Non. Me sa ki David ti ekri i vre e i fer sans.

Remark sa ki David ti ekri dan sa verse e dan lezot verse ki en pe parey. David ti dir: “Mon pou sant louanz pour ou non pour touzour anmezir ki mon respekte mon bann ve zour apre zour.” “Mon loue ou, O Zeova mon Bondye, avek tou mon leker e mon pou glorifye ou non pour touzour.” “Mon pou loue ou non pour touzour e touzour.”​—Ps. 61:8; 86:12; 145:1, 2.

Ler David ti ekri sa bann parol, i pa ti krwar ki i pa ti pou zanmen mor. I ti konnen ki Zeova ti’n dir ki bann imen ti pou mor parski zot fer pese e David ti admet ki i fer pese. (Zen. 3:3, 17-19; Ps. 51:4, 5) I ti konnen ki menm bann zonm fidel parey Abraam, Izaak ek Zakob ti’n mor. David ti osi konnen ki avek letan, li osi i ti pou mor. (Ps. 37:25; 39:4) Me sa ki David ti ekri dan Psonm 61:8 i montre ki i ti vreman anvi loue Bondye pour touzour, setadir tan ki David ti ankor vivan.​—2 Sam. 7:12.

Parfwa David ti ekri konsernan serten keksoz ki i ti pas ladan, parey nou vwar dan bann lenformasyon ki par lao Psonm 18, 51 ek 52. Dan Psonm 23, David i dir ki Zeova i parey en berze ki gid, protez e ki donn son bann mouton sa ki zot bezwen pour ganny lafors. David ti en berze ki koumsa li osi e sa ti fer li anvi servi Bondye ‘tou le zour son lavi.’​—Ps. 23:6.

Rapel ki Zeova ki ti enspir David pour ekri tou bann keksoz ki i ti ekri. Sa ki David ti ekri ti osi enkli bann profesi konsernan sa ki ti pou arive dan lavenir. Par egzanp, dan Psonm 110 David ti ekri konsernan en letan kot son Senyer ti pou ‘asiz lo kote drwat Bondye’ dan lesyel e pou ganny donnen pouvwar. Pouvwar pour fer kwa? Senyer ti pou ganny donnen pouvwar pour domin lo bann lennmi Bondye e pour “egzekit zizman kont bann nasyon” lo later. David ti en zanset Zezi, ki ti vin Mesi. Mesi ti pou dirize dan lesyel e i ti pou “en pret pour touzour.” (Ps. 110:1-6) Zezi ti dir ki sa profesi ki dan Psonm 110 ti pe koz lo li e ki i ti pou annan en lakonplisman dan lavenir.​—Mat. 22:41-45.

I kler ki Zeova ti enspir David pour ekri konsernan son letan e konsernan en letan dan lavenir kot i ti pou ganny resisite e kot i ti pou kapab loue Zeova pour touzour. Alor Psonm 37:10, 11, 29 i kapab aplik pour letan pep Izrael e osi pour en letan dan lavenir. Sa bann verse ti annan en lakonplisman dan letan pep Izrael e i pou annan en lakonplisman dan lavenir ler Bondye i akonpli son bann promes.​—Vwar paragraf 8 dan sa lartik “Ou pou avek mwan dan Paradi” ki dan sa Latour Veyer.

Alor Psonm 61:8 ek lezot verse ki en pe parey i montre ki David ti anvi glorifye Zeova dan letan pep Izrael ziska ki i mor. Sa bann verse i osi montre sa ki David pou kapab fer dan lavenir ler Zeova i resisit li.