1. Ki en frer i bezwen fer pour li reisi?

 LERWA David ti dir Salomon: “Reste for e montre ki ou en zonm.” (1 Rwa. 2:​1-3) Sa konsey i enportan pour tou bann frer dan kongregasyon. Pour zot reisi, zot bezwen aprann pour obei bann lalwa Bondye e aplik bann prensip Labib dan tou sa ki zot fer. (Lik 2:52) Akoz i vreman enportan pour bann zenn frer vin bann Kretyen matir?

2-3. Akoz i enportan pour en zenn frer vin en Kretyen matir?

² En frer i annan en kantite responsabilite enportan dan son fanmir e dan kongregasyon. Zenn frer, san dout ou’n mazin lo bann responsabilite ki ou kapab annan dan lavenir. Petet ou annan sa lobzektif pour vin en serviter a plen tan, en serviter kongregasyon e pli tar en ansyen dan kongregasyon. I kapab ki ou osi anvi marye e annan zanfan. (Efe. 6:4; 1 Tim. 3:1) Pour ou kapab atenn sa bann lobzektif e reisi, ou bezwen vin en Kretyen matir. b

³ Kwa ki kapab ed ou vin en Kretyen matir? I annan bann abilite enportan ki ou bezwen devlope. Alor ki ou kapab fer la konmela pour ed ou prepare pour bann responsabilite ki ou kapab annan dan lavenir e pour ou reisi?

4. Kote ou kapab trouv bann bon legzanp pour ou swiv? (Vwar portre.)

⁴ Swazir bann bon legzanp pour ou swiv. Dan Labib, i annan en kantite bon legzanp ki bann zenn frer i kapab swiv. Sa bann zonm dan letan Labib ti kontan Bondye e zot ti pran swen avek son pep dan plizyer fason. Ou osi kapab trouv legzanp bann frer matir dan ou fanmir e dan ou kongregasyon. (Ebr. 13:7) Osi, ou kapab swiv legzanp parfe ki  Zezi Kri in kite. (1 Pyer 2:21) Anmezir ki ou etidye sa bann legzanp, reflesir lo zot bann bon kalite. (Ebr. 12:​1, 2) Apre sa, deside ki mannyer ou pou swiv legzanp sa bann zonm.

5. Ki mannyer ou kapab devlop abilite pour reflesi e akoz i enportan pour fer sa? (Psonm 119:9)

⁵ Devlop “abilite pour reflesi” e gard li. (Prov. 3:21) En zonm ki’n devlop abilite pour reflesi, i pa azir deswit me i pran letan pour reflesir avan i fer en desizyon. Alor fer zefor pour devlop sa abilite e pour gard sa abilite. Akoz? Parski dan lemonn, i annan en kantite zenn garson ki fer bann desizyon baze lo zot prop nide oubyen ki azir dapre zot lemosyon. (Prov. 7:7; 29:11) Osi, bann progranm televizyon, film, Enternet ek rezo sosyal i kapab annan en lefe lo ou fason panse e lo lafason ki ou azir. Me ki mannyer ou kapab devlop abilite pour reflesi? Premyerman, aprann bann prensip ki dan Labib e reflesir lo rezon akoz sa bann prensip i bon pour ou. Apre servi sa bann prensip pour ed ou fer bann desizyon ki pou fer Zeova plezir. (Lir Psonm 119:9.) Si ou devlop sa abilite enportan, sa pou ed ou vin en frer matir. (Prov. 2:​11, 12; Ebr. 5:14) Aprezan, annou vwar lafason ki abilite pour reflesi pou ed ou dan de sityasyon. Sa i: (1) lafason ki ou konport ou avek bann ser e (2) ler ou pe fer bann desizyon konsernan ou laparans.

6. Ki mannyer ler en zenn frer in devlop abilite pour reflesi, sa pou ed li demontre respe anver bann ser?

⁶ Ler ou’n devlop abilite pour reflesi, sa pou ed ou demontre respe anver bann madanm. Par egzanp, en zenn frer i kapab anvi aprann konn en ser pli byen. Sa i en keksoz normal e i napa nanryen mal avek sa. Me en frer ki’n devlop abilite pour reflesi pa pou dir, ekri oubyen fer okenn keksoz ki pou donn lenpresyon ki i enterese avek sa ser, si i pa pe mazin marye avek sa ser. (1 Tim. 5:​1, 2) Osi si i pe pwente avek en ser, i pou protez repitasyon sa ser par fer sir ki i pa zanmen tousel avek sa ser san ki i annan en dimoun avek zot.—1 Kor. 6:18.

7. Ki mannyer ler en zenn frer in devlop abilite pour reflesi, sa pou ed li ler i pe fer bann desizyon konsernan son laparans?

 ⁷ En lot fason ki en zenn frer i kapab montre ki in devlop abilite pour reflesi, i par fer bann bon desizyon konsernan son laparans. Laplipar dimoun ki fer e promot bann nouvo stil sanze, i bann dimoun ki napa respe pour Zeova e ki viv en lavi imoral. Sa i fer ki lenz bann msye i kole oubyen i fer en msye paret konman en madanm. Alor ler en zenn frer ki pe fer zefor pour vin en Kretyen matir pe swazir ki lenz i pou mete, i pou les li ganny gide par bann prensip ki dan Labib e i pou swiv bon legzanp bann frer ki dan kongregasyon. I kapab demann son lekor: ‘Eski bann swa ki mon fer i montre ki mon rezonnab e ki mon pran an konsiderasyon santiman lezot? Eski mon fason sanze i fer li fasil pour lezot idantifye mwan konman en serviter Bondye?’ (1 Kor. 10:​31-33; Tit 2:6) Ler en zenn frer in devlop abilite pour reflesi, sa pou fer ki bann frer ek ser e son Papa ki dan lesyel pou apresye li.

8. Ki mannyer en zenn frer i kapab vin en dimoun ki diny konfyans?

⁸ Vin en dimoun ki diny konfyans. En zenn frer ki diny konfyans, i travay dir pour desarz tou son bann responsabilite. (Lik 16:10) Annou vwar legzanp parfe ki Zezi in kite. I ti toultan fer byen atansyon sa ki i ti fer e i ti en dimoun responsab. I ti osi fer tou sa ki Zeova ti demann li pour fer, menm ler i ti difisil pour li. I ti kontan lezot, sirtou son bann disip e i ti pare pour donn son lavi pour zot. (Zan 13:1) Parey Zezi, travay dir pour desarz nenport responsabilite ki ou gannyen. Si ou pa asire ki mannyer pour desarz en responsabilite, demontre limilite e demann bann frer matir pour ed ou. Pa bezwen fer pares e fer mwens ki sa ki neseser. (Rom. 12:11) O kontrer, fini sa ki ou’n ganny donnen pour fer e fer li “pour Zeova e non pa pour zonm.” (Kol. 3:23) Byensir, ou pou fer fot. Alor rekonnet ou limit e admet bann fot ki ou fer.—Prov. 11:2.

9. Akoz en zenn frer i bezwen devlop bann abilite ki itil?

⁹ Pour ou kapab vin en frer matir, ou bezwen devlop bann abilite ki itil. Sa bann abilite pou ed ou desarz bann responsabilite dan kongregasyon, ganny en travay pour pran swen avek ou lekor oubyen en fanmir e pour ou kapab annan bann bon lanmitye avek lezot. Annou vwar serten sa bann abilite.

10-11. Ler en zenn frer i konn lir e ekri byen, ki byenfe sa i anmennen pour li e pour bann frer ek ser dan kongregasyon? (Psonm 1:​1-3) (Vwar portre.)

¹⁰ Aprann pour lir e ekri byen. Labib i dir ki en msye ki pran letan pour lir Parol Bondye toulezour e medit lo la, i ere e i reisi. (Lir Psonm 1:​1-3.) Ler i lir Labib  toulezour, i pou konn fason panse Zeova e sa pou ed li reflesir e rezonn pli byen. (Prov. 1:​3, 4) Kongregasyon i bezwen bann frer koumsa. Akoz?

¹¹ Nou bann frer ek ser i bezwen led bann frer ki kapab ansenny zot e donn zot bann konsey ki sorti dan Labib. (Tit 1:9) Alor si ou kapab lir e ekri byen, ou pou kapab prepar bann diskour ek larepons ki pou ankouraz lezot e ed zot ranforsi zot lafwa. Osi, ler ou etidye e ler ou ekout bann diskour dan kongregasyon e dan lasanble, ou pou kapab pran bann not. Sa bann not pou ed ou fer ou lafwa vin pli for e pour ankouraz lezot.

12. Kwa ki pou ed ou pour kominik byen?

¹² Aprann pour kominik byen. En frer i bezwen aprann pour kominik byen. En frer ki kominik byen, i pare pour ekout lopinyon lezot e i konpran zot santiman. (Prov. 20:5) I kapab aprann pour konpran ton lavwa en dimoun, lekspresyon lo son figir ek son konportman. Ou pa pou kapab aprann fer sa bann keksoz si ou pa pas letan avek lezot dimoun. Si ou toultan pe servi lekipman elektronik pour kominike, par egzanp pour anvoy email e anvoy mesaz, sa i kapab fer li pli difisil pour ou kominik avek dimoun fas a fas. Alor, esey rod loportinite pour koz avek lezot an personn.—2 Zan 12.

13. Kwa ankor ki en zenn frer i bezwen aprann? (1 Timote 5:8) (Vwar portre.)

¹³ Aprann pour siport ou lekor finansyerman. En frer matir i bezwen kapab finansyerman siport son lekor ek son fanmir. (Lir 1 Timote 5:8.) Dan serten pei, bann zenn frer i kapab aprann en metye avek zot papa oubyen en lot manm fanmir. Dan lezot pei, en zenn garson i kapab aprann en metye ler i dan segonder. Nenport sityasyon ki ou ladan, i ti pou byen pour ou aprann en abilite ki pou ed ou ganny en travay. (Akt 18:​2, 3; 20:34; Efe. 4:28) Annan repitasyon konman en dimoun ki travay dir e fer sir ki ou konplet okenn travay ki ou ganny donnen. Si ou fer sa, i tre probab ki ou pou kapab ganny en travay e gard sa travay. Bann kalite ek abilite ki nou’n koz lo la i osi enportan pour en frer kapab desarz bann responsabilite ki i kapab annan dan lavenir. Annou vwar serten sa bann responsabilite.

14. Ki mannyer en zenn frer i kapab prepar li pour vin en serviter a plen tan?

¹⁴ Serviter a plen tan. En kantite frer matir in konmans servi Zeova a plen tan  ler zot ti ankor byen zenn. En zenn frer ki fer pionye i aprann ki mannyer pour travay avek dimoun ki annan diferan personnalite. I osi ed li pour aprann ki mannyer pour servi byen son larzan e pour pa depans plis ki sa ki i annan. (Fili. 4:​11-13) En bon fason pour konmans servis a plen tan i pour fer pionye asistan. En kantite frer i fer pionye asistan pour en pe letan e sa i ed zot pour prepare pour fer pionye ordiner. Ler zot fer pionye, sa i donn zot loportinite pour fer lezot form servis a plen tan, par egzanp pour servi lo en proze konstriksyon ki pour lorganizasyon Temwen Zeova oubyen servi konman en Betelit.

15-16. Ki mannyer en zenn frer i kapab kalifye pour servi dan kongregasyon?

¹⁵ Serviter kongregasyon oubyen ansyen. Tou frer i devret annan sa lobzektif pour kalifye pour vin ansyen pour zot kapab ede dan kongregasyon. Labib i dir ki bann frer ki pe fer zefor pour kalifye pour vin ansyen, i “anvi fer en bon travay.” (1 Tim. 3:1) Me avan en frer i servi konman en ansyen, i bezwen kalifye pour servi konman serviter kongregasyon. Bann serviter kongregasyon i ed bann ansyen dan diferan fason. Avek limilite, bann ansyen ek serviter kongregasyon i servi bann frer ek ser e zot anons sa bon nouvel avek devouman. Bann zenn frer i kapab kalifye pour servi konman serviter kongregasyon menm ler zot ankor adolesan. Osi en serviter kongregasyon ki byen kalifye e ki ankor dan son bann 20 an, i kapab ganny apwente konman ansyen.

¹⁶ Ki mannyer ou kapab kalifye pour servi konman serviter kongregasyon e pli tar ansyen? Dan Labib, i annan en lalis bann kalite ki ou bezwen devlope. Sa bann kalite i baze lo bann prensip Labib e lo ou lanmour pour Zeova, ou fanmir ek bann frer ek ser. (1 Tim. 3:​1-13; Tit 1:​6-9; 1 Pyer 5:​2, 3) Fer zefor pour konpran sak sa bann kalite. Priy Zeova e demann li pour ed ou kalifye. c

17. Ki mannyer en zenn frer i kapab prepare pour ler i marye e vin en sef fanmir? (Vwar portre.)

¹⁷ Marye e vin en sef fanmir. Zezi ti dir ki i annan serten frer matir ki reste selibater. (Mat. 19:12) Me si ou swazir pour marye, ou pou annan plis responsabilite konman en msye marye e en sef fanmir. (1 Kor. 11:3) Zeova i anvi ki en msye i kontan  son madanm e i pran swen avek li materyelman, i vin en bon zanmi pour son madanm e i ed son madanm pour kontinyen reste pros avek Zeova. (Efe. 5:​28, 29) Bann kalite ek abilite ki nou’n koz lo la dan sa lartik, parey devlop abilite pour reflesi, annan respe pour bann madanm e vin en dimoun ki diny konfyans, pou ed ou vin en bon konzwen. Ou pou pare pour desarz ou responsabilite konman en msye marye e en sef fanmir.

18. Ki mannyer en zenn frer i kapab prepar li pour vin en papa?

¹⁸ Papa. Apre ki ou’n marye, i kapab ki ou vin en papa. Ki ou kapab aprann avek Zeova konsernan vin en bon papa? Ou kapab aprann en kantite keksoz. (Efe. 6:4) Zeova ti dir son Garson, Zezi, ki i kontan li e ki Zezi i fer li plezir. (Mat. 3:17) Si ou vin en papa, fer sir ki regilyerman ou dir ou zanfan ki ou kontan zot. Felisit zot souvan pour bann bon keksoz ki zot fer. Bann papa ki swiv legzanp Zeova i ed zot zanfan pour vin bann Kretyen matir. Depi la konmela, ou kapab prepar ou pour sa rol konman papa par demontre lanmour e pran swen avek ou fanmir e avek bann frer ek ser dan kongregasyon. Ou osi kapab dir zot ki ou kontan zot e ki ou apresye zot. (Zan 15:9) Si ou prepare depi la konmela, sa pou ed ou dan lavenir si ou deside pour marye e vin en papa. Me antretan, ou pou presye pour Zeova e ou pou en gran led pour ou fanmir e pour bann frer ek ser dan kongregasyon.

19-20. Kwa ki pou ed en zenn frer vin en Kretyen matir? (Vwar portre lo kouvertir.)

¹⁹ Zenn frer, ou pou bezwen fer zefor pour vin en frer matir parski sa pa pou vin otomatikman. Ou bezwen swazir bann bon legzanp ki ou kapab swiv, devlop abilite pour reflesi, vin en dimoun ki diny konfyans, devlop bann abilite ki itil e prepar ou pour bann responsabilite ki ou kapab annan dan lavenir.

²⁰ Ler ou mazin bann sanzman ki ou bezwen fer, i kapab ki ou santi ki i tro difisil pour fer. Me ou kapab fer sa bann sanzman. Rapel ki Zeova i vreman anvi ed ou. (Iza. 41:​10, 13) Ou kapab asire ki ou bann frer ek ser dan kongregasyon pou osi ed ou. Ler ou vin en Kretyen matir, ou pou ere. Zenn frer, nou kontan ou! Ki Zeova i beni ou anmezir ki ou fer zefor la konmela pour vin en frer matir.—Prov. 22:4.