Sa resi dan Deterononm 22:25-27 pa ti ganny servi pour prouve ki sa zonm i koupab, akoz lalwa ti’n fini trouv li koupab. Sa lalwa ti ganny servi pour montre ki sa madanm i inosan. Annou vwar konteks sa bann verse.

Dan bann verse avan, i koz lo ler en zonm ti dormi avek en zenn fiy ki’n fiyanse “dan lavil.” Vi ki sa zenn fiy ti’n fiyanse, i ti ganny konsidere konman en madanm marye, alor si sa zonm ti dormi avek li, sa zonm ti ganny trouve koupab pour komet adilter. Me ki ti arive avek sa madanm? “I pa ti apel osekour dan lavil.” Si i ti’n apel osekour, sirman i ti pou annan dimoun ki ti pou’n tann li pe kriye e zot ti pou’n vin ed li. Me i pa ti kriye. Alor li osi i ti komet adilter e tou le de ti ganny trouve koupab.​—Det. 22:23, 24.

Me Lalwa i fer resorti en lot sityasyon. Labib i dir: “Me si sa zonm i rankontre dan lakanpanny, en zenn fiy ki’n fiyanse e ki sa zonm i vyol li, alor, zis sa zonm ki’n dormi avek li, ki ava ganny met a mor. Ou pa pou fer nanryen sa zenn fiy, akoz i pa’n komet okenn lofans ki merit lanmor. Annefe, sa ka i parey ka en zonm ki atak son prosen ki i touye. Akoz in rankontre li dan lakanpanny, sa zenn fiyanse in kekfwa kriy osekour, me ti napa personn pour vin sov li.”​—Det. 22:25-27.

Dan sa ka, bann ziz ti krwar sa ki sa madanm ti’n dir. Akoz? Zot ti krwar ki sa madanm ti “kriy osekour, me ti napa personn pour vin sov li.” Alor i pa ti pe komet adilter. Par kont, sa zonm ti koupab pour vyol e pour adilter akoz i ti fors sa madanm ki’n fiyanse pour dormi avek li.

Menm si sa lalwa ti ganny servi pour prouve ki sa madanm ti inosan, an menm tan i ti montre ki sa zonm ti koupab pour vyol ek adilter. Nou kapab asire ki bann ziz ti “fer en lanket aprofondi,” e donn en zizman dapre standar ki Bondye ti repet avek zot plizyer fwa.​—Det. 13:14; 17:4; Egz. 20:14.