Mon ti ne an 1927 dan en pti lavil o bor Chicago, Illinois, Leta-z-ini Lanmerik. Mon manman ek mon papa ti annan senk zanfan. Sa i Jetha, Don, mwan, Karl, ek Joy. Nou tou nou ti determinen pour servi Zeova avek tou nou leker. An 1943, Jetha ti asiste dezyenm laklas Lekol Gilead. An 1944, Don ti al Betel, Brooklyn, New York, an 1947, Karl ti ale li osi e apre Joy ti ale an 1951. Zot bon legzanp e osi legzanp mon paran ti ankouraz mwan pour fer plis dan servis Zeova.

Mon manman ek mon papa ti kontan lir Labib e zot ti kontan Bondye en kantite. Zot ti ansenny nou pour kontan Bondye nou osi. Me mon papa ti aret annan konfyans dan bann legliz apre ki i ti’n servi konman en larme Lerop dan Premye Lager Mondyal. Mon manman ki ti vreman rekonesan ki mon papa ti’n retourn dan lakour vivan apre lager, ti dir li: “Karl, annou al legliz parey nou ti abitye fer.” Mon papa ti reponn: “Mon ava al avek ou ziska laba me mon pa pou antre anndan.” Manman ti demann li: “Akoz non?” I ti reponn: “Pandan lager, bann sef relizye ki sorti dan menm larelizyon ti pe beni bann solda ki ti pe al lager avek kanmarad! Lekel ki Bondye ti pe siporte?”

Pli tar, ler manman ti kot legliz, de Temwen Zeova ti vin kot nou lakaz. Zot ti ofer mon papa sa de liv ki apel Light, ki ti pe koz lo liv Revelasyon. Mon papa ti enterese e i ti aksepte pour pran sa bann liv. Ler mon manman ti vwar sa bann liv, i ti konmans lir zot. Apre sa, en zour i ti vwar en lenvitasyon dan en zournal pour nenport dimoun ki enterese pour etidye Labib dan liv Light. I ti deside pour ale. Ler i ti ariv dan sa landrwa, en madanm ki pli aze ki li ti ouver laport. Mon manman ti montre li enn sa bann liv e demann li: “Eski ou pe etidye sa liv isi?” Sa madanm ti reponn: “Wi mon ker, ou kapab antre.” Son semenn answit, manman ti anmenn son bann zanfan avek li e apre sa nou ti kontinyen ale tou le semenn.

Pandan en renyon, sa kondikter ti demann mwan pour lir Psonm 144:15, ki dir ki bann dimoun ki ador Zeova i ere. Mon ti vreman kontan sa verse ek de lezot verse. Sa i 1 Timote 1:11 ki dir ki Zeova i “sa Bondye ki ere” e Efezyen 5:1 ki demann  nou pour “swiv legzanp [Bondye].” Mon ti realize ki mon devret pran plezir dan sa ki mon kapab fer pour mon Kreater e remersye li pour sa privilez ki mon’n gannyen pour servi li. Sa i de keksoz ki mon’n esey fer tou dilon mon lavi.

Sa kongregasyon pli pros avek nou ti an Chicago e i ti en zistans 32 kilomet. Kantmenm sa nou ti asiste renyon laba e mon ti kontinyen ganny plis konnesans Labib. Mon rapel en zour sa frer ki ti pe kondwir renyon ti donn Jetha sans pour reponn. Ler mon ti ekout Jetha, mon ti mazinen: ‘Mon ti konnen sa larepons. Mon ti’n kapab lev mon lanmen pour reponn.’ Mon ti konmans prepar mon bann larepons e reponn pandan renyon. Pli enportan i ki mwan ek mon bann frer ek ser ti pe fer progre spirityelman e an 1941, mon ti batize.

Mon rapel byen sa lasanble ki ti ganny fer an 1942 Cleveland, Ohio. Nou fanmir ti reste dan bann latant ansanm avek lezot fanmir o bor kot lasanble ti pe ganny fer. I ti osi annan bann frer ek ser dan plis ki 50 lezot lavil dan Leta-z-ini ki ti pe swiv sa lasanble par telefonn. Dezyenm Lager Mondyal ti ankor pe fer ravaz e Temwen Zeova ti pe ganny persekite plis. Dan aswar, mon ti vwar bann frer pe park zot transpor dan en fason ki lalimyer transpor pa ti kler kot nou ti pe reste. Zot ti’n aranze antre zot pour ki dan sak loto i annan en dimoun ki veye pandan lannwit. Si i ti annan en problenm, bann frer ki ti pe veye ti pou alim zot lalimyer pour kas lizye sa ki pe vin atak nou e zot ti pou osi ornen. Sa ti pou alert lezot pour zot vin ede. Mon ti mazinen ki pep Zeova i byen organize dan tou keksoz. I napa nanryen mal ki ti arive e vi ki mon ti santi mwan an sekirite, mon ti kapab dormi byen.

Ler mon mazin sa lasanble, plizyer lannen apre, mon realize ki mon manman pa ti zanmen enkyet oubyen per. I ti met tou son konfyans dan Zeova e osi dan son lorganizasyon. Mon pa pou zanmen oubliy son zoli legzanp.

Pa bokou letan avan sa lasanble, manman ti vin pionye ordiner. Alor i ti port byen latansyon lo bann diskour konsernan servis a plen tan. Ler nou ti pe retourn dan lakour i ti dir: “Mon ti pou kontan kontinyen fer pionye me mon pa pou kapab fer sa e an menm tan pran swen avek nou lakour.” Apre i ti demann nou si nou ti ava kontan ed li. Nou ti dir wi. Alor i ti donn nou sakenn enn oubyen de lasanm pour netwaye avan brekfas. Ler nou ti’n fini kit lakour pour al lekol, i ti verifye si lakaz i prop e apre sa i ti al predikasyon. I ti en madanm vreman okipe me i pa ti zanmen negliz son bann zanfan. Ler nou ti retourn kot lakour pour dezennen e apre lekol, manman ti toultan la pour nou. Parfwa apre lekol nou ti al dan predikasyon avek li e sa ti ed nou pour konpran sa travay ki bann pionye i fer.

Ler mon ti annan 16 an, mon ti konmans fer pionye. Menm si mon papa pa ti ankor vin en Temwen Zeova, i ti kontan demann mwan ki mannyer mon pe pase dan mon servis. En zour swar mon ti dir li ki malgre tou mon zefor dan predikasyon, mon pa ankor zwenn en dimoun ki enterese pour etidye Labib. Apre en pti pe letan, mon ti demann li: “Eski ou ti pou kontan mon fer letid avek ou?” I ti reflesir  lo la pour en pti moman e apre i ti dakor. Alor mon papa ti vin mon premye etidyan Labib. Sa ti en keksoz spesyal pour mwan!

Nou ti fer letid dan sa liv “The Truth Shall Make You Free.” Anmezir ki nou ti fer letid, mon ti realize ki mon papa ti pe ed mwan pour amelyor lafason ki mon etidye Labib e pour vin en pli bon ansenyan. Par egzanp, en zour swar apre ki nou ti’n fini lir en paragraf, i ti dir: “Mon konpran sa ki sa liv pe dir. Me ki mannyer ou konnen ki sa ki dan sa liv i vre?” Mon pa ti’n prepar mwan pour sa kalite kestyon. Alor mon ti dir: “Mon pa pou kapab montre ou laprev la konmela me dan prosen letid mon ava donn ou en larepons.” I sanmenm ki mon ti fer. Mon ti vwar bann verse ki siport sa ki nou ti pe diskite. Apre sa mon ti aprann pour fer resers pour prepar mwan pli byen pour nou letid. Sa ti ed mwan pour vin en pli bon etidyan Labib e ti ed mon papa osi. I ti aplik sa ki i ti pe aprann e an 1952, i ti batize.

Ler mon ti annan 17 an, mon ti kit lakour. Jetha a ti’n vin en misyonner e Don ti’n vin en Betelit. Zot tou le de zot ti kontan zot servis e sa ti ankouraz mwan en kantite. Alor mon ti fer laplikasyon pour Betel e osi pour Lekol Gilead e mon ti les tou keksoz dan lanmen Zeova. Ki ti arive apre? An 1946, mon ti ganny envite pour servi dan Betel.

Pandan plizyer lannen mon ti ganny diferan responsabilite dan Betel. Alor mon ti kapab aprann en kantite nouvo keksoz. I annan 75 an depi ki mon pe servi dan Betel e pandan sa letan mon’n aprann ki mannyer pour ede fer bann liv e ki mannyer pour fer kontabilite. Mon’n osi aprann ki mannyer pour enport keksoz ki nou ti bezwen dan Betel e ki mannyer pour anvoy keksoz dan lezot landrwa. Me pli enportan ankor, mon apresye tou sa bann keksoz spirityel ki mon aprann dan Betel atraver ladorasyon bomaten ek lezot progranm spirityel.

Mon ti osi aprann avek mon pli pti frer Karl ki ti vin Betel an 1947. I ti en bon etidyan ek ansenyan Labib. En fwa mon ti rod son led pour prepar en diskour ki mon ti’n gannyen pour fer. Mon ti eksplik Karl ki mon ti annan en kantite lenformasyon me mon pa ti konnen ki mannyer pour servi sa bann lenformasyon. I ti ed mwan vwar solisyon atraver zis en kestyon. I ti demann mwan: “Joel, ki tenm ou diskour?” Deswit mon ti konpran li. Mon ti bezwen zis servi sa lenformasyon ki eksplik tenm sa diskour e pa enkli lezot lenformasyon. Mon pa ti zanmen oubliy sa ki mon ti aprann sa zour.

 Pour nou trouv lazwa dan nou servis Betel, nou bezwen donn nou meyer dan sa travay predikasyon. Si nou fer sa, nou pou ganny bann leksperyans ankourazan. En leksperyans ki mon rapel byen ti arive en zour swar Bronx, New York City. Mwan avek en lot frer nou ti al vizit en madanm ki ti’n deza aksepte magazin The Watchtower ek Awake! Nou ti entrodwir nou lekor e dir: “Ozordi swar nou pe ed dimoun pour aprann bann keksoz ankourazan dan Labib.” I ti reponn: “Si i annan pour fer avek Labib zot kapab antre.” Nou ti lir e diskit lo plizyer verse Labib konsernan Rwayonm Bondye ek sa nouvo lemonn. Sa ti enpresyonn li parski son semenn answit i ti envit serten son bann zanmi pour vin ekoute zot osi. Pli tar sa madanm ansanm avek son msye ti vin bann serviter fidel Zeova.

Mon ti deside pour marye e 10 an apre ki mon ti’n fer sa desizyon, mon ti zwenn mon madanm. Kwa ki ti ed mwan pour trouv en bon madanm? Mon ti priy Zeova e mon ti mazin lo sa ki mon ti anvi fer apre ki nou’n marye.

Apre sa lasanble ki ti ganny fer Yankee Stadium an 1953, mon ti zwenn en ser ki apel Mary Aniol. I ti dan dezyenm laklas lekol Gilead ansanm avek mon ser Jetha e zot ti servi konman bann misyonner ansanm dan menm landrwa. Avek bokou lantouzyazm, Mary ti koz avek mwan konsernan son travay konman misyonner dan Karaib e bann letid labib ki in kondwir pandan plizyer lannen. Anmezir ki nou ti aprann konn kanmarad pli byen, nou ti realize ki nou ti annan menm lobzektif. Nou lanmour pour kanmarad ti vin pli for e nou ti marye Avril 1955. Mary ti montre dan diferan fason ki i en kado sorti kot Zeova e ki i en legzanp pour swiv. Nenport ki responsabilite ki Mary ti gannyen i ti fer li avek lazwa. I ti travay dir, i ti demontre lentere senser dan lezot e i ti toultan met Rwayonm Bondye premye dan son lavi. (Mat. 6:33) Mon ti servi konman sirveyan rezyonal ansanm avek Mary pandan trwa-z-an e an 1958 nou ti ganny envite pour al servi dan Betel konman en koup.

Mon ti aprann en kantite avek Mary. Par egzanp, apre ki nou ti’n marye nou ti deside pour lir Labib ansanm e nou ti lir apepre 15 verse sak fwa ki nou ti lir Labib. Apre ki enn ti’n lir en seksyon, nou ti fer komanter lo sa bann verse ki in lir e nou ti diskit lo ki mannyer nou kapab aplik sa ki nou’n lir dan nou lavi. Mary ti souvan rakont mwan bann keksoz ki in aprann dan lekol Gilead oubyen ler i ti misyonner. Sa ki mon ti aprann avek Mary ti ed mwan pour amelyor mon bann diskour e pour konnen ki mannyer pour ankouraz bann ser.—Prov. 25:11.

Mary ti mor an 2013. Me mon pe esper avek pasyans ler mon pou revwar li dan nouvo lemonn. Antretan mon determinen pour kontinyen aprann e pour met konfyans dan Zeova avek tou mon leker. (Prov. 3:5, 6) Mon ganny rekonforte e mon dan lazwa ler mon mazin lo sa ki pep Zeova pou fer dan nouvo lemonn. Sa pou sirman enkli aprann bann nouvo keksoz avek e lo nou Gran Ansenyan. Wi, mon pa pou zanmen kapab fini remersye Zeova pour tou sa ki in ansenny mwan ziska la e pour lafason ki in demontre son labonte ekstraordiner anver mwan.