Eski ou’n lir byen bann Latour Veyer pour sa lannen? Vwar si ou kapab reponn sa bann kestyon swivan:

Ki nou bezwen fer pour nou kapab “sanz [nou] fason panse”? (Rom. 12:2)

Sa i enplik fer plis ki zis bann bon keksoz. Nou bezwen reflesir lo ki kalite dimoun ki nou vreman ete e fer bann sanzman neseser pour ki nou kapab obei bann standar Zeova pli pros ki nou kapab.—w23.01, paz 8-9.

Ki mannyer nou kapab kontinyen rezonn byen anmezir ki nou obzerv sa ki pe arive dan lemonn?

Nou enterese pour vwar ki mannyer sa ki pe arive dan lemonn pe akonpli profesi Labib. Nou pa donn nou lopinyon personnel lo sa ki nou, nou krwar pou arive parski sa i kapab fer divizyon dan kongregasyon. O kontrer, i ti pou byen ki nou bann konversasyon i baze lo bann piblikasyon ki lorganizasyon Zeova in pibliye. (1 Kor. 1:10)—w23.02, paz 16.

Ki mannyer batenm Zezi i diferan avek batenm son bann disip?

Vi ki Zezi ti ne dan en nasyon ki ti’n ganny dedye avek Bondye, i pa ti bezwen dedye son lavi avek Zeova parey nou, nou bezwen fer. Zezi ti en zonm parfe ki pa ti’n zanmen fer pese. I pa ti bezwen repantir pour okenn pese.—w23.03, paz 5.

Ki mannyer nou kapab ankouraz lezot pour reponn pandan renyon?

Nou kapab gard nou larepons kourt parski sa pou permet lezot partisipe. Nou osi kapab evite koz lo plizyer pwen. Sa pou fer ki lezot i annan keksoz pour koz lo la.—w23.04, paz 23.

Ki sa “Semen Sen” ki ganny mansyonnen dan Izai 35:8 pe refer avek?

Premyerman, sa gran semen senbolik pe refer avek sa semen ki bann Zwif ti pran sorti Babilonn pour retourn Zerizalenm. Me ki sa semen pe refer avek dan nou letan? Pour plizyer santenn lannen avan 1919, Zeova ti servi serten zonm pour fer serten travay preparasyon. Par egzanp, sa bann zonm ti tradwir e enprim Labib e zot ti fer lezot travay ankor. Pep Bondye pe kontinyen mars lo sa “Semen Sen,” kot zot pe ador Zeova ansanm dan linite e dan lavenir Rwayonm Bondye pou anmenn bann benediksyon pour later.—w23.05, paz 15-19.

Ki sa de madanm ki Proverb sapit 9 i koz lo la e ki konsey nou gannyen konsernan zot?

Proverb i koz lo “en madanm bet” e lenvitasyon sa madanm i anmenn ver “Latonm.” Tandis ki sa madanm ki pe reprezant “vre lasazes,” son lenvitasyon i anmenn “ver lentelizans” e lavi. (Prov. 9:​1, 6, 13, 18)—w23.06, paz 22-24.

Ki mannyer Zeova ti montre ki i annan limilite e ki i rezonnab dan lafason ki i ti azir anver Lot?

Zeova ti dir Lot kit Sodonm e al dan bann montanny. Ler Lot ti sipliy Zeova pour les li al dan lavil Zoar, Zeova ti les li.—w23.07, paz 21.

Ki en madanm i kapab fer si son msye i get pornografi?

Sa madanm i devret gard antet ki i pa son lafot ki son msye i get pornografi. I devret konsantre lo son lanmitye avek Bondye e medit lo bann resi dan Labib konsernan bann madanm ki ti vreman enkyet e ki ti ganny rekonfor avek Bondye. I kapab osi ed son msye pour evit bann sityasyon kot i kapab ganny tante pour get pornografi.—w23.08, paz 14-17.

Ler dimoun i kestyonn nou konsernan nou krwayans, ki mannyer bon zizman i kapab ed nou pour demontre ladouser?

Nou kapab vwar sa kestyon konman en fason pour konnen ki sa dimoun pe mazinen oubyen kwa ki enportan pour li. Sa pou fer nou pli kapab reponn dan en fason ki demontre ladouser.—w23.09, paz 17.

Ki nou kapab aprann avek legzanp Mari konsernan rod led ki nou bezwen?

Ler Mari ti aprann ki i ti pou vin manman Mesi, Mari ti rod led avek lezot. Lanz Gabriyel ek Elizabet ti servi Lekritir pour ankouraz li. Nou osi nou kapab ganny lafors avek nou bann frer ek ser.—w23.10, paz 15.

Ki mannyer Zeova i kapab reponn nou lapriyer?

Zeova i promet ki i pou ekout nou lapriyer e ki i pou vwar ki mannyer nou lapriyer i relye avek son plan. (Zer. 29:12) I kapab reponn bann lapriyer ki en pe parey dan diferan fason me i pou toultan ed nou.—w23.11, paz 21-22.

Romen 5:2 i koz lo “lespwar,” akoz lespwar i ganny mansyonnen ankor dan verse 4?

Ler en dimoun i tann sa bon nouvel, sa dimoun i kapab konmans annan lespwar ki i pou viv dan en paradi lo later. Me ler i fer fas avek problenm, i andire e i santi ki i annan laprouvasyon Zeova, son lespwar i vin pli reel e i vin pli spesyal pour li.—w23.12, paz 12-13.