20) Ou lanmour pour li pou vin pli for toulezour.

18. Dapre Psonm 18, ki David ti rekonnet?

¹⁸ David ti rekonnet ki Zeova ti pe ed li. Par egzanp, ler David ti protez troupo son papa kont en lyon ek en lours, i ti rekonnet ki Zeova ki ti’n ed li touy sa bann zannimo sovaz. David ti osi rekonnet ki Zeova ki ti gid li ler i ti ranport laviktwar lo Golyat, en gerye ki ti en zean. (1 Sam. 17:37) Ler David ti pe sove akoz Lerwa Sail ti zalou li, i ti rekonnet ki Zeova ki ti’n sov li. (Ps. 18, lentrodiksyon) Si David ti en zonm orgeye, petet i ti pou’n krwar ki i’n fer sa bann keksoz li tousel. Me David ti annan limilite, alor i ti rekonnet ki Zeova ki ti’n ed li.​—Ps. 138:6, NWT.

19. Ki nou aprann avek legzanp David?

¹⁹ Ki leson nou aprann? Nou bezwen fer plis ki demann Zeova son led. Nou osi bezwen esey rekonnet kan e konman i donn nou son led. Si nou annan limilite, nou pou konpran ki nou pa kapab fer tou keksoz lo nou menm e ki Zeova i ed nou fer sa ki nou pa kapab. Sak fwa nou vwar lafason ki Zeova i ed nou, nou lanmitye avek li pou vin pli for. Isaac, en frer ki reste Fiji e ki’n servi Zeova pour plizyer lannen, in osi eksperyans sa. I dir: “Ler mon mazin tou sa ki’n pase dan mon lavi, mon vwar ki mannyer Zeova in ed mwan depi ler mon’n konmans etidye Labib ziska ozordi. Sa i fer ki Zeova i vreman reel pour mwan.”

20. Ki nou aprann avek lanmitye ki David ti annan avek Bondye?

²⁰ David ti imit bann kalite Zeova. Zeova in kree nou avek sa abilite pour imit son bann kalite. (Zen. 1:26) Pli nou aprann lo bann kalite ki Zeova i annan, pli nou pou kapab imit li. David ti’n aprann konn son Papa ki dan lesyel byen, alor i ti kapab swiv legzanp Zeova dan lafason ki i ti tret lezot. Annou vwar  en legzanp. David ti fer pese kont Zeova, ler i ti fer adilter avek Bat-Seba e fer son msye ganny touye. (2 Sam. 11:1-4, 15) Me Zeova ti swazir pour demontre konpasyon anver David, en zonm ki ti’n demontre konpasyon anver lezot. Vi ki David ti annan en bon lanmitye avek Zeova, bann Izraelit ti kontan li en kantite e Zeova ti servi David konman en legzanp pour lezot lerwa Izrael swiv.​—1 Rwa. 15:11; 2 Rwa. 14:1-3.

21. Dapre Efezyen 4:24 ek 5:1, ki pou arive ler nou ‘swiv legzanp Bondye’?

²¹ Ki leson nou aprann? Nou bezwen ‘swiv legzanp Bondye.’ Ler nou swiv legzanp Bondye, nou pou ganny bann byenfe e nou pou aprann konn li pli byen. Ler nou imit bann kalite ki Bondye i annan, nou osi montre ki nou son bann zanfan.​—Lir Efezyen 4:24; 5:1.

22-23. Ki pou arive si nou aplik sa ki nou aprann lo Zeova?

²² Parey nou’n vwar dan sa lartik, nou kapab aprann plis lo Zeova atraver kreasyon ek son Parol, Labib. Dan Labib, i annan legzanp bann serviter fidel Bondye ki nou kapab swiv, tel parey Moiz ek David. Zeova in fer son par. Nou bezwen fer nou par e aprann tou sa ki nou kapab lo li.

²³ Nou pa pou zanmen aret aprann lo Zeova. (Ekle. 3:11) Sa ki enportan i pa ki kantite ou konnen lo Zeova, me ki ou fer avek sa ki ou konnen lo li. Si nou aplik sa ki nou aprann e esey swiv legzanp nou Papa ki kontan nou, I pou kontinyen vin pros avek nou. (Zak 4:8) Dan Labib, Zeova i reasir nou ki i pa pou zanmen abandonn bann ki esey aprann konn li byen.