1. Ki mannyer Zeova i souvandfwa reponn lapriyer son bann serviter?

 ESKI ou ti konnen ki Zeova i kapab servi ou pour reponn lapriyer en dimoun? I kapab servi ou ki swa ou en ansyen, en serviter kongregasyon, en pionye oubyen en proklanmater. I kapab osi servi ou ki swa ou zenn, aze, ou en frer oubyen en ser. Ler en dimoun i kontan Zeova i demann Zeova pour ed li. Souvandfwa nou Bondye i servi bann ansyen ek lezot serviter fidel pour vin “en gran sours rekonfor” pour sa dimoun. (Kol. 4:11) I en gran privilez pour nou servi Zeova ek nou bann frer ek ser dan sa fason. Nou kapab fer sa ler i annan en lepidemi, en dezas oubyen ler zot pe ganny persekite.

2. Akoz i kapab difisil pour ed lezot ler i annan en lepidemi?

² I kapab difisil pour nou ed lezot ler i annan en lepidemi. Par egzanp, i kapab ki nou anvi vizit nou bann zanmi me nou pa kapab fer li parski sa i kapab met nou lavi ek lavi lezot dimoun an danze. Nou kapab anvi envit bann ki annan problenm finansyel pour en repa kot nou me i pa posib pour nou fer li. Petet nou osi anvi ed lezot me i kapab difisil pour nou fer sa si nou prop fanmir pe soufer. Malgre tousala, nou anvi ed nou bann frer ek ser e Zeova i kontan ler nou fer sa ki nou kapab pour zot. (Prov. 3:27; 19:17) Me ki nou kapab fer pour ed zot?

3. Ki nou aprann avek legzanp bann ansyen dan kongregasyon Desi? (Zeremi 23:4)

³ Sa ki bann ansyen i kapab fer. Si ou en ansyen, aprann konn ou bann mouton byen. (Lir Zeremi 23:4.) Desi, en ser ki’n ganny mansyonnen dan sa lartik avan, i dir: “Bann ansyen dan mon group predikasyon ti abitye travay avek mwan ek lezot dan predikasyon e zot ti zwenn avek nou ler  nou ti pas letan ansanm.” b Sa ti fer li pli fasil pour sa bann ansyen ed Desi ler pandemi COVID-19 ti konmanse e ler serten son bann fanmir ti mor akoz sa viris.

4. Akoz bann ansyen ti kapab ed Desi e ki bann ansyen i kapab aprann?

⁴ Desi i dir: “Vi ki mon ti zanmi avek bann ansyen, i ti fasil pour mwan koz avek zot lo mon bann santiman e lo sa ki ti pe fer mwan enkyet.” Ki bann ansyen i kapab aprann? Pran swen avek bann ki anba ou responsabilite avan ler i annan en problenm. Vin en zanmi pour zot. Ler i annan en lepidemi ki anpes ou vizit ou bann frer ek ser, rod lezot fason pour ou kominik avek zot. Desi i dir: “Parfwa diferan ansyen ti telefonn mwan oubyen zot ti anvoy mwan mesaz son menm zour. Bann verse ki zot ti partaz avek mwan ti tous mwan menm si mon ti deza konn sa bann verse byen.”

5. Ki mannyer bann ansyen i kapab konnen ki bann frer ek ser i bezwen e ki mannyer zot kapab ed sa bann frer ek ser?

⁵ En fason ki ou kapab konnen ki ou bann frer ek ser i bezwen, i par servi bon zizman ler ou pe demann zot kestyon. (Prov. 20:5) Eski zot annan ase manze, latizann oubyen lezot keksoz ki zot bezwen? Eski petet zot kapab perdi zot travay oubyen eski zot annan ase larzan pour kontinyen pey zot landrwa reste? Eski zot bezwen led pour rod lasistans finansyel avek gouvernman? Bann frer ek ser ti donn Desi bann keksoz materyel. Me sa ki ti ed li plis, i sa lanmour ki bann ansyen ti demontre anver li ek sa lankourazman ki zot ti donn li sorti dan Labib. I dir: “Bann ansyen ti priy avek mwan. Menm si mon pa rapel egzakteman sa ki zot ti dir me mon rapel lafason ki mon ti santi. I ti konmsi Zeova pe dir mwan, ‘Ou pa tousel.’”​—Iza. 41:10, 13.

6. Ki sak manm kongregasyon i kapab fer pour ed lezot? (Vwar portre.)

⁶ Sa ki lezot dimoun dan kongregasyon i kapab fer. Menm si nou ekspekte ki bann ansyen i pran swen avek bann frer ek ser dan kongregasyon, Zeova i anvi ki nou tou, nou ankouraz e ed lezot. (Gal. 6:10) Menm si nou fer en pti keksoz pour ed en dimoun ki malad, sa i kapab ankouraz sa dimoun en kantite. Par egzanp, en zanfan i kapab anvoy en kart oubyen en desen  pour ankouraz en frer. En zenn i kapab al laboutik oubyen al fer en lot konmisyon pour en ser. Lezot dan kongregasyon i kapab kwi en repa pour en dimoun ki malad e anmenn sa repa kot lakour sa dimoun. Byensir, pandan en lepidemi, tou dimoun dan kongregasyon i bezwen lankourazman. Petet nou kapab reste en pe pli lontan apre renyon pour koz avek bann frer ek ser, ki swa an personn oubyen atraver video konferans. Bann ansyen osi i bezwen lankourazman. Serten frer ek ser in anvoy en kart remersiman pour bann ansyen ki souvan i annan bokou plis keksoz pour fer ler i annan en lepidemi. I gou ler nou tou nou fer nou par pour “kontinyen ankouraz kanmarad e batir kanmarad.”​—1 Tesa. 5:11.

7. Ki i kapab arive pandan en dezas?

⁷ En dezas i kapab sanz lavi en dimoun en sel kou. Serten dimoun i kapab perdi zot bann keksoz materyel, zot lakour oubyen en dimoun ki zot kontan i kapab mor pandan en dezas. Sa bann keksoz i kapab arive avek nou bann frer ek ser. Ki nou kapab fer pour ed zot?

8. Ki bann ansyen ek bann sef fanmir i kapab fer avan i annan en dezas?

⁸ Sa ki bann ansyen i kapab fer. Ansyen, ed ou bann frer ek ser pour prepare avan i annan en dezas. Fer sir ki tou dimoun dan kongregasyon i konnen ki zot bezwen fer pour reste sen e sof e pour kontakte bann ansyen. Margaret, ki’n ganny mansyonnen dan sa lartik avan, i dir: “Nou bann ansyen ti fer bezwen lokal pour averti nou ki i kapab annan ankor dife dan sa landrwa kot nou reste. Zot ti dir ki si lotorite i donn nou lord pour kit nou lakour oubyen si sityasyon i vin pli danzere, nou devret kit nou lakour deswit.” Bann frer ti’n donn zot sa lenformasyon dan sa bon moman parski senk semenn pli tar i ti annan en gro dife brousay. Pandan ladorasyon fanmir, bann sef fanmir i kapab diskit lo sa ki sak manm fanmir i bezwen fer. Si ou ek ou bann zanfan in prepare, i tre probab ki zot pou reste kalm ler i annan en dezas.

9. Ki mannyer bann ansyen i kapab prepar zot avan en dezas e ki zot kapab fer ler i annan en dezas?

⁹ Si ou en sirveyan group, fer sir ki ou annan nimero telefonn ek ladres tou bann proklanmater ki dan ou group predikasyon e fer sir ki ou fer sa avan dezas. Fer sir ki ou lalis i azour. Koumsa si i annan en dezas, ou pou kapab kontakte sak proklanmater pour vwar ki i bezwen. Anvoy sa bann lenformasyon deswit kot kordinater konsey ansyen pour li kapab kontakte sirveyan rezyonal. Ler sa bann frer i travay ansanm, zot pou kapab ed bann frer ek ser dan sa pli bon fason. Apre sa dife dan sa landrwa kot Margaret i reste, son sirveyan rezyonal pa ti dormi pour 36 erdtan. I ti bizi pe organiz travay bann ansyen anmezir ki sa bann ansyen ti pe esey kontakte e pran swen avek sa apepre 450 frer ek ser ki ti’n bezwen kit zot lakour. (2 Kor. 11:27) Sa ti fer ki tou sa dimoun ki ti bezwen landrwa reste ti ganny en landrwa.

10. Akoz bann ansyen i vwar li enportan pour fer bann vizit lankourazman? (Zan 21:15)

¹⁰ Bann ansyen i annan sa responsabilite pour donn bann frer ek ser lankourazman sorti dan Labib e pour ed bann ki dezespere. (1 Pyer 5:2) Ler i annan en dezas, bann ansyen i devret premyerman fer sir ki tou bann frer ek ser i sen e sof, zot annan manze, lenz ek en landrwa reste. Pour plizyer mwan apre, i tre probab ki bann frer ek ser pou ankor bezwen led spirityel ek emosyonnel. (Lir Zan 21:15.) En frer ki apel Harold, ki servi lo en Komite Biro Brans Temwen Zeova e ki’n zwenn avek plizyer frer ek ser ki’n ganny afekte avek bann dezas, i dir: “I  pran letan pour en dimoun refer. Menm si zot lavi i retourn normal, i kapab ki zot ankor mazin en dimoun ki zot kontan ki’n mor, en keksoz ki annan bokou valer pour zot oubyen zot ankor mazin sa sityasyon difisil ki zot ti ladan. Sa bann souvenir i kapab fer zot sagren. Sa pa vedir ki zot mank lafwa me i zis en reaksyon normal.”

11. Ki bann fanmir pou bezwen apre en dezas?

¹¹ Bann ansyen i aplik sa konsey pour “plere avek bann ki plere.” (Rom. 12:15) Zot bezwen reasir bann ki’n pas dan en dezas ki Zeova ek bann frer ek ser i ankor kontan zot. Bann ansyen pou ed bann fanmir pour kontinyen fer zot bann keksoz spirityel, parey lapriyer, etidye, asiste renyon e partisip dan predikasyon. Zot kapab osi ankouraz bann paran pour ed zot zanfan pour konsantre lo bann keksoz ki en dezas pa kapab detri. Paran, fer ou zanfan rapel ki Zeova pou toultan zot Zanmi e ki i pou toultan ed zot. Eksplik zot ki zot pou toultan annan bann frer ek ser partou dan lemonn ki pare pour ed zot.​—1 Pyer 2:17.

12. Ki bann frer ek ser i kapab fer pour ede avek sa travay led sekour? (Vwar portre.)

¹² Sa ki lezot dimoun dan kongregasyon i kapab fer. Si i annan en dezas pros avek kot ou reste, demann bann ansyen ki mannyer ou kapab ede. Petet ou kapab les bann frer ek ser ki’n bezwen kit zot lakour oubyen bann ki pe ede avek travay led sekour, reste avek ou pour en serten letan. Petet ou kapab anmenn manze ek lezot keksoz pour bann proklanmater ki dan bezwen. Si en dezas i arive dan en landrwa ki lwen avek kot ou reste, ou ankor kapab ede. Ki mannyer? Ou kapab priy pour bann frer ek ser ki’n ganny afekte. (2 Kor. 1:8-11) Petet ou kapab siport sa travay led sekour par fer kontribisyon anver sa travay mondyal. (2 Kor. 8:2-5) Si ou kapab vwayaze pour al dan en landrwa kot in annan dezas, demann bann ansyen ki ou kapab fer pour ede. Si ou ganny envite pour ede, i tre probab ki ou pou ganny serten formasyon pour ki ou kapab ede dan sa pli bon fason.

13. Ki problenm nou bann frer ek ser i fer fas avek dan bann landrwa kot nou travay i ganny enterdi?

¹³ Dan bann pei kot nou travay in ganny enterdi, nou bann frer ek ser i ganny persekite e sa i fer lavi pli difisil pour zot. An plis ki sa, sa bann frer ek ser i fer fas avek bann  problenm ekonomik, zot malad e bann dimoun ki zot kontan i mor. Vi ki sa travay i ganny enterdi, bann ansyen pa lib pour vizit oubyen koz avek bann frer ek ser ki bezwen lankourazman. Sanmenm ki ti arive avek Andrei, ki’n ganny mansyonnen dan sa lartik avan. En ser dan son group predikasyon ti pe fer fas avek problenm ekonomik. Apre sa ser ti dan en aksidan loto. I ti bezwen fer plizyer loperasyon e i pa ti kapab travay. Menm si sa travay ti’n ganny enterdi e i ti annan en pandemi, bann frer ek ser ti fer sa ki zot ti kapab pour ede e Zeova ti vwar sa ki ti pe arive.

14. Ki mannyer bann ansyen i kapab depan lo Zeova?

¹⁴ Sa ki bann ansyen i kapab fer. Andrei ti priy pour sa ser e i ti fer sa ki i ti kapab. Ki Zeova ti fer? Zeova ti motiv plizyer frer ek ser dan kongregasyon ki ti kapab ed sa ser. Serten ti anmenn sa ser pour son bann lapwentman dokter. Lezot ti donn larzan pour ed li. Zeova ti motiv zot pour ed sa ser. I ti fer sir ki sa ki sa bann frer ek ser dan kongregasyon ti fer, ti sanmenm sa ki sa ser ti bezwen. (Ebr. 13:16) Ansyen, ler nou travay i anba restriksyon, demann lezot pour ede. (Zer. 36:5, 6) Pli enportan ankor, depan lo Zeova. Zeova i kapab ed ou pour pran swen avek bann frer ek ser.

15. Ki mannyer nou kapab reste ini ansanm ler nou pe ganny persekite?

¹⁵ Sa ki lezot dimoun dan kongregasyon i kapab fer. Ler nou travay in ganny enterdi, i kapab ki nou pou bezwen zwenn nou bann frer ek ser dan bann pli pti group. Alor, i enportan ki depi la konmela nou gard lape parmi nou. Lager avek Satan, pa avek kanmarad. Ler en frer oubyen en ser i fer en fot, les pase sa fot oubyen esey rezourd sa problenm deswit. (Prov. 19:11; Efe. 4:26) Pare pour ed lezot. (Tit 3:14) Sa led ki bann frer ek ser ti donn sa ser ki ti malad ti annan en bon lefe lo zot group predikasyon. Zot ti vin pli pros avek kanmarad, parey en fanmir.​—Ps. 133:1.

16. Dapre Kolosyen 4:3, 18, ki mannyer nou kapab ed nou bann frer ek ser ki pe ganny persekite?

¹⁶ Plizyer milye frer ek ser pe servi Zeova menm si gouvernman in met restriksyon lo sa travay predikasyon. Serten in ganny met dan prizon akoz zot lafwa. Nou kapab priy pour zot e pour zot fanmir. Nou kapab osi priy pour bann ki demontre kouraz e ki siport bann frer ek ser ki dan prizon menm si zot kapab ganny met dan prizon zot  osi. Sa bann frer ek ser i ankouraz bann ki dan prizon pour kontinyen annan konfyans dan Zeova. Zot donn sa bann frer ek ser bann keksoz ki zot bezwen e defann zot an kour. c (Lir Kolosyen 4:3, 18.) Pa zanmen oubliye ki nou lapriyer i kapab ed sa bann frer ek ser.​—2 Tesa. 3:1, 2; 1 Tim. 2:1, 2.

17. Ki mannyer nou kapab prepare depi la konmela pour fer fas avek persekisyon?

¹⁷ Ou ansanm avek ou fanmir, ou kapab prepare pour persekisyon depi la konmela. (Akt 14:22) Pa esey imazin tou bann move keksoz ki kapab arive. O kontrer, vin pli pros avek Zeova e ed ou zanfan pour fer parey. Si parfwa ou santi ou enkyet, devid ou leker avek Bondye. (Ps. 62:7, 8) Konman en fanmir, diskit lo tou bann rezon akoz ou kapab annan konfyans dan Zeova. d Zis parey ler ou prepare pour en dezas, sa i ed ou zanfan, si ou prepare pour persekisyon sa pou osi ed ou zanfan. Zot pou kapab demontre kouraz e reste kalm parski ou’n ansenny zot pour annan konfyans dan Zeova.

18. Ki pou arive dan lavenir?

¹⁸ Lape Bondye i fer nou santi nou an sekirite. (Fili. 4:6, 7) Ler Zeova i donn nou son lape, sa i fer nou reste kalm menm si nou fer fas avek bann lepidemi, dezas e nou ganny persekite. Zeova i servi bann ansyen pour pran swen avek nou. I osi donn tou dimoun dan kongregasyon sa loportinite pour ed kanmarad. Pandan sa letan lape ki nou annan la konmela, nou kapab prepare pour bann pli gro problenm ki nou pou gannyen dan lavenir, enkli sa “gran ladetres.” (Mat. 24:21) Sa letan, nou pou bezwen gard nou lape e ed lezot osi pour annan lape. Me apre sa gran ladetres, nou pa pou annan bann gro problenm ki pou fer nou enkyet. Nou pou finalman kapab annan sa ki Zeova in toultan anvi pour nou e sa i vre lape ki pou dire pour touzour.​—Iza. 26:3, 4.