Eski ou’n lir byen bann Latour Veyer pour sa lannen? Vwar si ou kapab reponn sa bann kestyon swivan:

Ki mannyer nou devret tret bann Kretyen swazir?

Nou apresye zot lafwa me nou pa donn zot tro bokou latansyon. Nou evite “flat lezot.” (Zid 16) Nou pa demann zot ki mannyer zot in ganny swazir.​—w20.01, paz 29.

Kwa ki devret konvenk ou ki Zeova i enterese avek ou?

Labib i montre ki Zeova ti enterese avek ou menm avan ou ti ne. I ekout tou lapriyer ki ou fer. Zeova i konn sa ki dan ou leker, i konn sa ki ou pe mazinen e ou bann aksyon i annan en lefe lo son santiman. (1 Kron. 28:9; Prov. 27:11) I’n atir ou ver li.​—w20.02, paz 12.

Kan ki nou kapab koze e kan ki nou kapab reste trankil?

Nou kontan pour koz lo Zeova. Nou koze ler nou vwar en dimoun pe pran en move semen. Bann ansyen i koze ler zot bezwen donn konsey. Nou reste trankil pour nou pa demann lenformasyon (oubyen pour nou pa donn lenformasyon) konsernan ki mannyer travay predikasyon i ganny fer dan bann landrwa kot nou travay i anba restriksyon. Nou pa donn bann lenformasyon konfidansyel.​—w20.03, paz 20-21.

Ki diferans i annan ant bann sotrel dan Zoel sapit 2 avek sa bann dan Revelasyon sapit 9?

Zoel 2:20-29 i dir ki Bondye i sas bann sotrel lwen e i promet ki i pou pey pour domaz ki bann sotrel in fer. Apre sa, Bondye i devers son lespri sen. Sa bann keksoz ti ganny akonplir ler bann Babilonnyen ti anvair Izrael e pli tar apre sa. Revelasyon 9:1-11 i konpar bann Kretyen swazir avek bann sotrel. I dir ki zot anons mesaz zizman Bondye avek sa move lemonn e sa i tourmant tou dimoun ki pran kote avek sa lemonn.​—w20.04, paz 3-6.

Lekel lerwa nor ozordi?

Larisi ek son bann alye. Zot in atak pep Bondye par restrikte sa travay predikasyon e zot in montre ki zot ay Temwen Zeova. Lerwa nor in esey vin pli pwisan ki lerwa sid.​—w20.05, paz 13.

Eski zis sa nef kalite ki dan Galat 5:22, 23 ki form parti “fri lespri sen”?

Non. Lespri sen Bondye i kapab ed nou devlop lezot zoli kalite, parey ladrwatir. (Efe. 5:8, 9)​—w20.06, paz 17.

Ki danze i annan ler nou poste bann keksoz personnel lo Enternet?

Sa ki nou poste i kapab donn lenpresyon ki nou pe fer vantar oubyen ki nou napa limilite.​—w20.07, paz 6-7.

Ki bann proklanmater i kapab aprann avek en bon peser?

Zot travay en ler e dan en landrwa kot zot pou ganny pwason. Zot ganny formasyon pour servi sa bon lekipman. Zot annan kouraz e zot travay, menm ler letan i sanze. Nou kapab fer parey dan sa travay predikasyon.​—w20.09, paz 5.

Ki serten fason nou kapab ed nou bann etidyan Labib pour kontan Zeova plis?

Nou kapab ankouraz nou bann etidyan Labib pour lir Labib toulezour e pour medit lo sa ki zot lir. Nou kapab osi montre zot ki mannyer pour priye.​—w20.11, paz 4.

Lekel “tou [ki] pou revin vivan dan Kris”?​—1 Kor. 15:22.

Zapot Pol pa ti pe dir ki tou imen ti pou ganny resisite. I ti pe refer avek bann Kretyen swazir ki ti’n “ganny sanktifye” e ki “ini avek Kris Zezi.” (1 Kor. 1:2; 15:18)​—w20.12, paz 5-6.

Ki travay bann Kretyen swazir pou fer apre ki zot sanze “dan en klendey, pandan dernyen son tronpet”?​—1 Kor. 15:51-53.

Zot pou swiv Zezi e diriz bann dimoun avek en baton feray. (Rev. 2:26, 27)​—w20.12, paz 12-13.