1. Ki mannyer en kantite dimoun i santi konsernan viv pour touzour?

 EN KANTITE dimoun i vey sa ki zot manze e zot esey fer legzersis regilyerman pour zot kapab reste an bonn sante. Me zot pa ekspekte ki zot pou viv pour touzour. Petet zot krwar ki i pa fer sans pour viv pour touzour e zot pa ni menm anvi viv pour touzour parski lavyeyes i vin avek en kantite problenm. Me Zezi ti dir ki i posib pour bann imen ganny “lavi eternel” parey i dir dan Zan 3:16 ek 5:24.

2. Ki Zan sapit 6 i dir konsernan lavi eternel? (Zan 6:39, 40)

² En zour, Zezi ti fer en mirak e i ti donn dipen ek pwason plizyer milye dimoun. a Sa mirak ti enpresyonan me sa ki Zezi ti dir son lannmen ti pli enpresyonan ankor. Sa lafoul ti’n swiv Zezi ziska Kapernaoum pros o bor Lanmer Galile e ler zot ti laba, Zezi ti dir zot ki bann dimoun ki’n mor ti pou kapab resisite e ganny lavi eternel. (Lir Zan 6:39, 40.) Imazinen ki sa pou vedir pour ou bann fanmir ek zanmi ki’n mor. Me sa ki Zezi ti dir dan bann lezot verse dan Zan sapit 6 ti difisil pour en kantite dimoun konpran e i ankor difisil pour en kantite konpran ozordi. Annou vwar sa ki Zezi ti dir.

3. Ki Zezi ti dir dan Zan 6:51 konsernan son lekor?

³ Sa mirak ki Zezi ti fer pour donn dipen ti fer sa lafoul Kapernaoum mazin sa lamann ki Zeova ti donn zot zanset ler zot ti dan dezer. Anfet, Labib i apel lamann “dipen sorti dan lesyel.” (Ps. 105:40; Zan 6:31) Apre sa, Zezi ti servi serten keksoz ki sa bann dimoun ti konnen konsernan lamann pour ansenny zot en keksoz vreman  enportan. Menm si lamann ti en kado sorti kot Zeova, bann ki ti manz lamann ti mor pli tar. (Zan 6:49) Me Zezi ti dir ki li i “sa vre dipen ki sorti dan lesyel,” “[sa] dipen Bondye” ek “sa dipen lavi.” (Zan 6:32, 33, 35) Zezi ti eksplike ki i ti annan en diferans ant li ek sa lamann ki Bondye ti donn pep Izrael. I ti dir: “Mwan menm sa dipen ki donn lavi ki sorti dan lesyel. Sa ki manz sa dipen pou viv pour touzour.” (Lir Zan 6:51.) Sa ti fer bann Zwif konfize. Zot pa ti konpran akoz Zezi ti dir ki i “sa dipen” ki sorti dan lesyel e ki sa dipen i pli meyer ki sa lamann ki Bondye ti’n donn zot zanset. Apre Zezi ti dir zot en keksoz ki ti pou ed zot konpran sa ki i ti’n dir. I ti dir: “Sa dipen ki mon pou donnen . . . i mon laser.” Ki Zezi ti pe esey dir? I enportan pour konpran sa ki Zezi ti pe esey dir parski sa pou ed nou konpran kwa ki fer li posib pour nou ek bann dimoun ki nou kontan, viv pour touzour. Annou vwar ki Zezi ti pe esey dir.

SA DIPEN KI DONN LAVI EK SON LASER

4. Akoz serten ti soke avek sa ki Zezi ti dir?

⁴ Ler Zezi ti dir ki “sa dipen ki [i] pou donnen pour ki lemonn i viv, i [son] laser,” sa ti sok serten dimoun ki ti pe ekout li. Petet zot ti krwar ki Zezi ti anvi donn zot son laser pour zot manze. (Zan 6:52) Apre sa, Zezi ti dir zot en keksoz ki petet ti sok zot plis ankor. I ti dir: “Si zot pa manz laser Garson zonm e bwar son disan, zot pa pou ganny lavi.”—Zan 6:53.

5. Akoz nou kapab asire ki Zezi pa ti pe dir ki dimoun ti pou bezwen bwar sa disan ki dan son lavenn?

⁵ Dan letan Noe, Bondye ti donn lord bann imen pour pa manz disan. (Zen. 9:3, 4) Pli tar Zeova ti osi donn lord bann Izraelit pour pa manz disan. Okenn dimoun ki ti manz disan ti pou “ganny met amor.” (Lev. 7:27) Zezi ti ansenny bann Zwif pour obeir tou Lalwa ki Bondye ti’n donn zot. (Mat. 5:17-19) Alor i pa ti pou zanmen demann bann Zwif pour manz son lekor fizik oubyen pour bwar sa disan ki dan son lavenn. Menm si sa parol ti en pe drol, Zezi ti anvi ansenny sa bann dimoun ki mannyer pour ganny “lavi eternel.”—Zan 6:54.

6. Ki mannyer nou konnen ki Zezi ti pe servi en legzanp ler i ti koz konsernan manz son laser e bwar son disan?

⁶ Ki Zezi ti pe esey dir? I kler ki Zezi ti pe servi en legzanp ler i ti pe koz avek sa lafoul dimoun, zis parey i ti fer ler i ti koz avek sa madanm Samariten. I ti dir sa madanm: “Sa ki bwar sa delo ki mon pou donn li pa pou zanmen swaf ankor, me sa delo ki mon pou donn li pou vin parey en sours delo dan li ki kontinyen koule pour donn lavi eternel.” (Zan 4:7, 14) b Zezi pa ti pe dir ki sa madanm Samariten ti pou ganny lavi eternel zis par bwar delo dan en pwi spesifik. Dan menm fason, i pa ti pe dir ki sa lafoul ki i ti koz avek Kapernaoum ti pou viv pour touzour si zot ti manz son lekor fizik e bwar sa disan ki dan son lavenn.

 EN LOT LOKAZYON KI ZEZI TI DIR EN KEKSOZ EN PE PAREY

7. Ki serten dimoun i dir konsernan sa ki Zezi ti dir dan Zan 6:53?

⁷ Serten dimoun i dir ki dan Zan 6:53, Zezi i eksplike ki dimoun ti pou bezwen fer pandan Repa Senyer parski ler Zezi ti entrodwir Repa Senyer, i ti servi bann mo en pe parey. (Mat. 26:26-28) Zot dir ki tou dimoun ki asiste Repa Senyer i devret manz sa dipen e bwar sa diven ki ganny pase. Eski keksoz i devret ganny fer koumsa? I enportan ki nou konn larepons sa kestyon parski tou le lannen plizyer milyon dimoun partou dan lemonn i zwenn ansanm pour sa levennman. Nou pou vwar bann diferans ki i annan ant sa ki Zezi ti dir dan Zan 6:53 e sa ki i ti dir pandan Repa Senyer.

8. Ki diferans i annan ant sa de levennman? (Vwar portre.)

⁸ Annou vwar de diferans ki i annan ant sa de lokasyon. Premyerman, kan e kote Zezi ti dir sa parol ki dan Zan 6:53-56? I ti dir sa parol avek en lafoul Zwif ler i ti Galile lannen 32. Sa ti apepre enn an avan ki i ti entrodwir Repa Senyer ler i ti Zerizalenm. Dezyenmman, avek lekel Zezi ti pe koze? Laplipar dimoun ki ti ekout Zezi ler i ti Galile ti pli enterese avek ganny manze olye aprann konsernan Zeova oubyen Rwayonm  Bondye. (Zan 6:26) Anfet, ler Zezi ti dir en keksoz ki zot ti vwar li difisil pour zot konpran, zot ti aret annan lafwa dan li. Menm serten son bann disip ti aret swiv li. (Zan 6:14, 36, 42, 60, 64, 66) Konpar sa ki ti arive Galile avek sa ki ti arive ler Zezi ti entrodwir Repa Senyer enn an pli tar, lannen 33. Sa zour, 11 parmi son bann zapot ti la avek li menm si zot pa ti vreman konpran tou sa ki i ti pe ansennyen. Me son bann zapot fidel pa ti parey bann dimoun Galile parski zot ti asire ki Zezi ti Garson Bondye ki ti’n vini sorti dan lesyel. (Mat. 16:16) Zezi ti felisit zot e dir: “Zot sa bann ki’n toultan la avek mwan dan mon bann leprev.” (Lik 22:28) Atraver zis sa de diferans dan Zan 6:53, nou vwar ki Zezi pa ti pe esey eksplike ki ti pou arive pandan Repa Senyer. Me i annan lezot diferans ant sa de levennman.

KI SA KI ZEZI TI DIR I VEDIR POUR OU?

9. Sa parol ki Zezi ti dir pandan Repa Senyer i aplik pour lekel?

⁹ Pandan Repa Senyer, Zezi ti partaz dipen san lelven avek son bann zapot e i ti dir zot ki sa i reprezant son lekor. Apre sa, i ti pas en lakoup diven pour zot bwar e i ti dir ki sa diven i reprezant “disan lalyans.” (Mark 14:22-25; Lik 22:20; 1 Kor. 11:24) Sa ki Zezi ti dir konsernan sa lalyans i vreman enportan. Sa nouvo lalyans pa ganny fer avek bann imen an zeneral me i ganny fer zis avek “pep Izrael,” setadir Izrael spirityel ki pou “dan Rwayonm Bondye.” (Ebr. 8:6, 10; 9:15) Sa letan bann zapot pa ti konpran tou keksoz konsernan sa lalyans. Me pa bokou letan apre, zot ti ganny swazir par lespri sen e form parti sa nouvo lalyans ki fer zot annan en plas dan lesyel ansanm avek Zezi.—Zan 14:2, 3.

10. Ki en lot diferans i annan ant sa ki Zezi ti dir Galile ek sa ki i ti dir pandan Repa Senyer? (Vwar portre.)

¹⁰ Remarke ki sa ki Zezi ti dir pandan Repa Senyer ti aplik pour sa “pti troupo.” Bann premye dimoun ki ti form parti sa group ti son bann zapot ki ti avek li sa zour swar. (Lik 12:32) Sa zour swar, Zezi ti demann zot pour manz sa dipen e bwar sa diven. Lezot ki ti pou form parti sa group pli tar, ti pou bezwen manz sa dipen e bwar sa diven ler zot selebre Repa Senyer. Zot sa bann ki pou ganny en plas dan lesyel ansanm avek Zezi. Sa ki Zezi ti dir son bann zapot pandan Repa Senyer i diferan avek sa ki i ti dir avek sa lafoul Galile. Sa ki Zezi ti dir pandan Repa Senyer i aplik zis pour en pti group dimoun. Tandis ki sa ki Zezi ti dir ler i ti Galile i aplik pour en pli gran group dimoun.

11. Ki Zezi ti dir ler i ti Galile ki montre ki i pa ti pe refer avek en pti group dimoun?

¹¹ Ler Zezi ti Galile lannen 32, laplipar dimoun ki i ti koz avek ti anvi ki i donn zot manze. Me Zezi ti esey fer zot konpran ki i annan en keksoz ki pli enportan ki manze. Sa keksoz ti kapab donn zot lavi eternel. Zezi ti osi dir ki bann dimoun ki’n mor pou ganny resisite dernyen zour e zot pou kapab viv pour touzour zot osi. Zezi pa ti pe refer avek en pti group dimoun parey i ti fer pli tar pandan Repa Senyer. O kontrer  ler i ti Galile i ti koz lo en benediksyon ki tou dimoun ti pou kapab gannyen. I pour sa rezon ki i ti dir: “Sa ki manz sa dipen pou viv pour touzour . . . sa dipen ki mon pou donnen pour ki lemonn i viv, i mon laser.”—Zan 6:51.

12. Ki nou bezwen fer pour ganny lavi eternel?

¹² Zezi pa ti dir bann Zwif Galile ki tou dimoun ki’n deza viv oubyen ki pou ne ki pou ganny sa benediksyon. Zis bann ki “manz sa dipen,” setadir ki demontre lafwa dan Zezi ki pou ganny sa benediksyon. En kantite Kretyen ozordi i krwar ki zot pou ganny sove si zis zot krwar dan Zezi e zot dir ki i zot sover. (Zan 6:29) Me i annan en kantite dimoun Galile ki o konmansman ti annan lafwa dan Zezi me apre zot ti aret krwar dan li. Akoz?

13. Ki bann vre disip Zezi i bezwen fer?

¹³ Laplipar dimoun dan sa lafoul ki Zezi ti donn manze, ti pe swiv Zezi tan ki zot ti pe ganny sa ki zot ti anvi. Zot ti anvi ki Zezi i geri zot, i donn zot manze e dir zot bann keksoz ki zot ti anvi tande. Me Zezi ti montre ki son bann vre disip ti pou bezwen fer plis ki sa. Zezi ti fer kler ki i pa’n vin lo later zis pour donn zot sa ki zot bezwen. I’n osi vin lo later pour ansenny zot sa ki zot bezwen fer pour vin son bann vre disip. Zot ti bezwen “vin kot” li setadir zot ti bezwen aksepte e obeir tou sa ki i ti ansennyen.—Zan 5:40; 6:44.

14. Ki nou bezwen fer pour ganny byenfe avek disan ek laser Zezi?

¹⁴ Zezi ti ansenny sa lafoul ki par sakrifye  son laser ek son disan, sa ti pou fer li posib pour zot viv pour touzour. Alor zot ti pou bezwen annan lafwa dan sa ki Zezi ti dir. I ti enportan pour sa bann Zwif annan sa kalite lafwa e i enportan pour nou osi. (Zan 6:40) Alor, sa ki Zezi ti dir dan Zan 6:53 i montre ki nou bezwen annan lafwa dan sa ranson pour nou kapab ganny lavi eternel. Sa benediksyon i posib pour en kantite dimoun.—Efe. 1:7.

15-16. Ki keksoz enportan nou aprann dan Zan sapit 6?

¹⁵ Dan Zan sapit 6, nou’n aprann en kantite keksoz ki vreman enportan e ankourazan pour nou tou. Nou’n aprann ki Zezi i vreman kontan dimoun. Ler i ti Galile, i ti geri bann ki ti malad, i ti ansenny zot konsernan Rwayonm e i ti fer sir ki zot annan manze. (Lik 9:11; Zan 6:2, 11, 12) Pli enportan, i ti ansenny zot ki i “sa dipen lavi.”—Zan 6:35, 48.

¹⁶ Bann ki Zezi ti dir i form parti “lezot mouton” pa devret manz sa dipen e bwar sa diven ki ganny pase pandan Repa Senyer. (Zan 10:16) Me kantmenm sa, zot osi zot ganny bann byenfe atraver laser ek disan Zezi Kri. Zot ganny sa bann byenfe ler zot demontre lafwa dan sakrifis Zezi e dan bann bon keksoz ki zot pou gannyen akoz sa sakrifis. (Zan 6:53) De lot kote, bann ki devret manz sa dipen e bwar sa diven, i montre ki zot form parti sa nouvo lalyans e zot annan lespwar pour dirize dan Rwayonm Bondye ki dan lesyel. Alor, ki swa nou en Kretyen swazir oubyen nou form parti lezot mouton, i vreman enportan ki nou etidye sa resi dan Zan sapit 6. Sa resi i montre nou ki i vreman enportan ki nou demontre lafwa dan sa ranson pour nou kapab ganny lavi eternel.