1. Kwa ki ti fer Abraam annan lespwar ki i pou ganny en garson?

 ZEOVA ti promet son zanmi Abraam ki i ti pou ganny en garson e ki tou nasyon lo later ti pou ganny beni atraver son garson. (Zen. 15:5; 22:18) Vi ki Abraam ti annan lafwa dan Bondye, i ti asire ki sa promes ki Bondye ti’n fer avek li ti pou vin vre. Kantmenm sa, ler Abraam ti annan 100 an e son madanm ti annan 90 an, sa koup fidel pa ti ankor ganny en garson. (Zen. 21:​1-7) Me Labib i dir: “Abraam ti annan lespwar ek lafwa ki i ti pou vin papa en kantite nasyon dapre sa ki i ti’n ganny dir.” (Rom. 4:18) Parey nou konnen, sa ki Abraam ti pe espere ti vin vre. I ti vin papa Izaak, sa garson ki i ti pe espere pour en kantite letan. Akoz Abraam ti asire ki Zeova ti pou gard son promes?

2. Kwa ki ti fer Abraam asire ki promes Zeova pou vin vre?

² Abraam ti annan en bon lanmitye avek Zeova, sa ti fer ki Abraam ti “antyerman konvenki ki sa ki [Bondye] ti’n promet li,” ti pou vin vre. (Rom. 4:21) Zeova ti pran plezir dan Abraam e i ti konsider li konman en dimoun drwat akoz son lafwa. (Zak 2:23) Parey nou lir dan Romen 4:​18, sa lafwa ki Abraam ti annan ti relye avek son lespwar. Aprezan annou vwar sa ki zapot Pol i dir konsernan lespwar dan Romen sapit 5.

3. Ki Pol i dir konsernan lespwar?

³ Zapot Pol i eksplike akoz nou kapab asire ki nou “lespwar pa pou dezapwent nou.” (Rom. 5:5) I osi ed nou konpran ki mannyer nou lespwar i kapab vin pli reel. Anmezir nou egzamin sa ki Pol i dir dan Romen 5:​1-5, mazin lo ou prop leksperyans. Ler ou fer sa, ou pou vwar ki avek letan ou lespwar in vin pli reel. Nou pou osi vwar ki mannyer ou kapab kontinyen fer ou lespwar vin pli reel.  Aprezan annou vwar en lespwar merveye ki Pol i dir pou definitivman vin vre.

4. Kwa ki ganny dir dan Romen 5:​1, 2?

⁴ Lir Romen 5:​1, 2. Pol ti ekri sa bann parol pour kongregasyon Ronm. Bann frer ek ser dan sa kongregasyon ti’n aprann konsernan Zeova ek Zezi, zot ti’n demontre lafwa e zot ti’n vin bann Kretyen. Sa ti fer ki Bondye ti konsider zot “konman drwat akoz [zot] lafwa” e i ti swazir zot avek son lespri sen. Alor, zot ti kapab annan en lespwar merveye e zot ti asire ki zot ti pou ganny sa ki zot ti pe espere.

5. Ki lespwar bann Kretyen swazir i annan?

⁵ Pli tar, Pol ti ekri bann Kretyen swazir dan lavil Efez konsernan sa lespwar ki zot in gannyen. Zot ti pou ganny en “leritaz glorye ki [Bondye in] anmase pour bann sen.” (Efe. 1:18) Pol ti osi dir bann Kolosyen kote zot ti pou ganny zot rekonpans. I ti dir: “Sa lespwar ki’n ganny rezerve pour zot dan lesyel.” (Kol. 1:​4, 5) Alor, sa lespwar ki bann Kretyen swazir i annan, i pour zot ganny resisite pour al viv dan lesyel pour touzour kot zot pou dirize ansanm avek Kris.—1 Tesa. 4:​13-17; Rev. 20:6.

6. Ki en frer ki en Kretyen swazir i dir konsernan son lespwar?

⁶ Bann Kretyen swazir i apresye zot lespwar. En frer ki apel Frederick Franz ki en Kretyen swazir, i dir ki mannyer zot santi konsernan sa lespwar. I ti dir: “Nou asire ki sa ki nou pe espere pou vin vre. Nou tou ki form parti sa 144,000 pou ganny sa ki Bondye in promet nou. Nou rekonpans pou pli gran ki sa ki nou pe imazinen.” An 1991, apre ki Frer Franz ti’n servi Zeova fidelman pour plizyer lannen, i ti dir: “[Nou] ankor apresye nou lespwar en kantite . . . Pli nou espere, pli nou vin pli rekonesan. I en keksoz ki vo lapenn espere menm si  i pran en milyon lannen pour vin vre. Mon apresye sa lespwar ki nou annan plis ki zanmen oparavan.”

7-8. Ki lespwar laplipar serviter Zeova i annan? (Romen 8:​20, 21)

⁷ Laplipar dimoun ki ador Zeova ozordi i annan en lot lespwar. I sa menm lespwar ki Abraam ti annan setadir sa lespwar pour viv pour touzour lo later anba gidans Rwayonm Bondye. (Ebr. 11:​8-10, 13) Pol ti ekri konsernan sa lespwar merveye. (Lir Romen 8:​20, 21.) Ler ou ti fek konn sa promes konsernan lavenir, kwa ki ou ti pli kontan avek sa promes? Eski i lefet ki en zour ou pou vin parfe e ou pou nepli fer pese? Oubyen eski ou ti kontan pour aprann ki bann dimoun ki ou kontan ki’n mor, pou reviv ankor lo en later ki pou’n vin en paradi? Sa lespwar ki Bondye in donn nou, i fer ki ou annan en kantite keksoz merveye ki ou vreman anvi eksperyanse.

⁸ Ki swa nou pou viv pour touzour dan lesyel oubyen lo later, nou annan en lespwar merveye ki donn nou rezon pour zwaye. Sa lespwar ki nou annan i kapab vin pli reel. Sa ki Pol ti ekri apre, i ed nou vwar ki mannyer sa i kapab arive. Annou vwar ki Pol ti ekri konsernan nou lespwar. Ler nou fer sa, sa pou fer nou pli asire ki nou lespwar pou vin pli reel e nou pa pou zanmen dezapwente.

9-10. Dapre sa legzanp ki Pol ti donnen, ki bann Kretyen i ekspekte? (Romen 5:3) (Vwar portre.)

⁹ Lir Romen 5:3. Remarke ki Pol ti dir ki ler nou pas dan leprev, nou lespwar i kapab vin pli reel. Sa i kapab paret drol. Anfet, tou disip Kris pou pas dan leprev. Mazin legzanp Pol. I ti dir bann Kretyen Tesalonik: “Ler nou ti avek zot, nou ti’n fini dir zot davans ki nou ti pou pas dan bann leprev e parey zot konnen, sanmenm sa ki’n arive.” (1 Tesa. 3:4) Pol ti osi dir bann Kretyen Korent: “Nou oule  ki zot konn leprev ki nou’n pas ladan . . . nou pa ti ni menm konnen si nou ti pou sirviv.”—2 Kor. 1:8; 11:​23-27.

¹⁰ Ozordi bann Kretyen i ekspekte ki zot osi zot pou fer fas avek bann difikilte. (2 Tim. 3:12) Me ou, eski ou’n deza ganny persekite akoz ou lafwa dan Zezi e akoz ou’n vin enn son disip? I kapab ki ou bann fanmir ek zanmi in sikann ou. I kapab osi ki zot in tret ou dan en move fason. Eski ou anplwayer oubyen bann koleg travay pa’n tret ou byen akoz ou en dimoun ki onnet? (Ebr. 13:18) Eski ou’n ganny opoze avek bann lotorite akoz ou anons sa bon nouvel avek lezot? Nenport ki kalite difikilte ki nou fer fas avek, Pol i dir ki nou devret zwaye. Akoz?

11. Akoz nou devret determinen pour andir nou bann problenm?

¹¹ Nou kapab zwaye ler nou pas dan difikilte parski nou konnen ki sa i kapab ed nou pour devlop en kalite enportan. Parey Romen 5:3 i dir: “Leprev i ed nou devlop landirans.” Tou Kretyen pou fer fas avek difikilte alor tou Kretyen i bezwen annan landirans. Nou tou nou bezwen determinen pour andir nenport difikilte ki nou kapab fer fas avek. Nou pou ganny sa rekonpans ki nou pe espere si nou andire e kontinyen servi Zeova. Nou pa anvi vin parey bann dimoun ki Zezi ti pe refer avek ler i ti pe koz konsernan bann lagrenn ki ti’n tonm lo ros. O konmansman sa bann dimoun i aksepte Parol Bondye avek lazwa me “ler problenm ek persekisyon i vini,” zot abandonnen. (Mat. 13:​5, 6, 20, 21) I vre ki i pa gou ler nou ganny opoze oubyen ler nou pas dan difikilte me nou ganny bann byenfe ler nou andire e nou kontinyen servi Zeova. Dan ki fason?

12. Ki byenfe nou gannyen ler nou andir nou bann problenm?

¹² Disip Zak i mansyonn bann byenfe ki nou gannyen ler nou andir nou bann difikilte. I ti dir: “Kontinyen andire parski sa pou form zot konpletman, zot pou san defo dan tou laspe e zot pa pou mank nanryen.” (Zak 1:​2-4) Zak i dekri landirans konmsi landirans i annan en travay pour fer. Me ki sa travay? I kapab ed ou pour devlop plis pasyans, pour annan plis lafwa e pour kontinyen depan plis lo Bondye. Ler nou andir bann difikilte ki nou fer fas avek, nou kapab ganny en lot byenfe enportan.

13-14. Ki nou gannyen ler nou andire e ki mannyer sa i relye avek sa lespwar ki nou annan? (Romen 5:4)

¹³ Lir Romen 5:4. Pol i dir ki ler nou annan landirans “nou ganny aprouve konman drwat.” Ler ou andire, sa i fer Zeova plezir. Sa pa vedir ki Zeova i kontan ler i vwar ou pe pas dan difikilte. O kontrer i kontan parski ou pe andire e ou pe reste fidel avek li. I vreman ankourazan pour konnen ki ler nou andire nou fer Zeova plezir.—Ps. 5:12.

¹⁴ Rapel ki Abraam ti fer fas avek diferan problenm e ler i ti andire e reste fidel avek Zeova, sa ti fer Zeova kontan. Zeova ti vin zanmi Abraam e Zeova ti konsider li konman en dimoun drwat. (Zen. 15:6; Rom. 4:​13, 22) Nou osi nou kapab vin parey Abraam. Zeova i pran plezir dan nou pa akoz lakantite travay oubyen responsabilite ki nou annan dan son servis me i pran plezir dan nou ler nou reste fidel avek li menm dan bann sityasyon difisil. Nenport ki laz, sirkonstans  oubyen abilite ki nou annan, nou tou nou kapab andire. Eski ou pe fer fas avek en problenm e ou pe reste fidel avek Zeova? Si wi, rapel ki ou pe fer Zeova plezir. Ler nou realize ki nou pe fer Bondye plezir, nou lespwar pou vin pli reel.

15. Ki Pol i dir ankor e ki mannyer sa i kapab fer serten dimoun konfize?

¹⁵ Parey Pol ti dir, nou fer Zeova plezir ler nou reisi andir nou bann problenm. Remark sa ki Pol i dir apre: “Nou ganny aprouve konman drwat, aprezan sa i fer nou annan lespwar e sa lespwar pa pou dezapwent nou.” (Rom. 5:​4, 5) Sa i kapab fer serten dimoun konfize. Akoz? Parski pli boner dan Romen 5:​2, Pol ti’n dir ki bann Kretyen Ronm ti deza annan en lespwar, setadir sa “lespwar pour ganny laglwar Bondye.” Petet en dimoun i kapab demande, ‘Si sa bann Kretyen i deza annan en lespwar, akoz pli tar Pol i koz ankor lo lespwar?’

16. Ki mannyer lespwar ki en dimoun i annan i kapab grandi? (Vwar portre.)

¹⁶ Pour nou kapab konpran sa ki Pol ti pe dir, nou bezwen gard antet ki lespwar i en keksoz ki kontinyen grandi. Annou pran en legzanp: Eski ou rapel premye fwa ki ou ti aprann konsernan sa lespwar merveye ki dan Parol Bondye? I kapab ki sa letan ou ti mazinen ki sa nide pour viv pour touzour dan en paradi lo later ti enn merveye me ou pa ti asire ki i pou vreman arive. Me apre ki ou’n kontinyen aprann plis lo Zeova ek bann promes ki dan Labib, ou’n vin pli asire ki sa lespwar pou vin vre.

17. Kwa ki pou fer en dimoun kontinyen annan lespwar apre ki in dedye son lavi avek Zeova e batize?

¹⁷ Menm apre ki ou’n dedye ou lavi avek Zeova e ou’n batize, ou’n kontinyen aprann konn Zeova pli byen e devlop plis lanmour pour li. Sa in fer ou lespwar  vin pli reel. (Ebr. 5:13–6:1) I tre probab ki ou’n eksperyans sa ki ganny dir dan Romen 5:​2-4. Ou’n pas dan diferan problenm me ou’n andire e Zeova in montre ki i pran plezir dan ou. Vi ki ou asire ki ou annan laprouvasyon Zeova, ou annan plis rezon pour ekspekte ki ou pou ganny bann keksoz ki i’n promet. Ou lespwar in vin pli reel ki avan. I pli personnel e i annan bokou plis lefe lo ou. I annan en lefe lo tou laspe ou lavi e i sanz lafason ki ou tret ou fanmir, lafason ki ou fer bann desizyon e menm lafason ki ou servi ou letan.

18. Ki garanti Zeova i donnen?

¹⁸ Zapot Pol i osi azout en pwen vreman enportan konsernan sa lespwar ki ou gannyen ler ou’n ganny aprouve konman drwat. I asir ou ki sa ki ou pe espere pou vin vre. Kwa ki fer ou asire? Pol ti mansyonn sa garanti ki Bondye i donnen. I ti dir: “Sa lespwar pa pou dezapwent nou, parski lanmour Bondye in ranpli nou leker gras a lespri sen ki nou’n gannyen.” (Rom. 5:5) Ou annan rezon pour asire ki sa ki ou pe espere pou vin vre.

19. Ki ou kapab asire konsernan ou lespwar?

¹⁹ Reflesir lo sa promes ki Zeova ti fer avek Abraam e lo lafason ki Bondye ti konsider li konman drwat e konman Son zanmi. Abraam ti annan rezon pour annan lespwar. Labib i dir: “Apre ki Abraam ti’n esper avek pasyans, Bondye ti fer sa promes avek li.” (Ebr. 6:15; 11:​9, 18; Rom. 4:​20-22) Abraam pa ti dezapwente. Ou osi ou kapab asire ki si ou reste fidel, ou pou ganny ou rekonpans ki ou pe espere. Ou annan rezon pour zwaye parski ou konnen ki ou lespwar i reel e ou pa pou dezapwente! (Rom. 12:12) Pol ti dir: “Mon priye ki sa Bondye ki donn lespwar i ranpli zot leker avek bokou lazwa ek lape akoz zot annan konfyans dan li e ki lespri sen i ranpli zot leker avek lespwar.”—Rom. 15:13.