ESKI ou pou konsider ou lekor konman en dimoun ki rekonesan oubyen ki demontre lapresyasyon? Sa i en kestyon ki nou tou nou bezwen reflesir lo la. Labib ti predir ki dan nou letan bokou dimoun “pa pou rekonesan.” (2 Tim. 3:2) I tre probab ki ou’n deza zwenn en dimoun ki ekspekte lezot fer keksoz pour zot oubyen donn zot keksoz. Petet zot pa santi ki zot bezwen demontre rekonesans pour sa ki zot in gannyen. Eski ou vwar li gou pour pas letan avek en dimoun koumsa?

De lot kote, bann serviter Zeova i ganny ankouraze pour “toultan montre zot rekonesans.” Nou bezwen “remersye Bondye pour tou keksoz.” (Kol. 3:15; 1 Tesa. 5:18) Anfet, i bon pour nou ler nou devlop en leta lespri rekonesan. I annan plizyer rezon akoz sa i leka.

En rezon enportan pour devlop en leta lespri rekonesan i akoz sa i kapab ed nou pour santi nou ere. Kan en dimoun i remersye en lot pour en keksoz, tou le de i santi zot zwaye. Akoz nou santi koumsa? Par egzanp, si lezot i pare pour pran letan pour fer en keksoz pour ou sa i akoz zot santi ki ou merite. Zot kontan ou. Ler ou realize ki zot kontan ou, sa pou fer ou ere. Sa ti leka pour Rit. Boaz ti demontre zenerozite anver Rit. Ler Rit ti vwar ki Boaz ti annan son lentere aker, i ti santi li ere.​—Rit 2:10-13.

I vreman enportan pour nou demontre nou rekonesans anver Bondye. San dout, parfwa ou mazin lo tou sa bann bon keksoz ki Zeova in donn ou e ki i pe kontinyen donn ou. (Det. 8:17, 18; Akt 14:17) Me dan plas pran sa bann byenfe alalezer, akoz ou pa pran letan pour reflesir o profon lo tou sa bann bon benediksyon ki Bondye in donn ou ek ou fanmir. Ler ou medit lo zenerozite ki ou Kreater in demontre anver ou, sa pou ed ou apresye Bondye plis e ou pou osi konpran ki kantite i kontan e apresye ou.​—1 Zan 4:9.

Nou devret fer plis ki zis reflesir lo bann benediksyon ki nou’n gannyen, nou devret osi remersye Zeova pour son labonte. (Ps. 100:4, 5) En resers in montre ki ler en dimoun i eksprim son rekonesans sa i fer li pli ere.

En lot rezon akoz i bon pour demontre rekonesans i akoz sa i ranforsi nou lanmitye avek lezot. Nou tou nou anvi ki lezot i apresye sa ki nou fer. Ou pou vin pli pros avek en zanmi ler ou montre ki ou senserman rekonesan pour sa ki in fer pour ou. (Rom. 16:3, 4) An plis, dimoun ki abitye demontre zot rekonesans i touzour pare pour ed lezot. Zot rekonnet ler lezot i demontre labonte anver zot e zot azir parey an retour. Byensir, nou zwaye ler nou ed lezot. Zis parey Zezi ti dir: “I annan plis lazwa pour donnen ki pour resevwar.”​—Akt 20:35.

Robert Emmons, ki en direkter pour en proze lo rekonesans kot Liniversite Kaliforni, ti dir: “Pour nou kapab demontre nou rekonesans, nou bezwen konpran ki nou depan lo kanmarad. Parfwa nou donnen e parfwa nou resevwar.” An realite, pour nou kapab kontinyen viv e pour nou ere, nou depan lo lezot dan diferan fason. Par egzanp, zot fer ki nou kapab ganny manze oubyen zot donn nou lasistans medikal. (1 Kor. 12:21) En dimoun ki rekonesan i apresye sa  ki lezot i fer pour li. Me eski ou fer li en labitid pour demontre ou rekonesans pour sa ki lezot i fer pour ou?

En lot rezon pour demontre rekonesans i akoz sa i ed ou pour konsantre lo bann keksoz pozitif dan plas konsantre lo keksoz negatif. Alor ler ou tant pour konsantre plis lo bann keksoz pozitif, ou pa pou tro konsantre lo ou bann problenm. Pli ou rekonesan, pli ou pou apresye bann bon keksoz otour ou e sa pou fer ou anvi demontre ou rekonesans plis ankor. Si ou konsantre lo bann keksoz ki fer ou anvi demontre rekonesans, sa pou ed ou pour “toultan annan lazwa akoz Senyer,” zis parey zapot Pol ti ankouraz nou pour fer.​—Fili. 4:4.

Ler ou rekonesan sa i ed ou pour pa annan en pwennvi negatif. I pou osi vreman difisil pour ou zalou, ankoler oubyen sagren e an menm tan rekonesan. Osi, en dimoun ki rekonesan pa pou tro konsantre lo keksoz materyel. Zot kontant zot avek sa ki zot annan e zot pa esey ganny plis.​—Fili. 4:12.

Konman en Kretyen ki pe viv dan bann dernyen zour, ou realize ki Satan i anvi ki ou santi ou malere e dekouraze akoz sa bann difikilte ki ou pe pas ladan. I pou kontan pour vwar ou devlop en move latitid e toultan pe konplent. Si ou sa kalite dimoun, i pou pli difisil pour dimoun ekout ou ler ou anons sa bon nouvel. Anfet, rekonesans i mars ansanm avek fri lespri sen. Par egzanp, nou ganny lazwa ler nou vwar bann bon keksoz ki Zeova in donn nou e nou annan lafwa dan sa ki in promet pour lavenir.​—Gal. 5:22, 23.

Konman en serviter Zeova, i tre probab ki ou dakor avek sa ki’n ganny dir dan sa lartik konsernan rekonesans. Kantmenm sa, ou realize ki i pa toultan fasil pour demontre rekonesans e pour annan en pwennvi pozitif. Me pa les sa dekouraz ou. Ou kapab kontinyen demontre rekonesans. Ki mannyer ou kapab fer sa? Pran letan sak zour pour reflesir lo bann keksoz dan ou lavi ki ou apresye. Pli ou fer sa, i pou vin pli fasil pour ou demontre rekonesans. Sa pou fer ou pli zwaye ki bann dimoun ki konsantre lo bann problenm. Reflesir lo bann keksoz ki Zeova ek lezot in fer, ki ankouraz ou e fer ou kontan. Petet ou kapab konmans ekri de ou trwa keksoz ki ou’n apresye sak zour.

Bann resers i montre ki ler nou remersye lezot regilyerman, sa i kapab sanz lafason ki nou laservel i fonksyonnen e fer li pli fasil pour nou santi nou ere. En dimoun ki rekonesan i pli ere. Alor, reflesir lo bann bon keksoz ki ou’n gannyen, apresye bann bon keksoz ki arive dan ou lavi e kontinyen demontre rekonesans. Dan plas pran sa bann keksoz alalezer, “loue [Zeova], akoz i bon.” Wi, “remersye Bondye pour tou keksoz.”​—1 Kron. 16:34; 1 Tesa. 5:18.