1. Kisisa “lape Bondye” e ki byenfe nou gannyen ler nou annan lape Bondye? (Filipyen 4:6, 7)

 I ANNAN en kalite lape ki dimoun dan sa lemonn pa konnen. Sa i “lape Bondye,” setadir sa trankilite ki en dimoun i gannyen gras a sa bon lanmitye ki i annan avek son Papa ki dan lesyel. Ler nou annan lape Bondye, nou santi nou an sekirite. (Lir Filipyen 4:6, 7.) Nou annan en bon lanmitye avek bann ki kontan Zeova. Nou osi annan en bon lanmitye avek sa “Bondye lape.” (1 Tesa. 5:23) Ler nou konn nou Papa, nou annan konfyans dan li e nou obei li, lape Bondye i kapab fer nou aret enkyet ler nou fer fas avek en problenm.

2. Akoz nou kapab asire ki i posib pour nou ganny lape Bondye?

² Eski i vreman posib pour trouv lape Bondye ler nou fer fas avek bann problenm parey lepidemi, dezas, konfli politik oubyen persekisyon? Tousala i bann problenm grav ki kapab fer nou per. Me Zezi ti donn son bann disip sa konsey: “Pa bezwen enkyet oubyen per.” (Zan 14:27) Erezman, bann frer ek ser in ekout konsey Zezi. Avek led Zeova, zot in reisi trouv lape menm si zot pe fer fas avek bann problenm ki difisil.

3. Ki mannyer en lepidemi oubyen en pandemi i kapab fer nou perdi nou lape lespri?

³ En lepidemi oubyen en pandemi i kapab fer en gran sanzman dan nou lavi. Remark sa lefe ki pandemi COVID-19 in annan lo en kantite dimoun. Dan en resansman ki ti ganny fer, plis ki lanmwatye dimoun ki ti partisip dan sa resansman ti dir ki pandan sa pandemi zot ti annan problenm pour dormi. Pandan sa pandemi i ti annan bokou plis dimoun ki ti santi zot enkyet, dan depresyon, abiz lakol ek drog e i ti osi annan bokou plis vyolans domestik ek dimoun ki ti pe esey swiside. Si i annan en lepidemi dan sa landrwa kot ou reste,  ki ou kapab fer pour ou pa tro enkyet e pour ou ganny lape Bondye?

4. Akoz ler nou konn profesi Zezi konsernan bann dernyen zour, sa i donn nou lape lespri?

⁴ Zezi ti predir ki pandan bann dernyen zour, i ti pou annan bann lepidemi “dan en landrwa apre lot.” (Lik 21:11) Ki mannyer sa ki Zezi ti dir i fer nou annan lape lespri? Nou pa sirprann ler i annan bann lepidemi parski nou realize ki sa bann keksoz pe arive zis parey Zezi ti dir zot pou arive. Alor nou pou swiv sa konsey ki Zezi ti donn bann ki viv pandan bann dernyen zour. Zezi ti dir: “Pa bezwen per.”​—Mat. 24:6.

5. (a) Dapre Filipyen 4:8, 9, ki nou devret priy lo la ler i annan en lepidemi dan sa landrwa kot nou reste? (b) Ki byenfe nou kapab gannyen ler nou ekout bann lanrezistreman odyo Labib?

⁵ Ler i annan en lepidemi, sa i kapab fer nou enkyet e per. Sanmenm ki ti arive avek en ser ki apel Desi. b Ler son tonton, kouzen ek dokter ti mor akoz COVID-19, Desi ti per ki i ti pou ganny sa viris e transmet li avek son manman ki aze. I ti per ki i ti pou perdi son travay akoz sa pandemi e i ti mazinen ki mannyer i ti pou kapab pey son lakaz e aste manze. I ti sitan enkyet konsernan sa bann keksoz ki i pa ti kapab dormi aswar. Me Desi ti reganny son lape lespri. Ki mannyer? I ti demann Zeova pour ed li reste kalm e pour mazin lo bann keksoz pozitif. (Lir Filipyen 4:8, 9.) I ti ekout Zeova “koz” avek li atraver bann lanrezistreman odyo Labib. Desi i dir: “Lavwa sa bann lekter i sitan kalm ki sa ti fer mwan aret enkyet e fer mwan rapel ki Zeova i kontan mwan.”​—Ps. 94:19.

6. Ki mannyer ou letid personnel ek bann renyon kongregasyon pou ed ou?

⁶ Pandan en lepidemi, nou pa toultan kapab fer sa ki nou ti abitye fer avan. Me pa bezwen les sa anpes ou fer ou letid personnel oubyen asiste renyon. Bann leksperyans dan nou bann piblikasyon ek video i fer nou rapel ki nou bann frer ek ser pe kontinyen servi Zeova fidelman malgre zot pe fer fas avek bann problenm ki en pe parey avek sa ki pour nou. (1 Pyer 5:9) Dan bann renyon, ou pou tann bann keksoz ki pou ed ou pour mazin bann keksoz ankourazan ki sorti dan Labib. Ou pou osi annan bann loportinite pour ankouraz lezot e pour ou ganny ankouraze ou osi. (Rom. 1:11, 12) Ler ou mazin lo lafason ki Zeova in ed son bann serviter ler zot ti malad, per oubyen ler zot ti santi zot tousel, ou lafwa pou vin pli for e sa pou fer ou asire ki Zeova pou ed ou, ou osi.

7. Ki leson ou kapab aprann avek zapot Zan?

⁷ Fer zefor pour kominik avek ou bann frer ek ser. Ler i annan en lepidemi, i kapab ki nou bezwen gard zistans avek nou bann  frer ek ser menm ler nou ansanm avek zot. Sa i kapab fer nou santi parey zapot Zan. I ti anvi vwar son zanmi Gayis fas a fas. (3 Zan 13, 14) Me Zan ti konnen ki pour en serten letan i pa ti pou kapab vwar Gayis. Alor Zan ti fer sa ki i ti kapab, i ti ekri en let pour Gayis. Si i pa toultan posib pour ou vizit ou bann frer ek ser an personn, esey telefonn zot, video call zot oubyen anvoy zot en mesaz. Ler nou reste an kontak avek nou bann frer ek ser, nou pa pou santi nou tro tousel e nou pou santi nou pli kalm. Si ou santi ou vreman enkyet, pran kontak avek bann ansyen e aksepte lankourazman ki zot donn ou.​—Iza. 32:1, 2.

8. Ki mannyer en dezas i kapab fer nou perdi ou lape lespri?

⁸ Si ou’n deza eksperyans en linondasyon, tranblemandter oubyen dife, i kapab ki ou’n santi ou vreman enkyet pour en kantite letan apre sa ki’n arive. Si en dimoun ki ou kontan in mor dan en dezas oubyen ou lakaz ek ou bann keksoz in ganny detrir, sa i kapab fer ou sagren, santi ki ou pa kapab fer nanryen oubyen menm ankoler. Me sa pa vedir ki ou kontan keksoz materyel oubyen ki ou mank lafwa. Ou’n pas dan en sityasyon difisil e serten i kapab ekspekte ki ou reakte dan en move fason. (Zob 1:11) Me ou kapab annan lape lespri. Ki mannyer?

9. Ki Zezi ti dir pour prepar nou pour bann dezas ki pou arive?

⁹ Rapel sa ki Zezi ti predir. Serten dimoun i krwar ki zot pa pou zanmen eksperyans en dezas. Me nou, nou konnen ki i pou annan plis dezas dan nou letan e ki nou kapab eksperyans serten sa bann dezas. Zezi ti dir son bann disip ki avan ki lafen i arive, i pou annan “bann gran tranblemandter” ek bann lezot dezas. (Lik 21:11) I ti osi predir ki i pou annan “en kantite pese” e sanmenm sa ki nou vwar ozordi. Par egzanp, nou vwar bann krim, vyolans ek latak teroris. (Mat. 24:12) Zezi pa ti dir ki zis bann ki Zeova in abandonnen ki pou eksperyans sa bann problenm. Anfet, en kantite serviter fidel Zeova in eksperyans bann dezas. (Iza. 57:1; 2 Kor. 11:25) I kapab ki Zeova pa pou protez nou kont tou bann dezas ki arive me i pou donn nou sa ki nou bezwen pour nou kapab reste kalm.

10. Akoz ler nou prepare pour en dezas depi la konmela, sa i montre ki nou annan konfyans dan Zeova? (Proverb 22:3)

¹⁰ Nou pou vwar li pli fasil pour reste kalm dan bann ka dirzans si nou’n prepare davans. Me eski ler nou prepar nou davans sa i montre ki nou napa konfyans dan Zeova? Non. Anfet ler nou prepare pour en dezas, sa i montre ki nou annan konfyans ki Zeova i kapab pran swen avek nou. Ki mannyer sa? Parol Bondye i konsey nou pour prepar nou an ka en dezas i arive. (Lir Proverb 22:3.) Plizyer fwa lorganizasyon Bondye in ankouraz nou pour prepar nou an ka dirzans. Zot fer sa atraver bann lartik dan bann magazin, bann renyon kongregasyon e atraver bann lanons. c Eski nou annan konfyans dan Zeova? Si wi, nou pou swiv sa konsey depi la konmela avan ki en dezas i arive.

11. Ki ou aprann avek legzanp Margaret?

¹¹ Annou vwar leksperyans en ser ki apel Margaret. I ti ganny demande pour kit son lakour akoz i ti annan en dife brousay dan sa landrwa kot i ti reste. Me vi ki en kantite dimoun ti pe kit sa landrwa an menm tan, bann semen ti bloke e trafik pa ti bouze. I ti annan en kantite lafimen nwanr partou  e Margaret pa ti kapab sorti dan son loto. Me vi ki i ti’n prepare davans, i ti reisi sov son lavi. I ti’n met en map dan son pers ki i ti kapab servi pour trouv en semen pour li kapab kit sa landrwa. I ti’n deza servi sa semen pour li konnen kote i pou pase an ka dirzans. Vi ki Margaret ti’n prepare davans, i ti kapab sov son lavi.

12. Akoz nou swiv bann mezir prekosyon?

¹² Pour fer ki i annan lord e pour protez nou, bann lotorite i kapab demann nou pour obei en curfew, pour kit nou landrwa oubyen pour swiv lezot lenstriksyon. Serten dimoun pa obei sa bann lenstriksyon parski zot pa anvi kit zot bann keksoz deryer. Dan bann sityasyon koumsa, ki bann Kretyen i fer? Labib i dir nou: “Akoz Senyer, soumet zot avek tou dimoun ki annan lotorite, ki swa en lerwa akoz i annan plis lotorite ouswa bann gouverner ki ganny anvoye par li.” (1 Pyer 2:13, 14) Lorganizasyon Bondye osi, i donn nou bann lenstriksyon pour ed nou reste sen e sof. Tanzantan nou ganny dir pour donn bann ansyen sa nimero telefonn ki nou pe servi pour ki zot kapab kontakte nou an ka dirzans. Eski ou’n fini fer sa? Bann ansyen i kapab donn nou lenstriksyon lo si nou pou reste dan sa landrwa kot nou ete oubyen si nou pou kit sa landrwa. Zot osi kapab dir nou ki mannyer pour ganny sa ki nou bezwen oubyen lo ki mannyer e kan pour ed lezot. Si nou pa obei sa bann lenstriksyon, nou kapab met nou lavi ek lavi sa bann ansyen an danze. Rapel ki sa bann zonm fidel pe vey lo nou. (Ebr. 13:17) Margaret i dir: “Mon vreman krwar ki ler mon’n swiv lenstriksyon bann ansyen ek lorganizasyon, sa in sov mon lavi.”

13. Kwa ki’n ed bann Kretyen ki’n bezwen al reste dan lezot landrwa pour zwaye e pour annan lape lespri?

¹³ En kantite frer ek ser ki’n bezwen kit zot lakour akoz en dezas, lager oubyen konfli politik, in fer zot mye pour adapte avek zot nouvo sirkonstans e zot in fer plis dan servis Zeova. Zis parey bann Kretyen dan premye syek ti bezwen al reste dan lezot landrwa akoz persekisyon, sa bann frer ek ser i kontinyen “anons sa bon nouvel lo parol Bondye.” (Akt 8:4) Ler zot partisip dan predikasyon, sa i ed zot pour konsantre lo Rwayonm olye lo zot bann problenm. Sa i fer ki zot in gard zot lazwa e zot annan lape lespri.

14. Ki mannyer ler nou ganny persekite sa i kapab fer nou perdi nou lape lespri?

¹⁴ Ler nou ganny persekite, nou kapab perdi en kantite keksoz ki ed nou pour annan lape lespri. Nou santi nou zwaye ler nou lib pour zwenn ansanm, nou lib pour fer predikasyon e pour fer bann keksoz ki nou abitye fer, san okenn lafreyer ki nou pou ganny arete. Si nou pa kapab fer sa bann keksoz, nou kapab santi nou enkyet e per sa ki pou arive apre. I normal pour nou santi koumsa. Me nou bezwen fer atansyon. Zezi ti eksplike ki i kapab ki serten son bann disip i tonbe akoz persekisyon. (Zan 16:1, 2) Ki mannyer ou kapab gard ou lape lespri ler ou pe ganny persekite?

15. Akoz nou pa devret per ler nou ganny persekite? (Zan 15:20; 16:33)

¹⁵ Parol Bondye i dir nou: “Tou bann ki oule vin disip Kris Zezi e demontre devosyon pour Bondye dan zot lavi pou osi ganny persekite.” (2 Tim. 3:12) En frer ki apel Andrei ti vwar li difisil pour aksepte sa, apre ki sa travay predikasyon ti’n ganny enterdi dan son pei. I ti mazinen: ‘I annan tro bokou Temwen Zeova isi. Ki mannyer bann lotorite i kapab aret nou tou?’ Me sa fason panse pa ti ed Andrei pour annan lape lespri. O kontrer, i ti fer li enkyet. Lezot frer ti met zot konfyans dan Zeova e zot pa ti esey konvenk zot lekor ki zot pa ti pou ganny arete. Zot ti konnen ki zot ti kapab ganny arete me zot pa ti sitan enkyet parey Andrei. Alor Andrei ti deside pour swiv zot legzanp e met tou son konfyans dan Zeova. Pa bokou letan apre, i ti reganny son lape lespri e i ti kapab zwaye malgre i ti ankor annan en kantite problenm. Nou osi nou kapab trouv lape e reste zwaye. Menm si Zezi ti dir nou ki nou pou ganny persekite, i ti osi asir nou ki nou kapab reste fidel.​—Lir Zan 15:20; 16:33.

16. Ki lenstriksyon nou bezwen obei ler nou pe ganny persekite?

¹⁶ Ler nou travay i ganny enterdi oubyen restrikte, nou kapab ganny bann lenstriksyon sorti kot biro brans Temwen Zeova ek bann ansyen. Sa bann lenstriksyon i la pour protez nou, pour fer sir ki nou kontinyen ganny nou manze spirityel e pour ed nou pour kontinyen anons sa bon nouvel dapre sirkonstans sa landrwa kot nou  ete. Fer ou mye pour obei bann lenstriksyon ki ou gannyen menm si ou pa vreman konpran akoz in ganny donnen. (Zak 3:17) Osi, pa zanmen donn bann lenformasyon konsernan nou bann frer ek ser oubyen konsernan kongregasyon, avek bann ki pa merit konn sa bann lenformasyon.​—Ekle. 3:7.

17. Parey bann zapot dan premye syek, ki nou determinen pour fer?

¹⁷ Enn bann rezon prensipal ki Satan i lager avek pep Bondye i akoz zot pe “rann temwannyaz konsernan Zezi.” (Rev. 12:17) Pa les Satan ek son lemonn fer ou per. Ler nou kontinyen anons sa bon nouvel e ansenny lezot malgre lopozisyon, sa i fer nou zwaye e annan lape lespri. Dan premye syek, ler bann lotorite Zwif ti donn lord bann zapot pour aret anons sa bon nouvel, sa bann zonm fidel ti swazir pour obei Bondye. Zot ti kontinyen fer sa travay predikasyon e sa ti fer zot zwaye. (Akt 5:27-29, 41, 42) Byensir, ler nou travay i anba restriksyon, nou bezwen fer byen atansyon ler nou pe anons sa bon nouvel. (Mat. 10:16) Si nou fer nou mye, nou pou annan sa lape lespri parski nou pou pe fer plezir Zeova e nou pe anons sa mesaz ki sov lavi.

18. Lekel ki kapab donn nou sa vre lape?

¹⁸ Nou kapab asire ki menm pandan bann moman pli difisil nou kapab annan lape lespri. Pandan sa bann moman, nou devret gard antet ki sa lape ki nou bezwen i lape Bondye, setadir sa lape ki zis Zeova ki kapab donnen. Depan lo Zeova ler i annan en lepidemi, en dezas oubyen ler ou ganny persekite. Reste pros avek son lorganizasyon. Konsantre lo sa lavenir merveye ki ou pou annan. Ler ou fer sa, “sa Bondye lape pou avek [ou].” (Fili. 4:9) Dan sa lartik ki swiv, nou pou vwar ki mannyer nou kapab ed nou bann frer ek ser ki pe fer fas avek problenm pour annan lape Bondye.