1. Ki responsabilite Zeova in donn bann paran?

ZEOVA ti kree sa premye koup avek sa dezir pour fer zanfan. Labib i dir: “Bann zanfan i en leritaz sorti kot Zeova.” (Ps. 127:3, not NWT) Ki sa i vedir? Meton enn ou zanmi i demann ou pour anmas en gro sonm larzan pour li. Ki mannyer ou pou santi? Sirman, i ti pou en loner pour ou konnen ki ou zanmi i annan konfyans dan ou. Me petet ou ti pou trakase lo ki mannyer ou pou gard sa larzan dan en landrwa sekirite. Zeova, nou Zanmi pli pros, i donn bann paran en keksoz ki annan bokou plis valer ki larzan pour pran swen avek. Zeova in donn zot sa responsabilite pour fer sir ki zot pran swen avek zot zanfan e ki sa bann zanfan i ere.

2. Ki kestyon nou pou reponn?

² Lekel ki devret deside si en koup marye pou annan zanfan e konbyen zanfan zot pou annan? Ki bann paran i kapab fer pour ed zot zanfan annan en lavi ere? Annou vwar serten prensip Labib ki kapab ed bann koup Kretyen fer bann bon desizyon.

3. (a) Lekel ki devret deside si en koup pou annan zanfan? (b) Ki prensip Labib bann zanmi ek fanmir sa koup i devret gard antet?

³ Dan serten kiltir, bokou dimoun i ekspekte bann koup ki fek marye i fer zanfan pli vit posib. Zot fanmir ek lezot i kapab met presyon lo zot pour swiv sa koutim. Jethro, en frer sorti Lazi i dir: “Serten paran dan kongregasyon i  met presyon lo bann koup ki napa zanfan pour zot fer zanfan.” Jeffrey, en lot frer sorti Lazi i dir: “I annan serten ki dir bann koup ki napa zanfan, ki zot pou napa personn pour pran swen avek zot ler zot pou’n vye.” Par kont, sak koup i devret deside pour zot menm si zot pou fer zanfan oubyen non. Sa i zot desizyon e zot responsabilite. (Gal. 6:5) Byensir, bann zanmi ek fanmir i anvi ki sa koup i ere, me zot bezwen mazinen ki sa koup i devret fer zot prop desizyon.​—1 Tesa. 4:11.

4-5. Ki de kestyon bann koup i bezwen diskite e ki sa pli bon moman pour fer sa? Eksplike.

⁴ I annan de kestyon enportan ki en koup i bezwen diskite ler zot pe deside pour annan zanfan. Premyerman, kan ki zot anvi fer zanfan? Dezyenmman, konbyen zanfan zot anvi? Ki sa pli bon moman pour en koup koz lo sa bann kestyon? Akoz sa de kestyon i sitan enportan?

⁵ Laplipar ditan, en koup i devret diskit lo sa de kestyon avan ki zot marye. Akoz? Parski i vreman enportan ki zot tou le de zot annan menm pwennvi lo sa size. Zot osi bezwen vwar si zot in pare pour en tel responsabilite. Serten koup in deside pour esper enn oubyen de-z-an apre zot maryaz pour fer zanfan akoz enn fwa ki zot annan zanfan, zot pou bezwen pas en kantite letan pour pran swen avek sa zanfan. Zot mazinen ki si zot espere avan fer zanfan, sa pou donn zot letan pour adapte avek lavi maryaz e pour vin pli pros avek kanmarad.​—Efe. 5:33.

6. Ki serten koup in deside fer vi ki nou pe viv dan bann letan difisil?

⁶ Lezot Kretyen in swazir pour fer parey sa trwa garson Noe ek zot madanm. Sa trwa koup pa ti fer zanfan deswit. (Zen. 6:18; 9:18, 19; 10:1; 2 Pyer 2:5) Zezi ti konpar nou letan avek “letan Noe” e i napa okenn dout ki nou pe viv dan “en letan vreman difisil.” (Mat. 24:37; 2 Tim. 3:1) I pour sa rezon ki serten koup i deside ki zot pa pou fer zanfan konmela pour zot kapab fer plis dan servis Zeova.

7. Ki mannyer sa bann prensip dan Lik 14:28, 29 ek Proverb 21:5 i kapab ed en koup?

⁷ Bann koup ki saz i ‘kalkile konbyen i pou koute’ ler zot pe deside si zot pou  fer zanfan e konbyen zanfan zot pou fer. (Lir Lik 14:28, 29.) Bann koup ki deza annan zanfan i konnen ki i kout larzan pour fer grandi zanfan. I osi demann letan ek lenerzi. Alor, i enportan pour en koup demann zot lekor bann kestyon parey: ‘Eski nou tou le de nou bezwen travay pour kapab aste bann keksoz ki nou fanmir i bezwen? Eski nou dakor lo kwa ki vreman neseser pour nou fanmir? Si nou tou le de nou bezwen travay, lekel ki pou vey nou zanfan? Lekel ki pou enfliyans fason panse ek aksyon nou zanfan?’ Ler en koup i diskit lo sa bann kestyon, zot aplik sa ki’n ganny ekrir dan Proverb 21:5, NWT.​—Lir. *

8. Ki bann difikilte en koup i bezwen ekspekte e ki en msye pou fer?

⁸ En zanfan i bezwen e i merite ki tou le de son paran i donn li zot letan ek lenerzi. Alor, si en koup i annan detrwa zanfan ki apepre menm laz avek kanmarad i kapab difisil pour donn sak zanfan sa latansyon ki zot bezwen. Serten koup ki annan plizyer zanfan i dir ki zot santi zot anba bokou presyon. I kapab ki en manman i santi ki i toultan fatige. Sa manman i kapab sitan fatige ki i napa ase lenerzi pour etidye, priye e al predikasyon regilyerman. I kapab osi difisil pour li konsantre e benefisye pandan renyon. Byensir, en msye ki kontan son madanm pou fer sa ki i kapab pour siport son madanm ler zot zanfan i bezwen latansyon, ki swa dan renyon oubyen kot lakour. Par egzanp, i kapab ed son madanm avek bann louvraz kot lakour. I pou fer son mye pour fer sir ki fanmir antye i kapab benefisye avek Ladorasyon Fanmir. Sa papa pou osi regilyerman akonpanny son fanmir dan predikasyon.

9-10. Ki bann paran i bezwen fer pour ed zot zanfan?

⁹ Ki serten keksoz bann paran i kapab fer pour ed zot zanfan aprann kontan Zeova? Ki mannyer zot kapab protez zot zanfan kont bann danze ki i annan dan sa move lemonn? Annou vwar serten keksoz ki bann paran i kapab fer.

¹⁰ Priy Zeova pour ganny led. Annou vwar legzanp Manoa ek son madanm ki ti paran Sanmson. Ler Manoa ti konnen ki son madanm ti pou ganny en garson, i ti demann Zeova pour gid li pour fer grandi son zanfan.

11. Ki mannyer bann paran i kapab imit legzanp Manoa dan Ziz 13:8?

 ¹¹ Nihad ek Alma, en koup sorti dan en pei ki apel Bosni ek Erzegovin, ti aprann avek legzanp Manoa. Zot dir: “Zis parey Manoa, nou ti sipliy Zeova pour ansenny nou ki mannyer pour vin bann bon paran. Zeova ti reponn nou lapriyer dan diferan fason e sa ti atraver Labib, bann piblikasyon baze lo Labib, dan renyon ek lasanble.”​—Lir Ziz 13:8.

12. Ki legzanp Zozef ek Mari ti kite pour zot zanfan?

¹² Ansenny par ou legzanp. Sa ki ou dir i enportan, par kont sa ki ou fer pou annan en pli gran lefe lo ou zanfan. Nou kapab asire ki Zozef ek Mari ti en bon legzanp pour zot zanfan, enkli Zezi. Zozef ti travay dir pour siport son fanmir. I ti osi ankouraz zot pour apresye bann keksoz spirityel. (Det. 4:9, 10) Zozef ti anmenn son fanmir Zerizalenm “tou le-z-an,” pour selebre Lapak, menm si Lalwa pa ti obliz li pour fer sa. (Lik 2:41, 42) Petet lezot papa ti panse ki i tro difisil, i pran tro bokou letan e kout tro bokou larzan pour anmenn zot fanmir antye Zerizalenm. Me Zozef ti apresye bann keksoz spirityel e i ti ansenny son zanfan pour fer parey. Deplis, Mari ti konn byen Lekritir. Par son parol ek aksyon, i ti ansenny son zanfan pour kontan Parol Bondye.

13. Ki mannyer en koup ti swiv legzanp Zozef ek Mari?

¹³ Nihad ek Alma, ki’n ganny mansyonnen pli boner, ti anvi swiv legzanp Zozef ek Mari. Ki mannyer sa ti ed zot elve zot garson pour li kapab kontan e servi Zeova? Zot dir: “Nou’n esey montre nou garson ki mannyer i bon pour viv dapre prensip Zeova par lafason ki nou viv nou lavi.” Nihad i dir: “Vin sa kalite dimoun ki ou anvi ou zanfan i vini.”

14. Akoz paran i devret konnen lekel zanmi zot zanfan?

¹⁴ Ed ou zanfan swazir bann bon zanmi. Tou le de paran i bezwen konnen lekel zanmi zot zanfan e ki zot pe fer. Sa i vedir ki bann paran i bezwen osi konnen avek lekel ki zot zanfan pe kominike lo rezo sosyal e lo mobayl. Sa bann zanmi i kapab annan en lenfliyans lo fason panse ek aksyon zot zanfan.​—1 Kor. 15:33.

15. Ki paran i kapab aprann avek legzanp Jessie?

¹⁵ Ki paran i kapab fer si zot pa konn bokou keksoz lo konpiter oubyen mobayl? Jessie, en papa ki reste Filipin, i dir: “Nou pa ti konn bokou lo teknolozi. Me sa pa ti anpes nou ansenny nou zanfan lo bann danze ki i annan ler ou servi bann lekipman elektronik.” Jessie pa ti anpes son bann zanfan servi sa bann lekipman elektronik zis akoz li i pa ti konn servi. I dir: “Mon ti ankouraz mon bann zanfan pour servi zot lekipman elektronik pour aprann en nouvo langaz, prepar renyon e lir Labib toulezour.” Si ou en paran, eski ou’n lir e diskit avek ou zanfan lo bann konsey ki dan seksyon “Zenn” lo jw.org^® konsernan anvoy mesaz e partaz portre lo Enternet? Eski zot in get e koz lo bann video ki annan pour tit, Eski ou annan en kontrol lo ou lekipman elektronik? e Servi byen rezo sosyal? * Sa bann video i kapab ede ler ou pe ansenny ou zanfan lo sa bon fason pour servi zot lekipman elektronik.​—Prov. 13:20.

16. Ki bokou paran in fer e ki mannyer sa in ed zot zanfan?

 ¹⁶ Bokou paran i fer zefor pour ki zot zanfan i pas letan avek bann serviter Zeova ki en bon legzanp. Par egzanp, en koup sorti KotdIvwar, ki apel N’Déni ek Bomine ti souvan envit sirveyan rezyonal pour reste kot zot. N’Déni i dir: “Sa ti annan en bon lefe lo nou premye garson. I ti konmans fer pionye e aprezan i servi konman en ranplasan pour sirveyan rezyonal.” Eski ou kapab fer bann laranzman parey pour ou zanfan?

17-18. Kan ki paran i devret konmans ansenny zot zanfan?

¹⁷ Konmans ansenny ou zanfan pli boner posib. Pli boner bann paran i ansenny zot zanfan, i pli bon pour zot. (Prov. 22:6) Annou vwar legzanp Timote, ki ler i ti’n gran i ti vwayaz avek zapot Pol. Enis, manman Timote ek son gran manman Lois ti ansenny li “depi ptipti.”​—2 Tim. 1:5; 3:15.

¹⁸ En lot koup sorti KotdIvwar ki apel Jean-Claude ek Peace ti kapab ed zot sis zanfan grandi pour kontan e servi Zeova. Kwa ki’n ed zot fer sa? Zot ti swiv legzanp Enis ek Lois. Zot dir: “Nou ti ansenny nou zanfan Parol Bondye depi ptipti pa bokou letan apre ki zot ti’n ne.”​—Det. 6:6, 7.

19. Ki savedir ansenny ou zanfan Parol Bondye?

¹⁹ Ki savedir “ansenny” ou zanfan Parol Bondye? Sa mo Ebre ki’n ganny tradwir “ansenny” dan Deterononm 6:7 i vedir pour “ansenny e fer konnen par repetisyon.” Pour bann paran kapab fer sa, zot bezwen pas bokou letan avek zot zanfan. Parfwa paran i kapab dekouraze akoz zot bezwen repet bann lenstriksyon avek zot zanfan. Me paran i kapab esey vwar sa konman en loportinite pour ed zot zanfan konpran e aplik Parol Bondye.

20. Eksplike ki mannyer Psonm 127:4 i kapab aplik pour elve zanfan.

²⁰ Konn ou zanfan byen. Psonm 127 i konpar bann zanfan avek bann dart. (Lir Psonm 127:4, NWT.) * Zis parey  bann dart i kapab ganny fer avek diferan materyo e dan diferan groser, sak zanfan i diferan. Alor, paran i bezwen deside ki mannyer pour ansenny sak zanfan. En koup ki reste Izrael, ki annan de zanfan ki pe servi Zeova i dir kwa ki ti ed zot: “Nou ti fer en letid Labib avek sak zanfan endividyelman.” Byensir, sak sef fanmir i bezwen deside si i posib oubyen neseser pour etidye avek zot zanfan koumsa.

21. Ki led bann paran i kapab gannyen avek Zeova?

²¹ Parfwa, paran i kapab santi ki i tro difisil pour ansenny zot zanfan me zanfan i en kado sorti kot Zeova. I toultan pare pour ed bann paran. I pare pour ekout zot lapriyer. I reponn zot lapriyer atraver Labib, nou bann piblikasyon e atraver legzanp ek konsey bann paran matir dan kongregasyon.

22. Ki bann pli bon keksoz ki bann paran i kapab donn zot zanfan?

²² Serten dimoun i dir ki i pran 20 an pour elve en zanfan me en paran pou toultan en paran. Bann pli bon keksoz ki zot kapab donn zot zanfan, i enkli zot lanmour, letan ek lansennyman ki sorti dan Labib. Sak zanfan pou reazir dan son prop fason anver sa lansennyman. Par kont, bokou zanfan ki’n ganny elve par bann paran ki kontan Zeova, zot santi parey Joanna Mae, en ser ki sorti Lazi. Joanna Mae i dir: “Ler mon mazin lafason ki mon paran in ansenny mwan, mon vreman rekonesan ki zot ti disiplin mwan e ansenny mwan pour kontan Zeova. Zot pa’n zis donn mwan lavi me zot in fer li posib pour mwan viv en lavi ki vreman fer sans.” (Prov. 23:24, 25) Plizyer milyon frer ek ser i santi menm parey.