Ler Zeova ti donn bann imen lord pour “ranpli later e pran swen avek li,” i ti pe dir ki avek letan later antye ti pou vin en paradi. (Zen. 1:28) Bann ki pou viv pour touzour pou bezwen obei sa menm lord. Ler zot pou ganny donnen later, i pa pou en paradi parski zarden Edenn nepli egziste. Zis apre Armagedon, nou pou annan en kantite travay pour fer pour netway bann landrwa lo later ki’n ganny afekte. Sa pou sirman en gro travay!

Sa i fer nou rapel sa travay ki bann Izraelit ti bezwen fer ler zot ti retournen sorti Babilonn. Pour 70 an personn pa ti’n reste dan zot pei. Me profet Izai ti predir ki avek led Zeova zot ti pou kapab fer zot pei revin zoli ankor. Sa profesi ti dir: “I pou fer bann dezer vin parey zarden Edenn, parey zarden [Zeova].” (Iza. 51:3, Labib an Kreol Seselwa) Zeova ti ed bann Izraelit pour fer zot pei revin zoli ankor. Pareyman, avek led Zeova, bann ki pou ganny donnen later pou kapab fer li vin en zoli paradi. Depi la konmela  i annan keksoz ki ou kapab fer pour montre ki ou anvi partisip dan sa travay.

En fason ki ou kapab fer sa i ler ou fer ou mye pour gard ou lakour prop e annord. Ou kapab fer sa menm si kot ou vwazen pa prop. Ou osi kapab ede pour netway e gard Lasal Rwayonm ek Lasal Lasanble prop. Si ou sirkonstans i permet, ou kapab osi fer laplikasyon pour vin en volonter pour partisip dan travay led sekour. Sa pou montre ki ou ti pou kontan ed ou bann frer ek ser si zot bezwen led. Ou kapab devlop bann nouvo abilite ki ou kapab servi si Zeova i les ou viv lo later pour touzour.

Zis apre ki Zezi ti’n resisit fiy Zairis, Zezi ti dir ki sa pti fiy i bezwen en keksoz pour manze. (Mark 5:42, 43) I kapab ki i pa ti en travay difisil pour okip sa pti fiy 12 an. Me mazin lo sa kantite travay ki nou pou bezwen fer ler Zezi pou akonpli sa promes kot “tou bann ki dan latonm pou tann son lavwa e zot pou resisite.” (Zan 5:28, 29) Menm si Labib pa donn bokou detay, nou kapab imazinen ki bann ki pou resisite pou bezwen manze, landrwa reste ek lenz. Eski ou kapab montre depi la konmela ki ou anvi ede ler sa letan i arive? Annou vwar serten keksoz ki ou kapab fer.

Ler lanons i ganny fer dan ou kongregasyon konsernan vizit sirveyan, eski ou ofer pour envit sirveyan vin pran en repa kot ou? Ler bann serviter spesyal a plen tan i kit Betel pour al fer pionye oubyen ler en sirveyan rezyonal i aret son servis, eski ou kapab ed zot pour trouv en landrwa reste? Ler i annan en lasanble dan ou rezyon, eski ou kapab volonter pour ede avan e apre lasanble oubyen pour ede akeyir bann ki pe vin lasanble?

Dapre sa ki nou lir dan Akt 24:15, nou ekspekte ki plizyer bilyon dimoun pou ganny resisite. En kantite parmi zot pa’n ganny sa loportinite pour  aprann konn Zeova. Me zot pou annan sa loportinite apre ki zot in ganny resisite. a Bann serviter fidel Zeova ki annan leksperyans pou ede pour ansenny zot. (Iza. 11:9) En ser ki apel Charlotte ki’n fer predikasyon Lerop, Sid Lanmerik ek Lafrik i dir ki i vreman anvi la sa letan. I dir: “Mon vreman anvi ansenny bann dimoun ki resisite. Ler mon lir konsernan en dimoun ki’n viv dan lepase, souvan mon mazinen: ‘Si sa dimoun ti’n konn Zeova, son lavi ti pou konpletman diferan.’ Mon vreman anvi koz avek bann dimoun ki resisite lo Zeova e lo ki mannyer zot lavi pou pli meyer si zot servi li.”

Menm bann serviter fidel Zeova ki ti viv avan Zezi i vin lo later, pou annan en kantite pour aprann. Zis imazinen ki mannyer i pou en lazwa e osi en privilez pour eksplik Danyel ki mannyer bann profesi ki i ti ekri me ki i pa ti konpran, in ganny akonplir. (Dan. 12:8) Oubyen imazin ou pe ed Rit ek Naomi pour aprann ki Mesi i enn zot desandans. Nou pou vreman kontan pour ansenny dimoun partou dan lemonn e nou pou napa sa presyon ek bann distraksyon ki egziste dan sa lemonn ozordi.

Ki ou kapab fer pour montre ki ou pare pour ede pour ansenny bann dimoun ki pou resisite? En fason pour fer sa i ler ou fer ou mye pour vin en pli bon ansenyan e ler ou partisip dan predikasyon regilyerman. (Mat. 24:14) Menm si ou pa kapab fer sa kantite ki ou ti ava kontan dan predikasyon la konmela akoz ou laz oubyen lezot rezon, ou kapab montre ki ou vreman anvi ansenny bann dimoun ki pou ganny resisite par fer ou mye dan predikasyon la konmela.

I byen pour reflesir lo sa bann kestyon enportan: Eski ou vreman anvi viv dan Paradi lo later? Eski ou vreman anvi la dan lavenir pour ede fer later vin en paradi, pour konstri lakaz e pour ansenny bann ki pou ganny resisite? Ou kapab montre ki ou’n pare pour viv pour touzour lo later par partisip dan bann travay ki parey bann travay ki pou ganny fer ler later i vin en paradi.