1. Ler nou reflesir lo lafwa ki Abraam ti annan, ki kestyon nou kapab demande?

 MENM si en kantite dimoun in tann koz lo Abraam, laplipar zot pa konn bokou keksoz lo li. Me ou, ou konn en kantite lo Abraam. Par egzanp, ou konnen ki Labib i dir ki Abraam i “papa tou sa bann ki annan lafwa.” (Rom. 4:11) Me petet ou kapab demann ou lekor, ‘Eski mon kapab swiv legzanp Abraam e annan menm kalite lafwa ki li i ti annan?’ Wi, ou kapab.

2. Akoz i enportan pour etidye legzanp Abraam? (Zak 2:​22, 23)

² En fason ki nou kapab annan sa menm lafwa ki Abraam ti annan i par etidye son legzanp. Abraam ti toultan fer sa ki Bondye ti demann li pour fer. I ti al reste dan en lot pei lwen avek son lakour e pour plizyer lannen, i ti reste anba latant. I ti pare pour sakrifye son garson Izaak, ki i ti kontan en kantite. Abraam ti fer tou sa bann keksoz parski i ti annan en lafwa for dan Zeova. Sa lafwa ki Abraam ti annan e bann aksyon ki i ti fer, ti fer li ganny laprouvasyon Zeova e vin son zanmi. (Lir Zak 2:​22, 23.) Zeova i anvi ki nou tou, enkli ou, nou ganny son laprouvasyon e vin son zanmi. I pour sa rezon ki i ti enspir Pol ek Zak, sa de ekriven Labib pour koz lo legzanp Abraam. Annou vwar sa ki Romen sapit 4 ek Zak sapit 2 i dir lo Abraam. Sa de sapit i refer avek en keksoz enportan ki ti ganny dir konsernan Abraam.

3. Ki verse Labib ki Pol ek Zak i site?

³ Pol ek Zak ti refer avek Zenez 15:6 ki dir: “[Abraam] ti annan lafwa dan Zeova e pour sa rezon, Bondye ti konsider li konman en dimoun drwat.” Zeova i konsider en dimoun konman drwat e san defo ler Zeova i trouv plezir  dan sa dimoun. I enkrwayab ki Bondye i kapab vwar en imen enparfe ki fer pese konman san defo. Sirman ou anvi Bondye i konsider ou konman en dimoun drwat e i posib pour li vwar ou dan sa fason. Me pour nou konnen ki mannyer nou kapab vin en dimoun drwat, nou bezwen konnen akoz Bondye ti dir ki Abraam ti en dimoun drwat.

4. Kwa ki anpes bann imen otomatikman ganny konsidere konman drwat?

⁴ Dan sa let ki Pol ti ekri pour bann Kretyen dan lavil Ronm, Pol ti dir ki tou dimoun i fer pese. (Rom. 3:23) Alor, ki en dimoun i kapab fer pour li ganny konsidere konman drwat e san defo e ganny laprouvasyon Bondye? Pol ti servi legzanp Abraam pour ed bann Kretyen konn larepons sa kestyon.

5. Akoz Zeova ti dir ki Abraam ti en dimoun drwat? (Romen 4:​2-4)

⁵ Ler Zeova ti dir ki Abraam ti en dimoun drwat, Abraam ti pe reste dan pei Kanaan. Akoz sa letan Zeova ti kapab dir ki Abraam ti en dimoun drwat? Eski i akoz Abraam ti pe obei Lalwa Moiz? Non. Ki mannyer nou konn sa? (Rom. 4:13) Lalwa Moiz ti ganny donnen avek nasyon Izrael plis ki 400 an apre ki Bondye ti dir ki Abraam ti en dimoun drwat. Alor, kwa ki ti fer li posib pour Bondye dir ki Abraam ti en dimoun drwat? Zeova ti demontre labonte ekstraordiner anver Abraam e i ti konsider li konman en dimoun drwat akoz son lafwa.—Lir Romen 4:​2-4.

6. Kwa ki fer Zeova konsider en dimoun konman drwat?

⁶ Pol ti dir ki ler en dimoun i annan lafwa dan Bondye, i son lafwa dan Bondye ki fer li ganny konsidere konman drwat. (Rom. 4:5) Pol ti osi dir: “David osi ti koz lo lazwa ki en dimoun i gannyen ler Bondye i konsider li konman drwat menm si i pa swiv lalwa. I ti dir: ‘Ere sa bann ki zot move aksyon i ganny pardonnen e ki zot pese i ganny kouver, ere sa dimoun ki Zeova pa pran kont son pese ditou.’” (Rom. 4:​6-8; Ps. 32:​1, 2) Bondye i pardonn oubyen kouver pese bann ki met lafwa dan li. I pardonn zot konpletman e i pa pran kont zot pese. Bondye i konsider sa bann dimoun san defo e drwat parski zot annan lafwa dan li.

7. Akoz bann serviter Bondye dan lepase ti kapab ganny konsidere konman drwat?

⁷ Menm si Abraam, David ek lezot serviter fidel Bondye ti ganny konsidere konman bann dimoun drwat, zot ti bann dimoun ki ti fer pese. Me Bondye ti konsider zot konman san defo parski zot ti annan lafwa dan li, sa i lekontrer avek bann ki ti napa lafwa dan li. (Efe. 2:12) Dan let ki Pol ti ekri pour bann Romen, i ti eksplike ki nou bezwen annan lafwa pour nou kapab vin zanmi Bondye. Abraam ek David ti zanmi Bondye parski zot ti annan lafwa dan li. Nou osi nou kapab vin zanmi Bondye si nou annan lafwa dan Bondye.

8-9. Ki serten fo krwayans serten dimoun i annan lo sa parol ki Pol ek Zak ti dir e akoz?

⁸ Pour plizyer santenn lannen, in annan bann deba parmi bann sef relizye konsernan ki mannyer lafwa i relye avek aksyon. Serten pret i ansennyen ki pour nou ganny sove, nou zis bezwen annan lafwa dan Zezi Kri. Petet ou’n tann zot dir “Aksepte Zezi e ou ava ganny sove.” Serten  pret i menm dir ki Pol ti dir ki Bondye i konsider bann dimoun drwat menm si zot pa fer aksyon. (Rom. 4:6) Me i annan lezot ki dir ki ou kapab sov ou lekor par fer bann pelerinaz relizye e par fer bann keksoz ki legliz i demann ou pour fer. Apre petet zot sit Zak 2:24 ki dir: “En dimoun i ganny aprouve konman drwat gras a son aksyon e non pa par son lafwa tousel.”

⁹ Sa bann diferan krwayans i fer serten spesyalis Labib krwar ki Pol ek Zak pa ti tonm dakor konsernan lafwa ek aksyon. Serten pret i kapab dir ki Pol ti krwar ki en dimoun i kapab ganny konsidere konman drwat akoz son lafwa san ki i bezwen fer aksyon. Tandis ki Zak ti ansennyen ki aksyon i vreman enportan pour ou kapab ganny laprouvasyon Bondye. En profeser larelizyon ti dir ki Zak pa ti konpran akoz Pol ti dir ki pour en dimoun kapab ganny konsidere konman drwat i zis bezwen annan lafwa. Me Zeova ki’n enspir Pol ek Zak pour ekri sa ki zot in ekri. (2 Tim. 3:16) Alor i bezwen annan en fason senp pour konpran sa ki zot in dir. Nou bezwen vwar konteks sa bann parol ki zot ti dir.

10. Ki Pol ti pe koz lo la? (Romen 3:​21, 28) (Vwar portre.)

¹⁰ Ki Pol ti pe koz lo la dan Romen 3 ek 4? I ti pe refer avek “lalwa” setadir Lalwa Moiz ki ti ganny donnen lo Montanny Sinai. (Lir Romen 3:​21, 28.) I paret ki dan letan Pol, serten Kretyen ki ti Zwif ti vwar li difisil pour aksepte ki zot nepli anba Lalwa Moiz e ki zot nepli bezwen fer bann keksoz ki Lalwa ti demann zot pour fer. Alor, Pol ti servi legzanp Abraam pour montre ki en dimoun pa ganny konsidere konman drwat zis akoz i  swiv “lalwa.” O kontrer Pol ti eksplike ki sa dimoun i bezwen annan lafwa. Ler nou konn sa, sa i ankouraz nou parski i fer nou annan konfyans ki nou kapab fer plezir Bondye. I osi vedir ki si nou devlop lafwa dan Bondye e Kris, nou kapab ganny laprouvasyon Bondye.

11. Ki “aksyon” Zak ti pe refer avek?

¹¹ De lot kote, bann “aksyon” ki ganny mansyonnen dan Zak sapit 2, i pa bann keksoz ki Lalwa Moiz ti demann bann Zwif pour fer. Zak ti pe refer avek bann aksyon oubyen aktivite ki bann Kretyen i fer dan zot lavi toulezour. Sa bann aksyon i montre si en Kretyen i vreman annan lafwa dan Bondye oubyen non. Annou vwar de legzanp ki Zak ti servi.

12. Ki mannyer Zak ti eksplik lafason ki lafwa ek aksyon i relye avek kanmarad? (Vwar portre.)

¹² Dan sa premye legzanp, Zak ti dir ki en Kretyen pa devret fer lapreferans. Pour montre sa, i ti servi legzanp en zonm ki ti fer lapreferans pour en dimoun ris e i pa ti demontre labonte anver en dimoun pov. Zak ti dir ki en dimoun koumsa i kapab dir ki i annan lafwa me son aksyon i montre ki i napa lafwa. (Zak 2:​1-5, 9) Dan sa dezyenm legzanp, Zak i koz lo en dimoun ki vwar ‘en frer oubyen en ser ki napa lenz ek manze’ me i pa ed zot. Menm si sa dimoun i dir ki i annan lafwa, son aksyon i montre ki i napa lafwa. Parey Zak ti dir, “lafwa tousel, san okenn aksyon, i mor.”—Zak 2:​14-17.

13. Ki mannyer Zak ti montre ki nou bezwen demontre nou lafwa par nou aksyon? (Zak 2:​25, 26)

¹³ Zak ti koz lo Raab pour montre legzanp en dimoun ki ti montre par son aksyon ki i annan lafwa. (Lir Zak 2:​25, 26.) Raab ti’n tann koz lo Zeova e i ti rekonnet  ki Zeova ti pe ed bann Izraelit. (Zoz. 2:​9-11) Son aksyon ti montre ki i annan lafwa parski i ti protez de espyon Izraelit ler zot lavi ti an danze. Sa ti fer ki sa madanm enparfe e ki pa ti en Izraelit ti ganny konsidere konman drwat zis parey Abraam. Son legzanp i montre ki i enportan pour demontre nou lafwa par nou aksyon.

14. Akoz nou kapab dir ki sa ki Pol ek Zak ti dir pa kontredir kanmarad?

¹⁴ Pol ek Zak ti pe eksplik lafwa ek aksyon dan de diferan fason. Pol ti pe dir bann Zwif ki zot pa ti pou zanmen ganny laprouvasyon Bondye zis par fer bann keksoz ki Lalwa Moiz i demann zot pour fer. Zak ti pe dir ki tou Kretyen i bezwen demontre zot lafwa par fer bann bon keksoz pour lezot.

15. Ki serten fason ki nou kapab demontre nou lafwa par nou aksyon? (Vwar portre.)

¹⁵ Zeova pa dir ki nou bezwen fer bann menm keksoz ki Abraam ti fer pour li konsider nou konman drwat. Anfet i annan diferan fason ki nou kapab demontre nou lafwa par nou aksyon. Nou kapab akeyir bann ki nouvo dan kongregasyon, ed bann frer ek ser ki bezwen led e fer bann bon keksoz pour nou fanmir. Tou sa bann keksoz i fer Bondye plezir e Bondye pou beni nou. (Rom. 15:7; 1 Tim. 5:​4, 8; 1 Zan 3:18) Enn bann fason pli enportan ki nou kapab montre ki nou annan lafwa i par anons sa bon nouvel avek devouman. (1 Tim. 4:16) Nou tou nou kapab montre par nou aksyon ki nou annan lafwa ki bann promes Zeova pou vin vre e ki fason fer Zeova i pli meyer. Si nou fer  sa, nou asire ki Bondye pou konsider nou konman drwat e nou pou vin son zanmi.

16. Dan kwa ki Abraam ti annan lespwar ek lafwa?

¹⁶ Romen sapit 4 i koz lo en lot keksoz ki nou kapab aprann avek Abraam. Nou aprann ki i enportan pour nou annan lespwar. Zeova ti promet ki atraver Abraam “en kantite nasyon” ti pou ganny beni. Imazin sa zoli lespwar ki Abraam ti annan. (Zen. 12:3; 15:5; 17:4; Rom. 4:17) Me ler Abraam ti annan 100 an e Sara ti annan 90 an, sa garson ki Zeova ti’n promet zot pa ti ankor ne. Petet i ti paret enposib pour Abraam ek Sara annan en garson. Sa sityasyon ti vreman difisil pour Abraam. Me “Abraam ti annan lespwar ek lafwa ki i ti pou vin papa en kantite nasyon.” (Rom. 4:​18, 19) Avek letan, sa ki Abraam ti pe espere ti vreman arive. Abraam ti vin papa Izaak, sa garson ki i ti pe espere.—Rom. 4:​20-22.

17. Ki mannyer nou konnen ki nou kapab ganny konsidere konman en dimoun drwat e vin zanmi Bondye?

¹⁷ Parey Abraam, nou kapab fer plezir Bondye, ganny konsidere konman en dimoun drwat e vin son zanmi. I sanmenm ki Pol ti refer avek ler i ti dir: “Sa parol ‘Bondye ti konsider li konman en dimoun drwat’ pa ti ganny ekrir zis pour [Abraam], me osi pour nou ki pou ganny konsidere konman drwat, parski nou krwar dan sa Enn ki ti resisit Zezi.” (Rom. 4:​23, 24) Parey Abraam, nou bezwen annan lafwa dan Zeova, fer bann bon aksyon e annan konfyans ki sa ki Zeova in promet pou vin vre. Dan Romen sapit 5, Pol i kontinyen koz lo sa lespwar ki nou annan e i sanmenm ki nou pou vwar dan sa lartik ki swiv.